“Nfudiilo”​—Ayipushisha kinyi?

Nsaa yokwete kupusha abakula shi: “Nfudiilo tayidi peepi!” nkinyi akikufwilaa mu binangu? Opwandikishaa bu mulambukishi kampanda alambukisha kumpala kwete kusama na kwinyuunya, mukwate Bible ku maasa? Sunga shi, opwandikisha bu muntu mununu e na myefu mwimane ku bukunkula bwa museese, mufwale musapi wanye mooshi mu kifuka, mukwate kitundwilo kyabadi bafunde mukandu w’efuku dya kiimu su? Apanangusheena bantu myanda i byabya, bangi be kupusha bu wibatale, bangi namu be kwela mpaka na kumona bu mwanda wa bisumanga.

Bible akula’shi: “Nfudiilo ayikafiki.” (Mateo 24:14, Kilombeno kipya 2009) Uno mwanda umune abewitamina dingi bu “efuku dikata dy’Efile Mukulu” na bu “Harmagedone.” (Bifumbulwe 16:14, 16) Eyendo, bipwilo bibungi bikwete kutwesha kapatakanyi bwa uno mwanda, na kulongyesha myanda ayikwatshisha moo, na ish’ayipushika kalolo. Sunga mbyabya, Bible kwete kupatuula myanda kalolo pabitale nfudiilo—aleesha kyayipushisha na kyayish’ayipushisha. Eyi dy’Efile Mukulu aditukwasha dingi bwa kumona kalolo su nfudiilo tayidi peepi. Na mwanda wi na muulo, aditulongyesha kya kukita bwa kupanda! Binobino, tubande kutaluula myanda ya madimi yabakulaa pabitale nfudiilo na kukimba kyayipatuula. Muyiile Bible “nfudiilo” ayipushisha kinyi?

NFUDIILO TAYILEESHA

1. KABUTU KA NSENGA MWILUNGU DYA KAALO.

   Bible akula shi: “[Efile Mukulu] boshimikile nsenga pa bibangilo byâyo, ta kwi akikeisânyisha mafuku oso mpâ na kwikalayika.” (Misambo 104:5, EEM) Uno verse na ingi ayitushinkamisha shi Efile Mukulu takabutula nsenga sunga kutadiila beyilwishe—efuku su ndimune!—Mulungudi 1:4; Yeeshaya 45:18.

2. NFUDIILO TAYILEESHA MWANDA WA KUPWANDIKISHA, USHI N’EFUKU NYA.

   Bible etulungula shi nfudiilo mbeyilumbuule—Efile Mukulu mmulumbuule nsaa yayikafiki. Akula shi: “Anka pa bitale dyadya efuku, sunga nsaa, takwi muntu su ngumune e na kyukilo kyabyo, sunga bamwikeyiilu be mwiyilu, sunga ngwinyi mwana, anka Yaaya. Dimukayi, pasukayi na tekayi, mwanda tanuwuku kyakya kipindji pakifiki nya.” (Maako 13:32, 33, Kilombeno kipya 2009) Abimweneka patooka shi Efile Mukulu (Yaaya) mmulumbuule “kipindji” sunga nsaa ilombane yakafwisha nfudiilo.

3. NFUDIILO TABEYIFWISHA KWI BANTU SUNGA KWI BINTU ABIPULUKA MWIYILU NYA.

   Nkinyi akikafwisha nfudiilo? Mukanda wa Bifumbulwe 19:11 awakula shi: “Namwene eyilu dishitukye: kubaadi nfwalasa tooka, mumukaamine abamwitamina bu sha kishima na bu binyibinyi.” Verse 19 atungunuka na kwakula shi: “namwene nyema, milopwe ya pa nsenga na bilwilo byayo, bebungye bwa kulwa ngoshi na sha-nfwalasa na kilwilo kyaye.” (Bifumbulwe 19:11-21) Sunga, bishima bibungi pano bi mu ngakwilo a mu kifwanyi, twi bya kushinkamisha bukidibukidi shi: Efile Mukulu akatumu kilwilo kyaye kya ba mwikeyilu bwa kubutula beshikwanyi naaye.

NFUDIILO AYILEESHA

1. NFUNDIILO A MAFUMU A BANTU AKUTWE KAPU.

   Bible amba shi: “Efile Mukulu e mwiilu akatûlu bungi bufumu, bushyabukalwishibwa. Bwabwa bufumu t’abukapono mu mâsa mwa ungi mwilo, ooo. Abukafingakasha na kufudîsha mafumu oso abebubadidîle. Anka pend’abo, nyi abukekadidîla ikalaika.” (Danyele 2:44, EEM) Anka bu byabaleesha mu ka mwanda 3, akukyebe kwikala kabutu ka “milopwe ya pa nsenga na bilwilo byayo,” abakekala “bebungye bwa kulwa ngoshi na sha-nfwalasa na kilwilo kyaye.”—Bifumbulwe 19:19.

2. NFUDIILO A NGOSHI, BUNTOMBOSHI, NA KUKUTWA KWA KULULAMA.

   “[Efile Mukulu] ayimika ngoshi nyaa na kufudiile nsenga.” (Misambo 46:9) “Bantu balulame [abakashaala] pa nsenga, bantu bapwidikye abepashaala, kadi bantu babi abakatuutshibwa pa nsenga na bashii na bululame abebapaasula panka.” (Myeele 2:21, 22) “Talayi! Nayikasha bintu byooso bipya.”—Bifumbulwe 21:4, 5.

3. NFUDIILO A BIPWILO ABIDIMBIILA EFILE MUKULU NA KUDIMBA BANTU.

   ‘Batemuki abatemuka myanda ya madimi, batshite mwakwidi abakunkusha bantu muîle mw’abakyebela. . . . Ank’anwe [apakafika nfudîlo] anukakitshi naminyi?’ (Yeelemiya 5:31, EEM) “Bebungi abangamba dyadya efuku shi: ‘Mwanaana, Mwanaana, tomono mwishina dyoobe mmubaatudi batemukile? Mwishina dyoobe mmubaatudi babingye bikudi bibi? Mwishina dyoobe mmubaatudi bakitshiine bipaso bibungi?’ Paapa nebalungula shi: ‘kashaa, ntaneenwiuku’mi; katukayi kwandi, anwe bankitshishi’a bubi.’”—Mateo 7:21-23.

4. NFUDIILO YA BANTU ABAKWATSHISHEENA UNO NDUMBULWILO A MYANDA.

   Yesu Kidishitu bambile shi: “Dingi kiimu ki bino: etaata dibafikile pano, bantu namu nkusangula mufito kumpala kw’etaata, mwanda bikitshino byabo bi bubi.” (Yowano 3:19) Bible apatuula kabutu ka kumpala ka nsenga ishima ka mu mafuku a Nowa muntu sha lulamato. Akula shi: “Bintu bya pa nsenga bya mu kyakya kipungo bibayinyinwe kwi mweshi wa meema. Bw’eyilu na nsenga bya binobino, dyadya eyi dimune ndibilamine kaalo, dyebilama bw’efuku dya kiimu na dya kushimina kwa bantu babi.”—2 Mpyeele 3:5-7.

Lamiina shi “efuku dya kiimu na dya kushimina” mbedipwandikishe na kabutu ka “mu mafuku a Nowa.” Mbintu kinyi bibaadi bilwishibwe? Nsenga inabeene ibaadi ishale; anka “bantu babi”—beshikwanyi n’Efile Mukulu—ngi babaadi bashimine mu “efuku dya kiimu.” Mu “efuku dya kiimu” di kumpala baaba booso basangule bwa kwikala beshikwanyi n’Efile Mukulu abakabutudiibwa. Anka bakuuku b’Efile Mukulu abakapashiibwa nka bibapandile Nowa na kifuko kyaye.—Mateo 24:37-42.

Banda kwela binangu abikalongama nsenga kunyima kw’Efile Mukulu kubutula bantu be bubi! Eyendo, mwanda wi mu Bible pabitale nfudiilo nyi mukandu wibuwa ta ngubi nya. Na dingi, we kwiyipusha shi: ‘Bible etulungula nsaa ayikafiki nfudiilo? Tayidi peepi su? Ne kupanda ku yaaya nfudiilo naminyi?’