Muloo wi bungi autuukilaa mu kupaana

1-2. Bi kuitukuasha bu biatudi bapangibue na ngobesha ya kupeta muloo p’atupa bangi kukila p’abetupa naminyi?

YEHOWA pa bapangile bantu, bebapangile na ngobesha ya kupeta muloo wi bungi nsaa y’abapa bangi kukila nsaa y’abebapa. (Bik. 20:35) Bino abipushisha’shi ta tui balombene kupeta muloo nsaa y’abetupa namu kia buntu kui bangi su? Nya. Atue booso apushaa muloo nsaa y’abetupa kia buntu. Anka atupushaa muloo wi bungi nsaa y’atupa bangi. Na mu binyibinyi, Yehowa baadi muitupangie mu uno mushindo bua buwa buetu. Buakinyi?

² P’aye kuitupanga mu uno mushindo, Yehowa mmuitukuashe bua’shi tuikale na muloo mu nshalelo eetu. Tui kutamisha muloo wetu nsaa y’atukimbi mishindo ya kupa namu bangi. Bi muloo ukata bu bitupangie Yehowa mu uno mushindo.​—Mis. 139:14.

3. Buakinyi Bible aleesha Yehowa bu “Efile Mukulu a muloo”?

³ Bible etulungula’shi booso abapa bangi be na muloo, tui kupusha kalolo buakinyi Yehowa mmuikale “Efile Mukulu a muloo.” (1 Ti. 1:11) Aye ngi baadi muikale a kumpala kupa bangi, na ta kui ungi muntu mulombene kupesheena kukila Yehowa. Nka bu bibakuile Mpoolo mutumibua’shi, kukiila kuadi, “tui na muwa, atusanasana, na tui kuanka.” (Bik. 17:28) Na dingi, “kia buntu kioso kibuwa na kia buntu kioso kipuidikie” abifiki kui Yehowa.​—Yak. 1:17.

4. Nkinyi akitukuasha bua kupeta muloo wi bungi?

⁴ Pangi atue booso atukumiinaa kupeta muloo wi bungi autuukila mu kupa bangi. Tui kuibikita pa kuambula kalolo ka Yehowa ka kupaana. (Ef. 5:1) Mu uno muisambo, atuisambila kileshesho ki buwa kia kupaana, na kuwuka kia kukita su tubapa muntu kintu kadi bakutua kuitutumbula bua bibatumukitshina. Ino mianda ayitukuasha buatudia kulama na kutamisha muloo wetu autuukila mu kupa bangi.

AMBULA YEHOWA PA KUPA BANGI

5. Yehowa etupeyaa bintu kinyi bia ku mbidi?

⁵ Yehowa aleeshaa kalolo ka kupaana mu ingi mishindo kinyi? Tutaluuleyi bileshesho bipeela. Yehowa etupeyaa bintu bia ku mbidi. Ta nsaa yooso y’atuikalaa na bintu bia muulo nya, anka ku bukuashi bua Yehowa atupetaa bintu biatudi nabio lukalo. Bu kileshesho, etukuashaa bua’shi tupete bidibua, bilamba, na mbalo ya kushaala. Mis. 4:8; Mat. 6:31-33; 1 Ti. 6:6-8) Yehowa etupeyaa bintu bia ku mbidi biatudi nabio lukalo bu kitungo su? Ta mbiabia nya! Buakinyi Yehowa etukitshinaa bino bioso?

6. Mukanda wa Mateo 6:25, 26, ubetulongiesha kinyi?

⁶ Yehowa etupeyaa bintu bia ku mbidi biatudi nabio lukalo muanda mmuitufule. Tutaluuleyi mayi a Yesu e mu mukanda wa Mateo 6:25, 26. (Badika.) Yesu afubisha bileshesho bia bintu bipangibue. Yesu pa baadi akula bua toonyi, bambile’shi: “Tatukunaa sunga kuumbula, sunga kulama bia kudia mu mashibo.” Akula dingi’shi: “Nshenu e muiyilu etudishaa.” Na dingi Yesu bayipuishe’shi: “Tanui na muulo kuitukila su?” Abitulongiesha kinyi? Yehowa ataa balanguidi baye na muulo ngofu kukila nyema. Su Yehowa apasukilaa nyema, bino abitushinkamiisha’shi mmulombene kuitulombesha nkalo yetu! Anka abikitaa nshe bana, Yehowa alombashaa nkalo yetu muanda mmuitufule.​—Mis. 145:16; Mat. 6:32.

7. Mmushindo kinyi umune watudi balombene kuambula kalolo ka Yehowa ka kupaana? (Tala dingi kifuatulo.)

⁷ Nka bu Yehowa, tui kupa namu bangi bintu bia ku mbidi na kifulo kioso. Bu kileshesho, owuku namu muina Nkidishitu noobe kampanda e mu lukalo lua kidibua sunga lua bilamba? Yehowa e nkufubisha bodia kumupuila lukalo luadi nalo. Muilo wa Yehowa nguwukibue bua kuleesha kalolo ka kupaana kushii kunyengakana bikishekishe nsaa ayituku masaku aatuukila ku bintu bipangibue. Bu kileshesho, mu kipungo kia kipupa kia Corona-virus, bakuetu balume na bakashi mbaabile bangi bidibua, bilamba, na bingi bintu bia ku mbidi bibaabadi nabio lukalo. Be bungi abatuushaa bia buntu bua kukuatshisheena mudimo ukuete kukitshika mu nsenga ishima. Bino abikuasha bua kukuatshisheena bakuetu be mu nsenga ishima, mu ma mbalo e lukalo lukata aatuuku masaku aatukila ku bintu bipangibue. Bano bakuetu balume na bakashi booso be na kalolo ka kupaana, abatumikilaa mayi e mu mukanda wa Bena Ebelu 13:16, aamba’shi: “Tanulubanga kukita bibuwa na kuiabishena na bangi bintu bianudi nabio, muanda Efile Mukulu asankaa na milambu i biabia.”

8. Yehowa etukuashaa buatudia kupeta bukome naminyi? (Bena Fidipe 2:13)

⁸ Yehowa etupeyaa bukome. Yehowa e na muloo wa kupa bafubi baye ba sha lulamato bukome buaye bushi na nfudiilo. (Badika Bena Fidipe 2:13.) Toodi muele namu luteko bua kukambila kitompuanga sunga bua’shi opete bukome bua kunyingiila kipungo kia nkalakashi i bukopo su? Pangi tobotekiele dingi Yehowa bua’shi akupe bukome bua kutungunuka na kukita bi bungi mu mafuku e kumpala. Pa baluluile ku luteko loobe, pangi boodi mupushe nka bi bapushishe Mpoolo mutumibua pa bafundile’shi: “Mu mianda yoso napetaa bukome, ku bukuashi bua yawa ebumpeyaa.”​—Fid. 4:13.

9. Mmushindo kinyi watudi balombene kuambula kalolo ka Yehowa ka kupaana pa kufubisha bukome buetu? (Tala dingi kifuatulo.)

⁹ Sunga mbiatudi bakutue kupuidika, tui kuambula mushindo aufubishaa Yehowa bukome buaye na kalolo kooso. Ta tui balombene kupa bangi bukome bu abikitaa Yehowa nya, kadi tui kumuambula pa kufubisha bukome buetu bua kuibakuasha. Bu kileshesho, tui kukuasha bakuetu babaapu kununupa sunga abakumbu pa kuibalumbuluila mashibo aabo, sunga kuenda mu kisalue mu kuibawudila bintu. Su kui mushindo, tui kuipaana bua kuenda mu kukuasha bua kutumpa na kulumbuula Nshibo ya Bufumu. Su tubafubisha bukome buetu mu ino mishindo, abikuasha bangi buabadia kulanguila Yehowa.

10. Tui kufubisha bukome bua bishima bietu bua kukuasha bangi naminyi?

¹⁰ Biabia, tolubanga’shi mianda yu’akula i kunyingisha bangi. Owuku’shi su otumbula ungi muntu mu binyibinyi na kumulungula’shi nasankilaa biabia bi’okitshi, bi kumunyingisha? Owuku muntu kampanda e na lukalo lua kunyingishibua su? Su we mukite bino, ikala mushinkamishe’shi yawa muntu awuku’shi okuete kumupasukila. We kuenda kui muntu mu kumutembela, kumuitanyina ku telefone, sunga kumutumina mesaje. Tuekalakashanga bua kuakula bi bungi. Mpenda nka bishima bipeela abitukila muishimba biabadi nabio lukalo kui bena Nkidishitu nobe, buabadia kushaala na lulamato mu mafuku e kumpala sunga kuipusha bi buwa pabitale nkalakashi yabo.​—Nki. 12:25; Ef. 4:29.

11. Yehowa apeyaa bangi binangu biaye mushindo kinyi?

¹¹ Yehowa etupeyaa binangu. Yakobo mutumibua bafundile’shi: “Su kui muntu a kuanudi mukutue binangu, atungunukie na kuibiteka kui Efile Mukulu, na abakamupa bianka, muanda ebipeyaa bantu boso na kalolo kushi kuibatopeka.” (Yak. 1:5) Bino bishima abileesha’shi, Yehowa t’alamaa binangu biaye bua penda aye nabene nya. Ebipeyaa bangi na kalolo kooso. Yakobo akula dingi’shi: Su Yehowa apa muntu binangu, amupa bianka “kushi kumutopeka.” T’akumiinaa’shi tupushe bi bubi nsaa y’atumutekie buludiki buatudi nabo lukalo nya. Mu kuilekeena na biabia, Yehowa akumiina’shi tumutekie buanka.​—Nki. 2:1-6.

12. Tui na mishindo kinyi yatudi balombene kupa bangi binangu bietu?

¹² Uno muanda nguitutale naminyi? Tui kuambula namu Yehowa pa kupa bangi binangu bietu naminyi? (Mis. 32:8) Muilo wa Yehowa wi na mishindo i bungi ya kulungula bangi mianda yabadi balongie. Bu kileshesho, ke bungi atutukaa na balungudi bapia mu bulungudi bua kuibaleesha bia kulungula mukandu wi buwa. Bakulu abekalaa na luishinko lui bungi, bua kukuasha bafubi ba midimo na bakuetu balume baki’abakatuka mu kubatshishibua buabadia kukita midimo y’abebapa mu kakongie. Na bakuetu balume na bakashi abawuku kuibaka mashibo a Bufumu na kuialama kalolo, abakuashaa bangi buabadia kuwuka uno mudimo bua’shi bamone bia kufubila Yehowa.

13. Nsaa y’atulongiesha bangi, tui kuambula mushindo wa Yehowa w’apeshenaa binangu naminyi?

¹³ Ekitshishe bua kuambula mushindo aupaanaa Yehowa binangu biaye nsaa y’olongiesha bangi. Tentekiesha’shi Yehowa apanaa binangu biaye na kalolo kooso. Mu mushindo umune, tulunguleyi bangi mianda y’atuwuku na yatudi bamone. T’abitungu’shi tufie bangi kiwukilo kietu mu kutshina kua’shi tala ampiana nya. Tatuikalanga na uno mmueneno a’shi: ‘Ta kui mundongieshe! Bangi bantu abanangushenaa’shi ku muanda ta mbebalongieshe, n’abo namu t’abakukumiinaa kulongiesha bangi.’ Bino binangu bi bino, ta bi na mbalo munkatshi mua muilo wa Yehowa. Biabia, ta tui na muloo nka penda wa kulongiesha bangi nya, “kadi mpa na kuibapa miuwa yetu” kuamba’shi bumuntu buetu booso. (1 Te. 2:8) Atukulupila’shi: “abo namu abakekala balombane bua kulongiesha bangi.” (2 Ti. 2:1, 2) Mu uno muanda umune, su atue booso tuekala atuipeshena binangu, atue booso atuikala na binangu mpaa na muloo.

SU MUNTU ABOPA KINTU TA MMUKUTUMBULE

14. Bantu be bungi abakitaa naminyi nsaa y’atuibakitshina kintu kampanda?

¹⁴ Nsaa y’atupa bangi kintu kampanda, bikishekishe bakuetu balume na bakashi, ke bungi abetutumbulaa. Be nkufundila mukanda wa kukutumbula, sunga kukutumbula mu ungi mushindo. (Kol. 3:15) Nsaa y’abetutumbula, atunyiishaa kupusha muloo bua kiatudi bebakitshine.

15. Abitungu tutentekieshe kinyi su bangi t’abetutumbula ku bi’atuibakitshina?

¹⁵ Anka ingi nsaa, bangi bantu t’abetutumbulaa bua bi’atuibakitshina nya. Ingi nsaa, bangi bantu abakutua kumona bioso bi’atuikitshisha bua kuibakuasha, bu nsaa ibatukisha, bukome buetu, na makuta abatutuusha bua kuibakuasha. Su bakutua kuitutumbula, tui kulama muloo wetu na kuleka kutshoboloka naminyi? Tentekiesha mayi e mu Kifundue kia mutue wetu wa muanda, e mu mukanda wa Bikitshino 20:35. Muloo w’atupushaa nsaa y’atupa bangi bintu, t’autukilaa nka ku mushindo w’abetutumbula nya. Tui kuata kitshibilo kia kutungunuka na kupa bangi na muloo ooso, sunga bakutua kuitutumbula ku bi’atuibakitshina. Mu mushindo kinyi? Tubandeyi kutala mishindo ipeela.

16. Nkinyi kilombene kuitukuasha buatudia kutungunuka na kupa bangi na muloo?

¹⁶ Tentekiesha’shi nsaa y’opa bangi, okuete kuambula Yehowa. Yehowa apeyaa bantu bintu bi buwa su bamutumbula sunga bakutua kumutumbula. (Mat. 5:43-48) Yehowa etulaa’shi su n’atue namu tubaapa bangi, “kushi kukulupila’shi betualuishe kintu su nkimune,” biabia “efuto dietu adikekala dikata.” (Luk. 6:35) Kino kishima “kintu su nkimune” nkilombene kuleesha lutumbu. Biabia, sunga betutumbula sunga kukutua kuitutumbula, Yehowa aketufutu bua mianda i buwa y’atukitshi bua kukuasha bangi, na muanda ‘atutuusha na muloo.’​—Nki. 19:17; 2 Ko. 9:7.

17. Nkingi kintu kinyi kiatudia kukita bua kuambula Yehowa nsaa y’atupa bangi? (Luka 14:12-14)

¹⁷ Kingi kintu kiatudia kukita bua kuambula Yehowa nsaa y’atupa bangi bintu, nkutumikila mayi a Yesu abakuile mu mukanda wa Luka 14:12-14. (Badika.) Ta bi bubi kukuukila beenyi sunga kuleesha kalolo kui bangi balombene kuitukitshina namu n’atue nya. Biabia, bi kuikala naminyi su tuamona’shi atukitshinaa bangi kalolo penda pa muanda wa’shi betualuishe namu n’atue? Su ngi bi’okitaa, ekitshishe bua kutumikila mayi abakuile Yesu. Tui kukitshina muntu kampanda kalolo, muanda atuwuku’shi te bia kuitukitshina namu n’aye kalolo. Dingi, atuikala na muloo muanda tukuete kuambula Yehowa. Su tubakitshina bangi kalolo kushi kutengiela’shi betualuishe, atuikala nka na muloo efuku dioso sunga bakutua kuitutumbula ku bi’atuibakitshina.

18. Nkinyi ki bia kuitukuasha bua kuleka kuelela bakuetu balume na bakashi binangu bi bubi, na buakinyi?

¹⁸ Tulekieyi kuelela bangi binangu bi bubi. (1 Ko. 13:7) Su bangi bakutua kuitutumbula, tui kuiyipusha’shi: ‘Eyendo ta be na lutumbu, su babayiluankana bua kuitutumbula?’ Pangi kui tungi tubingilo tua buakinyi, ta mbetutumbule bu bi’atukulupilanga. Pangi bangi, pa muanda wa’shi kalolo kabakishakisha kuibakuma ku mashimba, be kukutua na kuitutumbula. Mbilombene kuibakalakasha bikishekishe su kala, babaadi abakuasha namu bangi. Su mu binyibinyi tui bafule bakuetu balume na bakashi, t’atuikala atuibelela binangu bi bubi nya, anka atutungunuka na kuibapa na muloo ooso.​—Ef. 4:2.

19-20. Buakinyi luishinko ndulombene kuitukuasha nsaa y’atupa bangi kintu? (Tala dingi kifuatulo.)

¹⁹ Ikala na luishinko. Pabitale kuikala na kalolo Nfumu Solomoni bafundile bino: “Ela dyampa dyoobe panundw’a meema, mwanda wedipetuula kuunyima a mafuku.” (Mul. 11:1) Nka bu abileesha ano mayi, bangi be nketutumbula muyile kalolo kabatudi bebakitshine “kunyima a mafuku.” Tubandeyi kutala muanda ubaadi ukitshikile ungi mukuetu mukashi.

²⁰ Mu bipua bibakidi, ungi mukashi a mukunkushi a kifunda baadi mufundile ungi mukuetu mukashi ki’akatuka mu kubatshishibua mukanda wa kumunyingisha, mu wawa mukanda, baadi mushimikie kasele pa muulo wa kushaala na lulamato kui Yehowa. Kunyima kua bipua muanda, yawa mukuetu mukashi baadi mu mufundile waye mukanda amba’shi: “Mukanda oobe ngunyingishe ngofu, we munkuashe munda mua bino bipua bioso bibakidi.” Bambile dingi’shi: “[Mukanda oobe] ubaadi na mayi a kalolo, na ntaa na ndube verse oboodi muimuele.”a Kunyima kua kupatuula ingi nkalakashi ibaadi mufumankane nayo, mukuetu mukashi bambile’shi: “Ingi nsaa, naadi nakiebe kupela kukita kintu su nkimune, mpaa na kupela kuikala bu Kamonyi ka Yehowa. Anka, natentekieshaa kifundue kiboodi munfundile mu mukanda oobe, kibaadi kinkume kuishimba ngofu . . . na kiankuasha buandia kutungunuka na kushaala na lulamato.” Bambile dingi’shi: “Munda mua bino bipua bioso muanda, ta kui kintu kinyingishe bu mukanda oobe na kifundue kiboodi muimuele nya.” Banda kupuandikisha muloo ubapushiishe uno mukashi a mukunkushi a kifunda, nsaa ibaadi mupete mukanda “kunyima a mafuku”! N’atue namu, be kuitutumbula kunyima ku’atue kukitshina muntu kampanda kintu ki buwa mu ungi mushindo.

21. Buakinyi we na kitshibilo kia kuambula kalolo ka Yehowa ka kupaana?

²¹ Nka bu biatudi bebileeshe kunundu, Yehowa betupangile na ngobesha i pa buayo. Sunga mbi’atupushaa muloo nsaa y’abetupa kintu, anka muloo w’atupushaa nsaa y’atupa bangi ngukile. Atupushaa buwa bukile nsaa y’atupete mushindo wa kukuasha bena Nkidishitu netu. Na atuikalaa na muloo wi bungi nsaa y’abetutumbula. Biabia, sunga betutumbula sunga kupela kuitutumbula, tui kuikala nka na muloo muanda tubakitshi muanda wi buwa. Tolubanga’shi nsaa y’opa bangi, “Yehowa mmulombêne kukwalwisha bikile papa.” (2 Mya. 25:9, EEM) Tue bia kupa bangi bikile biabadi balombene nkupa kui Yehowa nya! Na nsaa y’abetufutu kui Yehowa, abikalaa buwa bukile. Ngi buakinyi, tuikaleyi na kitshibilo kia kutungunuka na kuambula Nshetu e muiyilu sha kalolo ka kupaana.