‘Tungunuka na kulonda’ Yesu kunyima koobe kubatshishibua

1-2. Mmiabi kinyi ayipetaa muntu kunyima ku’aye kubatshishibua?

ATUIKALAA na muloo nsaa y’atubatshishibua na kutuela mu kifuko kia Yehowa. Baaba booso bapue kubatshishibua mbalombene kuamba’nka bu Davide’shi: ‘Sha muloo nguno oosangula, ashaala mu nshibo yoobe.’​—Mis. 65:4.

² Kadi, ta muntu ooso yawa mulombene kuikala kuuku a Yehowa nya. Anka bu bia tumuene mu muisambo ushaale, Yehowa asangulaa bua kuisesela peepi na baaba abakumiina kuikala mu kipuano ki buwa naye. (Yak. 4:8) Nsaa yuelambula kui Yehowa na kubatshishibua, abikukuasha bua kuisesela kuadi mu mushindo wi pabuao. Biabia ikala mushinkamishe’shi kunyima kua kubatshishibua koobe, Yehowa ‘akakuelela miabi ikile bungi’.​—Mal. 3:10; Yel. 17:7, 8.

3. Bena Nkidishitu belambule na babatshishibue be na bushito kinyi bukata? (Mulungudi 5:4, 5)

³ Eyendo, kubatshishibua mpenda mbangilo a kufubila Yehowa. Kunyima kua kuela dino etabula dikata, abitungu wekitshishe bua kuikala na nshalelo muipushene na mutshipo oobe, sunga nsaa y’ofumankana na bitompuanga. (Badika Mulungudi 5:4, 5.) Bu biodi mulongi a Yesu, abitungu olonde kileshesho kiaye na miiya yaye. (Mat. 28:19, 20; 1 Mp. 2:21) Uno muisambo aukukuasha bua kukita nka biabia.

‘TUNGUNUKA NA KULONDA’ YESU SUNGA P’OFUMANKANA NA BITOMPUANGA

4. Balongi ba Yesu abakasemuna “mutshi wa makienga” mu mushindo kinyi? (Luka 9:23)

⁴ Kunyima k’obe kubatshishibua, we kupeta nkalakashi. Yesu baadi muleshe patooka’shi balongi baye abakasemuna “mutshi wa makienga.” Na abakebikitshi “efuku dioso.” (Badika Luka 9:23.) Yesu baadi akiebe kuamba’shi balongi baye abekala abakiengie mafuku ooso su? Nya. Baadi akiebe penda kulesha’shi, kukatusha miabi ibaabadia kupeta, babaadi balombene’nyi kupeta nkalakashi. Na ingi ya ku yaya nkalakashi ibadia kuikala bukopo.​—2 Ti. 3:12.

5. Mmiabi kinyi ibaadi Yesu mulee baaba abesumina ingi miloo?

⁵ Pangi, kifuko kiobe kikuete kukubingabinga, sunga’shi we mupele kukita ingi mianda ibadia kukupetesha makuta e bungi, bua’shi otuule mianda ya Bufumu pa mbalo ya kumpala. (Mat. 6:33) Su bi biabia, ikala mushinkamishe’shi Yehowa auku bioso biodi mukite pa muanda waye. (Eb. 6:10) Pangi we mupue kuimuena kulombana kua ano mayi a Yesu aamba’shi: “Takui muntu su ngumune mulekie nshibo, sunga bakuabo balume, bakuabo bakashi, nyinaye, nshaye, bana sunga mafuba pa muanda wande na pa muanda wa mukandu wibuwa, sh’akapete misusa 100 kukila, kubanga binobino mu ano mafuku​—mashibo, bakuabo balume, bakuabo bakashi, banyina, bana na mafuba pamune na kukiengieshibua—​na mu ndumbuluilo a mianda afiki, muwa wa loso.” (Mak. 10:29, 30) Miabi yodi mupete ngikile miloo yooso yodi muisumine.​—Mis. 37:4.

6. Buakinyi abitungu otungunukie na kulua na “luabi lua mbidi” sunga kunyima kua lubatshisho?

⁶ Eyendo, sunga kunyima k’obe kubatshishibua, abitungu otungunukie na kulua na “luabi lua mbidi.” (1 Yo. 2:16) Bino bi na muulo muanda oki nka muntu mukutue kupuidika. Ingi nsaa we mulombene kuipusha nka bu Mpoolo mutumibua. Bafundile’shi: “Mu kuakula kua binyibinyi, munda muande nasankilaa muiya w’Efile Mukulu, kadi namono mu mbidi muande, ungi muiya aulu ngoshi na muiya wa mu binangu biande, na auntuala ku bupika bua muiya wa muluisho wi mu mbidi yande.” (Lom. 7:22, 23) We mulombene kubofula pa muanda okuete kuitatshisha bua kukambila binangu bi bubi. Anka, kunangushena ku mulayilo ubodi mukite kui Yehowa nsaa ibodi muilambule kuadi, akunyingisha kitshibilo kiobe kia kukambila bitompuanga. Biabia, mutshipo ubodi mukite bua kuilambula kui Efile Mukulu aukukuasha bua kukambila bitompuanga. Mu mushindo kinyi?

7. Kuilambula kui Yehowa nkulombene kukukuasha bua kushaala na lulamato kuadi naminyi?

⁷ Nsaa yuelambula kui Yehowa, wepele obe nabene. Bino abipusha’shi, osangula bua kupela kukita mianda sunga bipatshila bish’abisankisha Yehowa. (Mat. 16:24) Biabia p’ofumankana na kitompuanga, t’oyikala na lukalo lua kuata nsaa bua kuuka kiodia kukita nya. Kadi oyikala mupue kuata kitshibilo kia kukita, kuamba’shi kushaala na lulamato kui Yehowa. Oyikala na kitshibilo kia kusankisha nka Yehowa. Paapa, wekala nka bu Yoobo. Sunga mbibaadi mufumankane na nkalakashi i bukopo, bambile n’eshimba dimune’shi: “Mpaa na pa nkafuila, ntaa na ndekie kululama kuande!”​—Yob. 27:5, NWT.

8. Kunangushena ku luteko lubodi mukite bua kuilambula akukuasha bua kukambila bitompuanga naminyi?

⁸ P’onangushena ku luteko lubodi mukite bua kuilambula kui Yehowa, okapete bukome bua kunyingiila kitompuanga kioso ki’opete. Bu kileshesho, we kubanga kukitshina mukashi sunga mulume shi oobe mianda bua kumulesha’shi we mumufule su? Nya! Bodi mupue kulaa Yehowa’shi tue mulombene kukita muanda wi biabia nya. Su bokitshi biabia, lukalo lui bubi t’alutama muishimba diobe nya, na bino abikukaluila ku tuinyongoshi tui bungi. Paapa, ‘t’otuele muishinda dia babi’ nya.​—Nki. 4:14, 15.

9. Kunangushena ku luteko lubodi mukite bua kuilambula akukuasha bua kutuula mianda ya mu kikudi pa mbalo ya kumpala naminyi?

⁹ We kukita kinyi su bakulungula bua kukita mudimo aukukutshishua bua kutuela mu bisangilo pa kiubishi? Kushi mpaka, tue kukumiina nya. Kumpala kua’shi bakupe wawa mudimo, wekalanga mupue kuata kitshibilo kia kupela kukumiina mudimo ushaukupa mushindo wa kutuela mu bisangilo. Biabia tue mulombene kukumiina mudimo wi biabia, aku namu akiebe kutuula mianda ya Bufumu pa mbalo ya kumpala. Kunangushena ku kileshesho kia Yesu kui kuitukuasha. Baadi na kitshibilo ki bukopo kia kusankisha Nshaye. Biabia nka bu Yesu, ikala na kitshibilo kia kupela na bukidi booso kukita kioso kilombene kuinyongosha Efile Mukulu, aye abodi muilambule kuadi.​—Mat. 4:10; Yo. 8:29.

10. Yehowa akakukuasha naminyi bua ‘kutungunuka na kulonda’ Yesu kunyima kua lubatshisho lobe?

¹⁰ Nkalakashi na bitompuanga abikupa mushindo wa kulesha’shi we na kitshibilo kia ‘kutungunuka na kulonda’ Yesu. P’okitshi biabia, oshinkamishe’shi Yehowa akakukuasha. Bible amba’shi: “Efile Mukulu e na lulamato na t’akalekiela bua’shi nutompibue na kitompuanga kianushakobesha, kadi apenufikila kitompuanga, akenukuasha buanudia kuikala na ngobesha ya kuikinyingiila.”​—1 Ko. 10:13.

KIODIA KUKITA BUA’SHI OTUNGUNUKIE NA KULONDA YESU

11. Mmushindo kinyi umune wi buwa wa kutungunuka na kulonda Yesu? (Tala dingi kifuatulo.)

¹¹ Yesu baadi na katshintshi, na baadi elamina nsaa ya kuifubuila kui Yehowa mu nteko. (Luk. 6:12) Biabia, umune wa ku mishindo i buwa wa kutungunuka na kulonda Yesu kunyima kua kubatshishibua, nkutungunuka na kukita mianda ayikukuasha bua kunyiisha kuifubuila peepi na Yehowa. Bible amba’shi: “Sunga tuekala bapue kuenda kumpala mu mushindo kinyi, tutungunukieyi nka na kutambuka mu mulongo mu diadia eshinda dimune.” (Fid. 3:16) Ke bungi, opushaa mianda kui bakuetu balume na bakashi baate bitshibilo bia kukita bi bungi mu mudimo wa Yehowa. Pangi tababatuelele mu kalaasa ka Balungudi ba Bufumu sunga kuenda mbalo i lukalo lukata lua balungudi. Su we na mushindo, kano nyi nkepatshila ke buwa bukile kodia kuata n’obe namu. Muilo wa Yehowa aukimbaa mishindo ya kukita bi bungi buaye. (Bik. 16:9) We kupusha naminyi su kubanga binobino tue na mushindo wa kuata kano kepatshila? T’onangushenanga’shi we mushadile kui baaba balombene kuibikita. Biabia, kintu ki na muulo nkia’shi otungunukie nka na kunyingiila. (Mat. 10:22) T’olubanga’shi wekasha Yehowa na muloo wi bungi, nsaa y’okitshi kiakia kiodi mulombene kumukitshina muyile ngobesha yobe. Uno ngi mushindo umune wi na muloo odia kutungunuka na kulonda Yesu kunyima kua lubatshisho lobe.​—Mis. 26:1.

12-13. Su katshintshi koobe kabanga kupeela we kukita naminyi? (1 Bena Kodinda 9:16, 17) (Tala dingi kashibo akamba’shi: “Tungunuka na kusuuka lubilo.”)

¹² We kuipusha naminyi su nteko yobe t’ayikiayituukila muishimba, sunga’shi t’okio sangeela dingi mudimo wa bulungudi bu kumpala? We kuipusha naminyi su kubadika koobe kua Bible ta kuki’akukusankisha bu bibaakudi akukusankisha kumpala? Su ino mianda yakufikila kunyima kua kubatshishibua koobe, tu’ambanga’shi boshimisha kikudi kia Yehowa. Bu biatudi bantu bakutue kupuidika, nshalelo eetu ashintulukaa nsaa na nsaa. Su katshintshi koobe kabanga kubofula, nangushena ku kileshesho kia Mpoolo mutumibua. Sunga mbibaadi ekitshisha bua kuambula Yesu, Mpoolo baadi auku’shi ingi nsaa te bia kuikala na lukalo lui bukopo lua kukita kiakia kibaadi akumiina kukita nya. (Badika 1 Bena Kodinda 9:16, 17.) Bambile’shi: “Sunga nebikita kushi muyile kikiebe ki’eshimba diande, nenka na bulami buabadi bampe.” Mu ungi ngakuilo, Mpoolo baadi na kitshibilo kia kulombasha mudimo waye wa bulungudi sunga mbibaadi epusha bino ingi nsaa.

¹³ Mu mushindo umune, t’otadilanga kukutua kua kupuidika kuikale na bukitshishi ku bitshibilo biobe. Biabia, ikala na kitshibilo kia kukita mianda i buwa sunga t’okumiina kuiyikita. Su otungunuka na kukita mianda i buwa, biabia bi’opusha mbilombene kushintuluka ingi nsaa. Sunga mbia naminyi, kulama biubishi bi buwa bia mu kikudi akukakukuasha bua kulonda Yesu kunyima kua lubatshisho. Nsaa i bakuenu balume na bakashi abamono kunyingiila koobe mu kufubila Yehowa, abibanyingisha ngofu.​—1 Te. 5:11.

“TUNGUNUKAYI NA KUITOMPA . . . TUNGUNUKAYI NA KUITALULA”

14. Nkinyi akitungu’shi wetaluule nsaa yooso, na buakinyi? (2 Bena Kodindo 13:5)

¹⁴ Abikakukuasha dingi, su kunyima kua kubatshishibua okatungunuka na kuitaluula obe nabene nsaa yooso. (Badika 2 Bena Kodinda 13:5.) Nsaa yooso, kimba bino biubishi bi buwa mu nshalelo oobe, bua kumona su otekaa efuku dioso, obadikaa Bible na kumuilongiela, otuelaa mu bisangilo, na kutuuka mu bulungudi. Ekitshishe bodia kulumbuula ino mianda ya lulanguilo loobe. Bu kileshesho, we kuiyipusha ino nkonko: ‘Ne kupatuluila bangi akilongiesha Bible naminyi? Kui mishindo yandia kuikasha mudimo wande wa bulungudi wi buwa su? Mmushindo kinyi wadia kuela nteko ayituukila muishimba, na kukita biayidia kulesha’shi ne mukulupile mui Yehowa? Natuelaa mu bisangilo bia bena Nkidishitu misuusa yooso su? Ne kutuula binangu biande ku bisangilo na kutuusha ngaluulo naminyi?’

15-16. Bolongiela kinyi ku muanda wabadi bamone kui mukuetu mulume pabitale kukambila kitompuanga?

¹⁵ Bi na muulo dingi wa kuuka kubofula koobe. Mukuetu mulume Robert etulondela muanda wadi mumone, awitupatuluila uno muanda kalolo: “Pa naadi na bipua peepi 20, naadi na mudimo. Dingi efuku kunyima kua kufuba, muina mudimo nami mukashi bangitanyine kuaye ku nshibo. Andungula’shi: ‘Tui nka atue banabene, ngi nsaa i buwa ino.’ Ku mbangilo, naadi muleshe kubofula kupeela, anka kunyima namulunguile’shi nya, na namupatuluila buakinyi napele.” Robert baadi munyingiile ku kino kitompuanga na nga kukaanyisha. Kunyima pa baadi munangushena ku kibaadia kukitshika, baadi mumone’shi mmukite mianda kalolo. Amba’shi: “Ntshi naadi mupele n’eshimba dimune, sunga lubilolubilo bu bibaadi Yosefe mupele kui mukashi a Potifare nya. (Kib. 39:7-9) Biabia, bibaadi binkaanyishe bibaabidi bingielele bukopo bua kupela. Uno muanda ngunkuashe bua kumona’shi, abitungu nyingishe kipuano kiande na Yehowa.”

¹⁶ Bi nkukuasha pu’etaluula obe nabene bu bibaadi Robert muitaluule. Sunga nsaa y’okambila kitompuanga kampanda, eyipushe obe nabene’shi: ‘Abingataa nsaa bungi kinyi ya kuamba’shi nya?’ Su otundula kubofula kampanda akutungu kulumbuula, t’otshobolokanga. Biabia, ikala na muloo muanda ouku kubofula koobe. Ikala otekie pabitale kubofula koobe, na okite mianda kampanda ayinyingisha kitshibilo kiobe kia kuikala na nshalelo muipushene na mayi a kulonda a Yehowa.​—Mis. 139:23, 24.

17. Robert baadi mutumbishe eshina dia Yehowa naminyi mu muanda ubaadi mumone?

¹⁷ Kui mianda i bungi yatudia kulongiela ku muanda wabadi bamone kui Robert. Atungunuka na muanda waye amba’shi: “Kunyima ku’ami kupela luitanyino lua muina mudimo n’ami mukashi, bandunguile’shi: ‘Bokambila kitompuanga!’ Naadi mumuipushe ki’abipushisha. Baadi mumpatuluile’shi, naadi na lole ande Kamonyi ka Yehowa, bamulunguile’shi, ba nsongua booso Tumonyi tua Yehowa be na mapala abidi, apamueka mushindo wa kukita muluisho abakitaa. Nankiebanga kuuka su ngi biodi nobe. Naadi mupushe muloo ukile p’ami kuuka’shi, nantumbisha eshina dia Yehowa.”

18. We na kitshibilo kia kukita kinyi kunyima kua kubatshishibua? (Tala dingi kashibo akamba’shi: “Miisambo y’okasangeela.”)

¹⁸ Nsaa yuelambula kui Yehowa na kubatshishibua, olesha’shi okumiina kutumbisha eshina diaye sunga kuakitshika muanda kinyi. Biabia, ikala mushinkamishe’shi Yehowa auku nkalakashi na bitompuanga bi’okuete kunyingiila. Kulupila’shi kubukuashi bua kikudi kiaye kiselele, mmulombene nkupa bukome bua kunyingiila. (Luk. 11:11-13) Na dingi ku bukuashi bua Yehowa, okekala na ngobesha ya kutungunuka na kulonda Yesu kunyima kua lubatshisho lobe.