4 | Bible atushaa malango e buwa

Ki’abipatuula

Sunga Bible nta mukanda wa ba munganga, kuete atuusha malango e buwa na aakuasha. Ano malango ngalombene kukuasha muntu kuete kukumba maladi a mu binangu e bukopo. Tubandeyi kutala bingi bileshesho.

Mushindo ulombene bino nkukuasha

“Ta mbee na mbidi bukome bee na lukalo na munganga, anka baa-sha-mikumbo.”​—MATEO 9:12.

Tui kuikala na lukalo na kiukilo kia mu Bible nka bu biatuikalaa na lukalo na buanga bua’shi buitubukie. Bantu be na lukalakashi lua mu binangu, mbapete bukuashi pabadi bawukie kalolo lukalakashi luabo na pa kuenda kui ba munganga.

“Kalashishi ka mbidi ke buwa bua mbidi yobe.”​—1 TIMOTE 4:8, NWT.

Kuata nsaa ya kukita kalashishi ka mbidi, nkulombene kukukuasha bua lukalakashi lobe lua mu binangu. Mu bino biubishi mui kukita kalashishi ka mbidi misuusa i bungi, kudia kidibua akitungu, na kulaala tulo tui bungi.

“Muloo wa mwishimba aupashaa muntu, kinyongwa akinyaanyishaa mbidi.”​—NKINDJI 17:22.

Kubadika ma verse a mu Bible aanyingisha na kuata bipatshila biodia koobesha, bi nkukuasha bua kulama muloo wa mu binangu. Su botuulu binangu biobe ku mianda i buwa mu nshalelo oobe, na kukulupila’shi ino mianda i buwa ayikakitshika mu mafuku aafiki, bino bi nkukuasha bua kukambila nkalakashi yobe ya mu binangu.

“Beeyishe ngi baa-sha-binangu.”​—NKINDJI 11:2.

Su omona’shi tue na mushindo wa kukita kintu su nkimune ki’okumiina kukita obe nabene, kumiina bukuashi bua bangi. Bena kifuko na ba kuuku abakumiina kukukuasha, anka t’abauku kiabadia kukita. Ebalungule baukie kiabadi balombene kukukuasha nakio. Ikala na nkatshinkatshi ku ki’otengiela’shi bakukitshiine, na kuikala na lutumbu lui bungi ku kioso ki’abakupa.

Mushindo wi malango a mu Bible akuashe bantu abakumbanga

“Naadi nepusha bishi buwa, ngi ami nkukatala munganga. Baadi na mushindo wa kutundula lukalakashi luande. Bino bibaadi binkuashe bua kuuka kibaadi akinkalakasha, na kuuka buanga buandi mulombene kutoma bua kuikadika na mbidi bukome.”​—Nicole,a baadi akumbu maladi a mu binangu.

“Ne musangane’shi kubadikanga Bible na mukashi ande, nkunkuashe bua kubanga efuku na binangu bi buwa, na kuibinyingisha. Na mafuku e bungi pandi na lukalakashi, nabadikaa verse anyingishaa.”​—Peter, baadi na lukalakashi lua mu binangu lu’abetanyina bu dépression.

“Bibaadi bokopo buandia kulungula bangi pabitale lukalakashi luande, muanda naadi na buufu. Anka kuuku ande a p’eshimba baadi ampusha kalolo na kuituulanga pa mbalo yande. Baadi munkuashe binyibinyi buandia kuipusha bi buwa, na kuipusha’shi ntshinaadi bupenka nya.”​—Ji-yoo, baadi na lukalakashi lua kukutua kua kudia kalolo.

“Bible baadi munkuashe, buandia kuikala na nkatshinkatshi, na binangu bi buwa nsaa ayitungu’shi mfube na kuikisha. Bino binangu bibaadi binkuashe buandia kunyingiila lukalakashi lua mu binangu lunaadi nalo.”​—Timothy, baadi na lukalakashi lua mu binangu lui bukopo.