3 | Bilombene bileshesho bia mu Bible nkukuasha

BIBLE ALESHA’SHI . . . Bana balume na bakashi baasha lulamato babaadi abapete mianda “nka bu’twe.”—SHAKE 5:17.

Ki’abipatuula

Ma verse a mu Bible ngawule na mianda ya mu nshalelo ya balume na bakashi, babaadi bapete nkalakashi ya mu binangu mu nshalelo aabo. P’obadika mianda yabo, osangana’shi bantu ba mu Bible babaadi na nkalakashi nka bu’tue.

Mushindo ulombene bino nkukuasha

Atue booso atukumiinaa’shi bangi bawukie biatuipusha. Bikishekishe su okuete kunyingiila lukalakashi lua mu binangu. Nsaa y’atubadika mianda ibaabadi bamone kui bantu ba mu Bible, atutundula’shi bangi ba kuabadi babaadi na binangu na kuipusha nka bu’tue. Bu kipeta, atumono’shi bangi ba kuabadi babaadi abakiengie nka bu’tue, na t’atuipusha bupenka nsaa y’atuikadika na kenyongoshi sunga lukalakashi lua mu binangu nya.

Mu Bible mui bishima bi bungi, bia bantu babaadi abepusha bu bashi bakuashibue na bashi na lukulupilo. Tobuelele namu binangu wamba’shi: ‘Bino tábikilanga’? Moyise bebiakuile, nka bu Eliya na Davide.—Mbadiko 11:14; 1 Banfumu 19:4; Misambo 55:4.
Bible etulungula pabitale muana mukashi abetanyina bu Anna baadi na “kinyongwa kikata,” muanda ta baadi na mushindo wa kupeta muana, na mukuanaaye baadi amukaa pabitale wawa muanda.—1 Samwele 1:6, 10.
Bible etulungula pabitale muana mulume abetanyina bu Yobo e nka bu’tue. Sunga mbibaadi na lukumiino lunyiingie mui Yehowa, baadi mukiengie na kukalakashua mu binangu na aye nkuamba’shi: “Tánkôkanga namu, tankyebe kwikadidîla na mûw’ami.”—Yoobo 7:16.

P’atulongo pabitale mianda ya bano balume na bakashi ba mu Bible, na mushindo wabadi boobeshe kukambila binangu biabo bi bubi, n’atue namu tui balombene kupeta bukome buatudi naabo lukalo bua kukambila tuinyongoshi tuetu.

Bikuete Bible kukuasha Kevin

Bukitshishi buinabo maladi a mu binangu kuandi

“Babaadi bankuate na maladi a mu binangu pa naadi peepi na kulombasha bipua 50. Kubaadi mafuku a naadi nepusha’shi ne mulombene kupudisha lukalakashi looso lualua mu nshalelo ande. Anka, angi mafuku namu nepusha’shi muwa ta wi na muulo mu nshalelo ande.”

Binkuashe Bible

“Muntu a mu Bible baadi muipushe nka bu ami, nyi Mpiele mutumibua. Bakitshiine bilubilo bibaadi bimutakule mu kuipusha’shi te na muulo. Biabia, pa mutue pa kutungunuka na kunangushena mu uno mushindo, Mpiele baadi akimbi ba kuuku ba kumupasukila. Su nakisha efuku bi bubi bua maladi ande a mu binangu, bilubilo biande ami nabene abinyishaa kunkalakasha na nepushaa’shi ntshi na muulo. Nka bu Mpiele, ne mulongie’shi abitungu kuikitshisha bua kuifubuila kui ba kuuku bande abakumiina kunkuasha bua’shi ntshikookanga mu nshalelo ande.

“Ungi muntu a mu Bible baadi munyingishe ngofu nyi Mfumu Davide. Baadi apusha lukalakashi lua mu binangu lu’abetanyina bu dépression misuusa i bungi bua muanda waye, na baadi enyongola ngofu bua bilubilo biaye bia kala. Naadi nepusha nka bu aye, muanda ingi nsaa naadi nakitshi sunga kuakula bintu binaadi nenyongola kunyima. Nemupete mayi a Davide e mu mukanda wa Misambo 51 anyingishe. Mu verse 5, Davide amba’shi: ‘Neûku bi myanda yandji mukusôlele, milwisho yande nkwete kwiitentekyesha mafuku oso, (EEM).’ Bino mbindeshe binyibinyi mushindo wandi mulombene kuipusha nsaa yandi mu lukalakashi lua mu binangu lu’abetanyina bu dépression, na biandi mulombene kuikitshisha bua kunangushena bi buwa pa bintale ami nabene. Anka, naadi dingi mupushe nka bu abilesha mayi a Davide mu verse 12, aamba’shi: ‘Obe Efile Mukulu, mpe namu eshimba dilamate’nka kodi! Mpangûle ongikashe na kishima modi, (EEM).’ Pamfubisha ano mayi mu luteko aankuasha bua kuipusha mu mushindo wilekeene pa bintale ami nabene. Mfudiilo a bioso, verse 19, mmunyingishe ngofu. Amba’shi: ‘Efile mukulu, toosumbusheenaa eshimba diinyongole na disaasukye, (EEM).’ Uno verse mmushinkamiishe’shi Efile Mukulu mmufule.

“Pa nangushenaa ku bileshesho bia mu Bible na ku kiabadi bampe kui Efile Mukulu lelo uno, abinyingisha lukulupilo luande lua mafuku aafiki. Milayilo ya mu Bible ngikadikie kuandi ya binyibinyi, na ayinkuasha ngofu bua’shi ntshikookanga.”