Muloo wa kukaanya na malongiesha aatukila mu kufubila Yehowa

Baledi bande babakatukile mu Estonie mu ngoshi ya Kabidi ya Nsenga Ishima, benda ku Allemagne kunaadi mutandikilue. Kunyima ku’ami kutandikua, bababangile kuilumbuula bua kuenda mu Canada. Nshibo yetu ya kumpala, ibaadi peepi na Ottawa mu Canada, kabaadi kashibo kapeela mubaadi amulaala mpaa na nsoolo. Tubaadi balanda be moo, anka tubaadi atupete mayi a kudia ku nakashika kooso.

Dingi efuku, Tumonyi tua Yehowa tubaadi tubadikile nyinami mukanda wa Kibafumbuilue 21:3, 4. Biabia bibaadi mulongie, bibaadi bimukume kuishimba ngofu aye nkubanga na kudila. Mbio ya bia binyibinyi, ibatamine na nshami na nyinami babaadi bende kumpala lubilolubilo mu kikudi na abo nkubatshishibua.

Baledi bande babaadi abauku Anglais ipeela, kadi babaadi abaata bia binyibinyi na muulo ngofu. Mu dia Mpooso dioso, kunyima kua mudimo wa bufuku bushima ku sosiete apuiyaa bilonda mu Ontario, nshami baadi etuata nami na muina ande mukashi Sylvia, endanga netu mu bulungudi. Na ku lubingo looso tubaadi atulongo Kitenta kia Mulami mu kifuko. Mama na papa babaadi bankuashe bua kufula Yehowa. Na bino mbintakule bua kulambula muwa wande ooso kui Yehowa mu kipua kia 1956, pa nalombeshe bipua ekumi. Pa nangushena pabitale mushindo ubaabadi bafule Yehowa, mbimpe eshimba dinyingie buandia kutungunuka na kumufubila.

Kunyima kua ami kupudisha kalaasa, naadi mushimishe muloo wa kufubila Yehowa. Naadi munangushene’shi su nekala mbala-mashinda, nta mpete dingi makuta e bungi bua kulombasha kepatshila kande ka kutuela mu ndekie na kuenda mu kuifunya mu nsenga nya. Napetele mudimo mu kiakia kibundi ku kisaashi bua kuyimbishanga mizike, nyi mmudimo unaadi mufule. Anka naadi nafubu ngofu ku kiolua kioso; na nta naadi nakutua bisangilo misuusa i bungi na kubanga kuikala mu kisaka kia ba kuuku bashi bafule Efile Mukulu. Ku nfudiilo a bioso, kondo kande k’eshimba kalongieshibue na Bible kabaadi kantakule buandia kushintuluka.

Nakatukile nenda ku Oshawa mu Ontario. Kuakua naadi mufumankane na Ray Norman, na mukuabo mukashi Lesli, na bangi ba mbala-mashinda. Booso buabo babaadi bankukile kalolo. Kumona mushindo ubaabadi na muloo, bibaadi bintakule buandia kutaluula bipatshila biande. Babaadi banyingishe buandia kubanga mudimo wa bu mbala-mashinda, ngi binakitshiine mu mueshi wa Kitema mu kipua kia 1966. Naadi na muloo, na nshalelo ande balongamine. Anka ungi nshalelo e buwa baadi antengiela mu kabasamushi.

APAKUITANYINA YEHOWA BUA KUKITA KINTU KAMPANDA, EKITSHISHE BODIA KUIKILOMBASHA

Pa naadi nki ku kalaasa, naadi muushe esaki bua kutuela mu Betele a ku Toronto mu Canada. Kunyima pa naadi nki mbala-mashinda, babaadi bangitanyine ku Betele bua kufuba munda a bipua binanga. Naadi mufule Lesli, na naadi na moo wa’shi su nakumiina luitamino lua ku Betele, nta mono dingi Lesli. Pa napuile kuela nteko munda mua mafuku e bungi, ku nfudiilo naadi mukumiine luitamino lua ku Betele, anka naadi mupushe bubi bukile pa kuiladikishena na Lesli.

Nafubile ku Betele ku mbalo y’abatumpaa bilamba na kunyima ami nkufuba bu sekretere. Mu aa mafuku, Lesli baafikile bu mbala-mashinda a nsaa yooso ku Gatineau mu Quebec. Naadi neyipusha misuusa i bungi kiadi mulombene kukita su naata kitshibilo ki buwa. Dingi kubakitshikile muanda wa kukaanya mu nshalelo ande. Ray tuutu a Lesli, babaadi bamuitanyine ku Betele. Babamutudile mu nshibo imune nami! Bino bibaadi bimpe mushindo wandia kualusha dingi kipuano na Lesli. Tubaadi beyibakishene ku nfudiilo kua bipua biande binanka bia mudimo mu 27/2/1971.

Ami na Lesli, babaadi betutume mu kufuba mu kakongie ka ludimi lua mfualase ku Quebec. Kunyima kua bipua bipeela, naadi mukaanye ngofu pa baabantumine mu kufuba bu mukunkushi a kifunda pa nalombeshe bipua 28. Naadi nepusha bu muana mukinga na bu shi mulombene, anka mayi a mu mukanda wa Yeelemiya 1:7, 8 abaadi anyingishe. Lesli babaadi bamuitanye kui mootoka atue bapue kuiyibakishena, ngi buakinyi baadi na lukalakashi lua kulaala. Biabia, tubaadi banangushene’shi bino mbilombene kuitukalakasha mu mudimo wa bu mukunkushi a kifunda. Sunga mbiabia, Lesli bambile’shi: “Su Yehowa etuitanyina bua kukita mudimo kampanda, ta tui balombene kuikitshisha bua kuiulombasha su?” Tubaadi bakumiine uno mudimo na tuewukita munda a bipua 17.

Nshalelo a bu mukunkushi a kifunda, e na bi bungi bia kukita na ntshi naadi na nsaa i bungi yandia kukisha pamune na Lesli nya. Napetele dingi dilongiesha. Dingi efuku mu dimune ku namashika, napushiishe abakookola ku kiibi. Anka pa natukile paasha, ntshi mumone winyi baadi mukookole ku kibelo nya. Kadi namuene nka penda kitunga kia biakudia, mui bikuba, mikate, mulangi wa maalua, bilaudi na kamukanda kashi kafunde eshina dia muntu kabaadi akamba’shi: “Tuala mukashi oobe ku picnic.” Diadi’efuku dibaadi buwa bukile kuatudi, dibaadi kaanya. Anka nalunguile Lesli’shi ne na bintu bia kulumbuula bi bungi ntshi mulombene kuenda ku picnic. Sunga bapushiishe kadi baadi muinyongole kapeela. Anka pa nakashalele mu biro biande, kondo kande k’eshimba kababangile ku nkalakasha. Naadi munangushene mukanda wa Bena Efeso 5:25, 28. Naadi munangushene’shi uno verse a mu Bible nyi Yehowa bantentekiesha biandi mulombene kupasukila abipusha mukashi ande. Kunyima kua kuela luteko, nalunguile Lesli’shi: “Ebuee tuende,” bapushiishe muloo wi moo. Tubaadi bende ingi mbalo i buwa ngofu mbuipi mua muela, atue nkuaala ka kiata ketu, atue nkukisha efuku di buwa bukile pamune. Kunyima ami natungunukile na kulumbuula miisambo yande.

Midimo yetu ya mu kifunda ibaadi buwa bukile na ibungi, kubanga ku Colombie Britannique na ku Terre-Neuve. Lukalo luande lua kuenda mu nyendo lubalombene. Naadi nanangushena bua kuenda mu nyendo ku kalaasa ka Galaade, anka ntshi naadi nakumiina kuikala bu misionere mu kingi kibundi nya. Bibaadi abimueneka’shi ba misionere mbantu be pa buabo, na naadi nepusha’shi ntshi bia koobesha kuibuikala. Ku lungi lupese, naadi napusha moo wa’shi mbalombene kuitutuma ku kibundi kia mu Afrique mui mukumbo wa luambu sunga ngoshi. Naadi musangeele mu Canada munaadi.

LUITAMINO LUA MU KABASAMUSHI LUA KUENDA KU ESTONIE NA KU BALTES

Mu kipua kia 1992, pa babafunguile mudimo mu bibundi bi peepi na Post-soviétique, tubeyipuishe su tui bia kufilukila ku Estonie bua kukita mudimo wa bu misionere. Tubaadi bakaanye ngofu, anka tu baadi beele luteko pabitale uno muanda. Tubaadi banangushene dingi’shi: ‘Su Yehowa betuitanyina bua kukita mudimo kampanda, ta tui balombene kuikitshisha bua kuiulombasha su? Tubaadi bakumiine na binangu bia’shi, ‘Bi buwa, anka t’atuende mu Afrique nya.’

Musango umune, tubabangile kulonga ludimi lua Estonien. Kunyima kua mieshi i bungi, babaadi betulungule buatudia kukita mudimo wa bu mukunkushi a kifunda. Tubaadi bakunkie tukongie tufikie ku 46 na tusaka mu mawumbo asatu a mu Baltes na Kaliningrad mu Russie. Bibaadi abitungu tutompe kulonga ingi ndimi bu Letton, Lituanie, na kiina Russie. Bibaadi lukalakashi lukata, na ba kuuku betu babaadi bakumibue ngofu ku mashimba p’abo kumona bi kuikitshisha kuetu na abo nkuitukuasha. Mu kipua kia 1999, babatudile Betele ku Estonie na babaadi bantume bu muina komite a filiale pamune na Toomas Edur, Lembit Reile, na Tommi Kauko.

Tubaadi bafikie mu kuiwukeena na Tumonyi tua Yehowa tui bungi tubaadi atukatukila ku Sibérie. Sunga mbibaabadi mu lukano mubaabadi abebakitshiina mianda i bubi na bibaabadi belekeene na bifuko biabo, ta babaadi bafiite munda sunga kulama ngo nya. Babaadi balame muloo wabo na katshintshi mu mudimo wa bulungudi. Bino bibaadi bitukuashe bua kumona’shi tui balombene kunyingiila na kulama muloo wetu sunga patudi munkatshi mua nkalakashi.

Tui bafube bipua bi bungi na ta tui baate nsaa ya kuikisha nya, ngi buakinyi Lesli bakookiele ngofu. Ta tubaadi batundule musuusa umune’shi akimukookiesha mmuanda wa maladi abetanyinaa bu fibromyalgie nya. Tubatshile kitshibilo kia kualukiila ku Canada. Pa babetuitanyine ku kalaasa ka bena komite a filiale ku Patterson, New York, États-Unis, ntshi naadi nanangushena’shi tui balombene kuimutuela. Ngi buakinyi, kunyima kua kuela nteko i bungi tubaadi bakumiine. Yehowa baadi muelele kitshibilo kietu muabi. Muamua mu kalaasa, ngi mubaadi Lesli mubukibue mu mushindo wibuwa ubaadi autungu. Bu kipeta, bibaadi bitupe mushindo wa kubanguula kukita dingi midimo yetu kalolo.

KANGI KABASAMUSHI: MPA KUENDA MU UNGI KONTINA

Dingi efuku ku kiolua mu kipua kia 2008, atue babalukiila ku Estonie, napushiishe telefone badidi, nyi mbiro bietu bikata bia mu nsenga ishima bibangipuishe su tui kukumiina kuenda mu kufuba mu Congo. Naadi mukalakashue ngofu muanda naadi nakumiina kualuula butookie bua diadi’efuku. Dia kumpala ntshi naadi muiwulungule Lesli nya, muanda naadi nauku’shi ta mmulombene kulaala buabua bufuku. Anka mu kuilekeena na biabia, ami bupenka buande ngi shi mulaale, muanda naadi neele nteko pabitale uno muanda wa kuenda mu Afrique.

Pa babutookiele, nalunguile Lesli atue nkunangushena’shi: “Yehowa ngi betuitanyina bua kuenda mu Afrique. Tui kuuka naminyi’shi ta tui balombene kuikuenda na tui kupeta miabi naminyi su ta tui batompe?” Kunyima ku’atue kupua kukita bipua 16 mu Estonie, tubakaamiine ndekie bua kuenda ku Kinshasa mu Congo. Mu yawa Betele mubaadi lupango lui na mitshi i buwa kubandila na mubaadi butaale. Kintu kimune kia kumpala kibabatudile mu nshibo kui Lesli, nyi karte kabaadi mulame pa bayile mu Canada. Mu kano karte, mubaadi mayi aamba’shi: “Ikala na muloo yaya mbalo yodi.” Kunyima kua bisangilo bakuetu balume na bakashi, babaadi abalongo na bantu be bungi Bible na kulesha mianda yabadi bamone ibape muloo mu mudimo wa bu misionere, na bino bibaadi bitukuashe bua kuikala na muloo wi bungi. Angi mafuku, tubaadi bapete kineemo kia kuenda mu kukunka angi ma filiale a mu maumbo afikie ku 13 a mu Afrique. Bino bibaadi bitukuashe bua kumona bantu belekeenelekeene na biabadi buwa. Moo unaadi nao ku mbangilo ubapuile na atutumbula Yehowa p’aye kuitutuma mu kumufubila mu Afrique.

Mu Congo, tuibasangane muanka bidibua bilekeenelekeene, na biishi binaadi nanangushena’shi ta tui balombene kuibidia. Anka nsaa ibatumuene bakuetu abebidi, na atue namu tubatompele kuibidia, kumbi bibaadi buwa bukile.

Tubaadi atutuala bukuashi bua mu kikudi na bua ku mbidi kutunduka nguba ku’eumbo dia Congo, kubaadi akufiki bisaka bia ba ntomboshi mu kulua na bena kibundi, abatapa bakashi na bana. Bakuetu be bungi babaadi na bintu bia ku mbidi bipeela. Anka lukulupilo luabo lui bukopo lua lusangukilo, kifulo kiabo bua Yehowa, na lulamato luabo ku ndumbuluilo aaye mbitukume ku mashimba eetu ngofu. Kileshesho kiabo ki buwa nkitukuashe buatudia kunangushena pabitale buakinyi tukuete kufubila Yehowa na kunyingisha lukumiino luetu muadi. Bangi bakuetu babaadi abakiengie muanda wa kukutua mashibo na bia kudia. Bino abitulongiesha’shi we kushimisha bintu bia ku mbidi musuusa umune, anka kipuano kietu na Yehowa ngi ki na muulo ukata. Sunga mbibaabadi na uno nshalelo e bukopo, bakuetu ta babaadi abediladila nsaa yooso nya. Mmueneno aabo mmuitunyingishe buatudia kunyingiila nkalakashi sunga mikumbo n’eshimba dinyingie.

PA BATUPETELE MUDIMO UPIA MU ASIE

Kuakua dingi kubamuenekiele ungi muanda wa kukaanya. Babetulunguile buatudia kuenda ku filiale a ku Hong Kong. Ta tubaadi atupuandikisha’shi tui kukatuka mu Asie nya! Kunyima ku’atue kumona bi kifulo kia Yehowa ku ingi midimo yetu, tubaadi bakumiine luitanyino. Mu kipua kia 2013, tubakatukile na mpolo ku meeso kuetu, tualeka ba kuuku betu ba p’eshimba na mianda i buwa ya mu Afrique kushi atue kuuka akitutengiela ku’atuende.

Kubaadi kushintuluka kukata bua nkashaala mu Hong Kong, muanda kibaadi kibundi kikata ki na bantu bafikie mu ma mbalo elekeenelekeene. Kulonga ludimi lua ki Chinois kubaadi bukopo. Bakuetu babaadi betukuukile na muloo ooso, na mu binyibinyi, tubaadi basankile bidibua bia mu kiakia kibundi. Ku filiale a ku Hong Kong, mudimo ubaadi aufubibua ngofu. Anka muulo wa kufutshila mashibo ubaadi aukanka kuifuku n’efuku. Biabia Kasaka ka Bakunkushi-Bakulu kabatshile kitshibilo ki buwa bukile kia kupaana kipindi kikata kia lupango lua filiale. Kunyima kua mafuku apeela mu kipua kia 2015, tubaadi bende mu Corée du Sud, kuakua tubaadi batungunukie na kufuba. Kulonga ludimi lua mu Corée du Sud kubaadi bukopo biabia, sunga mbibaatudi t’atuakula kalolo lualua ludimi bakuetu ba mu Corée du Sud babaadi abetunyingisha pa kuakula’shi nubende kumpala ngofu na kuakula ludimi lua mu Corée du Sud.

MALONGIESHA ATUDI BAPETE MU KUFUBILA YEHOWA

Kuikala na ba kuuku bapia misuusa yooso t’akuikalaa kubofule nya, anka tubaadi baate mpango ya kuikala atuitanyina namu bangi bafikanga mu kuitutembela, na kunyima kua mafuku apeela tubaadi bafikie mu kuiwukeena na bangi bantu be bungi. Tui bamone’shi ba kuuku betu sunga mbiabadi befuaneene ngofu, Yehowa mmuitupangie mu mushindo wi buwa bukile p’aye kuitupa mushindo wa kufungula mashimba eetu na kuikala na kifulo bua ba kuuku betu be bungi.​—2 Ko. 6:11.

Tui bamone bi muulo wa kukumiina bantu mu mushindo wi bakumiine Yehowa na kumona kishinkamiisho akilesha’shi, Yehowa mmuitufule na etupeyaa buludiki mu nshalelo eetu. Misuusa yooso ibaatudi abepusha bu atue bakalakashibue mu binangu, sunga nsaa ibaatudi abeyipusha su bangi namu mbetufule, ngi nsaa ibaabadi abetutumina ma karte na mikanda ifunde mayi aanyingisha kui ba kuuku betu. Mu binyibinyi, tui bamone Yehowa bi’aluula ku nteko yetu, na kuitushinkamiisha bi kifulo kiaye na kuitunyingisha bua kutungunuka na kufuba.

Munda mua bipua bi bungi, ami na Lesli tui balongie muulo wa kuata nsaa y’atukisha pamune ku muntu na muntu, sunga tuekala na bia kukita bi bungi bui naminyi. Na dingi tui bafikie mu kuuka muulo wa kushaala pamune na kusepa bikishekishe nsaa y’atulongo ludimi lupia. Bufuku booso, atuikitshishaa bua kukimba muanda kampanda wi buwa bua kutumbula Yehowa.

Mu binyibinyi, naadi nepusha’shi ntaa na ngikale bu misionere sunga kuenda mu angi mawumbo. Anka ne mumone muloo wa kuuka’shi bintu bioso abikitshikaa nka ku bukuashi bua Yehowa. Mayi a mutemuki Yelemiya aamfikilaa mu binangu aamba’shi: “Yehowa we munkambile bwa kukita naami kyooso kyoodi mukumiine.” (Yel. 20:7) Eyendo, Yehowa mmumpe mianda ya kukaanya insankishe na miabi ishi bia kupuandikisha, mmundombeshe dingi mpaa na lukalo luande lua kutuela mu ndekie bua kuenda mu angi mawumbo. Tui batuele mu ndekie tuenda mu ma mbalo e bungi anshi naadi mulombene kupuandikisha pa naadi nki mukinga, tui bakunkie angi ma filiale a mu kontina yooso itaano ya mu nsenga ishima. Mu midimo yetu yooso ne na lutumbu lukata bua bukuashi bua Lesli na kinangu kiaye kia kuipaana.

Misuusa yooso, atuikitshishaa bua kutentekiesha’shi atukitaa bino bioso muanda tui bafule Yehowa. Miabi ya tukuete kusangeela lelo uno, ngikale nka bu katompelo ka muwa wa ikalaika nsaa ayikekala Yehowa ‘abuula eyaasa [diaye] bwa kwikutshisha bii na muuwa byooso byadi mufule.’​—Mis. 145:16.