2 | “Kusambibwa akutukila mu Bifundwe”

BIBLE AMBA’SHI: “Byooso bibaabadi bafunde kala Muiyi dy’Efile Mukulu, mbwa’shi, ku katshintshi na kusambiibwa abituukila mu Bifundwe, tupete lukulupilo.”—BENA-LOOMA 15:4.

Ki’abipatuula

Mu Bible mui binangu bi bungi, bilombene kuitupa bukome na kunyingiila kuatudi nako lukalo, bua kukambila mianda ayitukalakasha mu binangu. Mukandu wa mu Bible awitupa dingi lukulupilo lua’shi mu mafuku apeela’mu, lukalakashi lua mu binangu, t’alukekala kuanka dingi.

Mushindo ulombene bino nkukuasha

Atue booso atupushaa kenyongoshi ingi nsaa; anka, baaba be na lukalakashi lua mu binangu lu’abetanyina bu dépression, abakiengaa nsaa yooso na kenyongoshi. Bible e kukuasha mushindo kinyi?

Bible atushaa binangu bi bungi bi buwa, abitungu bipiane binangu bi bubi. (Bena-Fidipe 4:8) Tui balombene kuikitshisha bua kuusha mu binangu bietu na mianda ayinyingisha, na binangu bitaale bilombene kuitukuasha bua kukambila mianda ayikalakasha binangu bietu.—Misambo 94:18, 19.
Bible mmulombene kuitukuasha buatudia kuleka kunangushena’shi ta tui na muulo.—Luuka 12:6, 7.
Ma verse e bungi a mu Bible aetushinkamiisha’shi ta tui bupenka nya na’shi Efile Mukulu, Mupangi eetu, auku kalolo bi’atupushaa.—Misambo 34:18; 1 Yowano 3:19, 20.
Bible etulaa’shi Efile Mukulu akakatusha lukalakashi looso lui mu binangu bietu. (Yeeshaya 65:17; Kibafumbwilwe 21:4) Nsaa ya tukuete kukienga na kenyongoshi ka mu binangu, abitungu tumone’shi uno mulayilo awitupa bukome bua kunyingiila.

Bikuete Bible kukuasha Jessica

Bukitshishi buinabo lukalakashi lua mu binangu lu’abetanyina bu dépression kuandi

“Pa naadi na bipua 25, naadi na maladi a mishila ya mu bongo, pa naadi mukepimishe, babankuatshile na lukalakashi lua mu binangu lu’abetanyina bu dépression e bukopo. Naadi nakiengie nsaa yooso bua binangu bibaadi abintentekiesha mianda ya kala. Ba munganga babaadi bankuashe bua kupusha’shi lukalakashi lua mu binangu lu’abetanyina bu dépression, lubaadi lunkuate muanda wa kunangushena ku mianda i bukopo ibaadi inkitshikile mu nshalelo ande. Kukatusha buanga bui buwa bunaadi natomo, naadi na lukalo na malango a kunkuasha bua’shi ndekie kunangushena ku mianda ayinkalakasha mu binangu.”

Binkuashe Bible

“Pa naadi na lukalakashi lua mu binangu lu’abetanyina bu dépression, binangu bibaadi abimpalakana ngofu, kuinyongola kukilekile, na kukutua kua tulo. Ke bungi, bufuku, naadi nepusha mu binangu biande, mbiwule nka na mianda ya tuinyongoshi ibaadi mu mutue muande. Nka bu abipatuula mukanda wa Misambo 94:19, Efile Mukulu mmulombene kuitusamba na kuitukuatshishena patudi bakalakashibue na tuinyongoshi. Ngi buakinyi, naadi nalama Bible na mianda inaadi nafundu ku lupese, ya mu bifundue abinyingisha peepi na lusala luande. Nsaa inaadi nakutua mushindo wa kulaala tulo, naadi nabadika angi ma verse a mu Bible, p’ami kukita bino, naadi natadiila’shi binangu bi’Efile Mukulu binsambe.

“Bible etukankamika buatudia kukumba binangu, ku mianda ikutuene na ki’atuuku pabitale Efile Mukulu. Kala, naadi mushinkamishe’shi ntshi naadi na muulo, na’shi ntshi mufudibue. Aku namu, ne mulongie’shi uno mushindo wa kunangushena nguikutuene na Bible, Bible alesha’shi Efile Mukulu Nshe bana e na kifulo na lusa, na etupasukilaa pa bupenka. Ku kapeelakapeela, ne mulongie biandia kukunkusha binangu biande pa mutue pa’shi abio binkunkushe. Ne mulongie biandia kuimona nka bu abimmonaa Efile Mukulu. Dino etabula di na muulo dibaadi adinkuasha buandia kuleka mueneno ande e bubi anaadi naye pa bintale ami nabene.

“Nkuete kutengiela na kinsukunsuku kioso, kipungo akikashimina nkalakashi ya mu binangu na mianda yooso ayinkalakasha. Nauku’shi mu mafuku aafiki, t’akuikala nkalakashi ya mu binangu nya. Kuuka bino, akunkuasha buandia kunyingiila kubanga binobino na kutengiela na kinsukunsuku kioso mafuku aafiki, kipungo kianshankekalanyi na lukalakashi lua mu binangu lu’abetanyina bu dépression su ndumune.”