1924​—Takudi bipua lukama

BABAADI ABALUNGULA MUKANDU WI BUWA KU KISAASHI N’ESHIMBA DINYINGIE

Bakuetu ba ku Betele babaadi bafube ngofu bua kuibaka kisaashi kia WBBR, mu kibundi kia New York. Kunyima kua kulumbuula yaya mbalo, babaadi bebakie nshibo ikata ya bena mudimo na beyitshibuula tudimbo tua kutuula bintu. Pabapuile wawa mudimo, bakuetu bababangile kuata bintu bibaadi na muulo bua kuenda nabio ku “kisaashi.” Anka babaadi na kia kunyingiila nkalakashi i bukopo.

Bakuetu babaadi bamone’shi bibaadi bukopo bukile bua kushimika antene a kiakia kisaashi. Bibaadi abitungu’shi uno antene baadi bula bua metre 91 ekale mutentekibue ku mitshi ibidi i na bula bua metre 61 ku mutshi ooso. Ku mbangilo ta babaadi bobeshe nya. P’abo kukulupila mu bukuashi bua Yehowa, nfudiilo a bioso babaadi bobeshe. Calvin Prosser baadi mufube mu uno mudimo bambile’shi: “Su tubadia koobesha kushimika antene wawa musuusa wa kumpala ubatutompele, tubadia kuikala na kuimona tuabanga kuamba’shi: ‘Talayi kintu kibatukitshi!’” Bano bakuetu babaadi balushe ntumbo kui Yehowa, anka nkalakashi yabo tayibaadi ipue nya.

Pabaadi kisaashi kietu kikii kipia, tabibaadi bibofule bua kuula bintu bibaatudi nabio lukalo nya. Biabia, bakuetu babaadi bafubishe emeter tabaadi mukulu baadi na bukome bupeela bua 500W bua kupalakasha mayi nka penda mu kiakia kibundi mubaadi kisaashi. Pa mutue pa kuula mikro inabene ya kisaashi, bakuetu babaadi abafubisha mikro ya telefone bisumanga. Dingi efuku bufuku mu mueshi wa Kabidi, bakuetu babaadi baate kitshibilo kia kutompa bintu bioso bia kisaashi bibaabadi bawule. Bu bibaabadi na lukalo lua kuwukisha mianda ku kisaashi, bakuetu babayimbile ngono ya Bufumu. Ernest Lowe atentekiesha’shi, baaba bakuetu babaadi abayimbi babaadi bebayitanyine kui Nsushi Rutherford,b ebalungula’shi yaya ngono yanukuete kuyimba ibapushika mu kisaashi kiande ki kuno ku Brooklyn, aku namu kui bula bua bilometre bikile pa 25.

Mukuetu Rutherford baadi muibalungule mu miseku amba’shi: “Lekayi kuela tuatua tulewo.” Na’shi: “Mayi eenu aapushika nka bu tu buusu atudidi!” Bibaadi bikalakashe bakuetu kapeela abo nkutshiba kisaashi, anka babaadi bashinkamishe’shi tabadi peepi na kukita miisambo yabo ya kumpala ku kisaashi.

Mu 24/2/1924, mukuetu Rutherford bambile’shi: “Kino kisaashi atuikifubisha bua kukita nakio mudimo wabadi betupe kui Nkidishitu Nfumu.” Mukuetu Rutherford bambile’shi: “Kepatshila ka kino kisaashi nka kukuasha bantu booso bua’shi bapushe Bible kalolo na bawukie’shi tui bashaale mu kipungo kinyi.”

Muisambo wa kumpala ku kisaashi ubakitshikile kalolo kakile. Kiakia kisaashi kia WBBR babaadi bekifubishe munda mua bipua 33, bua kukitanga miisambo kuanka ya muilo wa Yehowa.

BABAADI ABATOPEKA MALONGIESHA A BAKATA BA BIPUILO KU KISAASHI N’ESHIMBA DINYINGIE

Mu mueshi wa Musambo kipua kia 1924, Balongi ba Bible babaadi batuele mu kikongeno kikata mu kibundi kia Columbus, Ohio. Bantu babafikile mu mambalo elekeenelekeene babaadi abapusha miisambo mu ino ndimi: Arabe, Anglais, Français, Allemand, Grec, Hongrois, Italien, Lituanien, Polonais, Russe, Scandinave na lua Ukrainien. Ku mianda ibaabadi abesamba ku kisaashi, bakuetu ba muamua mu kibundi kia Ohio babaadi balungule Jurnaliste buadia kufunda miisambo itale programe a kikongeno efuku dioso.

Mu dia Kananka, efuku dia 24 dia mueshi wa Musambo, bakuetu balume na bakashi babaadi bakile pa 5 000 babaadi bapalakane mu kiakia kibundi bua kulungula mukandu wi buwa mu kiakia kibundi kibakitshikiile kikongeno. Babaadi baabile mikanda ikile pa 30 000, na babanga kulonga Bible na bantu binunu. Kitenta kia Mulami kibaadi kitanyine dino efuku bu “kipindi kia kikongeno kia muloo ukile.”

Mu dia Kataano, efuku dia 25 dia mueshi wa Musambo, mukuetu Rutherford pa baadi eele umune wa ku miisambo yaye ya ku kikongeno, baadi mubadikie mukanda ubaadi autopeka malongiesha a bakata ba bipuilo n’eshimba dinyinge. Mukuetu Rutherford bambile’shi: “Bakata ba mianda ya politike, bakata ba bipuilo, na bakata ba bansunga, bakuete kukutshishua bantu buabadia kulonga bia binyibinyi pabitale Bufumu bu’Efile Mukulu buinyi bua kuete kufubisha bua kuelela bantu miabi.” Kukatusha biabia, baadi muakule dingi’shi: “Bano bantu be bubi bukile muanda bakuete kukuatshishena Société des Nations ‘babaadi abamba’shi Efile Mukulu ngi kuete kukunkusha nsenga mu uno mushindo.’” Balongi ba Bible babaadi na lukalo n’eshimba dinyingie bua kulungula bantu mukandu wi buwa, na kuibaleesha patooka’shi abiakula bano bantu mbia madimi.

Kunyima kua mafuku, muisambo wa mu Kitenta kia Mulami ubakuile’shi: “Kino kikongeno kia mu Columbus, kibanyingisha lukumiino na kisumi bia kino kisaka kia bakuetu balume na bakashi . . . , babapete eshimba dinyingie dia kulungula mukandu wi buwa sunga kuekadika kubinguabingua kui naminyi.” Leo Claus, baadi mutuele mu kiakia kikongeno bambile’shi: “Pabatutuukile mu kiakia kikongeno, tubaadi bapushe muloo ukile muanda wa mikanda bungi ibatudi baabile mu terituare eetu.”

Mu mueshi w’Ekumi, Balongi ba Bible bababangile kuabila midiyo ya ma trakte abaabadi batuushe ku masaki kui mukuetu Rutherford, abaadi na mutue wa muanda awamba’shi: Acte d’accusation contre le clergé. Mu kangi ka kibundi kapeela kabetanyinaa bu Oklahoma mu États-Unis, Frank Johnson bapuile kuabila ma trakte muanka na atengiela munda mua minite 20 bua’shi bakuetu balume na bakashi bafikie paapa pa baadi. Baadi atengiela mbalo ifuame muanda bana balume ba mu kiakia kibundi babaadi na nsungu ya’shi t’alungulanga mukandu wi buwa, babaadi abamukimbi. Mukuetu Johnson batshile kitshibilo kia kuenda mu kufuamina mu kipuilo kibaadi peepi naye. Pa basangeene’shi mu kipuilo ta mui muntu su ngumune, batshile ma trakte a Acte d’accusation contre le clergé abaadi nawo eatuula mu ma nkuasa a muamua mu kipuilo, aata angi eatuula mu Bible a mukata a kipuilo. Baadi mukite bino mu kipuilo lubilolubilo. Bu bibaadi bimushadile nsaa ipeela, bayile akakita nka biabia mu bingi bipuilo bibidi.

Akupu, Frank balukiile yaya mbalo ibaadi apuandikisha’shi e kufumankana na bakuetu balume na bakashi. Baadi mufuamine dingi pa mbalo ya mudimo na budimu booso bua kutala baaba bana balume babaadi abamukimbi. Baaba bana balume babaadi abamukimbi babakidile mu mootoka, anka ta mbamumone nya. Kunyima kua kapindi kapeela na baaba bantomboshi kukila, balungudi babaadi abalungula mukandu wibuwa na Frank, babafikile paadi bamuela mu wabo mootoka benda naye.

Umune a ku bakuetu balume baadi mutentekieshe’shi: “Nsaa ibaatudi atukatuka mu kiakia kibundi, tubaadi bakidile kumpala kua bipuilo bisatu. Kumpala kua kipuilo kioso kubaadi bantu pepi 50. Bangi babaadi ababadika yawa trakte, bangi namu babaadi bamulame bua kumuleesha mukata a kipuilo. Tubakatukile nka mu yaya nsaa bua kupela bilumbu! Tubaadi batumbule Yehowa Efile Mukulu eetu bua bulami buaye, na binangu bibaadi muitupe bua kudimukila beshikuanyi ba Bufumu.”

KILESHESHO KI’ESHIMBA DINYINGIE MU BULUNGUDI

Balongi ba Bible ba mu angi maumbo babaadi baleshe n’abo eshimba dinyingie mu bulungudi. Kunundu ku’eumbo dia France, Józef Krett baadi mulungule mukandu wibuwa kui bena Pologne babaadi bafilukie babaadi abatumika mu mine. Baadi na mpango ya kuela muisambo ubaadi na mutue wa muanda awamba’shi: “Lusangukilo lua bafue taludi peepi.” Pabaadi bakuetu balume na bakashi babile masaki a luitamino mu kiakia kibundi, ungi mumpeele baadi mutoshe bantu ba mu kipuilo kiabo’shi tabendanga. Anka bena kipuilo kiabo tababaadi bamukookiele nya. Bantu bakile pa 5 000 babafikile batuela mu kiakia kisangilo mpa na winyi mumpeele! Mukuetu Krett baadi muitanyine mumpeele bua’shi apatuule bi lukumiino luaye, kadi yawa mumpeele baadi mupele. Kunyima kua kuela muisambo, mukuetu Krett baadi mupe bantu mikanda yooso ibaadi nayo muanda babaadi abakumiina kuwuka bi bungi pabitale Eyi di’Efile Mukulu.​—Am. 8:11.

Mukuetu Claude Brown baadi mulungule mukandu wi buwa mu Afrique mu eumbo dia Côte-de-l’Or, (diabetanyina binobino bu Ghana.) Miisambo yaaye na mikanda ibaadi muabile, bibaadi bikuashe bua kupalakasha mukandu wi buwa bukidibukidi mu diadia eumbo. John Blankson, baadi alongo kalasa ka mianda itale manga, bafikile atuela bua kuteemesha muisambo wa mukuetu Brown’. Batunduile musango umune’shi bino mbia binyibinyi. John atentekiesha’shi:“Bia binyibinyi bi baadi bingikashe na muloo wi bungi,” “na naadi mupete bulungantu bua kuibilungula bena kalasa nami booso.”

Biabia, John pabawukile’shi Bible t’alongiesha’shi Efile Mukulu e mu basatu, dingi efuku bayile mu kutembela mumpele a kipuilo kiabetamina bu Anglican bua kumuipusha pabitale uno muanda. Mumpeele bamubingile mu kipuilo amusashiila’shi: “Tue muina Nkidishitu nya; we muntu a diabulu. Katuka paapa!”

Nsaa ibalukiile John kuaye ku nshibo, bafundiile mumpeele mukanda amulungula’shi bakafumankane mbalo i bantu be bungi bua’shi besambe pabitale uno muanda wa busatu buiselele. Mumpeele bamualuluile bua’shi bakafumankeene ku biro bia mukata a balongieshi ba mianda itale manga, bua’shi bamuipushe su mu binyibinyi naaye baadi mufundile mumpeele wawa mukanda.

John bamualuluile’shi,“Oolo mulongieshi, nami muiufunde.”

Yawa mukata aabo afundile mupeele mukanda wa kumuteka lusa. Na John namu nkufunda’shi:

“Muanana, mulongieshi eetu, bandungula’shi nkufundile mukanda wa nkuteka lusa, nami namu nkuete kuilumbuula bua nkufundila, anka su okumiina’shi okuete kulongiesha bantu mianda ya madimi.”

Mulongieshi baadi mufiite munda, na amuipusha’shi: “Blankson, bino ngi biokiebe kufunda?”

“Oolo, mulongieshi. Nka bino ngi biandi mulombene kufunda.”

“Su bofundu biabia, atukubingi. Buakinyi we kufundila mukata a kipuilo kia mbulamatadi biabia, na okulupila’shi oshaala ku kalaasa ka mbulamatadi?”

“John bamuipuishe’shi, . . . Su wetulongiesha muanda kampanda watu’shi bapushe kalolo, ta tuibalombene nkuipusha?”

“Nui kungipusha.”

“Bibuwa, ngi muanda watudi nao pano wawa. Uno muana mulume etulongieshanga mianda ya mu Bible na ami namuele lukonko. Su te bia kungaluula ku lukonko luande, buakinyi ne kumufundila mukanda wa kumuteka lusa?”

Ta mbabingie Blankson ku kalasa nya. Na dingi ta mmutekie lusa.

KUTUULA BINANGU KU MAFUKU AAFIKI

Pabaabadi bataluule mudimo wa kipua kishima, Kitenta kia Mulami kibambile’shi: “Tui kuakula nka bi bakuile Davide’shi: ‘Okampa bukome bwa kulwa ngoshi.’ (Mis. 18:40) Kiakia kipua kibaadi kitunyingishe ngofu, muanda tubamuene mushindo ubaadi witukuashe Yehowa mu mudimo waye . . . Bafubi baaye ba sha lulamato babaadi na muloo wi bungi wa kulungula mukandu wi buwa.”

Mafuku apeela kunyima kua kiakia kipua, bakuetu babatshile mpango ya kutuula kingi kisaashi bua kupalakasha mukandu wi buwa. Babaadi bebakie kino kisaashi muiwumbo dia Chicago mu États-Unis. Kino kisaashi kipia babaadi bekitanyine bu WORD abipatuula’shi “eyi.” Bua uno musuusa babaadi bafubishe emeter e bukopo bua 5000w, kisaashi kia WORD kibaadi kilombene kulungula mukandu wa Bufumu mu bilometre binunu, mpa na kunundu ku’eumbo dia Canada.

Mu kipua kia 1925, Yehowa bakuashishe bakuetu buabadia kupeta mpushisho mupia a mukanda wa Kibafumbuilue shapitre 12. Pa muanda wa uno mpushisho mupia, bangi babalekiele kufubila Yehowa. Bangi be bungi babaadi na muloo wa kupusha kalolo mianda ibaadi ikitshikie muiyilu na mushindo wayidi na bukitshishi kui muilo w’Efile Mukulu wi pa nsenga.