Ki buwa na ki bubi: Bible: E na bukunkushi bua kukulupila

TUI NA LUKALO NA BUKUNKUSHI BU’EFILE MUKULU

Mu Bible, Yehowaa Efile Mukulu apatuula’shi, bantu be na lukalo na bukuashi na ta mbalombene kukita mianda yooso abo banabene. (Yeelemiya 10:23) Ngi buakinyi, mmuitupe mayi a kulonda aetukunkusha atupete mu Bible. Mmufule bantu, na t’akumiina’shi tuate bitshibilo bi bubi bilombene kuitutapa ku mashimba, na kuitufuishiisha nkalakashi mu nshalelo eetu nya. (Miiya Ikituulwe 5:29; 1 Yowano 4:8) Kukatusha biabia, bu biadi Mupangi eetu e na binangu na kiukilo, akumiina kuitupa malango e buwa. (Misambo 100:3; 104:24) Kadi, Efile Mukulu t’akitshishaa muntu pa bukopo bua’shi ekale na nshalelo muipushene na mayi aaye a kulonda nya.

Yehowa bapeele mulume na mukashi ba kumpala, Adama na Eva kintu kioso kibaabadi nakio lukalo buabadia kuikala na muloo. (Kibangilo 1:​28, 29; 2:​8, 15) Na dingi, baadi muibape miiya ipeelepeele ibaadi atengiela’shi bakookiele. Biabia, baadi muibatadiile abo banabene bua’shi basangule su abakumiina kukookiela yaaya miiya, sunga kupela. (Kibangilo 2:​9, 16, 17) Bi malua muanda Adama na Eva babaadi basangule nshalelo a kuiyelela mayi a kulonda abo banabene, pa mutue pa kutumikila mayi a kulonda a Efile Mukulu. (Kibangilo 3:6) Mbipeta kinyi bituukie? Bino mbikashe bantu na muloo wa kukita kiakia ki’abamono’shi ki buwa su? Nya. Kunyima kua bipua bi bungi, tui bafikie mu kuwuka’shi, kupela kutumikila mayi a kulonda a Efile Mukulu ta nkufuishe butaale na muloo wa losoo.—Mulungudi 8:9.

Bible etupa bukunkushi buatudi nabo lukalo bua’shi tumone bia kuata bitshibilo bi buwa, bilombene kuitukuasha sunga tuekala bashaleele mbalo kinyi, sunga tuekala bakudile mu kifuko ki naminyi. (2 Timote 3:​16, 17; tala kashibo akamba’shi: “Mukanda wa bantu booso.”) Tala mushindo aukitaa Bible bino.

Uuka bi bungi pabitale buakinyi Bible mmulombene kuitaminyibua bu “Eyi di’Efile Mukulu.”—1 Bena Tesalonike 2:13. Tala mu jw.org video amba’shi: Bible mmukanda wa nanyi?

MUSHINDO AULEESHA BIBLE BI BUKUNKUSHI BU’EFILE MUKULU

Bible etulungula bi kipuano ki’Efile Mukulu na bantu ku banga ku kibangilo. Kupusha bi mueneno Efile Mukulu a ki buwa na ki bubi, a kuitukuasha sunga kuituinyongosha. (Misambo 19:​7, 11) Malongiesha atupetaa misuusa yooso mu Bible, aekalaa nka a binyibinyi na aetukuashaa bua kuata bitshibilo bi buwa mu nshalelo eetu a kuifuku n’efuku.

Bu kileshesho, taluula elango di mu Nkindji 13:20: “Atambuka mu mulongo wa bantu baasha binangu eekala sha binangu, atembela bapatakane ashaala muntu mubi.” Dino eyi dia kulonda di na muulo ukata mu ano mafuku eetu, nka bu bibaadidi na muulo mu mafuku a kala. Bible mmuule na mayi a kulonda alombene kuitukuasha na e na muulo.—Tala kashibo akamba’shi: “Elango dia mu Bible aditungunukaa nka na kukuasha.”

Pangi we kuiyipusha’shi: ‘Ne kushinkamisha naminyi’shi elango dia mu Bible dikuete kunkunkusha lelo uno?’ Mu muisambo aulondo atukataluula bingi bileshesho bia mianda ikitshikie mu nshalelo.