Mukanda wa Kibafumbwilwe: Ki’aulesha bua beshikuanyi b’Efile Mukulu

1. Nkinyi akilesha mukanda wa Kibafumbwilwe pabitale muilo w’Efile Mukulu?

MUKANDA wa Kibamfumbwilwe aulesha’shi Bufumu bu’Efile Mukulu bukuete kumunana muiyilu, na’shi Satana baadi mubingibue muanka. (Kibaf. 12:1-9) Kuakua kubingibua nkufuishe butaale kui baaba booso be muiyilu, anka kuetufuishiisha lukalakashi kui atue be pa nsenga. Buakinyi? Muanda nsungu ya Satana ngimeene kui baaba booso be na lulamato abafubila Yehowa pano pa nsenga.​—Kibaf. 12:12, 15, 17.

2. Nkinyi akiketukuasha bua kushaala na lulamato kui Yehowa?

² Mmushindo kinyi watudi balombene kushaala na lulamato kui Yehowa sunga biabakuete kuituluisha kui Satana? (Kibaf. 13:10) Muanda umune ulombene kuitukuasha, nkuuka akikakitshika mu mafuku aafiki. Bu kileshesho, mu mukanda wa Kibafumbwilwe, Yowano mutumibua baadi muleshe ingi miabi yatukapete mu mafuku apeela e kumpala aku. Umune wa ku ino miabi nyi nkubutudibua kua beshikuanyi b’Efile Mukulu. Bua binobino, tutaluuleyi mushindo aulesha Kibafumbwilwe bua bano beshikuanyi na akikebafikila.

“BITUNDUILO” ABILESHA BESHIKUANYI B’EFILE MUKULU

3. Mbingi bitunduilo kinyi biabadi bafubishe mu Kibafumbwilwe?

³ Mu verse a kumpala a Kibafumbwilwe, etulesha’shi mianda yatukiebe kubadika binobino, ngileshibue mu “bitunduilo” uno nyi ngakuilo a mu kifuanyi. (Kibaf. 1:1) Beshikuanyi b’Efile Mukulu mbebaleshe mu kifuanyi. Atumono nyema i bungi ya bukielo. Bu kileshesho, kubaadi ‘nyema a bukielo baadi atuuku mu meema akata, e na nsengwa ekumi na mitwe musambobidi.’ (Kibaf. 13:1, Kilombeeno Kipya 2014) Yawa nyema a bukielo babaadi abamulondo kui ‘mungi nyema a bukielo atuuku muushi mwa nsenga.’ Yawa nyema baadi akula bu kinyoka na baadi “ayisha kaalo akakatukila mwiulu.” (Kibaf. 13:11-13, Kilombeeno Kipya 2014) Na dingi atumono nyema ilekeene ya bukielo, “nyema a bukielo moonga abadi bashaale” mongo kui ndumba mukashi. Ino nyema isatu ayilesha beshikuanyi kubanga kukala ba Yehowa Efile Mukulu na Bufumu buaye. Kia kumpala, bi na muulo tuiyitundule.​—Kibaf. 17:1, 3.

4-5. Mushindo awakula Ndanyele 7:15-17, awitukuasha bua kupusha akipatuula bino bitunduilo naminyi?

⁴ Kumpala kua kuuka bano beshikuanyi, abitungu tubande kupusha akielesha ino nyema ya bukielo na uno mukashi ndumba ba mu kifuanyi. Mushindo watudia kupusha kalolo abitungu kulekiela Bible ebipatuule aye nabene. Bifuanyi bi bungi biatusangana mu mukanda wa Kibafumbwilwe, mbapue kui bipatuula mu ingi mikanda ya mu Bible. Bu kileshesho, Ndanyele bamuene kimonua kia “nyema inanka ii moo ibatuukile mu mbuu.” (Nda. 7:1-3) Ndanyele etulungula ki’ayipatuula. Ino nyema ya bukielo ikata ayilesha ba “mfumu” bananka sunga guvernema. (Badika Ndanyele 7:15-17.) Kino kipatuluilo akipushika kalolo akitukuasha buatudia kuuka’shi ino nyema ya bukielo yabadi baleshe mu Kibafumbwilwe, ngilombene kulesha dingi makome a politike.

⁵ Bua binobino tutaluuleyi bingi bitunduilo biabadi baleshe mu Kibafumbwilwe. Nsaa yatutaluula atukamono mushindo awitukuasha Bible bua kupusha akilesha bino bitunduilo. Atubanga na mishindo ya nyema ya bukielo ilekeene. Kia kumpala, atukatundula ki’ayilesha. Kubaapu, atukamono akikakitshikila ino nyema. Na ku mfudiilo, atukataluula akilesha ino mianda ikata kuatudi.

MBALESHE BIA KUTUNDULA BESHIKUANYI B’EFILE MUKULU

6. Nkinyi akipushisha mitue musambobidi ya nyema a bukielo yabadi baleshe mu Kibafumbwilwe 13:1-4?

⁶ Mitue musambobidi ya nyema a bukielo nkinyi? (Badika Kibafumbwilwe 13:1-4.) Atumono’shi uno nyema a bukielo, kebungi akambaa kumueneka bu ngye, mikoolo yaye bu urse, na kukanua kuaye bu ntambue, na e na nsengua ekumi. Nyema yoso inanka yabadi baleshe mu mukanda ya Ndanyele shapitre 7 i nka na bino bintu bimune bifuaneene. Mu mukanda wa Kibafumbwilwe bino bintu bioso atuibipete ku nyema umune kushi ku nyema ya bukielo inanka ilekeene. Uno nyema umune a bukielo, t’alesha penda guvernema umune sunga penda ampire umune a mu nsenga nya. Na dingi Yowano baadi muleshe’shi abamupeele matalua a kumunana “pa bisaamba bioso na miilo na ndjimi na maumbo.” Biabia mmulombene kuikala bukata kukila ma guvernema ooso a maumbo. (Kibaf. 13:7, Kilombeeno Kipya 2014) Uno nyema a bukielo dingi, mmulombene kulesha makome ooso a politike abaadi amunane kubanga kasha muntu bekeele kuanka mpaa na bu lelo.b​—Mul. 8:9.

7. Mutue ooso wa ku mitue musambo ya nyema a bukielo aulesha kinyi?

⁷ Mutue ooso wa ku ino mitue musambobidi aulesha kinyi? Kipatuluilo ki’atupete mu Kibafumbwilwe shapitre 17, aulesha kifuanyi kia nyema a bukielo abadi bateemune mu Kibafumbwilwe shapitre 13. Mu Kibafumbwilwe 17:10, atubadika’shi: ‘Kwi bamfumu musambobidi: batano mbapone; umune ekudi; mungi tabandjile kufika nya, na pakafiki, abituungu abaande kubombeela kapindji kapeela.’ Ku makome ooso a bena politike abadi bafubishe kui Satana, musambobidi nyi wileeshe bu “mitue.” Ano ma ampire ya mu nsenga ishima abaadi amune muilo w’Efile Mukulu na abaadi na bukitshishi bukata kuabadi. Mu kipungo kia Yowano mutumibua, kui mafumu atano aku ano mafumu abaadi apue kumunana mu nsenga ishima: Ejipitu, Asiri, Babilone, Mede na Perse, na Grese. Bufumu bua kasamombo mbua bena Looma, bubaadi bumunane mpaa na nsaa ibapetele Yowano kino kibafumbwilwe. Nkinyi akilesha’shi bufumu bua musambobidi ngi bufumu bua mfudiilo mu nsenga ishima sunga bu mutue?

8. Nnanyi alesha mutue wa musambobidi wa nyema a bukielo?

⁸ Nka bu bi’atukebimono, matemuki a mu mukanda wa Ndanyele aaketukuasha bua kutundula bufumu bua musambobidi, na mutue wa mfudiilo wa nyema a bukielo. Mbukome kinyi bua nsenga ishima bukuete kumunana mu kino kupungo kia nfundiilo “ki’efuku dia Muanana”? (Kibaf. 1:10) Nkuisanga kua Royaume-Uni na États-Unis d’Amérique, abayitanyina ingi nsaa bu anglo-américaine bukome bua nsenga ishima. Biabia tui balombene kufudiisha’shi nyi mutue wa musambobidi wa nyema a bukielo abadi batemune mu Kibafumbwilwe 13:1-4.

9. Nyema a bukielo e na “nsengua ibidi bu Muana a mukooko alesha kinyi”?

⁹ Mukanda wa Kibafumbwilwe shapitre 13 awitulongiesha’shi uno mutue wa musambobidi anglo-américaine mbukome bua nsenga ishima, bua nyema a bukielo baadi na ‘nsengua ibidi ifwaneene na ya Muana a mukooko, baadi kwete kwakula bu kinyoka.’ “Mu kipaso kibaadi ayisha mpaa na kaalo akakatukila mwiulu akeende pa nsenga, kumpala kwa bantu.” (Kibaf. 13:11-15) Kibafumbwilwe shapitre 16 na 19 ayitanyina uno nyema a bukielo bu “mutemuki a madimi.” (Kibaf. 16:13; 19:20, Kilombeeno Kipya 2014) Ndanyele ateemuna kintu kampanda kifuaneene, ki’abetanyina bu anglo-américaine bukome bua nsenga ishima ‘abukalwishakana bintu mu kipaso kya kukaanya.’ (Nda. 8:19, 23, 24, EEM) Bibakitshikile nka biabia mu ngoshi ya kabidi ya Nsenga Ishima. Ma bombe atomike abidi abaadi afube mudimo ukata ku mfudiilo kua ngoshi ya mu Pacifique ibaadi bu kipeta kia kuikitshisha kua bena sianse ba mu Grande-bretagne na ba mu Amerique. Pa babapuile ino bombe ibidi kui anglo-américaine bukome bua nsenga ishima, be bu babaadi “bayishe mpaa na kaalo akakatukila mwiulu akeende pa nsenga.”

10. Kifuanyi kia ‘nyema a bukielo’ akilesha kinyi? (Kibafumbwilwe 13:14, 15; 17:3, 8, 11)

¹⁰ Dingi atumono mungi nyema a bukielo. Uno nyema muifuanene na nyema a mitue musambobidi, anka ngilekeene ku a elangi, uno nyema monga pididi, abamuitanyina bu ‘kifwanyi kia nyema a bukielo’ mbamuleshe bu “mfumu a muanda.”c (Badika Kibafumbwilwe 13:14, 15; 17:3, 8, 11.) Yawa “mfumu” abamba’shi baadi kuanka anka taki kuanka’nyi, anka kunyima akamueneka dimo. Mu binyibinyi bino abilesha Organisation de Nations unies baadi mukuatshishene mianda ya politike ya mu nsenga ishima! Kumpala babaadi abamuitanyina bu Société des Nations. Na dingi baadi mushimine mu ngoshi ya kabidi ya Nsenga Ishima. Kunyima mmumuekie dingi bu Nations unies mbiadi binobino.

11. Nyema a bukielo sunga mbulamatadi a politique ikuete kukita kinyi, na buakinyi ta tui balombene kuibatshina?

¹¹ Kukidila ku madimi aabo abakuete kupalakasha, nyema a bukielo sunga mbulamatadi kuete kunyingisha bantu buabadia kutombokiela Yehowa na muilo waye. Mu ngakuilo a mu kifuanyi, be nka bu “bamfumu bakata ba pa nsenga yishadiibwe yoso yishima” bua kuibabunga muanda wa ngoshi ya Armagedone ya “dino efuku dikata di’Efile Mukulu Sha bukome booso.” (Kibaf. 16:13, 14, 16, Kilombeeno Kipya 2014) Biabia ta tuina kintu kiatudi balombene kutshina nya. Efile Mukulu eetu mukata Yehowa akakitshi bukidibukidi bua kupaasha baaba booso abakuatshishena bufumu buaye.​—Es. 38:21-23.

12. Nkinyi akikakitshikila ino nyema yoso ya bukielo?

¹² Nkinyi akikakitshikila ino nyema yooso ya bukielo? Kibafumbwilwe 19:20 aluula’shi: “Na nyema bakwatshilwe, mpaa na mutemuki a madimi abaadi n’aye, wiinyi baadi mukite bilengyeleshi kumpala kwaye bibaadi mulubishe nabio baaba babeelwanga kitundwilo kia nyema, na baaba babalangwilanga kifwanyi kiaye. Babeelwe booso bubidi abatala mwishiba dia kaalo aditeembe suufule.” Sunga mbiabaki’abatungunuka na kufuba, bano bena politike booso beshikuanyi b’Efile Mukulu abakaluishibua bua looso.

13. Nkalakashi kinyi ayipete bena Kidishitu pa muanda wa guvernema ya muno mu nsenga?

¹³ Bino abipushisha kinyi kuatudi? Bu biatudi bena Kidishitu, abitungu tulamate kui Efile Mukulu na Bufumu buaye. (Yo. 18:36) Bua kukita bino abitungu kuleka kutuelakana mu mianda ya politike ya ino nsenga iluile. Bua kushaala kushi kutuelakana mu mianda ya ino nsenga bi bukopo, muanda mbulamatadi ya ino nsenga ayitutekie bua’shi tuibakuatshishene mu ngakuilo sunga mu bikitshiino. Baaba booso abakuatshika ku bukitshishi bua uno nyema, abakapete kitampi. (Kibaf. 13:16, 17) Yawa ooso akedibua kitampi na uno nyema a bukielo, t’akakuminyibua dingi na Yehowa nya na dingi akashimisha mpaa na muwa wa ikalayika. (Kibaf. 14:9, 10; 20:4) Bi na muulo bua’shi tushaale kushi kutuelakana mu mianda ya ino nsenga, sunga mbulamatadi ya ino nsenga yetukitshisha pa bukopo bua’shi tuiyikuatshishene mu mishindo yoso yaya!

MFUDIILO A NDUMBA MUKATA E BUUFU

14. Ingi mianda kinyi ya kukaanya i bamuene Yowano mutumibua bu biabadi bebileshe mu Kibafumbwilwe 17:3-5?

¹⁴ Yowano mutumibua mmuleshe’shi baadi “mukaanye bikata” bua bintu bibaadi mumone. Mbintu kinyi bibaadi mumone? Mmuana mukashi mushaale panundu pa ino nyema yooso ya bukielo. (Kibaf. 17:1, 2, 6) Baadi muilengieshe bu “ndumba mukata” na abamuitanyina bu “Babilone mukata.” Mukite “lukyebanokyebano” na “bamfumu bakata ba pa nsenga.”​—Badika Kibafumbwilwe 17:3-5.

15-16. “Babilone mukata” nkinyi, na mmushindo kinyi watumuiuku?

¹⁵ “Babilone mukata” nnanyi? Uno muana mukashi ta mulombene kulesha ndumbuluilo ya politike nya, muanda abamuakula’shi kuete kukita lusandi na bakunkushi ba politike ba mu ino nsenga. (Kibaf. 18:9) Kuete ekitshisha buadia kukunkusha bano bakata ba politike mu ngakuilo a mu kifuanyi mmuibashaale mu mongo. Na dingi, ta naye aleesha ndumbuluilo a mianda ya busunga bua luabi ya mu uno ndumbuluilo a Satana nya. Bano booso babadi baleshe mu Kibafumbwilwe bu “bansuunga ba pa nsenga.”​—Kibaf. 18:11, 15, 16, Kilombeeno Kipya 2014.

¹⁶ Mu bifundue, kishima “ndumba mukata,” nkilombene kulesha kufubila Efile Mukulu, kadi muntu ekala muipaane mu ingi mishindo ya lulanguilo lua mankishi, sunga mu ingi mishindo ya kuikala bu kuuku na uno ndumbuluilo e bubi. (1 Mya. 5:25; Shak. 4:4) Mu kuilekeena na biabia, baaba booso abalanguila Efile Mukulu na lulamato, mbebaleshe bu “tumame” sunga be selele. (2 Kod. 11:2; Kibaf. 14:4, Kilombeeno Kipya 2014) Babilone a kala nyi baadi mbalo ikata ya lulanguilo lua madimi. Babilone mukata, mmulombene kulesha ndanguilo yoso ya madimi. Biabia, nnaye ampire mukata a lulanguilo lua madimi mu nsenga ishima.​—Kibaf. 17:5, 18; tala mu site a jw.org mu muisambo wi pa mbalo ifunde’shi: “Babilone mukata nkinyi?”

17. Nkinyi akikakitshikila Babilone mukata?

¹⁷ Nkinyi akikafikila Babilone mukata? Kibafumbwilwe 17:16, 17 aluula luno lukonko mu uno mushindo’shi: “Na nsengwa ekumi yibomono, na nyema, mbaabano abakashikwa mukashi mwina lusandji na abakamuleka shii na kintu na e muswa, na abakadia mwiita waye bakamushiikye ku kaalo, Mwanda Efile Mukulu batuulu mu mashimba aabo bwa kutumikila kinangu kiaye, na bwa kutumikila kinangu kiaye.” Oolo Yehowa akatakula miilo buayidia kufubisha nyema a bukielo moonga pididi sunga Nations unies buadia kualulukila uno ampire mukata a nsenga ishima a luluanguilo lua madimi bua kumubutula bua losoo.​—Kibaf. 18:21-24, Kilombeeno Kipya 2014.

18. Nkinyi akishinkamisha’shi ta tui bakite kintu su nkimune akikuatshishena Babilone mukata?

¹⁸ Bino abipushisha kinyi kuatudi? Abitungu tulame mufubo wa bu “balangwidi wi selele na ushii katoba kumpala kw’Efile Mukulu Nshetu.” (Shak. 1:27, Kilombeeno Kipya 2014) Biabia t’abitungu’shi tulekiele malongiesha a madimi, misangeelo ya ba mpangaano, miya, na bikitshiino bia bikudi bibi bia mu Babilone mukata bikale na bukitshishi kuatudi nya! Biabia abitungu tutungunukie na kuitanyina bantu bua’shi ‘batuukie munkatshi muaye’ tala bamukuatshishena ku miluisho yaye kumpala ku’Efile Mukulu.​—Kibaf. 18:4, Kilombeeno Kipya 2014.

KIIMU BUA BESHIKUANYI B’EFILE MUKULU

19. “Kinyoka kikata kimongolokye” nnanyi?

¹⁹ Mukanda wa Kibafumbwilwe aulesha dingi “kinyoka kikata kimongolokye.” (Kibaf. 12:3, Kilombeeno Kipya 2014) Kino kinyoka kikata akilu na Yesu na ba mikeyilu baye. (Kibaf. 12:7-9) Akituuku muilo w’Efile Mukulu ngoshi, na akipa uno nyema a bukielo sunga guvernema a bena politike bukome. (Kibaf. 12:17; 13:4) Kino kinyoka kikata nanyi? Nyi “nyoka a kala, uno abetanyina bu Diabulu na bu Satana.” (Kibaf. 12:9; 20:2, Kilombeeno Kipya 2014) Aye nyi kuete kukuatshishena baaba beshikuanyi booso ba Yehowa.

20. Nkinyi akikakitshikila kinyoka kikata?

²⁰ Nkinyi akikakitshikila kinyoka kikata? Mukanda wa Kibafumbwilwe 20:1-3 aupatuula’shi muikeyilu akeele Satana mu lupongo lula, luikale bu luaye lukano sunga mbalo yashi mulombene kukita kintu. Muamua mu lupongo lula, Satana ‘t’akalubisha dingi miilo mpaa na apakalombana bipua 1 000.’ Ku mfudiilo a bioso, Satana na ba demo baye na booso abamukuatshishena abakaluishibua na belue “mwishiba dia kaalo na suufule.” (Kibaf. 20:10, Kilombeeno Kipya 2014) P’onangushena kapeela apakekala mu nsenga tamuki Satana na ba demo baye. Kiakia kipungo akikekala buwa bukile!

21. Buakinyi tui balombene kuikala na muloo pabitale mianda ibatukatuka mu kubadika mu mukanda wa Kibafumbwilwe?

²¹ Abitunyingisha ngofu nsaa yatupusha akipushisha bino bitunduilo bioso biabadi batuushe mu mukanda wa Kibafumbwilwe! Ta tui bapete nka penda mushindo wa kutundula bi beshikuanyi ba Yehowa nya, kadi tubamono dingi akikebakitshikila. Oolo, ‘Sha muloo ngiawa abala n’eyi di bukopo na baaba abapusha mayi a buno butemuki’! (Kibaf. 1:3) Anka nsaa yabakabutula beshikuanyi b’Efile Mukulu bafubi baye baasha lulamato abakapete miabi i bungi. Atukesambila dingi uno muanda mu muisambo wetu wa mfudiilo wa ku ino miisambo isatu.