MUISAMBO WA KULONGA 16
‘Mukwenu akasaanguka’!
“Yesu balungwile [Maata] shi: ‘Mukwenu akasaanguka.’” —YO. 11:23, Kilombeeno Kipya 2014.
LOONO 151 Akayitamina
KI’ABAKUILA MUANKAa
1. Mmushindo kinyi ubaadi ungi muana mulume muakule bua lukulupilo luaye lua lusangukilo?
UNGI muana mulume abetanyinaa bu Matthew, baadi na mukumbo wi bukopo ubaadi autungu’shi bamubaale misuusa i bungi. Pa baadi na bipua musambobidi, aye na bena kifuko naye babaadi babandile muisambo wa ku mueshi wa mu Televizio a JW. Peepi na mfudiilo a programe, babaadi bamone loono lui na video aluisambila pabitale kukuukila bantu babadi bafule babasanguka.b Pa bapuile programe, Matthew bayile kui baledi baaye ebakuata ku maboko na kuibalungula’shi: “Nubamono, mama na papa? Sunga nafua nakasanguka. Nui balombene kuntengiela; nakekala biya.” We kunangushena bibaadi bano baledi bapushe, pa babaukile mushindo ubaadi muana aabo na lukumiino lunyingie mu lusangukilo?
2-3. Buakinyi bi buwa buatudia kunangushena ku mulayilo wa lusangukilo?
2 Nsaa yooso, atukitshi kalolo p’atunangushena ku mulayilo wa mu Bible, wa lusangukilo lua mu mafuku aafiki. (Yo. 5:28, 29) Buakinyi? Ku muanda t’atuukaa nsaa yatudi balombene kupeta maladi e bukopo, sunga kufuisha muntu atudi bafule mu kabasamushi. (Mul. 9:11; Shak. 4:13, 14) Lukulupilo luetu lua lusangukilo, ndulombene kuitukuasha buatudia kunyingiila ino nkalakashi. (1 Tes. 4:13) Bifundue abitushinkamiisha’shi, Nshetu e muiyilu etuuku kalolo na mmuitufule ngofu. (Luk. 12:7) Yehowa Efile Mukulu, etuuku kalolo kakile mu mushindo wa’shi aketusangula, nka na buabua bumuntu buetu bumune, na binangu bietu bimune. Yehowa mmuitufule ngofu, na mmuitupe mushindo watudia kuikala na muwa wa ikalaika, sunga tuafua aketusangula!
3 Mu uno muisambo atukesambila kia kumpala, buakinyi tui balombene kukumiina mu mulayilo wa lusangukilo. Kia kabidi, atukataluula muanda wa mu Bible aunyingisha lukumiino pabitale bino bishima bia mutue wetu wa muanda abiamba’shi: ‘Mukwenu akasaanguka.’ (Yo. 11:23, Kilombeeno Kipya 2014) Kia kasatu, atukalongo mushindo watudi balombene kunyiisha kuikala na lukulupilo lua lusangukilo.
BUAKINYI TUI BALOMBENE KUIKALA NA LUKUMIINO MU MULAYILO WA LUSANGUKILO
4. Bua kukumiina mu mulayilo, abitungu tuikadikie na kishinkamiisho su? Tuusha kileshesho.
4 Bua kukumiina mu mulayilo, abitungu tushinkamishe’shi yawa muntu muiwulee e na lukalo lui buwa na bukome, sunga ngobesha ya kuiwulombasha. Tubande kuata kileshesho: Puandikisha’shi kipapi kibaluisha nshibo yobe. Kuuku oobe baafiki, bakulaa’shi, ‘nankukuasha bua kuibakuula nshibo yobe.’ Bebiakula n’eshimba dioso, na we mushinkamishe’shi e na lukalo lua nkukuasha. Su e na mayele a kuibaka na e na lukalo na biina mudimo, owuku’shi e na ngobesha ya nkukuasha. Biabia, okumiina mu mulayilo waye. A bikuikadika naminyi pabitale mulayilo w’Efile Mukulu wa lusangukilo? Mu binyibinyi, e na lukalo na bukome bua kuiwulombasha?
5-6. Buakinyi tui balombene kushinkamisha’shi Yehowa e na lukalo lua kubusha bafue?
5 Yehowa, e na lukalo lua kubusha bafue? Oolo, ngi lukalo luadi nalo. Baadi muyokiele bafundi ba Bible be bungi, buabadia kufunda mulayilo waye wa lusangukilo lua mafuku aafiki. (Yesh. 26:19; Os. 13:14; Kibaf. 20:11-13) Nsaa ayilaa Yehowa, ebilombashaa misuusa yooso. (Yos. 23:14) Yehowa ngi mukumiine nkasangula baaba booso bafue. Buakinyi tui kuamba bino?
6 Tubandeyi kutala bishima bia mfumu a kifuko Yobo. Baadi mushinkamishe’shi sunga afua, Yehowa akumiina kumumona dingi na muwa. (Yob. 14:14, 15) Yehowa apushaa nka mu uno mushindo umune bua balanguidi baaye booso bafue. Mmukumiine kuibabusha dingi na muwa, na mbidi bukome, na muloo. A bi kuikadika naminyi bua midiyala ya bantu batababafuile kushi’bo kupeta mushindo wabadia kulonga bia binyibinyi pabitale Yehowa? Efile Mukulu eetu sha kifulo, akumiina kuibasangula nabo. (Bik. 24:15) Akumiina kuibapa mushindo wabadia kufika ba kuuku baaye, na kupeta muwa wa ikalaika pa nsenga. (Yo. 3:16) Abipushika kalolo’shi Yehowa e na lukalo lua kusangula bafue.
7-8. Buakinyi tui balombene kushinkamisha’shi Yehowa e na bukome bua kusangula bafue?
7 Yehowa e na dingi bukome bua kusangula bafue su? Oolo! Aye ‘Nsha-bukome booso.’ (Kibaf. 1:8) Biabia, aye e na bukome bui bungi bua kubutula muishikuanyi ooso yawa, mpaa na lufu. (1 Kod. 15:26) P’atuuku bino, abitunyingisha na kuitusamba. Tubandeyi kutala muanda wabadi bamone kui mukuetu mukashi Emma Arnold. Aye na kifuko kiaye, lukumiino luabo lubaadi lutompibue mu Ngoshi ya kabidi ya Nsenga ishima. Emma baadi musambe nsonguakashi aaye, ku muanda wa bantu baadi mufule babaadi bafue ku lukano lua ba Nazi. Amba’shi: “Su bantu bafue ta mbalombene kupeta dingi muwa, bino abilesha’shi lufu muishikuanyi netu, e bukome kukila Efile Mukulu, aku namu ta ngi biabidi nya.” Mu binyibinyi, ta kui kintu su nkimune ki bukome kukila Yehowa! Efile Mukulu sha bukome booso bapangile muwa, ngi e na ngobesha ya kualuisha baaba booso bafue muwa.
8 Kangi kabingilo ka buakinyi atuuku’shi Efile Mukulu e na ngobesha ya kusangula bafue nka’shi, e na binangu bishi na mfudiilo. Ayitanyinaa luenyenye looso muishina dialo. (Yesh. 40:26) Dingi, atentekieshaa booso batababafuile. (Yob. 14:13; Luk. 20:37, 38) Mbibofule buadia kutentekiesha tumianda tupeela kantu pa kantu, pabitale baaba bakasangula. Bino mbitale mapala aabo, bumuntu buabo, mianda ibabakitanga mu nshalelo aabo, na binangu biabo.
9. Buakinyi okumiina mu mulayilo wa Yehowa wa lusangukilo lua mu mafuku aafiki?
9 Abipushika kalolo’shi, tui balombene kukumiina mu mulayilo wa Yehowa wa mu mafuku aafiki, ku muanda atuuku’shi e na bioso bibidi lukalo na bukome bua kuiwulombasha. Tutaleyi kangi kabingilo ka kukumiina mu mulayilo w’Efile Mukulu wa lusangukilo: Nka’shi Yehowa tababushiishe bantu. Mu mafuku a kala, Yehowa baadi mupe ndambo ya bantu babaadi na lulamato bukome, mpaa na Yesu bua kusangula bafue. Tubandeyi kutaluula lusangukilo lumune lua ku nsangukilo ibaadi Yesu mukite, yabadi baleshe mu mukanda wa Yowano shapitre 11.
YESU BAFUISHA KUUKU AAYE ADI MUFULE
10. Nkinyi kibakitshikile pa baadi Yesu alungula mukandu wi buwa asabuka muela wa Yordano ende ku Betani, na nkinyi kibaadi mukite? (Yowano 11:1-3)
10 Badika Yowano 11:1-3. Banda kunangushena muanda ubakitshikile ku Betani peepi na ku mfudiilo kua kipua kia 32 bino bipungo bietu (B.B.,) Yesu baadi na ba kuuku baaye ba kifulo mu kiakia kibundi, Lazare na bakuabo bakashi babidi, Mariya na Maata. (Luk. 10:38-42) Anka, Lazare pa baadi akumbu, bakuabo bakashi babaadi benyongole bikile. Babaadi batume mukandu kui Yesu, Yesu namu baadi asabuka muela wa Yordano, buakukekufika bibadi abitungu kutambuka pangi mafuku abidi kukatuka ku Betani. (Yo. 10:40) Bi malua, muanda Lazare bafuile pa baadi winyi mukiendi ta wakafikile kui Yesu. Sunga Yesu bawukile’shi kuuku aaye ki’akatuka mu kufua, bashadile nka kuakua akita mafuku akile pa abidi, akupu enda ku Betani. Biabia, pa bafikile Yesu, Lazare tabaadi mupue kufua munda a mafuku ananka. Yesu pa bafikile, bakitshiine kintu kampanda bua kukuasha ba kuuku baaye na kutumbisha Efile Mukulu.—Yo. 11:4, 6, 11, 17.
11. Pabitale bukuuku ndilongiesha kinyi diatudi balombene kupetala ku uno muanda?
11 Atupete dilongiesha pabitale bukuuku ku uno muanda. Tubandeyi kutala bino: Pa baadi Mariya na Maata batume mukandu kui Yesu, ta babaadi bamutekie bua’shi afikie ku Betani nya. Babaadi bakule nka penda’shi kuuku aaye a kifulo e na maladi. (Yo. 11:3) Pa bafuile Lazare, Yesu baadi mulombene kumusangula nka kuakua kula kubaadi. Kadi, Yesu baadi mukumiine kuenda ku Betani bua nkemoneena na ba kuuku baaye Mariya na Maata. We na kuuku akumiinaa nkukuasha koshi mumutekie su? Dingi, we mulombene kumukulupila bua nkukuasha mu ‘kipungo kya mpombo.’ (Nki. 17:17) Anka bu Yesu, tui kuikadika kuuku e biabia bua bangi! Bua binobino, tubandeyi kualuka ku muanda wetu na tumone kibaadi kikitshikie dingi.
12. Yesu baadi mulee Maata kinyi, na buakinyi Maata baadi mulombene kukumiina ku uno mulayilo? (Yowano 11:23-26)
12 Badika Yowano 11:23-26. Maata bawukile’shi Yesu e peepi na Betani. Bayile nka paapa bua nkafumankana naye na kuamba’shi: “Mwanaana, su boody’a kwikala panka, mukwetu tabaady’a kufwa nya.” (Yo. 11:21) Mu binyibinyi, Yesu baadi mulombene kupaasha Lazare. Anka Yesu baadi akumiina kukita ungi muanda aukaanyisha ngofu. Amulaa’shi: ‘Mukwenu akasaanguka.’ Baadi mupe dingi Maata, kabingilo ke buwa bukile kadia kukumiina mu mulayilo waye pa bambile’shi: “Ami, ne lusaangukilo na muwa.” Eyendo, Efile Mukulu bapeele Yesu bukome bua kubusha bafue. Kumpala, basanguile ka nsonguakashi ako kaki’akakatuka mu kufua, asangula nyi ka nsongualume, abimueka’shi diadia efuku, kubafuile muana mulume. (Luk. 7:11-15; 8:49-55, Kilombeeno Kipya 2014) Anka, baadi mulombene kubusha muntu kampanda tabaadi mupue kufua takudi mafuku ananka na mbidi yaye tayibaadi ipue kunyanga su?
“LAZAARE, TUUKA!”
Yesu apusha lusa lukata bua ba kuuku baaye benyongole (Tala kikoso 13-14)
13. Muyile mukanda wa Yowano 11:32-35, Yesu bakitshiine kinyi pa bamuene Mariya na bangi bakuete kudila? (Tala dingi kifuatulo.)
13 Badika Yowano 11:32-35. Banda kunangushena muanda ubakitshikile dingi. Mariya ungi mukuabo mukashi na Lazare, bayile mu kufumankana na Yesu. Mariya, baadi muakule naye nka ano mayi amune amba’shi: “Mwanaana, su boody’a kwikala panka, mukwetu tabaady’a kufwa nya.” Mariya na bangi, babaadi benyongole bikile. P’aye kuibamona na kuibapusha bakuete kudila, Yesu baadi mupushe bubi bukile. Ku muanda baadi mupushe lusa lukile bua ba kuuku baaye, baadi mudile atusha mpolo. Baadi mupushe bi’abikiengieshaa kuishimba nsaa i muntu oodi mufule afu. Mu binyibinyi, e na kinsukunsuku kioso kia kupudisha mianda ibaadi itushe mpolo yabo!
14. Nkinyi kiatudi balombene kulongiela pabitale Yehowa ku bibaadi Yesu mukite pa baadi Mariya adidi?
14 Bibakitshiine Yesu pa baadi Mariya adidi, abitulongiesha’shi Yehowa nyi Efile Mukulu e na lusa lukata. Buakinyi tui kuamba bino? Nka bu bia tuibimuene mu muisambo ushaale, Yesu balesheshe bi binangu bia Nshaye mu mushindo upuidikie na bi’apushaa. (Yo. 12:45) Yesu baadi mudile ku muanda baadi mupushe lusa lukata, bua ba kuuku baaye babaadi benyongole. Biabia, atuuku’shi Yehowa apushaa namu naye luno lusa lukata, nsaa y’etumono atudidi. (Mis. 56:8) Mu binyibinyi, bino bi nkutakula biodia kuifubuila peepi n’Efile Mukulu eetu sha lusa.
Yesu alesha bukome buaye p’asangula bafue (Tala kikoso 15-16)
15. Nka bu biabadi bebileshe mu Yowano 11:41-44, nkinyi kibakitshikile ku mashama a Lazare. (Tala dingi kifuatulo.)
15 Badika Yowano 11:41-44. Pa bafikile Yesu ku mashama a Lazare, batekiele bua’shi bakatushe ebue dibaadi dishikiile kunundu kuawo. Maata amutosha na kumulungula’shi mbidi yaye tayibangile kununka. Yesu bamualuluile’shi: “Ntshi mukulungule’shi su okumiina, omono ntumbo y’Efile-Mukulu?” (Yo. 11:39, 40) Yesu batadile muiyilu, ateka munkatshi mua bantu. Baadi mukumiine kupa Yehowa ntumbo yooso bua kibaadi kikitshikie ku mongo. Akupu, Yesu belele musaase n’eyi di bukopo’shi: “Lazaare, tuuka!” Lazare nkutuka mu mashama! Yesu bakitshiine kintu kibaabadi abamono kui bangi’shi taki bia kukitshika.—Tala mayi e kuushi ku’esaki e mu Yowano 11:17 mu Bible a Traduction du monde nouveau édition d’étude.
16. Mmushindo kinyi wi muanda w’atusangana mu mukanda wa Yowano shapitre 11, aunyingisha lukumiino luetu mu lukulupilo lua lusangukilo?
16 Muanda wi mu mukanda wa Yowano shapitre 11, aunyingisha lukumiino luetu mu lukulupilo lua lusangukilo. Mmushindo kinyi? Tentekiesha mulayilo wa Yesu kui Maata awamba’shi: ‘Mukwenu akasaanguka.’ (Yo. 11:23, Kilombeeno Kipya 2014) Nka bu Nshaye, Yesu e na lukalo na bukome bua kulombasha uno mulayilo. Mpolo yaye ibalesheshe’shi, Yesu e na lukalo lukata lua kubusha bantu bapue kufua, na kukatusha tuinyongoshi atutukila ku lufu tukuete kupusha bantu. Na nsaa ibatukile Lazare mu mashama, Yesu balesheshe dingi’shi e na bukome bua kusangula bafue. Dingi, nangushena ku bibaadi Yesu mutentekieshe Maata, bamutentekieshe’shi: “Ntshi mukulungule’shi su okumiina, omono ntumbo y’Efile-Mukulu?” (Yo. 11:40) Tui na kabingilo ke buwa ka kukumiina’shi mulayilo w’Efile Mukulu, wa kusangula bafue aukalombana. Tui kukita kinyi bua kunyiisha kuikasha luno lukulupilo bu lua biinyi kuatudi?
MUSHINDO WATUDI BALOMBENE KUNYIISHA KUIKASHA LUKULUPILO LUA LUSANGUKILO BU LUA BIINYI KUATUDI
17. Nkinyi akitungu tulamiine mu binangu nsaa y’atubadika mianda ya nsangukilo i mu Bible?
17 Badika pabitale nsangukilo, na onangushene ku nsangukilo ya kala. Bible, alesha nsangukilo muanda ya bantu babaadi basangukie pa nsenga.c Buakinyi tue mulombene kuilongiela ino mianda kalolo? Nsaa yuelongiela, tentekiesha’shi bano bantu booso babaadi ba binyibinyi, balume, bakashi, na bana. Tala malongiesha oodi mulombene kupeta. Nangushena pabitale mushindo wi kileshesho kioso, akilesha bi lukalo lu’Efile Mukulu na bukome bua kualuisha bantu bafue muwa. Kikile bioso, nkunangushena ngofu ku muulo wa lusangukilo lua Yesu. Tentekiesha’shi lusangukilo luaye, babaadi beluleshe kui nkama ya bantu babaadi belumone na aluitupa mbangilo e bukopo a lukumiino luetu.—1 Kod. 15:3-6, 20-22.
18. We kufubisha kalolo ngono yetu pabitale lukulupilo lua lusangukilo naminyi? (Tala dingi mayi e kuushi ku’esaki.)
18 Fubisha kalolo “misambo ya mu kikudi” ayiteemuna lukulupilo lua lusangukilo.d (Ef. 5:19, Kilombeeno Kipya 2014) Ino misambo ayinyiisha kuikasha lusangukilo bu lua binyibinyi kuatudi, na kunyingisha lukumiino luetu mu luno lukulupilo lui buwa. Eyiteemeshe. Eyilongiele biodia kuiyiyimba kalolo, nuisambile akilesha bishima biayo mu lulanguilo luenu lua mu kifuko. Kulamiina bino bishima na kunangushena ngofu ku bianka, abinyingisha lukumiino luetu na kukuma mashimba eetu. Na dingi, su opeta nkalakashi i bukopo mu nshalelo oobe, sunga kufuisha muntu oodi mufule, kikudi kia Yehowa akikakukuasha biodia kutentekiesha ino misambo na kupeta busambi na bukome bu’ayikupa.
19. Nkinyi kiatudi balombene kunangushena pabitale lusangukilo? (Tala kashibo akamba’shi: “Nkinyi kiodi mulombene kuibayipusha?”)
19 Fubisha ngielelo oobe a meeshi. Yehowa mmuitupe ngobesha yatudia kumona mu binangu atue banabene nsenga ipia. Ungi mukuetu mukashi apatuula’shi: “Nakishaa nsaa i bungi nanangushena nemono ami nabene mu nsenga ipia, muandi mulombene kupusha eshiko di buwa dia bilongo mu Mpaladiiso.” Nangushena p’okamono bana balume na bana bakashi babaadi na lukumiino mu mafuku a kala. Nnanyi otengiela na kinsukunsuku kioso bua nkamona? Nkonko kinyi y’okamuele? Na nangushena dingi bi’okekala mu buumune na bakuenu boodi mufule batababafuile kala. Na nangushena ingi mianda pabitale buumune, bishima bia kumpala bi’okatuusha, kuianyena biipa na muloo ooso, na mpolo ya muloo y’okatuusha.
20. Abitungu tuikale na kitshibilo kinyi?
20 Tui na lutumbu lukata bua mulayilo wa Yehowa wa lusangukilo! Tui balombene kushinkamisha’shi uno mulayilo aukalombana, muanda Yehowa e na lukalo, na bukome bua kuiwulombasha. Tuikadikieyi na kitshibilo kia kutungunuka na kunyingisha lukumiino luetu, mu luno lukulupilo lui buwa. Su tubakitshi bino, atunyiisha kuifubuila kui Efile Mukulu, mulee kui ooso akuatudi’shi, ‘Mukuenu oodi mufule akasanguka!’
LOONO 147 Mbetulee muwa wa looso
a Su we mufuishe mukuenu, kushi mpaka mulayilo wa lusangukilo aukunyingisha ngofu. Mmushindo kinyi oodi mulombene kupatuluila bangi, buakinyi we mukumiine ku uno mulayilo? Na mmushindo kinyi oodi mulombene kunyingisha lukumiino lobe ngofu mu lukulupilo lua lusangukilo? Kepatshila ka uno muisambo, nka kuitukuasha booso buatudia kunyingisha lukumiino luetu mu lukulupilo lua lusangukilo.
b Loono lui na video lui na mutue wa muanda awamba’shi: Enka mbwipi muno, lubaadi lua Televizio a JW mueshi wa 11/2016.
c Tala kashibo akamba’shi: “Nsangukilo mwanda yabadi baleeshe mu Bible” ke mu Kitenta kia Mulami kia 1/8/2015, esak. 4.
d Tala ino misambo ayilondo mu mukanda wetu wa ngono awamba’shi: “Tuyimbileyi Yehowa na muloo.” (Loono lua 139), aluamba’shi: “Emone mu nsenga ipya.” (Loono lua 144), aluamba’shi: “Tula meso oobe kwifuto!” Na (lua 151), aluamba’shi: “Akayitamina.” Tala dingi mu jw.org ingi ngono yetu, bu lua “Enka mu bwipi muno,” lua “Mu nsenga ipia ayifiki,” na lua “Tu verras.”