Mushindo wa kufuba na bintu byabadi bakobole nka penda mayi
1. Kukasha mikanda ifundibwe, twi na kingi kintu kinyi kikwete kwitukwasha?
1 Bantu bebungi abakuminaa kufuba na jw.org bwa kubadika myanda ibuwa na mayi a bya binyibinyi. (Mul. 12:10) Byabya, we mufube namu na mayi a bintu bikobole bi mwanka su? Bino abikwasha bwa kupusha myanda ibungi i mu site eetu a Internet. Aa mayi akobole e kwitukwasha naminyi?
2. Mbikunyi byatudi balombeene kufuba na mayi akobole bwa kwilongyela sunga bwa kulonga kwa mu kifuko?
2 Bwa kwilongyela sunga bwa kulonga kwa mu kifuko: Kupusha mayi akobole a mu Bible, ma jurnale, sunga mikanda nsaa yatukwete kutambuka sunga y’atukitshi ingi mifubo mbilombeene kwitukwasha bwa kufuba kalolo na nsaa yeetu. (Ef. 5:15, 16) Twi bya kukumbasha myanda ilekeenelekeene mu lulangwilo lwetu lwa mu kifuko nsaa y’atuteemesha kubadika twalondeshanga pamune mu mukanda wetu watudi nao. Kuteemesha mayi abadi bakobole nsaa y’atwilongyela akukwasha bikishekishe su atukyebe kulumbuula mbadikilo eetu sunga kulonga lungi ludimi.
3. Bantu kinyi be mu teritware eetu balombeene kupeta bukwashi bwa mayi akobole?
3 Bwa bulungudi: Bantu ba mu teritware eetu abamono shi ta be na nsaa ya kubadika mbalombeene kukumiina kuteemesha mayi akobole. Sunga shi twi balombeene kufumankana na bantu abakula lungi ludimi balombeene kukumiina kwituteemesha su abapusha mukandu wa Bufumu “mw’edimi dyaabo.” (Bik. 2:6-8) Mu angi ma mbalo, kuteemesha kwi na muulo mu bipikwa bya kwabo. Bu kileshesho, mu kipikwa kya beena Hmong, bantu bakulu abalondelaa bana bakinga bibaadi nshalelo aabo kala, na mbalombeene kulamiina kalolo myanda y’abadi bebalondele. Mu bipikwa bibungi bya mu Afrike bantu abakuminaa kulonga ku bukwashi bwa kwibalondela myanda.
4. Nkonko kinyi ayitungu shi twiyipushe pabitadile kukwasha kwa bantu be mu teritware eetu?
4 Mu teritware eenu, kupushisha muntu mayi abadi bakobole mu ludimi lwaye mbilombeene kumukwasha su? Su twatumina muntu mayi akobole mu mesage mbilombeene kumukwasha su? Twi balombeene kwata ku Internet mayi akobole a mukanda kampanda mu CD na kumupa muntu baleesha lukalo, pangi nkumupa pamune na wawa mukanda unabeene su? Kyooso ky’atupa muntu mu mudimo wa bulungudi kyatudi baate ku Internet bu mukanda, broshire, jurnale sunga trakte twi balombeene kwikifunda mu rapore ya bulungudi. Mayi akobole mbeatuushe bwashi tutumikye nayo mu kwilongyela kwa pa bupenka na bwa kukuna mbyo ya bya binyibinyi bya Bufumu.—1 Kod. 3:6.