We muilumbuule bua kuilambula obe nabene kui Yehowa su?

1-2. Abitungu muntu akite kinyi kumpala kua kubatshishibua?

MU BIPUA bitano bishaale, bantu bakile pa mudiyo umune mbabatshishibue bu Tumonyi tua Yehowa. Be bungi ba kubano bantu, be nka bu mulongi Timote a mu siekele a kumpala baadi mulongieshibue bia binyibinyi ‘kubanga ku bukinga buaye.’ (2 Ti. 3:14, 15) Bangi mbalongie pabitale Yehowa, abo batabadi bantu bakulu, bangi namu abo babaapu kununupa. Ungi muana mukashi umune mulongie Bible na Tumonyi tua Yehowa, mmubatshishibue taadi na bipua 97!

² Su we mulongi a Bible, sunga’shi mbakukushe kui baledi bekale Tumonyi tua Yehowa, okuete onangushena pabitale kubatshishibua su? Kano nyi nkepatshila ke buwa bukile! Kumpala kua kubatshishibua, uuka’shi abitungu w’elambule obe nabene kui Yehowa. Uno muisambo aupatuula akilesha kuilambula. Uno muisambo aukakukuasha bodia kumona buakinyi t’abitungu’shi otshine bodia kulambula muwa oobe kui Efile Mukulu na kubatshishibua su we muilumbuule bua kuibikita.

KUILAMBULA NKINYI?

3. Tuusha bileshesho bia mu Bible bia bantu babaadi belambule kui Yehowa.

³ Mu Bible, kishima kuilambula akipushisha kuituula ku lupese bua mudimo wa kishila. Bena Isalele babaadi muilo wilambule kui Yehowa. Anka bangi ba mu muilo wa bena Isalele babaadi abelambula kui Yehowa mu mushindo wi pa buawo. Bu kileshesho, Alona baadi na “katunduilo ke pa buako ka kuilambula” kuamba’shi batudile kumpala kua lubango kalongo ka kiamo kia ôlo. Kano ka kilongo ka kiamo kia ôlo kabaadi akalesha’shi, mmuituule ku lupese bua kufuba mu mushindo wi pa buawo bu tshite-muakuidi mukata a bena Isalele. (Lv. 8:9) Na Banazi namu babaadi abelambula kui Yehowa mu mushindo wi pa buawo. Kishima “Banazi” akifiki mu kishima kia kiina Ebelu akiamba’shi nazir, akipushisha’shi “batudibue ku lupese,” sunga’shi “belambule.” Banazi babaadi na miiya i pa buayo ibaabadi bebafundile mu muiya wa Moyise.​—Mb. 6:2-8.

4. (a) Mu mushindo kinyi muikale bano booso belambule kui Yehowa basangule kuikala ku lupese lua kishila? (b) “Kuipela obe nabene” akupushisha kinyi? (Tala dingi kifuatulo.)

⁴ Nsaa yuelambula kui Yehowa obe nabene, bosangula kuikala bu mulongi a Yesu Nkidishitu na bokumiina kulombasha kikiebe ki’eshimba di’Efile Mukulu bu kintu ki na muulo ukata mu muwa oobe. Kuilambula bu muina Nkidishitu akutekie kinyi? Yesu bambile’shi: “Su muntu akiebe kundonda, epele aye nabene.” (Mat. 16:24) Kishima kia mu kiina Greke kiabadi bapatuule bu “kuipela obe nabene,” nkilombene kulesha dingi’shi “kuilungula obe nabene’shi nya.” Nka bu bangi bafubi ba Yehowa belambule, abitungu wakule’shi nya ku kintu kioso kilombene nkukutshishua bua kukita kikiebe ki’eshimba dia Yehowa. (2 Ko. 5:14, 15) Bino abipushisha’shi abitungu kuamba nya ku “bikitshino bia ku mbidi,” bu kutambuka lusandi. (Nga. 5:19-21; 1 Ko. 6:18) Kukookiela ku ino miiya kui nkuelela bukopo su? Nya, muanda we mufule Yehowa na we mushinkamishe’shi miiya yaye i kuanka bua buwa bobe. (Mis. 119:97; Yesh. 48:17, 18) Ungi mukuetu mulume Nicholas mmupatuule mu uno mushindo’shi: “We kumona miiya ya Yehowa bu lupango lua bilonda sunga bu lukano alukukutshishua bua kukita kioso ki’okumiina, sunga bu lupango lua bilonda luabadi bashikiile nyema ya ntambue alukukaluila ku masaku.”

5. (a) We kuilambula kui Yehowa obe nabene naminyi? (b) Nkuilekeena kinyi kui pankatshi pa kuilambula na kubatshishibua? (Tala dingi kifuatulo.)

⁵ We kuilambula obe nabene kui Yehowa naminyi? Omulaa mu luteko’shi okamulanguila nka penda aye, na’shi okatuulu kikiebe ki’eshimba diaye pa mbalo ya kumpala mu nshalelo oobe. Na dingi, olaa Yehowa’shi okatungunuka na kumufula “n’eshimba diobe dioso, na anyima oobe oso, na binangu biobe bioso, na bukome bobe boso.” (Mak. 12:30) Kuilambula abekukitaa pa bupenka, penda obe nabene na Yehowa. Kadi kubatshishibua abekukitaa pa butooka; bua kulesha bantu abakumono’shi we mupue kuilambula. Kuilambula koobe nyi mmulayilo wi na muulo ukata. Abitungu’shi kepatshila koobe kekale ka kulombasha wawa mulayilo, na Yehowa namu atengiela’shi okite biabia.​—Mul. 5:4, 5.

BUAKINYI ABINTUNGU W’ELAMBULE OBE NABANE KUI YEHOWA?

6. Nkinyi akitakulaa muntu bua kuilambula aye nabene kui Yehowa?

⁶ Kabingilo kakata akatungu’shi w’elambule kui Yehowa obe nabene nka’shi we mumufule. Kifulo kiobe ta kimeenanga nka ku bi’opusha mu binangu biobe nya. Anka abitungu kikale kimeene ku “kiukilo kia binyibinyi” na “mpushisho a mu kikudi,” kuamba’shi yaya mianda yodi mulongie pabitale Yehowa ayikukuasha bua’shi kifulo kinyiishe kutama buaye. (Kol. 1:9) Kuilongiela koobe kua Bible akukushinkamiisha ino mianda isatu: (1) Yehowa e kuanka binyibinyi, (2) Bible nyi Eyi diaye diyokielue, na (3) afubishaa ndumbuluilo aaye bua kulombasha kikiebe ki’eshimba diaye.

7. Tui kukita kinyi kumpala kua kuilambula atue banabene kui Efile Mukulu?

⁷ Bano booso belambule abo banabene kui Yehowa, abauku malongiesha a kitako atupete muiyi di’Efile Mukulu, na be na nshalelo muipushene na mayi aaye a kulonda. Abekitshishaa muabo mooso bua kulungula bangi pabitale mianda yabadi balongie. (Mat. 28:19, 20) Kifulo kiabo akinyiisha kutama bua Yehowa na be na lukalo lua kumulanguila nka penda aye. Nnobe namu we na luno lukalo su? Su we na kifulo kia uno mushindo, t’okamono kuilambula na kubatshishibua bu kintu kampanda ki’okitshi penda bua kusankisha mulongieshi oobe a Bible sunga baledi bobe nya; ngi bioshu’ebimono sunga bu kintu kampanda ki’okitshi bua kutuela mu kisaka kampanda na bakuuku bobe.

8. Lutumbu lui na mudimo kinyi mu kitshibilo kiobe kia kuilambula obe nabene kui Yehowa? (Misambo 116:12-14)

⁸ Nsaa y’onangushena ku bintu bioso biabadi bapue nkukitshina kui Yehowa, wekala na lutumbu na okumiina kulambula muwa oobe kuadi. (Badika Misambo 116:12-14.) Bible ayitanyina Yehowa’shi aye ngi etupeyaa “Kia buntu kioso kibuwa na kia buntu kioso kipuidikie.” (Yak. 1:17) Kia buntu kikile bioso ku bukata, nyi mmulambu wa nkuulo ya Muana aaye Yesu. Banda kunangushena kapeela! Nkuulo ngikupe mushindo wa kuikala mu kipuano ki buwa na Yehowa. Na nkupa lukulupilo lua kuikala na muwa wa losoo. (1 Yo. 4:9, 10, 19) Kuilambula obe nabene kui Yehowa, nyi mmushindo wi buwa bukile aulesha’shi we na lutumbu bua kia buntu kikata, akilesha kifulo kiabadi bakuleshe kui Yehowa pamune na ingi miabi yooso yadi mupue nkuelela. (Miy. 16:17; 2 Ko. 5:15) Mbashimikie kasele pabitale lutumbu mu dilongiesha dia 46 pa kamutue ka muanda 4, ke mu mukanda wetu wa We kuikala na muloo bua loso! Mui video a minite isatu e na mutue wa muanda awamba’shi: Tuala bia muntu biobe kui Efile Mukulu.

WE MUILUMBUULE BUA KUILAMBULA NA KUBATSHISHIBUA SU?

9. Buakinyi t’abitungu’shi muntu elambule bu abatakula pa bukopo?

⁹ We kuipusha’shi tue muilumbuule bua kuilambula na kubatshishibua. Pangi abitungu oshintule ingi mianda mu nshalelo oobe bua’shi epushene na mayi a kulonda a Yehowa, pangi we na lukalo na nsaa i bungi bua kunyingisha lukumiino loobe. (Kol. 2:6, 7) Balongi booso ba Bible t’abatamishaa kifulo mu mushindo umune bua Yehowa nya, na bansongua booso ta mbalombene kuilumbuula bua kubatshishibua mu kipua kimune nya. Taluula kuenda koobe kua kumpala mu kikudi muyile biodi na ngobesha ya kukita kushi kuipuandikisha na ungi muntu.​—Nga. 6:4, 5.

10. Abitungu okite kinyi su bosangana’shi tue muilumbuule bua kuilambula na kubatshishibua? (Tala dingi kashibo akamba’shi: “Kui bansongua ba sha baledi babo Tumonyi tua Yehowa.”)

¹⁰ Sunga omona’shi tue muilumbuule bua kuilambula kui Yehowa, tungunuka na kukita ano matabula kumpala kua kulombasha kepatshila koobe. Teka Yehowa akuelele miabi mu kuikitshisha koobe bua kushintula mianda ayitungu. (Fid. 2:13; 3:16) Abitungu dingi wekale mushinkamishe’shi apusha luteko loobe na akualuula.​—1 Yo. 5:14.

BUAKINYI BANGI BAKUETE KUIKOKA BUA KUILAMBULA NA KUBATSHISHIBUA?

11. Yehowa aketukuasha buatudia kushaala na lulamato kuadi mushindo kinyi?

¹¹ Bangi mbapue kuilumbuula bua kuilambula na kubatshishibua, kadi baki’abekoko. Pangi mbalombene kuiyipusha’shi: ‘Bi kuikala naminyi su nakita muluisho ukata na bantusha mu kakongie?’ Su we na moo wi biabia, ikala mushinkamishe’shi Yehowa akakupa kioso kiodi nakio lukalo bua’shi omone bia “kutambuka mu mushindo w’akumiina na kumusankisha mu mianda yoso.” (Kol. 1:10) Akakupa dingi bukome bua kukita mianda i buwa. Mmupue kulesha’shi ebikitshi mu mushindo wadi mupue kukitshina be bungi buabadia kukita mianda i buwa. (1 Ko. 10:13) Kano ngi kabingilo ka buakinyi bantu bapeela abatushibuaa mu kakongie ka bena Nkidishitu. Yehowa apeyaa muilo waye kioso kiaudi nakio lukalo buaudia kushaala na lulamato.

12. Tui kuleka kukita miluisho i bukata naminyi?

¹² Muntu ooso shi mupuidikie atompibuaa bua kukita mianda i bubi. (Yak. 1:14) Biabia, we kusangula kiodia kukita nsaa y’otompibua. Kadi muanda wi’shi, obe nabene ngi e na matalua a kuisanguila bi’okumiina’shi nshalelo oobe ekale. Sunga bikale’shi bantu be na binangu bilekeene, obe nabene ngi mulombene kuludika nshalelo oobe. Biabia, sunga nsaa y’otompibua abitungu osangule bua kupela kukita muanda wi bubi. Bua kupela kukita muanda wi bubi, ikala otekie efuku dioso. Na kulama biubishi bi buwa bia kuilongiela Eyi di’Efile Mukulu pa bupenka. Tuela mu bisangilo bia bena Nkidishitu. Lungula bangi bi lukumiino lobe. Su bokitshi ano matabula ooso, abikakupa bukome bua kuikala na nshalelo muipushene na mutshipo oobe wa kuilambula. Biabia, tolubanga’shi Yehowa akakukuasha bodia koobesha.​—Nga. 5:16.

13. Nkileshesho kinyi ki buwa kiabadi betulekiele kui Yosefe?

¹³ Abikakubofuila bodia kuikala na nshalelo muipushene na kuilambula koobe, su buata kitshibilo kia kiodia kukita kumpala kua kufumankana na kitompuanga. Bible etulungula bungi bua bantu babaadi bakite bino, sunga mbibaabadi bakutue kupuidika. Bu kileshesho, mukashi a Potifare baadi mutompe misuusa na misuusa bua kutambuka lusandi na Yosefe. Biabia kushi mpaka, Yosefe baadi mupue kuuka kiadi mulombene kukita. Bible etulungula’shi baadi mupele na amba’shi: “Mbikunyi biandi mulombene kukita bubi bui bino bukata, na kukitshina Efile Mukulu muluisho?” (Kib. 39:8-10) Eyendo’shi, Yosefe baadi muukie mushindo wadi mulombene kukita kumpala kua’shi yawa muana mukashi amutompe. Biabia bibaadi bimubofuile nsaa ibaadi mupete kitompuanga.

14. We kusuuka kitompuanga naminyi?

¹⁴ We kuambula Yosefe na kusuuka kitompuanga nsaa y’otompibua naminyi? We kuata kitshibilo kubanga binobino kia kiodi mulombene kukita nsaa y’otompibua. Uuka bia kuamba’shi nya musuusa umune ku mianda yabadi bashikue kui Yehowa, na kuleka kunangushena ku yanka. (Mis. 97:10; 119:165) Biabia, nsaa y’abakutompo, t’okakitshi muluisho. Wekala mupue kuuka kiodia kukita muanda we mupue kuilumbuula.

15. Mukuetu mulume sunga mukashi e kulesha’shi “akimbi Yehowa n’eshimba dimune” naminyi? (Bena Ebelu 11:6)

¹⁵ Pangi we mupue kupeta bia binyibinyi na okumiina kufubila Yehowa n’eshimba diobe dioso, anka kui kintu kampanda kiki’akikutakula mu kuikoka bua kuilambula na kubatshishibua. We kukita nka bu bibakitshine Nfumu Davide. We mulombene kuisendeela Yehowa’shi: “Efile Mukulu ntaluule, oshinguule bii eshimba dyande, ntompe owukye bii nkalakasho yandi nayo. Otale su naalondo eshinda dii masaku, onkunkushe mwishinda dyaa-ikalaika.” (Mis. 139:23, 24) Yehowa elelaa baaba booso “abamukimbi n’eshimba dimune miabi.” Kuikitshisha koobe bua kulombasha kepatshila ka kuilambula na kubatshishibua, akumulesha’shi okuete kuibikita.​—Badika Bena Ebelu 11:6.

TUNGUNUKA NA KUIFUBUILA NGOFU KUI YEHOWA

16-17. Yehowa akakaa bansongua booso be na baledi babo Tumonyi tua Yehowa naminyi? (Yowano 6:44)

¹⁶ Yesu bakuile’shi balongi baye mbakakibue na Yehowa. (Badika Yowano 6:44.) Nangushena pabitale mushindo w’abikaanyisha na ki’abipushisha koodi. Yehowa amonaa kintu kampanda ki buwa ki mui muntu ooso akaka kuadi. Amonaa muntu ooso yawa bu “kintu kiaye’ye nabene” sunga “ki na muulo ukata.” (Miy. 7:6, NWT) Bino ngi biabakuete nkumona namu nobe kui Yehowa.

¹⁷ Pangi we nsongua, we mutandikilue mu bia binyibinyi. Pangi we kupusha’shi okuete ofubila Yehowa muanda baledi bobe abamufubilaa, kushi pa muanda wa’shi Yehowa mmukukakie kuadi. Ngi buakinyi Bible amba’shi: “Efubuileyi pepi n’Efile Mukulu, n’aye namu akefubuila pepi nenu.” (Yak. 4:8; 1 Mya. 28:9) Su buata mpango ya kuifubuila kui Yehowa n’aye namu akebikitshi pa kuifubuila koodi. Yehowa t’akumonaa penda bu muntu e mu kisaka nya. Akakaa muntu pa bupenka mpaa na muana sha baledi baye Tumonyi tua Yehowa. Su yawa muntu baata mpango ya kuifubuila kui Yehowa, Yehowa namu efubuila kuadi nka bu abibilesha mukanda wa Yakobo 4:8.​—Puandikisha na 2 Bena Tesalonike 2:13.

18. Nkinyi ki’atukesambila mu muisambo aulondo? (Misambo 40:8)

¹⁸ Nsaa yuelambula obe nabene kui Yehowa na kubatshishibua, wambula kinangu kia Yesu. Yesu baadi muilambule aye nabene kui Nshaye bua kukita kioso kibaadi amutekie. (Badika Misambo 40:8; Eb. 10:7) Mu muisambo aulondo, atukesambila kilombene nkukuasha bodia kutununuka na kufubila Yehowa na lulamato looso kunyima koobe kubatshishibua.