Kinfuanyi kia mfudiilo kia mbalo ibaabadi abeelela miisambo na kitunduilo kunundu
1922 Takudi Bipua Lukama
‘EFILE MUKULU mwitupe ngobesha ya kutshokola mwi Yesu Kidishitu.’ (1 Kod. 15:57) Ano mayi abaadi asangudibue bu kifundue kia ku kipua kia 1922, bua kushinkamiisha balongi ba Bible’shi Yehowa akebafutu bua lulamato luabo. Mu kiakia kipua, Yehowa baadi mufute baaba balungudi baasha kisumi. Yehowa baadi muibeelele miabi p’abo kubanga kutuusha mikanda na kuiyilamika pamune bua’shi ituukie mukanda umune, na kufubisha radio bua kupalakasha bia binyibinyi bia Bufume. Dingi kunyima kua 1922, kubaadi kumuekie patooka’shi Yehowa baadi muelele muilo waye miabi. Balongi ba Bible babaadi bapete mushindo wa kuibunga pamune mu kikongeeno kibaadi kiende nkumo kibakitshikile mu Cedar Point, Ohio, mu État-Unis. Kiakia kikongeeno, kibaadi na bukitshishi bukata kui ndumbuluilo a Yehowa kubanga aa mafuku mpaa na lelo uno.
“KIBAADI KINANGU KI BUWA BUKILE”
Pabaadi bantu be bungi abalungula mukandu wi buwa, bakuetu balume na bakashi babaadi na lukalo na mikanda i bungi. Bakuetu ba ku Betele a ku Brooklyn babaadi abatuusha mikanda i bungi, babaadi bakiabafutshila kiamo kia ungi compagnie akitaa mianda ya busunga. Biabia, munda a mieshi i bungi uno compagnie balekiele kutuusha mikanda ibaabadi balombeene kufubisha mu mudimo wa bulungudi, Mukuetu Rutherford baayipuishe mukuetu Robert Martin, baadi akunkusha ino midimo, su kui mushindo wabadia kuitushiisha mikanda abo banabeene.
Bina mudimo bia kutuusha nabio mikanda, mu museese wa Concord a Brooklyn, mu New York
Mukuetu Martin atentekiesha’shi, “kino kinangu kibaadi buwa bukile, ku muanda kibaadi kibape mushindo wabadia kubanga kuitushiisha mikanda abo banabeene.” Bakuetu babaadi abafutshila mbalo, mu museese wa Concord numero 18 ibabapatele ku Brooklyn, na babaadi na biamo bioso bibaabadi nabio lukalo.
Ta kubaadi muntu su ngumune shi na muloo, wa kuitushiisha mikanda abo banabeene nya. Mukata a yawa compagnie baadi atuusha mikanda wetu kumpala, bafikile mu kuitutembela pa mbalo yetu ipua. Bambile’shi: “Ino mbalo, nuina kiamo ki buwa bukile kia nukuete kuitushiisha mikanda anue banabeene, anka ta kui muntu su ngumune akuanudi auuku bia kuikifubisha. Penda munda mua mieshi isamombo anuluisha biamo bienu bioso.”
“Bino bibaakuile bibaadi abimueneka’shi mbia binyibinyi,” anka Mukuetu Martin amba’shi: “tubaadi baukie’shi Yehowa mulombene kuitukuasha, na betukuashiishe.” Mukuetu Martin bakuile bia binyibinyi. Kiamo kietu kipia kia kutuusha mikanda kibaadi akituusha mikanda 2 000 kuifuku.
Biamo bia kutuusha nabio mikanda mu usine
MBALUNGULE BANTU BINUNU MUKANDU WI BUWA KU BUKWASHI BUA RADIO
Kukatusha kutuusha kua ingi mikanda wetu tue banabeene, muilo wa Yehowa ubabangile kufubisha angi mayele apia, akupalakasha mukandu wi buwa, nyi kuela miisambo ku kisaashi. Mu dia Lubingo kunyima kua midi, muifuku dia 26/2/1922, nyi mubakuile Mukuetu Rutherford bua musuusa wa kumpala ku kisaashi. Baadi muele muisambo ubaadi awamba’shi: “Bantu midiyo be na muuwa lelo uno taabafu dingi nya” ku kisaashi kibaadi ku KOG Los Angeles, mu Californie a mu États-Unis.
Bantu bafikie ku 25 000 babaadi balondeshe uno muisambo. Bangi ba kuabadi, babaadi abatumu mikanda bua kuleesha lutumbu bua wawa muisambo. Umune wa ku ino mikanda, ubaadi mukanda wa Willard Ashford baadi mushaale mu Santa Ana, mu Californie. Baadi mutumbule Mukuetu Rutherford bua muisambo ubaadi muele wi buwa “kupusha pa nsaa ya kuikisha.” Bambile dingi’shi: “Naadi na bantu basatu babaadi na maladi mu nshibo, tabibaadi mushindo wa’shi muntu su ngumune a kuatudi afika mu mukuteemesha, nsaa ywele uno muisambo nya, sunga bodia kuiwelela peepi neetu, kukatusha nka penda ku bukuashi bua kisaashi.”
Mu bingo ibalondele babaadi beele dingi ingi miisambo i bungi. Ku mfudiilo kua kipua kia mu 1922, Kitenta kia Mulami kibaadi kipuandikishe’shi, bantu bafikie ku binunu 300 000, babaadi batambule mukandu wi buwa ku bukuashi bua kisaashi.
Kukiila ku mikanda ibaabadi abebafundila, na bibaadi abiakula bantu, balongi ba Bible babaadi baate kitshibilo kia kutuula kisaashi mu Islande peepi na Betele a mu Brooklyn. Mu bipua bibalondele balongi ba Bible babaadi abafubisha uno radio a WBBR bua kupalakasha mukandu wa Bufumu kui bantu be bungi mu ma mbalo e bungi.
“ADV”
Kitenta kia Mulami kia mu 15/6/1922, kibaadi kiukishe’shi abitungu kutuela mu kisangilo kikata kibakitshikile, mu Cedar Point, Ohio, kubanga mu 5 na ku 13/9/1922. Pabayile balongi ba Bible ku kiakia kikongeeno kia mu Cedar Point babaapushiishe muloo ukile.
Mu muisambo waye wa kumpala, Mukuetu Rutherford baadi mulungule bantu’shi: “Panangusheena nashinkamisha’shi, Muanana bakumiina . . . kuelela kino kikongeeno muabi na akukakitshika mudimo ukata wa kulungula mukandu wi buwa biabisha kitshikile dimo kashaa pano pa nsenga.” Baaba babaadi abeele miisambo ku kikongeeno, babaadi abambuula nka bino bishima bimune bua kunyingisha bakuetu balume na bakashi bua’shi, bakite mudimo wa bulungudi.
Kibumbu kia bantu babatuelele ku kikongeeno, kibakitshikile ku Cedar Point, Ohio mu kipua kia 1922
Mu dia Katano mu 8/9/1922, bangi bantu bafikie ku 8 000 babaadi bakatuele mu nshibo ibabakitshine kikongeeno, na muloo wa kuteemesha muisambo ubaabadi abakitshi kui Mukuetu Rutherford. Babaadi bakulupile’shi mulombeene kupatuula akipushisha “ADV,” abaabadi bafunde ku masaki a luitamino. Pa babaadi bashaale bangi bantu babaadi abamono mifungofungo ya mpeko ya madiba i bungi bukile, kumpala kubaabadi abeele muisambo. Mungi muntu abetanyinaa bu Arthur Claus, baadi muende ku kiakia kikongeeno, akatukila ku Tulsa, Oklahoma mu États-Unis, baadi mupete mbalo ya kushaala buadia kuteemesha kalolo muisambo. Bino bibaadi bukopo bukukile, ku muanda mu aa mafuku takubaadi bikolo bilombene kutamisha mayi bua’shi bantu be bungi bapushe nya.
“Tubaadi abateemesha kalolo kakile”
Bua kuleesha’shi tala muntu atshibikisha muisambo mukuetu baadi akunkusha kisangilo baadi muakule’shi, muntu su ngumune ta mulombeene kufika kunyima atuela bua kutshibikisha muisambo wa beele kui Mukuetu Rutherford nya. Mu nsaa ya 9:30 kumpala kua midi, Mukuetu Rutherford babangile na kuteemuna bishima bia Yesu bi mu mukanda wa Mateo 4:17 abiamba’shi: “Bufumu bwa mwiyilu tabudi peepi.” Pabaadi esambila mushindo ulombene bantu kupusha pabitale buno Bufumu baadi muambuule mayi, a Yesu aamba’shi: “Kipungo kiaye kia kuikadika kuanka akakunkusha mudimo wa kulumbuula muilo waye, na mu kiakia kipungo, akabungu baaba be na bia binyibinyi na be na lulamato kuadiye nabeene.”
Mukuetu Claus baadi mushaale muamua muinyi mu nshibo ibabakitshinyine kikongeeno, atentekiesha’shi tubaadi atuteemesha kalolo kakile. Nka paapa mu kapindi kapeela, naadi mukumbe maladi na natuuka muinyi mu nshibo ya kikongeeno. Mukuetu Arthur ta baadi akumiina kutuuka mu nshibo wa kikongeeno nya, muanda baadi muukie’shi pangi ta mbalombene kumutadila bua’shi alukie nsaa i baadi Mukuetu Rutherford eele muisambo nya.
Anka mu kapindi kapeela babangile kupusha bi buwa. Bakuile’shi panaadi natambukuka kunyima kua nshibo ibaabadi abakitshina kikongeeno, naadi mupushe abakupila nkasa i bukopo. Bino bibaadi bimupushishe muloo ukata! Baadi muate kitshibilo kia’shi, mulombene kupusha kingi kipindi kia kiakia kikongeeno, su akaamina ku musaka wa nshibo. Mukuetu Claus, baadi ki nsongualume e na bipua 23 mu aa mafuku, bapetele mushindo wadia kukamina ku madidishi. Musaka, ubaadi ubaule pabaadi muifubuile peepi naabo, paapa ngi pabaadi “mupushe muisambo kalolo kakile.”
Anka mukuetu Arthur ta baadi bupenka nya. Bangi ba kuuku baaye, babakamiine nabo namu ku musaka. Umune a kuabadi Frank Johnson bakamiine kuakua, na bamuipusha’shi we na kapete su?
Arthur baluluile’shi: “Oolo ne naako.”
Frank baluluile’shi, ‘we lualuulo lua nteko yeetu.’ “Bomono bukata bui uno mufungofungo? Nyi buinyi bukata bua kitunduilo kiabadi bakookole na misumaadi. Abitungu kuteemesha Nsushi kalolo.a Nsaa y’amba’shi, ‘Abitungu nulungule, nulungule,’ otshibe ino mioshi inanka.”
Arthur, baadi mukuate nka kapete kaaye mu maasa, atengiela na ba kuuku baaye bua’shi, Mukuetu Rutherford ambe bino bishima bia’shi, lungulayi, lungulayi abo batshibe yaya muishi inanka. Mu kapindi kapeela Mukuetu Rutherford bapudiishe kipindi ki na muulo kia mu muisambo waye. Muanda wa muloo na kisumi, Mukuetu Rutherford baadi muele musaase amba’shi: “Ikalayi ba Tumonyi tua binyibinyi, basha lulamato kui Muanana. Ndayi kumpala mu ngoshi, mpa na apafiki mbalo yooso ya Babilone kabaaka. Palakashayi mukandu wi buwa mu ma mbalo ooso. Abitungu be pa nsenga baukie’shi Yehowa Efile Mukulu, nyi Mfumu a ba mfumu, na Muanana a ba muanana. Dino nyi efuku dikile ooso. Mfumu kuete kumunana! Anue nui balungudi baaye. Nyi buakinyi lungulaayi, lungulaayi, lungulaayi Mfumu na Bufumu bwaye!”
Arthur bambile’shi aye na bangi bakuabo babatshibile yaya mioshi ya kukitunduilo akio nkupona, bu mufungofungo munkatshi mua nshibo kushi kutuusha masaku. Muyile yaya mikanda ya “ADV,” ku kiakia kitunduilo kibaadi kufunde’shi: “Lungulaayi pabitale Mfumu na Bufumu.”
MUDIMO WI NA MUULO UKATA
Ku kikongeeno kia mu Cedar Point kibaadi kikuashe bakuetu buabadia kutuula binangu ku mudimo wi na muulo, wa kulungula mukandu wa Bufumu, na baaba babaadi bakumiine, babaadi na muloo wa kupalakasha mukandu wi buwa. Ba colporteur (abaukibua lelo uno bu ba mbala-mashinda) ba ku Oklahoma mu États-Unis. Babafundile’shi: “Mu district mubatudi bafube mubaadi bantu be bungi babaadi bepaane nka mu mudimo wa kubundula ma charbon, na mubaadi bulanda bukile. Bambile’shi, ke bungi nsaa ibaadi bantu abapusha mukandu ubaadi mu jurnale a L’Âge d’Or, taadi ayitaminyibua lelo uno bu Réveillez-vous !, “babaadi abadidi.” Bakuile mu uno mushindo’shi uno ubaadi bu muabi ukata wa kuibakankamika.”
Baaba balongi ba Bible babaadi abauku muulo wi nao mayi a Yesu aasanganyibua mu mukanda wa Luka 10:2 aamba’shi: “Bya kunwa biibungi anka bafubi mbapeela.” Ku mfudiilo kua kipua babaadi baate kitshibilo kikata kia kulungula mukandu wa Bufumu mu nsenga ishima.
a Mukuetu Rutherford baadi ayitaminyibua ingi musuusa bu “Nsushi” muanda, baadi afubu bu nsushi mu angi mafuku, mu kibundi kia Missouri mu États-Unis.