Miya ya mu Bible pabitale buwa na bubi tayi na muulo dingi su?

Bantu bebungi mpa na bano abeyitaminaa bu bena Kidishitu, abapuandikishaa’shi miya ya mu Bible pabitale kuifikena pepi kua mulume na muakashi na eyibakishi nyi mianda ya kala. Bua’shi bantu beubidishene nabio, bingi bipuilo mbishintuule malongiesha aabio pabitale ngikashi ibuwa na ibubi. Miya ya mu Bible pabitale buwa na bubi tayi na muulo dingi su? Nya. Uno muisambo aupatuula akitulesha’shi tangipue muulo.

Bantu be na lukalo lua miya y’Efile Mukulu pabitale buwa na bubi

Bantu mbapangibue na lukalo lua kukunkushibuwa na Mupangi. Bible amba’shi: “Muntu ta mfumw’eshinda dyalondo nya.” (Yeelemiya 10:23) Sunga Yehowaa Efile Mukulu mmuitupangie na ngobesha ya kuisanguila kiatukumina kukita, ta mmuitupe matalua sunga ngobesha ya kuitshibila kibuwa na kibubi nya. Pabitale uno muanda akumina’shi tukulupile muadi.​—Nkindji 3:5.

Miya y’Efile Mukulu pabitale ngikashi ibuwa i mu Bible. Tubande kutala tubingilo tubidi atulesha’shi i na muulo.

• Efile Mukulu mmuitupangie. (Misambo 100:3) Bu biadi Mupangi etu, Yehowa Efile Mukulu auku kalolo kiatudi nakio lukalo bua kuikala na mbidi bukome, binangu bibuwa, na kuipusha kalolo. Auku dingi kilombene kutuuka su tuapela kulonda bukunkushi buaye pabitale muikelo. (Bena-Ngalatea 6:7) Na dingi Yehowa akumina kiakia kibuwa buetu. Nyi buakinyi Bible ayitamina Efile Mukulu bu “akupa bulambukishi abukukwasha, akukunkusha mwishinda dyoobe.”​—Yeeshaya 48:17.

• Nkalo yetu ngilombene kuitupambusha. Bantu bebungi abapuandikisha’shi mbalombene kuisanguila kibuwa na kibubi pa kulonda mashimba na nkalo yaabo. Anka, Bible amba’shi “esimba ndilamalama ngofu kukila bingi bintu bioso na ta nkintu kia kuasha nakio nya.” (Yeelemiya 17:9) Su eshimba diobe t’adikunkushibua na binangu bi’Efile Mukulu, adikukunkusha muishinda adikutuadila tuinyongoshi.​—Nkindji 28:26; Mulungudi 10:2.

Abitungu bakata ba bipuilo balenguule akiamba Bible pabitale kibuwa na kibubi su?

Nya! Bible alongiesha bia binyibinyi pabitale Efile Mukulu na biakumina’shi tuikale. (1 Bena-Kodinda 6:9-11; Bena-Ngalatea 5:19-23) Akumina’shi bantu baukie bino bia binyibinyi. (1 Timote 2:3, 4) Bakata ba bipuilo abitungu balongieshe mianda ayakula Eyi di’Efile Mukulu.​—Tite 1:7-9.

Bantu bebungi abapele kuikala na nshalelo muipushene na miya y’Efile Muklu pabitale ngikashi ibuwa mbakulupile mui bakata ba bipuuilo bua’shi “bebalungule kiakia kiabakumina kupusha.” (2 Timote 4:3) Anka, Eyi di’Efile Mukulu aditusha dino elango dibuwa: “Malua kui baaba abamba’shi kibuwa kibubi na kibubi kibuwa.” (Yeeshaya 5:20) Abipushika kalolo’shi, Efile Mukulu akatshibila bakata ba bipuilo kiimu muanda tabakuete kulongiesha bantu mianda ayamba Efile Mukulu pabitale buwa na bubi.

Miya y’Efile Mukulu pabitale ngikashi ibuwa ayitakulaa muntu bua kutshibila bangi kiimu su?

Nya. Boso abakumina kusankisha Efile Mukulu abalondaa kileshesho na malongiesha a Yesu Kidishitu. Balongieshe balondji baaye’shi tabatshibilanga bangi kiimu anka baleshe kifulo mu mianda yooso.​—Mateo 5:43, 44; 7:1.

Yesu balongieshe balondji baaye buabadia kunemeka miya y’Efile Mukulu pabitale mianda yoso ya mu nshalelo. Anka, abitungu bashinguule’shi bangi bantu mbalombene kusangula kuikala na nshalelo shi muipushene na miya y’Efile Mukulu. (Mateo 10:14) Yesu tabaadi mupe balondji baaye matalua a kufubisha bena politike sunga mushindo kampanda oso wawa bua kutakula bantu pabukopo bua kulonda miya y’Efile Mukulu.​—Yowano 17:14, 16; 18:36.

Muntu mulombene kupeta miabi kinyi su alondo miya y’Efile Mukulu?

Su tukuete kukita muetu moso bua kunemeka miya y’Efile Mukulu pabitale buwa na bubi, atukapete miabi kubanga binobino mpa na mu mafuku ekumpala. (Misambo 19:8, 11) Ingi miabi ngino:

• Muloo wibungi.​—Nkindji 29:6.

• Kipuano kibuwa n’Efile Mukulu.​—Nkindji 3:32.

• Bukuashi bu’Efile Mukulu mu nsaa ya malua.​—Nkindji 11:8.

• Lukulupilo lua kuikala na muwa wa looso pa nsenga.​—Misambo 37:29.