UFuba na kamukanda ka ‘Myanda i mu Eyi dy’Efile Mukulu’—Bwa kubanga mwisambo na muntu
1. Nkiina mudimo kinyi kipya kyatudi bapete bwa bulungudi?
1 Bible a Les Saintes Écritures—Traduction du monde nouveau abadi bakituule e na kipindji kya kumbangilo ki na mutwe wa mwanda awamba shi “Myanda i mu Eyi dy’Efile Mukulu.” Mushindo kinyi watudi balombeene kufuba na kino kina mudimo kipya nsaa ya twilumbuula bwa kubanga mwisambo na muntu mu bulungudi? Byabya kino kipindji kii na ma verse e muushi mwa mitwe ya myanda ilekeelelekeene ya mu Bible, ngifwaneene na bi mu mukanda wa Comment raisonner, nkalombeene kwikala buuwa bukile bwa kubanga mwisambo na bantu.
2. Mushindo kinyi watudi balombeene kufubisha kamukanda ka “Myanda i mu Eyi dy’Efile Mukulu” mu bulungudi?
2 We mulombeene kufuba na kulonko lwa 8 na wambe shi: “Tukwete kutembela bantu booso bwa kapindji kapeela mwanda bantu bebungi bakwete kwiyipusha shi: ‘Efile Mukulu ndjo kwete kukyengyesha bantu su?’ [Mu angi ma teritware, bii na muulo kulesha muntu otembela lukonko.] Mweneno oobe enaminyi? [Mutadile aluule.] Bible aluula lwalwa lukonko kalolo.” Badikayi musango umune mu Bible na kwisambila verse umune sunga ibungi ya ku yaaya yabadi baleeshe muushi. Su yawa muntu balesha lukalo, nwi balombeene kumulesha yooso konko 20 i mu kaaka kamukanda na kumuteka bwashi asangule lumune lwanudi balombeene kutaluula mususa aufiki. Sunga shi nwibalombeene kumulekyela umune wa ku mikanda yeetu ya kulonga aupatuula myanda ibungi pabitale lwalwa lukonko lubanukatuka mu kutaluula.
3. Mushindo kinyi watudi balombeene kufuba na kamukanda ka “Myanda i mu Eyi dy’Efile Mukulu” bwa kubanga mwisambo na bantu bash’abakumina lulangwilo lwa beena Kidishitu?
3 Lukonko lwa 4, lwa 13 mpa na ku lwa 17 ngilombeene kukwasha ngofu nsaa y’anulambukisha mu ma teritware mwi bantu bash’abakumina lulangwilo lwa beena Kidishitu. Bu kileshesho, nwi balombeene kufuba na myanda i mu lukonko lwa 17 na nwambe shi: “Tukwete kumona bantu mu minite ipeela bwa kwisamba nabo myanda ilombeene kutwesha muloo mu bifuko. We mulombeene kukumiina shi bifuko bikwete kufumankana na nkalakasho ikile bungi lelo uno? [Mutadiile aluule.] Balume na bakashi bebungi mbapete bino bishima bya kinangu bibakwashe ngofu: “Mukashi naamu aneemekye mulunda aaye.” [Twe na lukalo lwa kuleesha shi bino abituukila mu Beena-Efeeze 5:33 nya. Su okwete kulungula mwana mukashi, we mulombeene kuteemuna bishima bi mu Beena-Efeeze 5:28.] Omono shi kutumikila kwa ano mayele nkulombeene kukwasha mu dibaka su?
4. Nkinyi kyoodi mulombeene kukita ku nfudiilo kwa mwisambo wenu na muntu sh’akumiina lulangwilo lwa beena Kidishitu?
4 Ku nfudiilo kwa mwisambo wenu, ata mpàngo ya kutungunuka na mwisambo ungi musuusa. Pangi we mulombeene kwata mpàngo ya kwisambila pabitale umune a ku angi maverse a mu lwalwa lukonko lubofubu nalo. Ingi nsaa, uukisha yawa muntu shi kiukilo kyanukwete kwiabisheena naye nkya mu Bible. Muyiile mwisambo wenu wa kumpala na mweneno a muntu pabitale Bible, mupe mukanda omono shi ngulombeene kumukwasha.—Tala kashibo ke mu Mudimo wetu wa Bubumu wa mweshi w’ekumi na wa Kabidi 2013.