Nyema ebubi sha mitue musambo abadi besambile mu Kibafumbwilwe shapitre 13 apatuula kinyi?
Lualuulo lua mu Bible
Nyema ebubi sha mitue musambo abadi besambile mu Kibafumbwilwe 13:1 alesha ndumbuluilo a mianda ya politike ya mu nsenga ishima.
E na matalua, bufumu, na nkuasa a bufumu; abilesha ndumbuluilo a mianda ya politike.—Kibafumbwilwe 13:2.
Kuete kumunana pa “bisamba bioso na bantu na ndimi na miilo yoso,” biabia mmukata kukila mbulamatadi a eumbo dimune.—Kibafumbwilwe 13:7.
Mmusangie bitunduilo bia nyema inanka yabadi besambile mu butemuki bua Ndanyele 7:2-8, e na mpala ya Ngie mikoolo ya Urse, na eyilu dia Ntambue, na nsengua ekumi. Nyema yabadi batemune mu butemuki bua Ndanyele, ayilesha banfumu kampanda, sunga mafuku a politike, aamunana mu kuilondena kua ma ampire. (Ndanyele 7:17, 23) Biabia nyema ebubi abadi batemune mu Kibafumbwilwe 13 alesha ndumbuluilo a politike musangie mbulamatadi ya mu nsenga ishima.
Kuete kutuuka mu “kalunga ka mema,” nyi nkuamba’shi bantu ba mu nsenga abakitaa ino mbulamatadi.—Kibafumbwilwe 13:1; Yeeshaya 17:12, 13.
Bible amba’shi bungi sunga eshina dia yawa nyema—666—nyi ‘mbungi bua muntu.’ (Kibafumbwilwe 13:17, 18) Uno muaku aulesha’shi yawa nyema a mu Kibafumbwilwe 13 nyi ndumbuluilo a bantu, kushi bu ndumbuluilo a mu kikudi sunga a demo nya.
Sunga bena maumbo bekala abepushena mu mianda ipeela, mbekuatene mu kitshibilo kiabo kia kulama matalua aabo pamutue pa kuiyisha muushi mua Bufumu bu’Efile Mukulu. (Misambo 2:2) Abakebungu dingi bua kulua na biluilo bi’Efile Mukulu biabakunkusha kui Yesu Nkidishitu mu nsaa ya Armagedone, anka ku ino ngoshi, abakayipa bena maumbo.—Kibafumbwilwe 16:14, 16; 19:19, 20.
“Nsengua ekumi na mitue musambo”
Mu Bible mbatemune bungi kampanda bua kulesha kintu kampanda. Kileshesho, ekumi, na musambo abilesha bungi bukumbane. Akikuasha bua kupusha kalolo kipatuluilo kia “nsengua ekumi na mitue musambo” ya nyema a mu Kibafumbwilwe 13 nyi ‘nkifuatulo kia nyema e bukielo’ abadi baleshe kunyima mu Kibafumbwilwe bu—nyema e na elangi dimonga sha mitue musambo na nsengua ekumi. (Kibafumbwilwe 13:1, 14, 15; 17:3) Bible amba’shi mitue musambo ya uno nyema monga aipatuula “banfumu musambo,” sunga mbulamatadi.—Kibafumbwilwe 17:9, 10.
Bi mumune, mitue musambo ya nyema ebubi abadi besambile mu Kibafumbwilwe 13:1 ayilesha mbulamatadi musambo nyi nkuamba’shi: bukome bua politike bua kumpala bua nsenga ishima bubaadi bumunane na bubaadi bukiengieshe muilo w’Efile Mukulu ngofu:—Ejipitu, Azi, Babilone, bua bena Mede na bena Perse, Grece, Loma, na Anglo-Americain. Su tubamba’shi nsengua musambo ayilesha maumbo biaekala akata sunga apeela, abilesha’shi, kifulu kia bufumu ki ku mitue ya nsengua yoso akilesha’shi eumbo dioso dikuete kumunana pamune na eumbo dikile angi oso bukome mu nsenga ishima mu kiakia kipungo.