Mukanda wa Kibafumbwilwe: Aupushisha kinyi koodi lelo uno?

1-2. Nkabingilo kinyi kamune kalombene kuitutakula mu kutuula binangu bietu ku mukanda wa Kibafumbwilwe?

T’ABABAKUITANYINE bua kubandila albume a ma foto a muntu ouuku su? Anka nsaa y’obandila ma foto, bomono mapala a bantu be bungi bosh’ouuku. Anka foto imune ibakaka binangu biobe. Buakinyi? Muanda we mu yaya foto. Anka nsaa y’obandila yaya foto, otompo kunangushena nsaa ibaabadi bakukuate yanka na mbalo ibaabadi bakukuatshile. Na dingi, okimbi bia kutundula muntu ooso e mu yaya foto. Yaya foto imune ibekala na muulo ukata koodi.

² Mukanda wa Kibafumbwilwe wi bu yaya foto. Buakinyi? Bua tubingilo tubidi tukata. Ka kumpala, uno mukanda wa mu Bible mbetufundile wanka. Mu verse a kumpala atubadika’shi: “Kibafumbwilwe kia Yesu Kidishitu, kibamupeele Efile Mukulu bwa kuleesha bapika baaye bintu abituungu kufika binobino.” (Kibaf. 1:1) Biabia, ino mianda yabadi bafunde mu uno mukanda ta mbafundile bantu booso mu kibungi nya. Anka mbetufundile atue bafubi b’Efile Mukulu belambule. Pa muanda wa’shi tui muilo w’Efile Mukulu, ta tui balombene kukaanya nsaa yatusangana’shi, tu kuete kukuatshishena kulombana kua ano matemuki atusangana mu uno mukanda aukaanyisha wa Kibafumbwilwe. Ku lungi lupese, atuimono atue banabene “mu ino foto.”

3-4. Muyile mukanda wa Kibafumbwilwe, nsaa kinyi ayikalombana ano matemuki, na mbukitshishi kinyi buaadi alombene kuikala nao kui ooso a kuatudi?

³ Kabingilo ka kabidi, nkatale kipungo akilombana ano matemuki. Yowano mutumibua baadi muleshe kipungo akikalombana ano matemuki ooso, nsaa ibakuile’shi: “Kikudi kibangikiile mu efuku dya mwanaana.” (Kibaf. 1:10, Kilombeeno Kipya 2014) Nsaa ibafundile Yowano ano mayi mu kipua kia 96 bino bipungo bietu (B.B.), “efuku dya Mwanaana” dibaadi diki kula ngofu. (Mat. 25:14, 19; Luk. 19:12) Anka muyile butemuki bui mu Bible, diadia efuku dibabangile mu 1914 nsaa ibaabadi batuule Yesu bu Mfumu muiyilu. Kubanga nka mu kiakia kipua matemuki a mu Kibafumbwilwe atale muilo w’Efile Mukulu, ababangile kulombana. Oolo, binobino tui mu “efuku dia Mwanaana”!

⁴ Pa muanda wa’shi tui mu kino kipungo ki bukopo, nnatue be na lukolo na kutuula binangu bietu ku elango dia kifulo diatupete mu Kibafumbwilwe 1:3 adiamba’shi: ‘Sha muloo ngiawa abala n’eyi di bukopo, na baaba abapusha ano mayi a butemuki na kulama bintu bifundjibwe mwanka, mwanda kipindji takidi peepi.’ Biabia abitungu ‘tubadikie n’eyi dibukopo,’ bua kupusha “ano mayi a butemuki na kuialama.” Mbingi bishima kinyi bia mu ano mayi abitungu’shi tuibilame?

SHINKAMISHA’SHI LULANGUILO LOOBE NDUKUMINYIBUE NA YEHOWA

5. Mukanda wa Kibafumbwilwe aushimika kasele pabitale lukalo lua kushinkamisha’shi lulanguilo luetu ndukuminyibue na Yehowa naminyi?

⁵ Kubanga mu shapitre a kumpala a mukanda wa kibafumbwilwe, atulongo’shi Yesu auuku mianda yoso ikuete kukitshika mu tukongie tua muilo waye. (Kibaf. 1:12-16, 20; 2:1) Mikandu ibaadi Yesu mutumine tukongie musambobidi tua mu Asie Mineure ngishinkamishe’shi Yesu auuku mianda i mu tukongie kalolo. Mu ino mikandu yoso, baadi mutushe buludiki abupushika kalolo bua kukuasha bena Kidishitu ba mu siekele a kumpala buabadia kushikamisha’shi lulanguilo luabo ndukuminyibue na Yehowa. Kiakia kibaadi muakule mu ino mikandu nkitale muilo w’Efile Mukulu ooso lelo uno. Ndilongiesha kinyi dia tui mupetela? Mukunkushi eetu Yesu Kidishitu, auuku kalolo’shi tui mu kipuano ki buwa na Yehowa. Tui mu bulami bukata bua Yesu, ta kui kintu su nkimune kiash’amono nya. Auuku’shi tui na lukalo lua kutungunuka na kukita mianda i buwa bua kukuminyibua na Yehowa. Mbuludiki kinyi bubaadi mutushe abutungu’shi tui bulame lelo uno?

6. (a) Nka bu biabadi bashimikie kasele mu Kibafumbwilwe 2:3, 4, mmuanda kinyi ukata ubaabadi baleshe mu mukandu wa Yesu kui kakongie ka bena Efeso? (b) Ndilongiesha kinyi diatupetela ku uno muanda?

⁶ Badika Kibafumbwilwe 2:3, 4. T’abitungu tushimishe kifulo kietu kia ku mbangilo bua Yehowa nya. Mukandu wa Yesu kui bano booso babaadi mu kakongie ka bena Efeso ubaadi uleshe’shi, babaadi banyingiile na batungunukie kushi kukooka na kufubila Yehowa mpa na munkatshi mua nkalakashi ilekeenelekeene. Sunga mbiabia babaadi bashimishe kifulo kiabo kia ku mbangilo. Bibaadi abitungu’shi balushuule kifulo kiabo kia ku mbangilo bisumanga lulanguilo luabo t’alukuminyibua nya. Bi mumune lelo uno, tui na lukalo lua kukita bi bungi kukila kunyingiila. Tui na lukalo na kunyingiila bua tubingilo tui buwa Efile Mukulu eetu t’atalaa nka penda biatukitshi nya, kadi atalaa buakinyi atuibikitshi. Akitutumu bua kuibikita ki na muulo ukata kuadi, muanda akumiina’shi lulanguilo luetu luikale luimeene pa kifulo kikata na lutumbu luetu kuadi.​—Nki. 16:2; Mak. 12:29, 30.

7. (a) Bu abilesha Kibafumbwilwe 3:1-3, mmuanda kinyi ubamuene Yesu kui booso babaadi mu kakongie ka Sarde? (b) Abitungu tukite kinyi?

⁷ Badika Kibafumbwilwe 3:1-3. Abitungu tutungunukie na kuikala bapasukie. Bena kakongie ka mu Sarde babaadi na muanda wilekeene na wa tungi tukongie. Kala babaadi banyingie mu kikudi, anka binobino t’abakiabafubila’nyi Efile Mukulu nya. Kumpala Yesu baadi muibalungule buabadia “kubuula meeso.” Dino dilongiesha aditudimusha mushindo kinyi? Oolo, Yehowa t’analube mudimo wetu. (Eb. 6:10) Ta tui balombene kukulupila nka penda mu mianda ibatudi bakitshiine Yehowa mu mafuku a kala nya. Sunga pangi tuekala na bukome bupeela kukila bibaatudi kumpala, abitungu tuipaane “mu mufubo wa Muanana,” na bashale bapasukie mpa na ku nfudiilo.​—1 Kod. 15:58; Mat. 24:13; Mak. 13:33.

8. Ndilongiesha kinyi diatupete mu mayi ababalunguile bakuetu ba mu Laodisee, atupete mu Kibafumbwilwe 3:15-17?

⁸ Badika Kibafumbwilwe 3:15-17. Abitungu tuikadikie na kisumi n’eshimba dietu dioso mu lulanguilo luetu. Mukandu wa Yesu kui booso babaadi mu kakongie ka Laodisee ubaadi ushimikie kasele bua pa muanda ibabadi nao wilekeene na tungi tukongie. Babaadi “kifuufu” mu lulanguilo luabo. Bu bibaadi Yesu muituule pa mbalo yabo bebalunguile’shi, nui “baasha malwa na baasha makyenga.” Bibaadi abitungu bekale na katshintshi kakata bua Yehowa na bua lulanguilo luaye. (Kibaf. 3:19) Ndilongiesha kinyi dibatupete pano? Su boshimisha kisumi kiobe, abitungu tubanguule kuikala na lutumbu bua mianda yoso i buwa yabakuete kuitukitshiina kui Yehowa na ndumbuluilo aaye. (Kibaf. 3:18) Ta tui balombene kutadiila kukimba kua bintu bia ku mbidi kuakumba binangu bietu, na kutuula mianda ya mu kikudi pa mbalo ya kabidi nya.

9. Anka bu abilesha mukandu wa Yesu kui bena Kidishitu ba mu Peregame na ba mu Tyatire, mmasaku kinyi aatungu’shi tusuukie?

⁹ Abitungu tusumbule malongiesha a bantu basumbule lukumiino. Yesu baadi mulangie bangi babaadi batueshe kuiabuula na tusakatusaka mu kakongie ka mu Peregame. (Kibaf. 2:14-16) Baadi mutumbule baaba booso babaadi mu kakongie ka Tyatire bashi “batwelakane mu myanda ya Satana” na be balunguile’shi , “shalayi balamate” ku bia binyibinyi. (Kibaf. 2:24-26, NWT) Bena Kidishitu babofule na babaadi belekiele abo banabene na kulubishua na ano malongiesha a madimi, babaadi abatungu’shi belangie kuishimba. Uno muanda nguitutale naminyi lelo uno? Abitungu tusumbule dilongiesha dioso dikutuene na binangu bia Yehowa. Bantu basumbule lukumiino mbalombene kumueneka bu be na “mwikeelo wa bwin’Efile Mukulu, anka bakwete kutuna bukome bwa’bo.” (2 Tim. 3:5, Kilombeeno Kipya 2014) Mbibofule buatudia kutundula na kusumbula malongiesha a madimi, nsaa yatuibadikila Eyi di’Efile Mukulu kalolo.​—2 Tim. 3:14-17; Yu. 3, 4.

10. Ndingi dilongiesha kinyi diatudi balombene kulongiela ku kibakuile Yesu kui kakongie ka Peregame na Tyatire?

¹⁰ T’abitungu tutuelakane sunga kulekiela eyikashi dioso dia bukitekite nya. Kubaadi ungi muanda mu kakongie ka Peregame na ka Tyatire. Yesu baadi mutopekie bangi ba mu tuno tukongie tooso, bashi baadi basumbule dino eyikashi dia bukitekite. (Kibaf. 2:14, 20) Ndilongiesha kinyi diatupetela pano? Ta tui balombene kutengiela’shi Yehowa etufuila lusa ku kikitshiino su nkimune kia bukitekite, sunga tuekala bapue kumufubila munda a mafuku bungi kinyi sunga tuekala na mashito e naminyi. (1 Sam. 15:22; 1 Mp. 2:16) Atengiela’shi tulame mayi aaye a kulonda sunga biekala’shi miya ya uno ndumbuluilo e bubi ikuete kuenda na kuluila.​—Ef. 6:11-13.

11. Nkinyi kibatukatuka mu kulonga binobino? (Tala kashibo akamba’shi  “Ki’abitulongiesha lelo uno.”)

¹¹ Mmushindo kinyi watudi balombene kuakula mu kikoso mianda yoso ibatukatuka mu kuakula binobino? Tu bakatuka mu kumona’shi abitungu tushinkamishe’shi lulanguilo luetu, ndukuminyibue na Yehowa. Su tukuete kukita kintu kampanda kilombene kukutshishua lulanguilo luetu bua’shi belukumiine, abitungu tushintuule nka paapa tukite mianda i buwa. (Kibaf. 2:5, 16; 3:3, 16) Biabia Yesu baadi mushimikie kasele pa ingi mianda mu mikandu yaye kui tukongie. Bu mianda kinyi?

IKALA MUILUMBUULE BUA KUNYINGIILA KUBINGUABINGUA

12. Nkinyi kiatudi balombene kulongiela ku mukandu wa Yesu ubalunguile bakuetu ba mu kakongie ka Simirne na ka Filadelfi? (Kibafumbwilwe 2:10)

¹² Bua binobino, tutaleyi mikandu ya Yesu ibaadi mutumine tukongie ka Simirne na ka Filadelfi. Balunguile bena Kidishitu ba mu tuno tukongie’shi ta mbalombene kutshiina kubinguabingua muanda Yehowa akebafutu su babashaala balame lukumiino luabo. (Badika Kibafumbwilwe 2:10; 3:10) Abitulongiesha kinyi lelo uno? Abitungu tuukie’shi atupete kubinguabingua na tuilumbuule buatudia kuikunyingiila. (Mat. 24:9, 13; 2 Kod. 12:10) Buakinyi kuitutentekiesha uno muanda kui na muulo ukata?

13-14. Mianda yabadi baleshe mu Kibafumbwilwe shapitre 12 i na bukitshishi kinyi kui muilo w’Efile Mukulu?

¹³ Mukanda wa Kibafumbwilwe awitulungula’shi muilo w’Efile Mukulu aupete kubinguabingua mu ano mafuku eetu​—“efuku dya Mwanaana.” Mukanda wa Kibafumbwilwe shapitre 12 auteemuna ngoshi muiyilu nk’abo bakiabakatuka mu kutuula Bufumu bu’Efile Mukulu. Mikayele​—Yesu Kidishitu mutumbishibue​—na biluilo biaye bia ba mikeyilu babaluile ngoshi na Satana na ba demo. (Kibaf. 12:7, 8) Bu kipeta, babaadi batshokole beshikuanyi booso b’Efile Mukulu na kuibasumbula pa nsenga, na bino mbituadile bantu booso bashaale pa nsenga makienga e bungi. (Kibaf. 12:9, 12) Biabia, bino bibaadi bikitshikie bi na bukitshishi kinyi kui muilo w’Efile Mukulu?

¹⁴ Mukanda wa Kibafumbwilwe awitulungula dingi kibaadi Satana mukite kunyima. Taki na bulungantu dingi bua kualuka muiyilu, ngi buakinyi mmutuule nsungu yaye kui bedibue muimu ba ki pa nsenga abalesha mpala ya Bufumu bu’Efile Mukulu “be na mudimo wa kutusha bukamonyi pabitale Yesu.” (Kibaf. 12:17; 2 Kod. 5:20; Ef. 6:19, 20, NWT) Buno butemuki mbulombane naminyi?

15. Mbantu kinyi babalesha bu “tumonyi tubidi” be mu Kibafumbwilwe shapitre 11, na nkinyi kibaadi kibakitshikile?

¹⁵ Satana mmulue ngoshi na bakuetu bedibue muimu bakuete kukunkusha mudimo wa kulungula mukandu wa Bufumu. Aulesha’shi munkatshi muabo mui “tumonyi tubidi” tua mu kifuanyi tubaabadi bayipe.b (Kibaf. 11:3, 7-11) Bakuetu balume muanda babaadi abakunkusha ndumbuluilo, babaadi badimbilue madimi bebafunda, abo nkuibatshibila kiimu na kuibeela mu lukano munda mua mafuku e bungi. Bantu be bungi babaadi abanangushena’shi mudimo wa bano bedibue muimu “ubaafu.”

16. Mmuanda kinyi wa kukaanya ubakisthikile kubanga mu 1919, kadi Satana ki’atungunuka na kukita kinyi kubanga mu kiakia kipungo?

¹⁶ Butemuki bui mu Kibafumbwilwe shapitre 11 abubanga na ano mayi aamba’shi, “tumonyi tubidi” tubaadi tulombene kupetuula muwa, kunyima kua kapindi kapeela. Pa balombene buno butemuki, kubakitshikile muanda kampanda ubaadi ukaanyishe bantu kipua kimune kunyima kua’bo kuibeela mu lukano. Ku mbangilo kua kipua kia 1919 bano bakuetu bedibue muimu babaadi batushibue mu lukano na kunyima babalekiele kuibadimbiila. Nka paapa bakuetu ababangile dingi kukunkusha mudimo wa kulungula mukandu wibuwa na wa kulongiesha. Anka bino ta mbimikie Satana buadia kuleka kutuuka muilo w’Efile Mukulu ngoshi nya. Kubanga nka kiakia kipungo, Satana mmutuushe “mweela” wa kubinguabingua kui muilo ooso w’Efile Mukulu. (Kibaf. 12:15) Mu binyibinyi, ‘pano ngi apatuungu kunyingiila na lukumiino’ kui ooso akuatudi.​—Kibaf. 13:10, Kilombeeno Kipya 2014.

TUIPAANEYI NGOFU MU MUDIMO WA YEHOWA WADI MUITUPE

17. Muilo w’Efile Mukulu ngupete bukuashi kinyi buaush’autengielanga, sunga mbia ukuete kuluishibua na Satana?

¹⁷ Kibafumbwilwe shapitre 12 akilesha dingi’shi muilo w’Efile Mukulu ngulombene kupeta bukuashi mu mushindo waush’aupuandikishanga. Mukanda wa Kibafumbwilwe aupatuula’shi “nsenga” ngimine “mweela” wa kubinguabingua. (Kibaf. 12:16) Nka bino ngi bibaadi bikitshikie. Ingi nsaa, bantu bakata batabadi na nshalelo e buwa mu uno ndumbuluilo a Satana, na bena mbulamatadi, abakaluilaa muilo w’Efile Mukulu. Misuusa i bungi ababingaa bilumbu ku tumilaadi na bino abibapeya bulungantu. Abafubishaa buabua bulungantu naminyi? Abafubishaa mushindo ooso wawa aumueneka bua kukita mudimo wabadi bebape kui Yehowa. (1 Kod. 16:9) Mu uno mudimo mui mianda kinyi?

18. Mmudimo kinyi ukata watudi nao mu ano mafuku a ku mfudiilo?

¹⁸ Yesu batemukile’shi muilo waye aukalungula “mukandu wibuwa wa Bufumu bw’Efile Mukulu” mu nsenga yoso ishadibue kumpala kua’shi mfudiilo ifikie. (Mat. 24:14, Kilombeeno Kipya 2014) Bua kukita uno mudimo, bakuete kupeta bukuashi bua muikeyilu sunga bua kisaka kia ba mikeyilu, bu biabadi bebileshe mu Kibafumbwilwe 14:6 amba’shi: “baadi na mukandu wi buwa wa looso bwa kwiwulungula be pa nsenga, na maumbo ooso na bisaamba [bioso] na ndjimi na miilo.”

19. Ngungi mukandu kinyi autungu’shi baaba booso bafule Yehowa beulungule?

¹⁹ Ta nka penda mukandu wibuwa wa Bufumu ngi mukandu umune wabakuete kulungula kui muilo w’Efile Mukulu nya. Bakuete kukuatshishena dingi mudimo wa ba mikeyilu wabadi baleshe mu Kibafumbwilwe shapitre 8 na mu shapitre a 10. Bano ba mikeyilu abalesha mulongo wa malua aakuata bano booso abapele mukandu wibuwa wa Bufumu bu’Efile Mukulu. Nyi buakinyi ba Temue ba Yehowa bakuete kulungula mukandu wa kiimu, wi bu “mabwe a kaalo” abilesha mukandu wa kiimu ki’Efile Mukulu kui bintu bilekeenelekeene bia mu ndubuluilo e bubi a Satana. (Kibaf. 8:7, 13) Bantu be na lukalo lua kuuka’shi mfudiilo tayidi peepi buabadia kumona bua kushintuula nshalelo aabo bamone biabadia kupanda kuifuku dia nsungu ya Yehowa. (Sef. 2:2, 3) Anka uno mukandu ta mbantu booso bakuete kui ukumiina nya. Muanda abitungu tuikale n’eshimba dinyingie buatudia kumona bia kulungula bangi pabitale uno mukandu. Mu kipungo kia mpombo ikata mukandu wa kiimu kia mfudiilo aukapa bantu nsungu i bungi.​—Kibaf. 16:21.

LAMA MAYI A BUTEMUKI

20. Nkinyi ki’atukataluula mu miisambo ibidi ayilondo?

²⁰ Mu binyibinyi abitungu tulame “mayi a butemuki” muanda atulombasha buno butemuki nsaa yatubadika mukanda wa Kibafumbwilwe. (Kibaf. 1:3) Biabia mmushindo kinyi watudi balombene kunyingiila na lulamato luetu looso kubinguabingua, na kutungunuka na kulungula uno mukandu? Atukanyingishibua na ino mianda ibidi: Wa kumpala, nku akilesha mukanda wa Kibafumbwilwe pabitale beshikuanyi b’Efile Mukulu, na wa kabidi mmiabi ya mu mafuku aafiki yatupete su tubashaala na lulamato luetu. Atukataluula ino mianda yoso ibidi mu miisambo ayilondo.