Ino nsenga ayikafudila su?

Pangi ouku abiakula Bible bua nfudilo a ino nsenga. (1 Yowano 2:17) Bino abilesha’shi ta kuikala dingi bantu pa nsenga su? Pa nsenga tapakekala dingi bia kuikala na muwa, su ayikabutudibua yoso?

LUALULO LUA BIBLE KU INO NKONKO YOSO LUI’SHI: NYA!

Nkinyi kish’akikashimina?

BANTU

Akiamba Bible: Efile Mukulu ‘ta mupangie [nsenga] bua’shi ikale bisumanga ooo. Beyikitshine’shi bantu bemushale’.—YEESHAYA 45:18, EEM.

Eshiba dia mema diabadi befunyishe kui miengie na mutamba.

NSENGA

Akiamba Bible: “Kipungo akyende, kingi akifiki, nsenga naamu ayiikala-panka bwa looso.”—MULUNGUDI 1:4.

KIABIKIEBE KUAMBA: Muyile abilesha Bible, nsenga tayikabutudibua nya, ayikekala’nka ishadibue na bantu. Biabia, nfudilo ya nsenga ayilesha kinyi?

TALA UNO MUANDA: Bible apuandikisha nfudilo ayifiki ya ino nsenga na ya mu mafuku a Nowa. Mu aa mafuku nsenga ibadi ‘iwule na myanda ya buntomboshi.’ (Kibangilo 6:13, EEM) Anka, Nowa badi muntu mululame. Biabia, Efile Mukulu badi mukaluile Nowa na kifuko kiaye, kadi nkubutula bantu be bubi ku mpeshi a kabutu. Muyile bibakitshikile mu aa mafuku, Bible akula’shi: “Nsenga ya aa mafuku yibalwishiishwe, paayo kwiyina mu meema.” (2 Mpyeele 3:6, Kilombeno kipya 2014) Biabia nyi bibadi bu nfudilo a nsenga mu aa mafuku. Kadi nkinyi kibabadi babutule? Nta nsenga nya, kadi mbantu bebubi babadi pa nsenga. Biabia, apakula Bible bua nfudilo ya nsenga, t’esambilaa bua kuluishibua kua nsenga ayo inabene nya. Kadi esambilaa kubutudibua kua bantu be bubi be pa nsenga na ndumbuluilo abo.

Nkinyi akikashimina?

NKALAKASHI NA BUNTOMBOSHI

Akiamba Bible: ‘Kapindji n’aka, taakwikala mubi dimo; okataluula mbalo ibaadi, tweyimono kintu. Beeyishe naamu, abakapyaana nsenga, abakasangela butaale bw’eyondo.’—MISAMBO 37:10, 11.

Bifuatulo bisangie: 1. Ba ngifi abatuku mu magazin na bintu bibabaibi na mbeyanyine bilamba ku mpala. 2. Muana mulume apa ungi muana mulume ka kibuta kaule makuta.

KIABIKIEBE KUAMBA: Mpeshi a kabutu a mu mafuku a Nowa tabadi mukatushe buntomboshi boso musango umune nya. Kunyima kua Mpeshi a kabutu, bantu be bubi bababangile dingi kukiengiesha bantu. Mu mafuku apela’mu, Efile Mukulu akakatusha buntomboshi. Nka bu bibambile mufundi a misambo’shi: “Taakwikala mubi dimo.” Efile Mukulu akapudisha buntomboshi boso ku bukuashi bua Bufumu buaye—mbulamatadi e muiyilu akakunkusha bantu balulame mu nsenga ishima.

TALA UNO MUANDA: Bantu bakuete kukunkusha nsenga binobino abakakuatshishena Bufumu bu’Efile Mukulu su? Bible alesha’shi t’abakebukuatshishena nya. Anka, abakatombokiela Bufumu bu’Efile Mukulu. (Misambo 2:2) Abikatuusha bipeta kinyi? Bufumu bu’Efile Mukulu abukapiana mafumu oso a bana ba bantu na “abushaala looso.” (Ndanyele 2:44) Kadi buakinyi abitungu’shi mafumu a bana ba bantu abutudibue?

KIATUTENGIELA—Nfudilo a mafumu a bana ba bantu

Akiamba Bible: “[Muntu] t’e na su nkipaso kyadya kuludika matabula ê muishinda di buwa.”—YEELEMIYA 10:23, EMM.

Bantu abakidila pepi na kimano kiwule na ma foto a bena politike abakitshi kampanye.

KIABIKIEBE KUAMBA: Bantu tababadi bapangibue buabadia kuikunkusha abo banabene nya. Ta mbalombene kobesha kukunkusha bangi bantu na kupua nkalakashi yabo.

TALA UNO MUANDA: Ungi mukanda wa Britannica Academic awamba’shi mbulamatadi ya bana ba bantu tayi na bukome bua kupua mianda ayikalakasha bantu bu: “Bulanda, nsala, bipupa, masaku aatukila ku bipangua, ngoshi sunga ingi mianda ya buntomboshi.” Awamba dingi’shi: “Bangi . . . abakumina’shi nka mbulamatadi akukunkusha nsenga ishima nyi mulombene kupudisha ino nkalakashi.” Anka, sunga biekala’shi mbulamatadi yoso ya bana ba bantu aifubu mu buumune, nsenga aitungunuka’nka na kukunkushibua na bantu bakutue kupuidika, bashi na ngobesha ya kupudisha nkalakashi yoso yatudi batemune kunundu. Bufumu bu’Efile Mukulu nyi penda mbulamatadi umune e na ngobesha ya kupudisha nkalakashi yoso i mu nsenga ishima bua loso.

Biabia muyile Bible, bantu be buwa tabe na kia kutshina nfudilo ya nsenga, sunga ya uno ndumbuluilo e bubi. Anka, nyi mmuanda wabatengiela, ku muanda ino nsenga iluile abakeyipiana kui nsenga ipia ibuwa y’Efile Mukulu!