Wataa kudimusha na muulo su?

1. Nkiimu kinyi akikakitshika mu mafuku apeela’mu?

TUI MU kipungo ki bukopo! Mu mafuku apeela’mu, Yesu akatshibila muntu ooso mushaale pa nsenga kiimu. Yesu baadi muleeshe kipungo akikatuala ku kiimu p’aye kupa balongi baye “kitunduilo” kia kufika kuaye kush’akumueka na meeso na “kua nfudiilo a nsenga.” (Mat. 24:3) Kino kitunduilo mbekifunde mu mukanda wa Mateo shapitre 24 na 25, na ino mianda imune mbeyifunde mu mukanda wa Maako shapitre 3 na mu Luka shapitre 21.

2. Atuisambila kinyi mu uno muisambo, na bino abitukuasha naminyi?

² Nkindi isatu ya Yesu ayitukuasha buatudia kuikala belumbuule, na ayitudimusha. Inyi nkindi isatu ngino: Lukindi lua mbushi na mikooko, lua bansonguakashi tumame bakutue binangu, na badimukie, na lua ntalanta. Lukindi looso aluitukuasha bua kupusha’shi, Yesu akatshibila muntu ooso muyile bikitshino biaye kiimu. Mu uno muisambo, atuisambila ino nkindi yooso na atumono malongiesha aatukila kuayidi na biatudia kuiatumikila. Mu lukindi lua kumpala, atuisambila mbushi na mikooko.

MBUSHI NA MIKOOKO

3. Yesu akatshibila bantu kiimu nsaa kinyi?

³ Mu lukindi lua mbushi na mikooko, Yesu bakuile’shi akatshibila bantu kiimu muyile bi’abakitshi nsaa y’atuibalungula mukandu wi buwa na mushindo w’abakuatshishena bakuabo bedibue muimo. (Mat. 25:31-46) Mu kipungo kia “mpombo ikata,” Yesu ngi muakatshibi kiimu kia’shi ino mbushi, na’shi ino mmikooko kumpala kua’shi ngoshi ya Armagedone ibangie. (Mat. 24:21) Nka bu mulami a mikooko bi’abuulaa mbushi na mikooko, ngi bi’abakabuula kui Yesu bantu abakuatshishena balongi baye bedibue muimu na lulamato looso kui bano booso bash’abebikitshi.

4. Muyile mukanda wa Yeeshaya 11:3, 4, buakinyi tui kushinkamisha’shi Yesu akatshibila bantu kiimu na kululama? (Tala dingi ki ku kipusu.)

⁴ Butemuki bua mu Bible abuleesha’shi, Yehowa mmusangule Yesu bu nsushi akatshibi kiimu na kululama. (Badika Yeeshaya 11:3, 4.) Yesu akatala bi muikeelo wa bantu, binangu biabo, na bi’abakulaa, mpaa na mushindo w’ abakitshina bedibue muimu mianda. (Mat. 12:36, 37; 25:40) Yesu akawuku bantu abakuatshishenaa bakuabo bedibue muimu na mudimo wabo.a Umune wa ku mishindo i na muulo ukata wa bakuete kukuatshishena bakuabo na Nkidishitu kui bantu be bu mikooko, nyi nkulungula mukandu wi buwa. Baaba booso abakebakuatshishena, abakebatshibila kiimu bu “balulame” na abakekala na lukulupilo lua “muwa wa loso” pa nsenga. (Mat. 25:46; Kbf. 7:16, 17) Dino ngi efuto di buwa bukile adikapete baaba booso abakashaala na lulamato! Su babashaala na lulamato mu kipungo kia mpombo ikata, mashina aabo aakatungunuka na kuikala mu “mukanda wa muwa.”​—Kbf. 20:15.

5. Ndilongiesha kinyi di’atupetela ku lukindi lua mbushi na mikooko, na ndutale bantu kinyi?

⁵ Leesha’shi we na lukumiino na lulamato. Lukindi lua Yesu lua mbushi na mikooko, alushimika kasele kia kumpala bua baaba booso be na lukulupilo lua kushaala pa nsenga. T’abaleesha lukumiino luabo nka penda pa kukuatshishena bakuabo na Nkidishitu mu kukita mudimo wa kulungula mukandu wi buwa nya, anka abakumiinaa na lulamato looso kukunkushibua na kasaka kapeela ka bakuetu balume bedibue muimu babadi basangule kui Yesu. (Mat. 24:45) Biabia, mpaa na baaba booso be na lukulupilo lua kuenda muiyilu, abitungu bateemeshe uno mukandu wa kudimusha wi mu lukindi lua mbushi na mikooko. Buakinyi? Muanda Yesu kuete atala bi muikeelo wabo, binangu biabo, na bi’abakula. Abitungu n’abo namu baleeshe bi lukumiino luabo. Biabia, Yesu baadi muakule ingi nkindi ibidi ayishimika kasele pabitale kudimusha bedibue muimu. Atuiyipete dingi mu mukanda wa Mateo shapitre 25. Tutaluuleyi lukindi lua kabidi lua bansonguakashi tumame bakutue binangu, na badimukie.

BANSONGUAKASHI TUMAME BAKUTUE BINANGU, NA BADIMUKIE

6. Mmushindo kinyi ubaadi bansonguakashi bataano tumame baleeshe’shi babaadi badimukie? (Mateo 25:6-10)

⁶ Mu lukindi lua bansonguakashi tumame, Yesu bakuile bua bansonguakashi ekumi tumame babayile mu kufumankana na mulume. (Mat. 25:1-4) Bano bansonguakashi booso babaadi na lukulupilo lua kushindikila mulume ku musangeelo wa eyibakishi. Yesu baadi muleeshe’shi bataano babaadi “badimukie,” na bangi bataano namu babaadi “bakutue binangu.” Bansonguakashi tumame bataano babaadi belumbuule na bashaale bapasukie. Baaba bansonguakashi tumame bataano, babaadi belumbuule bua kutengiela mulume mpaa na nsaa yooso y’akafiki, sunga afika munkatshi mua bufuku. Dingi, babaadi batuale muimu wa kutembesha nawo bimunyi biabo bufuku. Babaadi batuale ungi muimu wa kulama bua’shi tala bimunyi biabo biashima su mulume akafika nsaa ikile. Biabia, babaadi belumbuule bua’shi bimunyi biabo bishaale nka abitembe. (Badika Mateo 25:6-10.) Nsaa ibafikile mulume, baaba bansonguakashi tumame babaadi bapasukie, babayile kuadi bakita naye musangeelo wa eyibakishi. Mu mushindo umune, bena Nkidishitu bedibue muimu mbalombene kuenda kui mulume Yesu, mu Bufumu buaye bua muiyilu nka su babashaala belumbuule, na bapasukie, na be na lulamato mpaa na p’akafiki.b (Kbf. 7:1-3) Nkinyi akikafikila bano bangi bansonguakashi bataano bakutue binangu?

7. Nkinyi kibaadi kifikile bansonguakashi tumame bataano babaadi bakutue binangu, na buakinyi?

⁷ Mu kuilekeena na bansonguakashi tumame badimukie, bansonguakashi tumame bataano babaadi bakutue binangu, ta babaadi belumbuule bua nsaa ayikafiki mulume nya. Bimunyi biabo bibaadi bishime, kadi ta babaadi na ungi muimu wa kuibitembesha dingi nya. Pa babawukile’shi mulume taadi peepi na kufika, babayile mu kuula muimu. Nsaa ibafikile mulume, abo ta babaadi babande kualuka nya. Yaya nsaa: “Ba nsonguakashi tumame babaadi belumbuule, babatuelele naye mu musangelo wa bulunda, na abo nkushita kiibi.” (Mat. 25:10) Kunyima nsaa ibalukiile bano bansonguakashi tumame bakutue binangu bua’shi batuele mu nshibo, mulume bebalunguile’shi: “Ta nenuuku nya.” (Mat. 25:11, 12) Bano bansonguakashi tumame babaadi bakutue binangu, ta babaadi belumbuule bua kutengiela mulume mpaa na nsaa yooso y’afiki nya. Ndilongiesha kinyi bua bedibue muimu?

8-9. Bedibue muimu be kupetela dilongiesha kinyi ku lukindi lua bansonguakashi tumame? (Tala dingi kifuatulo.)

⁸ Leesha’shi we muilumbuule na we mupasukie. Yesu ta bakuile’shi kui bisaka bibidi bia bedibue muimu, kimune nkia belumbuule bua kutengiela mpaa na apakafikila nfudiilo a uno ndumbuluilo a mianda e bubi, na kingi namu ta nkilumbuule bua kutengiela nya. Biabia, baadi mupatuule kilombene kukitshikila bedibue muimu bashi belumbuule bua kunyingiila na lulamato looso mpaa na ku nfudiilo. Su ta mbelumbuule, t’abakapete efuto. (Yo. 14:3, 4) Uno mmuanda wa kuata na muulo! Sunga tuekala na lukulupilo lua kuenda muiyilu sunga lua kushaala pano pa nsenga, abitungu atue booso tuate kuno kudimusha kua Yesu kui mu lukindi lua bansonguakashi tumame na muulo. Abitungu ooso a kuatudi, atungunukie na kushaala mupasukie na kuilumbuula bua kunyingiila mpaa na ku nfudiilo.​—Mat. 24:13.

⁹ Kunyima kua kupatuula lukindi lua bansonguakashi tumame, lubaadi lushimikie kasele pa muulo wa kuilumbuula na kushaala mupasukie, Yesu bakuile bua lungi lukindi lua ntalanta. Luno lukindi alushimika kasele pa muulo wa kukita mudimo na kisumi kioso.

NTALANTA

10. Bafubi babidi babaadi baleeshe lulamato luabo mushindo kinyi? (Mateo 25:19-23)

¹⁰ Mu lukindi lua ntalanta, Yesu bakuile bua bafubi babidi babaadi na lulamato kui nfumuabo, anka mufubi umune ta baadi na lulamato nya. (Mat. 25:14-18) Bano bafubi babidi babaadi baleeshe’shi be na lulamato p’abo kufuba ngofu bua kufuimisha makuta a nfumuabo. Kumpala kua kuenda mu luendo ku dingi ewumbo, nfumu baadi muibape ntalanta, kuamba’shi makuta e bungi. Bano bafubi babidi babaadi na lulamato, babaadi baate aa makuta na beafubisha kalolo. Nkipeta kinyi kibatukile? Nsaa ibalukiile nfumuabo, basangeene baaba bafubi babidi mbafuimishe makuta abebapeele misuusa ibidi. Nfumuabo bebalunguile’shi: Tuelayi “mu muloo wa [nfumuenu].” (Badika Mateo 25:19-23.) Bibaadi naminyi bua mufubi a kasatu? Bakitshine kinyi na makuta ababamupeele kui nfumuaye?

11. Nkinyi kibaadi kifikile uno mufubi “mulofua,” na buakinyi?

¹¹ Mufubi a kasatu baadi mupete ntalanta umune, anka baadi “mulofua.” Nfumuaye baadi mukulupile’shi afubisha yawa ntalanta kalolo. Pa mutue pa biabia, baadi mubundule mu nsenga afia yawa ntalanta. Nsaa ibalukiile nfumuaye, yawa mufubi baadi mumualuishe nka ntalanta umune abamupeele kushi kutenteka. yawa mufubi ta baadi na binangu bi buwa nya. Uno mufubi pa mutue pa kuteka lusa bua biadi mufubishe bintu bia nfumuaye bi bubi, baadi muitanyine nfumuaye bu “muntu a mianda i bukopo.” Uno mufubi ta baadi mukuminyibue na nfumuaye nya. Kukatusha biabia, babamunyengiele yawa ntalanta, bamubinga mu nshibo ya nfumuaye.​—Mat. 25:24, 26-30.

12. Bafubi babidi ba sha lulamato abaleesha bantu kinyi lelo uno?

¹² Bafubi babidi ba sha lulamato, abaleesha bena Nkidishitu bedibue muimu. Nfumuabo, Yesu, ebetanyina buabadia ‘Kutuela mu muloo wa nfumuabo.’ Abapete efuto dia kuenda muiyilu, lusangukilo lua kumpala. (Mat. 25:21, 23; Kbf. 20:5b) Anka, kileshesho ki bubi kia mufubi muloofua, akidimusha bedibue muimu. Mu mushindo kinyi?

13-14. Bedibue muimu abapete dilongiesha kinyi ku lukindi lua ntalanta? (Tala dingi kifuatulo.)

¹³ Leesha’shi we mufubi sha kisumi. Mu lukindi lua ntalanta na lua bansonguakashi tumame, Yesu ta batemukile’shi bedibue muimu abakekala baloofua nya. Anka, baadi mupatuule kilombene kuibafikila su bashimisha kisumi kiabo. Be kukutua “kushinkamisha kuitaminyibua na kusangudibua [kuabo abo banabene],” na be kukutua kutuela mu Bufumu bua muiyilu.​—2 Mp. 1:10.

¹⁴ Mu nkindi ya Yesu bu lua bansonguakashi tumame na lua ntalanta, ayipushisha kalolo’shi abitungu bena Nkidishitu booso bedibue muimu bekale belumbuule na bapasukie, P’abakitshi bino abaleesha’shi mbafubi ba sha kisumi. Biabia, Yesu bakuile ungi muanda bua kudimusha bedibue muimu su? Oolo, bakuile! Atupete kuno kudimusha mu mukanda wa Mateo 24:40, 41, awakuila dingi kiimu kia nfudiilo kia bedibue muimu.

NNANYI “ABAKATA”?

15-16. Mukanda wa Mateo 24:40, 41, aukuasha bedibue muimu buabadia kumona muulo wa kushaala bapasukie naminyi?

¹⁵ Kumpala kua kuakula bua nkindi isatu ibatukatuka mu kutaluula, Yesu baadi mupatuule bua kiimu kia nfudiilo kia bedibue muimu, akikaleesha winyi abadi bakumiine. Yesu bakuile dingi bua bana balume babidi abakitshi mudimo muifuba na bana bakashi babidi abapele ku mabue. Mu luno lukindi, abimueka’shi booso babidi abakitshi mudimo umune, anka Yesu bakuile’shi, “abakata umune balekie ungi.” (Badika Mateo 24:40, 41.) Yesu baadi dingi mudimushe balongi baye’shi: “Biabia shalayi bapasukie, muanda t’anuuku efuku adifiki Nfumuenu.” (Mat. 24:42) Yesu bakuile ungi muanda wi mumune na uno, kunyima kuaye kuakula bua lukindi lua bansonguakashi tumame. (Mat. 25:13) Mui kuipusheena mu kuno kudimusha kooso su? Oolo, mui kuipusheena. Nka penda bedibue muimu ba sha lulamato lua binyibinyi ngi ‘baabakaata,’ bebakuukile kui Yesu batuele mu Bufumu bua muiyilu.​—Yo. 14:3.

¹⁶ Leesha’shi we mupasukie. Muedibue muimu ooso sh’ashaala mupasukie mu kikudi, t’abakamubungu na bano “basangulue” nya. (Mat. 24:31) Biabia, atue booso muilo w’Efile Mukulu, sunga tuekala na lukulupilo kinyi, abitungu tumone ano mayi a Yesu bu kudimusha akuitukuasha buatudia kushaala bapasukie na kushaala na lulamato.

17. Buakinyi ta tui balombene kufiita munda su Yehowa asangula muedibue muimu ano mafuku eetu?

¹⁷ Atue abawuku Yehowa kalolo, tui bashinkamishe’shi akitaa mianda nka na kululama. Ta tui balombene kufiita munda su Yehowa asangula bena Nkidishitu ba sha lulamato bu bedibue muimu, ano mafuku eetu nya.c Atutentekiesha kibakuile Yesu bua bena mufubo bababangile mudimo mu nsaa ya 11, mu kileshesho kiaye kia nfinyo. (Mat. 20:1-16) Baaba bababetanyine bua kukita mudimo ku kiolua muifuba dia nfinyo, babapetele efuto dimune na baaba bababangile mudimo kunakashika. Mu mushindo umune, Sunga bedibue muimu bekala basangudibue nsaa kinyi, abakapete efuto dia kuenda muiyilu su bebatshibila kiimu kia’shi be na lulamato.

ATA KUDIMUSHA NA MUULO

18-19. Tubalongo kinyi mu ino nkindi ya Yesu?

¹⁸ Tubamono mianda kinyi? Bua booso be na lukulupilo lua kushaala na muwa pa nsenga, lukindi lua mbushi na mikooko alushimika kasele pa muulo wa kushaala na lukumiino na lulamato kui Yehowa, kubanga binobino mpaa na apakafiki mpombo ikata. Mu kiakia kipungo akifiki, Yesu akatshibila baaba abashaala na lulamato kiimu kia’shi mbalombene “nkapeta muwa wa loso.”​—Mat. 25:46.

¹⁹ Tubakatuka mu kumona dingi nkindi ibidi ayidimusha bedibue muimu. Mu lukindi lua bansonguakashi ekumi tumame, bataano ba kuabadi babaadi baleeshe’shi be na binangu. Babaadi belumbuule na bapasukie, mbelumbuule bua kutengiela mpaa na nsaa ayikafiki mulume. Anka bano bataano babaadi bakutue binangu ta babaadi belumbuule nya. Ngi buakinyi mulume baadi mupele’shi tabatuelanga naye mu musangeelo wa eyibakishi. Natue namu, abitungu’shi tuilumbuule bua kutengiela Yesu mpaa na p’akafiki mu kubutula uno ndumbuluilo a mianda e bubi. Na dingi, mu lukindi lua Yesu lua ntalanta tubamono bafubi babidi ba sha lulamato babaadi bafubi ba sha kisumi. Babaadi bakite mudimo wi bukopo bua kufuimisha makuta a nfumuabo na abo nkukuminyibua naye. Anka uno mufubi baadi muloofua, babamubingile. Bibetulongisha kinyi? Bibetulongiesha’shi, abitungu tuikale na bi bungi bia kukita mu mudimo wa Yehowa mpaa na ku nfudiilo. Ku nfudiilo, tubamono’shi abitungu bedibue muimu bashaale bapasukie bua’shi Yesu amone bia “kuibaata” buadia nkebapa efuto diabo dia muiyilu. Bano bedibue muimu bakuete kutengiela na kinsukunsuku kioso bua “kubungibua” bua kuenda muiyilu na Yesu. Kunyima kua ngoshi ya Armagedone, abakashaala pamune na Yesu buabadia kudia kidibua muiyibakishi dia Muana a mukooko.​—2 Te. 2:1; Kbf. 19:9.

20. Yehowa akakitshi kinyi bua bano booso abaata kudimusha kuaye na muulo?

²⁰ Biabia, nsaa ya Yesu kutshibila bantu kiimu tayidi peepi, anka t’abitungu’shi tutshine nya. Biabia su tubashaala na lulamato, Nshetu sha kufulo e muiyilu aketupa “bukome bukile bua mafuku oso” bua’shi “tumone bia koobesha . . . kuimana kumpala kua Muana a muntu.” (2 Ko. 4:7; Luk. 21:36) Sungu tuekala na lulukupilo lua kuenda muiyilu sunga lua kushaala pa nsenga, atukasankisha Nshetu su tubaata kudimusha kui mu nkindi ya Yesu na muulo. Kukiila ku kalolo ka Yehowa, mashina eetu aakekala “afundwe mu mukanda” wa muwa.​—Nda. 12:1; Kbf. 3:5.