Tuibalongie mianda i bungi kui Mulongieshi eetu Mukata

KILESHESHO KIA BALEDI BANDE

Mu bipua 1950, baledi bande abaadi bafilukie mu Italie bua kuenda ku Kindersley, mu Saskatchewan, mu Canada. Mafuku apela kunyima, abalongiele bia binyibinyi, na abio nkufika kintu ki na muulo mu nshalelo eetu. Natentekiesha panaadi mukinga, tubaadi atukisha nsaa i bungi mu bulungudi mu kifuko, nyi buakinyi naadi nele bidiodi pa kuakula’shi: Ne “mbala-mashinda mukuashi” e na bipua muanda!

Baledi bande abaadi balanda; anka abaadi kileshesho ki buwa kia kuipaana bua Yehowa. Bu kileshesho, mu 1963 abaadi bapaane bintu bi bungi bua kupeta ekuta bua kumona bia kuenda ku kikongeno kisangie maumbo mu Pasadena, mu Californie, mu États-Unis. Mu 1972 tubayile mu Trail, kibundi kia mu provinse a Colombie-Britanique, mu Canada mu bilometre 1 000 bua kulungula bantu abakulaa ludimi lua Italien mukanda wi buwa. Papa baadi asuula mu makashinyi. Baadi mupele mudimo aumupa makuta e bungi buadia kuipaana mu kufubila Yehowa.

Ne na lutumbu bua kileshesho ki buwa kibabadi bandekiele’mi na bakuetu basatu kui baledi betu. Kileshesho kiabo nyi kipindi kia kumpala kia kulongieshibua kuande mu mudimo wa Yehowa. Mbandongieshe mianda yanshanaa ndube mu muwa wande, kuamba’shi: Su nakimba Bufumu kumpala, Yehowa ampasukila.​—Mat. 6:33.

MBANGILO A MUDIMO WA NSAA YOSO

Mu 1980, naadi muibakile Debbie, mukuetu mukashi e buwa, na baadi muipaane mu kufubila Yehowa. Tubaadi atukumiina kubanga mudimo wa nsaa yoso, nyi buakinyi Debbie babangile bu mbala-mashinda kunyima kua mieshi isatu natue kuiyibakishena. Kipua kimune kunyima kueyibakishi dietu, tubayile mu kakongie kapela kabaadi na lukalo lua balungudi, na ami nkubanga bu mbala-mashinda.

Mafuku apela kunyima, tubaadi babofule kuishimba, natue kuanta kitshibilo kia kukatuka. Anka, kumpala kua kuibikita, tubalunguile mukunkushi a kifunda. Kushi kudia mukanue, kadi na kalolo koso, betulunguile’shi: “Anue banabene nyi abelesha mianda bukopo. Nuibatuule binangu nka ku nkalakashi yenu. Anka, su nuatuula binangu bienu ku mianda i buwa, anuiyimono.” Dino elango nyi dibatudi nadio lukalo. (Mis. 141:5) Tubaadi beditumikile kushi kunyengakana, na atue nkumona’shi kubaadi mianda i bungi i buwa yakukita. Bantu be bungi mu kakongie, abaadi abakumiina kukita bi bungi mu mudimo wa Yehowa, mpa na bana bakinga, na baaba abaadi beyibakishene na muntu shi Kamonyi ka Yehowa. Dino dibaadi dilongiesha di na muulo kuatudi. Tuibalongie bua kutuula binangu ku mianda i buwa na kukulupila’shi Yehowa etukuasha bua kunyingiila nkalakashi. (Mik. 7:7) Tubaadi bapetuule muloo wetu, na mianda nkulumbuluka.

Balongieshi ba mu kalasa ketu ka kumpala ka ba mbala-mashinda, abaadi bafube mu angi maumbo. Nsaa ibabadi abetulesha bifuatulo, na kuakuiila nkalakashi na miabi ibabadi bapete, bibaadi bitutakule bua kufuba bu ba misionere. Nyi atue nkuata kitshibilo kia kufuba bu misionere.

Bua kulombasha kano kepatshila, mu 1984 tubayile mu Québec, mui bantu abakula Nfwalanse, mu bilometre 4 000 na Colombie-Britanique. Kuanka, bibaadi abitungu’shi tulongie bipikua biabo na ludimi lupia. Lungi lukalakashi ndua’shi, ke bungi ta tubaadi na makuta nya. Angi mafuku, tubaadi atuladila bilunga bibaatudi atutekie muntu sh’efuba. Debbie baadi ateekie bino bilunga mu mishindo ilekene i buwa. Mu ino nkalakashi, tubaadi banyingiile na muloo. Na dingi, tubaadi bakulupile’shi Yehowa etupasukila.​—Mis. 64:10.

Dingi efuku, abaadi betuitamine ku telefone. Abetuitamiine bua nkafuba ku Betele a mu Canada. Tubaadi bapue kuusha formilere a ku Kalasa ka Gileade, biabia tubaadi na muloo anka tubaadi dingi benyongole. Kadi tubaadi bakumiine luitamino. Pabatufikile, tubepuishe mukuetu Kenneth Little, muina Komite a Filiale’shi: “Atukitshi kinyi su betuitamina ku Gileade?” Baluluile’shi: “Atumono ki’atukitshi, su abenuitamina.”

Kunyima kua lubingo lumune, abetuitamine ku Gileade. Biabia, bibaadi abitungu’shi tuate kitshibilo. Mukuetu Little betulunguile’shi: “Sunga nuata kitshibilo ki naminyi, dingi efuku, nuinkakumiina kuata kingi kilekene. Kitshibilo kimune ta ki buwa; Yehowa e kuelela kitshibilo kioso kiakia miabi.” Tubaadi bakumiine luitamino lua ku Gileade, na munda mua bipua tuibamone’shi bibaadi biakule mukuetu Little bibaadi bia binyibinyi. Ke bungi, atufubisha mayi aaye, bua kukuasha baaba abeyipusha mudimo wa kukumiina mu mudimo wa Yehowa.

NSHALELO A BU MISIONERE

Tubaadi na muloo wa kuikala munkatshi mua balongi 24 ba mu kalasa ka 83 ka Gileade, mu mueshi wa Kananka mu kipua kia 1987, mu Brooklyn New York. Mukuetu mulume Ulysses Glass na Jack Redford nyi abaadi balongieshi betu. Mieshi itano ya kalasa ibaadi ikile lubilo biabia, abo nkuitupa mapolome mu le 6/9/1987. Abaadi betutume mu Haïti, pamune na John na Marie Goode.

Kubanga mu 1962, ta babaadi abatumu dingi ba misionere ba ku Gileade mu Haïti, muanda abaadi bebabingie muanka. Mbingo isatu kunyima kuatue kupeta mapolome, tubabangile kufuba mu Haïti mubaadi kakongie ka balungudi 35 kabaadi ku miengie. Tubaadi bakinga, na t’atubaadi na kiukilo, na tubaadi bupenka buetu mu nshibo ya ba misionere. Bantu be bungi babaadi na bulanda bukile, na be bungi ta babaadi abauku kubadika. Kuanka, bantu abaadi na bu ntomboshi bukile pa muanda wa mianda ya politike, na bantu abaadi abakiebe kushintula bufumu, kuela kaalo muishinda, na bipapi bi bukopo.

Tuibalongie mianda i bungi kui bakuetu bakashi banyingie, be na muloo ba mu Haïti. Be bungi abaadi na nshalelo e bukopo, anka abaadi bafule Yehowa na mudimo wa bulungudi. Ungi mukuetu mukashi baadi mununu, ta baadi auku kubadika; anka baadi mulamiine bifundue 150. Mianda ibaadi mu dino eumbo, ibaadi itunyingishe bua kunyisha kulungula bantu’shi, nka penda Bufumu bu’Efile Mukulu nyi abupu mianda ya bantu. Tui na muloo pakumona’shi, bangi ba ku balongi betu ba Bible tabadi ba mbala-mashinda ba mieshi yoso, ba mbala-mashinda ba nsaa yoso, na bakulu.

Pabatudi mu Haïti, naadi muimonene na Trevor, nsongualume baadi bu misionere a bena kipuilo kia Mormon, n’ami nkuisamba naye pabitale Bible misango i bungi. Kunyima kua kipua, baadi muntumine mukanda. Bafundile’shi: “Nabatshishibua ku kikongeno akifiki! Nakumiina kualuka mu Haïti bua kufuba bu mbala-mashinda a nsaa yoso mu yaya mbalo inaadi bu misionere a bena Mormon.” Bino nyi biadi mukite munda mua bipua bi bungi pamune na mukashi aaye.

MU EUROPE AKUPU MU AFRIQUE

Abaadi betutume bua nkafuba mu kipindi kia Europe, mubabadi abende na kuitupa matalua a kulungula mukandu wi buwa. Mu 1992 tubafikile mu Ljubljana, mu Slovenie, pepi na mbalo ibaadi ikudile baledi bande kumpala kua’shi bende mu nkashala mu Italie. Mu aa mafuku, abaadi abatungunuka na kulua ngoshi mu Yougoslavie. Filiale a mu Vienne muiumbo dia Autriche, nyi baadi akunkusha mudimo wa bulungudi mu Croatie, na mu Serbie. Lelo uno, ano oso maumbo taadi na abo ma Betele.

Bino bibaadi abitekie’shi tulongie lungi ludimi na bingi bipikua. Bantu ba mu ino mbalo abaadi abamba’shi, “Jezik je težek,” kuamba’shi “Ludimi lui bukopo.” Nalo namu lubadi bukopo! Tubaadi na muloo pakumona lulamato lua bakuetu balume na bakashi abaadi bakumiine kushintuluka kua mianda mu ndumbuluilo eetu, na mushindo ubaadi Yehowa muibelele miabi. Tubaadi dingi bamone mushindo ubaadi Yehowa mulumbuule mianda na kifulo kioso pa nsaa ilombane. Tuibalongie mianda i bungi mu Slovenie, na tubaadi bapue kulonga angi malongiesha e bungi abaadi etukuashe bua kunyingiila nkalakashi yatudi bapete kuanka.

Anka tubaadi bapete kungi kushintuluka. Mu 2000 abaadi betutume mu Côte d’Ivoire, eumbo di kupona ngumba kua Afrique. Anka pa muanda wa ngoshi, mu mueshi w’Ekumi na umune 2002, tubaadi basuukile mu Sierra Leone. Na ngoshi ibaadi ikite bipua 11, ibaadi ikia ipu muanka. Bibaadi bukopo kukatuka mu Côte d’Ivoire nka biabia namu. Anka, mianda ibatudi bapue kumona, ibaadi itukuashe bua kulama muloo.

Tubaadi batuule binangu bietu kui bantu abaadi abakumiina kulonga bia binyibinyi na kui bakuetu balume na bakashi abaadi banyingiile ngoshi munda mua bipua bi bungi. Abaadi balanda, anka abaadi na kikudi kia kupaana. Ungi mukuetu mukashi baadi mupe Debbie bilamba. Nsaa ibaadi Debbie apele, uno mukuetu mukashi bamulunguile’shi: “Mu ngoshi, bakuetu ba mu angi maumbo abaadi betukuashe. Uno namu nyi musango wetu wa kukuasha.” Tuibefundile kepatshila ka kuambula kileshesho kiabo.

Muenda mafuku, tubalukiile mu Côte d’Ivoire, anka mianda ya politike ibaadi dingi ibuushe ngoshi. Biabia, mu mueshi w’Ekumi na umune 2004, tubatuelele mu helicopter, bua kusuuka na penda kibuta kia kilo 10 ku muntu. Tubaadi balaale mu nsenga mu camp ka basalayi bufuku, na butookie tubatuelele mu ndekie bua kuenda mu Suisse. Pabatufikile munkatshi mua bufuku, bena Komite ba Filiale, balongieshi ba ku École de formation ministèrielle na bakashi baabo babaadi betukukile, betuanya biipa, kuitupa kia kudia ki kaalo na kuitupa ma chocolat a mu Suisse. Bibaadi bitukume kuishimba ngofu.

Abaadi betutume bua mafuku apela mu Ghana, akupu tualuka mu Côte d’Ivoire ayo ngoshi ibapu. Kalolo ka bakuetu kabaadi ketukuashe bua kunyingiila ino nkalakashi ya kusuuka na midimo ya kapindi kapela. Ami na Debbie tubaadi atuuku’shi kifulo ki mu ndumbuluilo a Yehowa ta nkia kubepuula nya. Anka, ino yoso nkalakashi ibaadi itulongieshe mianda i bungi.

KUENDA MU MOYEN-ORIENT

Mu 2006 tubapetele mukanda wa ku biro bietu bikata, ubaadi awamba’shi abetutumu mu Moyen-Orient. Kuakua dingi bibaadi abitungu’shi tulongie ndimi ipia, bipikua na tubaadi bapete nkalakashi. Kuanka kubaadi nkalakashi i bungi pa muanda wa mianda ya politike na bipuilo. Tubaadi bafule ndimi ilekene ibaadi bakuetu abakula mu tukongie, na kumona’shi su atulondo bukunkushi bua teokrasi, atuikala mu buumune. Tubaadi bafule bakuetu balume na bakashi muanda be bungi abaadi banyingiile kubinguabingua kua bena bifuko nabo, bena kalasa, bena mudimo na ba nkungishanyi nabo.

Mu 2012 tubatuelele mu kikongeno ki pabuakio mu Tel Aviv, mu Israel. Uno nyi musango wa kumpala wibungie muilo wa Yehowa wa kiakia kipindi bungi bui bino kubanga mu Pantekote 33 B.B. Uno nyi muanda watushi bia kuilua!

Munda mua bino bipua, abaadi abetutumu mu kutala eumbo dibabaadi bakandikie mudimo wetu. Tubaadi atutuala mikanda yetu, kulungula mukandu wi buwa, na kutuela mu bikongeno bia bantu bapela. Tubaadi atuakana na basalayi be na ma mputu, na ma mbalo e bungi ababaadi bashikie, anka tubaadi atuipusha mu kukaluilua nsaa ibaatudi atuende mbufiefie na balungudi bapela.

KUALUKA MU AFRIQUE

Mu 2013 abaadi betutume mu filiale a mu Congo Kinshasa, eumbo dikata di buwa, kadi di bulanda bukile na ngoshi. Tubambile’shi, “Atuuku mu Afrique; biabia t’atukapete nkalakashi.” Anka, tubaadi na bi bungi bia kulonga, bikishekishe ma mbalo ashi mashinda na bitala bi buwa. Tuibapete mianda i bungi i buwa, bu kunyingiila na muloo wa bakuetu balume na bakashi sunga biabadi na bulanda, kifulo kiabo bua mudimo wa bulungudi, na kuipaana kuabo bua kutuela bisangilo na mu bikongeno. Tuibemuene abikumiina bantu kulonga bia binyibinyi penda ku bukuashi bua Yehowa na miabi yaye. Bipua biatudi bakite mu Congo mbitulongieshe mianda i bungi na mbitupe ba kuuku bafikie nka bu kifuko kietu.

Ku nfudiilo kua 2017, tubapetele ungi mudimo upia, abaadi betutume mu Afrique du Sud. Uno nyi filiale mukata biabia, na mudimo ubabaadi betupe ta tubaadi babande kuiufuba nya. Tuibafule bakuetu balume na bakashi abaadi baleshe lulamato munda mua bipua bi bungi. Na bi muloo kumona bena Betele abafubu pamune mu buumune sunga biabadi bafikie mu ma mbalo elekene, ekoba na tubila tuilekene. Abimueka patooka’shi Yehowa mukuashe muilo waye bua’shi wikale mu butaale, muanda ukuete kufuala bu muntu bupia, na kutumikila mayi a kulonda a mu Bible.

Munda mua bipua, ami na Debbie tuibapete midimo i bungi i buwa, kuubiila nshalelo mupia, na kulonga ndimi ipia. Ta bibaadi bibofule nya, anka tuibapushe kifulo kia lulamato kia Yehowa kukiila kui ndumbuluilo aaye na bakuetu bena Nkidishitu. (Mis. 144:2) Mianda i bungi yatudi balongie mu mudimo wa nsaa yoso ngituikashe bafubi be buwa ba Yehowa.

Ne na lutumbu bua mianda ibaadi indongieshe baledi bande, bukuashi bua mukashi aande Debbie; na kileshesho ki buwa kia kifuko kia mu kikudi ki mu nsenga ishima. Ami na mukashi ande, tui na kitshibilo kia kutungunuka na kulonga mianda i bungi kui Mulongieshi eetu Mukata.