Mukanda wa Kibafumbwilwe: Awakula kinyi pabitale mafuku oobe aafiki?

1. Nkitshibilo kinyi kikata akitungu’shi bantu booso baate?

LELO uno, bantu be na kitshibilo kikata akitungu kuata. Abakakumiina kukuatshishena Yehowa Efile Mukulu bu Mfumu e buwa a eyilu na nsenga, sunga’shi abakashaala kunyima kua uno muishikuanyi mukata, Satana Diabulu? Muntu ooso yawa e na lupese kampanda alutungu’shi asangule. Takui muntu ashaala kushi kuikala ku lupese kampanda nya, kitshibilo ki’abaata akikala na bukitshishi ku muwa wa ikalayika wi ku mafuku aafiki. (Mat. 25:31-33, 46) Mu kipungo kia “mpombo ikata,” abakeele bantu bitundwilo bua abakapanda sunga abakabutudibua.​—Kibaf. 7:14; 14:9-11; Es. 9:4, 6.

2. (a) Bena-Ebelu 10:35-39 etunyingisha bua kukita kinyi? (b) Mukanda wa Kibafumbwilwe ngulombene kuitukuasha mushindo kinyi?

² Badika Bena-Ebelu 10:35-39. Su buata kitshibilo kia kukuatshishena bukunkushi bua Yehowa, wata kitshibilo ki buwa ngofu. Binobino okumiina kukuasha bangi buabadia kuata kino kitshibilo ki buwa. Bua’shi okite bino, abitungu ofubishe mianda i mu mukanda wa Kibafumbwilwe bodia kuibakuasha. Uno mukanda wi buwa bukile aulesha akikakitshikila bano booso abatombokiela Yehowa, anka aushimika kasele, ku miabi ayikapete bano booso abakuatshishena na lulamato looso bukunkushi buaye. Atukitshi kalolo nsaa y’atulongo bino bia binyibinyi bi na muulo ukata. Su tubakitshi biabia, abitukuasha buatudia kunyiisha kuikala na kitshibilo kia kufubila Yehowa. Kukatusha biabia, tui balombene kufubisha mianda ibatulongo bua kukuasha bangi bua’shi baate bitshibilo bi buwa na batungunukie na kufubila Yehowa.

3. Nkinyi ki’atukataluula mu uno muisambo?

³ Mu uno muisambo, atukataluula ino nkonko: Nkinyi akikatshikila baaba booso abakuatshishena bukunkushi bu’Efile Mukulu? Ku lungi lupese, nkinyi akikatshikila baaba booso abakuatshishena nyema a bukielo monga pididi, abadi baleshe mu mukanda wa Kibafumbwilwe?

NKINYI AKIKAKITSHIKILA BAABA BOOSO BALAMATE YEHOWA?

4. Nkisaka kinyi kibamuene Yowano mutumibua nkimane na Yesu muiyilu?

⁴ Mu kimonua, Yowano mutumibua bamuene bisaka bibidi bia bantu, abakuatshishena bukunkushi bua Yehowa na abakapete miabi ya muwa wa ikalayika. Kisaka kia kumpala nkia bantu 144 000. (Kibaf. 7:4) Mbatshiibue pa nsenga buabadia kukita guvernema sunga Bufumu, pamune na Yesu muiyilu bua’shi bakakunkushe booso abakashaala pa nsenga ishima. (Kibaf. 5:9, 10; 14:3, 4) Yowano bebamuene mu kifuanyi, mbemane pamune na Yesu muiyilu ku muengie wa Siyona.​—Kibaf. 14:1.

5. Nkinyi akikatshikila baaba bedibue muimu baki pa nsenga na muwa?

⁵ Munda mua bipua bi bungi, mbasangule binunu bia bantu buabadia kuikala ku kisaka kia bantu 144 000. (Luk. 12:32; Lom. 8:17) Yowano akula’shi nka penda ndambo ipeela ya ku baaba abende muiyilu, ngi iki na muwa pano pa nsenga mu ano mafuku a ku mfudiilo. Bano “bashaale” abakapete “kitampi” kia mfudiilo akilesha’shi Yehowa mmuibakumiine kumpala kua’shi mpombo ikata ifikie. (Kibaf. 7:2, 3; 12:17) Nsaa ipeela kumpala kua mpombo ikata, ino ndambo ipeela ya ku bantu 144 000, ishaale pa nsenga abakeyata bua’shi yende muiyilu buayidia nkesanga na baaba bangi babapuile kufua na lulamato basanguka benda muiyilu. Muiyilu, abakamunana pamune na Yesu mu Bufumu bu’Efile Mukulu.​—Mat. 24:31; Kibaf. 5:9, 10.

6-7. (a) Yowano bamuene dingi kisaka kinyi na abitulongiesha kinyi? (b) Bua kinyi Kibafumbwilwe shapitre 7 akula bua bisaka bibidi bua bano bedibue muimu bapeela baki pa nsenga na “kibumbu kikata”?

⁶ Kunyima kuaye kumona kiakia kisaka akiende muiyilu, Yowano bamuene “kibumbu kikata,” kilekeene na kino kia 144 000, kino nkisaka kishi bia muntu kubala. (Kibaf. 7:9, 10) Nkinyi ki’atulongiela kuabadi? Yowano akula’shi: “Nyi mbaaba abafiki ku mbombo ikata, na babasuula ma nkandjo aabo na babeatoosha mu mase a muana a mukooko.” (Kibaf. 7:14, Kilombeeno Kipya 2014) Kunyima ku’abo kupanda ku mpombo ikata, kino “kibumbu kikata” akikashaala pa nsenga na akikasankila miabi ya kukaanya.​—Mis. 37:9-11, 27-29; Nki. 2:21, 22; Kibaf. 7:16, 17.

⁷ Sunga tuekala mu kisaka kia bantu abende muiyilu sunga mu kiakia akishaala pa nsenga, tubemono atue banabene mu bino biabadi baleshe mu Kibafumbwilwe shapitre 7 su? Oolo Tubemono. Kino nyi nkipungo ki buwa bukile, kia bisaka bioso bibidi bia bafubi b’Efile Mukulu! Atukekala na muloo ukile bungi, pa kumona’shi tubaadi basangule bua kukuatshishena bukunkushi bua Yehowa. Mukanda wa Kibafumbwilwe awitulungula dingi kinyi pabitale mpombo ikata?​—Mat. 24:21.

NKINYI AKIKAKITSHIKILA BAABA BOOSO ABATOMBOKIELA EFILE MUKULU?

8. Mmushindo kinyi aukabanga mpombo ikata, na bantu be bungi abakakitshi kinyi?

⁸ Nka bu bia tuibimuene mu muisambo ushaale, bano bena politike booso ba mu ino nsenga abakalulukila uno babilone mukata, ampire a nsenga ishima a lulanguilo lua madimi. (Kibaf. 17:16, 17) Bino bikitshiino abilesha mbangilo a mpombo ikata. Bino abikiebe kulesha’shi bantu be bungi abakafiki, buabadia kuata kitshibilo kia kubanga kufubila Yehowa su? Nya. Mu kuilekeena na biabia, mukanda wa Kibafumbwilwe shapitre 6 aulesha’shi mu kiakia kipungo ki bukopo, baaba booso bantu bash’abafubila Yehowa, abakakimbi kukaluilua kui bakata ba mbulamatadi na bakata ba busunga ba mu ino ndumbuluilo, babadi bapuandikishe na miengie. Bu bano booso bantu biabash’abakakuatshishena Bufumu bu’Efile Mukulu, Yehowa akebamono bu beshikuanyi n’aye.​—Luk. 11:23; Kibaf. 6:15-17.

9. Mmushindo kinyi aukashaala muilo wa Yehowa bu bantu belekeene na bangi mu kipungo kia mpombo ikata, na nkipeta kinyi akikatuku?

⁹ Eyendo’shi, bafubi ba Yehowa baasha lulamato, abakashaala bu bantu belekeene na bangi mu kipungo ki bukopo kia mpombo ikata. Nka penda abo, ngi abakashaala kisaka kia muilo wi pa nsenga aufubila Yehowa Efile Mukulu, na aupele kukuatshishena ‘nyema a bukielo.’ (Kibaf. 13:14-17) Ku muanda abashaala na lulamato kui Yehowa baaba booso batombokiele Yehowa abakekala na nsungu ikile kuabadi. Bu kipeta, miilo isangie ayikatuku muilo w’Efile Mukulu ngoshi pa nsenga yoso ishima. Kino kikitshiino ngi ki’abayitanyina mu Bible bu buluishi bua Goge a kuiumbo dia ku Magoge.​—Es. 38:14-16.

10. Nka bu bi’abalesha mu Kibafumbwilwe 19:19-21, Yehowa akakita naminyi na buno buluishi bua muilo waye?

¹⁰ Yehowa akakita kinyi bua buno buluishi? Etulungula’shi: “Nakakwata nsungu ikata.” (Es. 38:18, 21-23, EEM) Mukanda wa Kibafumbwilwe shapitre 19 aulesha akikakitshika kunyima. Yehowa akatumu muana aaye, bua kukaluila muilo waye na bua kubutula beshikuanyi baabo. Yesu akafiki mu kulua ino ngoshi na “bilwilo bya mwiyilu”​—ba mikeyilu baasha lulamato pamune na bedibue muimu 144 000. (Kibaf. 17:14; 19:11-15) Ino ngoshi ayikafudiila naminyi? Abakabutula bantu booso na ndumbuluilo yoso itombokiele Yehowa!​—Badika Kibafumbwilwe 19:19-21.

KUNYIMA KUA NGOSHI, EYIBAKISHI

11. Nkintu kinyi ki na muulo ukata ki mu mukanda wa Kibafumbwilwe?

¹¹ Banda kupuandikisha mushindo aukapusha, baasha lulamato be pa nsenga bua kupaashibua ku kabutu kakata ka beshikuanyi b’Efile Mukulu! Akikekala kipungo kia muloo! Mpaa na muiyilu abakeele tukundakunda tua muloo nsaa y’abakabutula Babilone mukata, akukekadika’nyi kingi kintu akikebatuadila’nyi muloo ukata. (Kibaf. 19:1-3) Kiakia kintu, mu binyibinyi, ki na muulo ukata ki mu mukanda wa Kibafumbwilwe​—nyi “eyibakishi dia muana a mukooko.”​—Kibaf. 19:6-9, NWT.

12. Nka bu biabadi baleshe mu mukanda wa Kibafumbwilwe 21:1, 2, nsaa kinyi ayikakitshika eyibakishi dia muana a mukooko?

¹² Nsaa kinyi ayikakitshika eyibakishi? Bedibue muimu booso 144 000, abakekadika bapue kuenda muiyilu kumpala kua’shi ngoshi ya Armagedone ibangie. Biabia, kino t’akikekadika kipungo kia eyibakishi dia muana a mukooko nya. (Badika Kibafumbwilwe 21:1, 2.) Eyibakishi dia muana a mukooko, adikakitshika kunyima kua ngoshi ya Armagedone kukitshika, na booso beshikuanyi b’Efile Mukulu, babaapu kubutudibua.​—Mis. 45:3, 4, 13-17.

13. Eyibakishi dia muana a mukooko adipushisha kinyi bua booso abakedikitshi?

¹³ Eyibakishi dia muana a mukooko, adipushisha kinyi bua booso abakedikitshi? Eyendo, bu bi eyibakishi ndisangie na balume na bakashi pamune, biabia dino eyibakishi dia mu kifuanyi adilesha buumune bua Bufumu, bua Yesu Kidishitu, na “mukashi aaye,” bedibue muimu 144 000. Kino kintu ki na muulo ukata, nyi nkutudibua kua Bufumu bupia abukamunana pa nsenga munda a bipua 1 000.​—Kibaf. 20:6.

KIBUNDI KI BUWA NA MAFUKU OOBE AAFIKI

14-15. Kibafumbwilwe shapitre 21 apuandikisha bedibue muimu 144 000 na kinyi? (Tala kifuatulo kia ku kipusu.)

¹⁴ Akupu, mukanda wa Kibafumbwilwe shapitre 21 aupuandikisha bedibue muimu 144 000, na kibundi ki selele ki’abetanyina bu “Yeelusaleme mupya.” (Kibaf. 21:2, 9) Kino kibundi ki na bitako 12 bia mabue, biabadi bafunde ‘mashina 12 a batumiibwa ba mwana a mukooko.’ Bua kinyi bino bibaadi bikakie binangu bia Yowano? Ku muanda bamuene eshina diaye ndifundibue ku ebue dimune dia ku ano ooso mabue. Nyi nkineemo kikata!​—Kibaf. 21:10-14; Ef. 2:20.

¹⁵ Kino kibundi kia mu kifuanyi t’akimueka bu bingi nya. Nkishaale n’eshinda dia oòlo e buwa, biibi 12 abipenyapenya, midimba na bitako mbibakibue na mabue a muulo​—na ki na kipimo kipuidikie. (Kibaf. 21:15-21) Dingi, kubaadi kingi kintu kibaadi akimueka bu kishi kuanka! Tala bi’abetulungula dingi kui Yowano: ‘Na ntshinamwene ntempelo mwanka nya; mwanda Yehowa Efile Mukulu sha bukome booso, na mwana a mukooko mbeekale ntempelo a mwanka. Na kibundji takibaadi lukalo na nguba sunga na mweshi nya bwa kwikimunyika, mwanda ntumbo y’Efile Mukulu ngikimunyikye, na mwana a mukooko nyi elampi dia’kio.’ (Kibaf. 21:22, 23, Kilombeeno Kipya 2014) Baaba booso be mu Yeelusaleme mupia abakekala na Yehowa. (Eb. 7:27; Kibaf. 22:3, 4) Muanda, Yehowa na Yesu ngi bekadikie ntempelo a kibundi.

16. Nkinyi akikakitshikila bantu mu bipua kinunu bia kumunana kua Bufumu bu’Efile Mukulu?

¹⁶ Bi na muulo ukata bua bedibue muimu, kunangushena pabitale kino kibundi. Anka mpaa na booso be na lukulupilo lua pa nsenga, be na namu’nyi kabingilo ka kutuula binangu biabo ku kianka. Munda a bipua kinunu bia kumunana kua Bufumu bu’Efile Mukulu, Yeelusaleme mupia akeele miabi pa nsenga. Yowano bamuene yaya yoso miabi ayalaala bu “mweela wa meema a muwa.” Na ku mpese yoso ibidi ya muela, kui “mitshi ya muwa” ayitusha mapuupua “bua kupaasha mikumbo ya beena maumbo.” (Kibaf. 22:1, 2, Kilombeeno Kipya 2014) Bantu booso abakemushaala, abakapete mushindo wa kupeta bino bintu bi buwa. Bantu booso bakuete kukookiela Yehowa, abakekadika bapuidikie. T’akukekadika mikumbo, sunga mitanyo, sunga mpolo ya kinyongua nya.​—Kibaf. 21:3-5.

17. Bu abilesha mukanda wa Kibafumbwilwe 20:11-13, mbanyi abakapete miabi mu bipua kinunu bia kumunana?

¹⁷ Mbanyi abakapete ino miabi yoso i buno buwa? Ba kumpala, nyi nkibumbu kikata akikapanda ku ngoshi ya Armagedone, na muana ooso akatandikua mu nsenga ipia. Anka mukanda wa Kibafumbwilwe shapitre 20 ngule dingi’shi bafue, abakasanguka. (Badika Kibafumbwilwe 20:11-13.) Bantu “balulame” batababafuile kubanga ku kala, na bantu “bashii balulame”​—bashi bapetele mushindo wabadia kulonga pabitale Yehowa​—booso abakapete dingi muwa pano pa nsenga. (Bik. 24:15; Yo. 5:28, 29) Bino, abilesha’shi mmuntu ooso abakasangula bua kupeta muwa pano pa nsenga mu kumunana kua bipua kinunu su? Nya. Baaba booso bantu babi babaadi bapele mushindo wabo ubabapele bua kufubila Yehowa kumpala kua’shi bafue, t’abakebasangula bua’shi bapete dingi muwa nya. Tabaki na mushindo’nyi na mbaleshe’shi ta mbalombene’nyi kupeta muwa mu mpaladisu pa nsenga nya.​—Mat. 25:46; 2 Tes. 1:9; Kibaf. 17:8; 20:15.

KITOMPUANGA KIA MFUDIILO

18. Ku mfudiilo kua bipua 1 000 nsenga ayikekala naminyi?

¹⁸ Ku mfudiilo kua bipua 1 000, booso abakashaala pa nsenga abakekadika bapuidikie. Ta kui muntu su ngumune, anakekadikie ku bukitshishi bua muluisho wa Adame ubatudi bapiane kubanga ku kibangilo nya. (Lom. 5:12) Mulua wa muluisho wa Adame, t’aukekala kuanka dingi. Mu uno mushindo, booso be pa nsenga abakekadika na “muwa” bu bantu bapuidikie ku mfudiilo kua bipua 1 000.​—Kibaf. 20:5.

19. Bua kinyi abitungu kitompuanga kia mfudiilo?

¹⁹ Atuuku’shi Yesu baadi mukambile kuikitshisha kooso kua Satana, kubaadi akitshi bua kuluisha kululama kuaye. Yesu bashadile nka na lulamato mu bitompuanga. Anka, abitungu’shi bantu booso bekale bapuidikie, bua kushaala na lulamato bu Yesu nsaa ayibatompo Satana su? Muntu ooso, mmulombene nkaluula luno lukonko pa bupenka bua kulesha lulamato luaye kui Yehowa, nsaa y’abakatuusha Satana mu lukano ku mfudiilo kua bipua 1 000. (Kibaf. 20:7) Baaba booso abakalesha’shi be na lulamato, mu kino kitompuanga kia mfudiilo abakapete muwa wa ikalayika na mfudiilo a bioso, abakekala mu bulungantu bua binyibinyi. (Lom. 8:21) Baaba booso bantomboshi, abakabutudibua bua losoo, mpaa na winyi Diabulu na bademo baye.​—Kibaf. 20:8-10.

20. Opusha naminyi pabitale matemuki aakaanyisha aasanganyibua mu mukanda wa Kibafumbwilwe?

²⁰ Wepusha naminyi kunyima kua kutaluula mu kikoso kino akiakula mukanda wa Kibafumbwilwe? Ta mbikutakule namu bua kuimona obe nabene mu ano matemuki aakaanyisha su? Bino t’abikutakula namu bodia kuitanyina bangi bua’shi bafikie mu kuisanga netu mu lulanguilo luiselele lua Efile Mukulu eetu su? (Kibaf. 22:17) Nsaa y’atutuulu ino mianda mu binangu bietu na mu mashimba eetu, abitusankisha pa kushinguula ino mianda ikata ya mu mafuku aafiki, na abitutakula kushi mpaka buatudia kuakula mayi a mutumibua Yowano abakuile’shi: “Aamene, fika, Mwanaana Yesu.”​—Kibaf. 22:20.