Kashaa nta ndekiele kulonga

Naadi mutandikue mu kipua kia 1927 mu ka kibundi kapeela ke pepi na Chicago, mu Illinois, États-Unis. Mbetutande butaano: Ami, Jetha, Don, Karl, na Joy. Atue boso tubatshile kitshibilo kia kufubila Yehowa na mashimba eetu oso. Jetha batuelele mu kalasa ka kabidi ka Galaade mu kipua kia 1943. Don, Karl, na Joy babatuelele ku Betele a mu Brooklyn, New York, mu bino bipua bilondeene: 1944, 1947, na mu kipua kia 1951. Kileshesho kiabo ki buwa mpa na kia baledi betu kibaadi kinyingishe buandia kukita bi bungi mu mudimo wa Yehowa.

BIBALONGIELE KIFUKO KIETU BIA BINYIBINYI

Papa na mama babaadi ababadika Bible ngofu na babaadi bafule Efile Mukulu, na abo nkuitulongiesha bua kumufula natue namu. Anka, papa ta baadi ata dingi bipuilo na muulo, kunyima kua kufuba bu musalayi mu Europe mu Ngoshi ya Kumpala ya Nsenga ishima. Mama baadi na lutumbu lukile pa kumona’shi papa baaluka ku nshibo na muwa, bamulunguile’shi: “Karl, tubangie kuenda ku kipuilo bu bibatudi atuibikitshi.” Papa bamualuluile’shi: “Ami nenushindikila ku kipuilo anka nta nemutuele.” Mama nkumuipusha’shi: “Buakinyi t’otuele mu kipuilo?” Papa bamualuluile’shi: “Pabatudi atulu ngoshi, bakata ba kipuilo kimune abaadi abelele basalayi ba lupese loso miabi na ma mputu aabo! Efile Mukulu akuatshishenaa basalayi ba mpese yoso ibidi abalu ngoshi su?”

Kunyima kua mama kualuka ku kipuilo, Tumonyi tua Yehowa tubidi tubafikile tuakookola ku nshibo kuetu. Babapeele papa mikanda ibidi ya kulonga nayo Bible ibaabadi abetanyina bu Lumière, ino mikanda ibaadi ayisambila pabitale mukanda wa Kibafumbuilue. Papa baadi musankile ino mikanda na aye nkukumiina kuiyata. Mama pa bamuene ino mikanda, babangile kuiyibadika. Dingi efuku, mama bapushishe ku mikandu, abetamina bantu abakumiina kulonga Bible ku bukuashi bua ino mikanda ya Lumière. Mama batshile kitshibilo kia kuikuenda. Pa bafikile kuanka, ungi muana mukashi tabaadi mukulu ngofu ngi baadi mumufunguile kiibi. Baadi mukuate umune wa ku yaya mikanda, mama nkumuipusha’shi: “Okuete kulonga uno mukanda pano?” Yawa muana mukashi bamualuluile’shi: “Oolo lole, tuela.” Lubingo lubalondele, mama baadi muende netu kuanka, kunyima kua mafuku tubabangile kutuela pa kiubishi.

Dingi efuku mu bisangilo, baadi akunkusha bisangilo bantekiele buandia kubadika Misambo 144:15, awakula’shi baaba boso abalanguila Yehowa be na muloo. Kino kifundue kibaadi kinkaanyishe ngofu, nka bu bibaadi binkanyishe bino bingi bifundue bibidi: 1 Timote 1:11, awakula’shi Yehowa nyi “Efile Mukulu a muloo,” na Bena Efeso 5:1, muabetutekie buatudia “kuambula Efile Mukulu.” Naadi mushinkamishe’shi nekala na muloo p’ami kufubila Mupangi ande, na kumutumbula bua kino kinemo kia kumufubila. Ino mianda yoso ibidi ngi yandi muitatshishe bua kukita mu nshalelo ande.

Kakongie kabaadi pepi netu, kabaadi mu Chicago mu bilometre 32. Sunga mbiabia, tubaadi atuende nka mu bisangilo, na kiukilo kiande kia Bible kibaadi kitame. Natentekiesha dingi efuku, baadi akunkusha bisangilo baadi musangule Jetha buadia kutuusha lualuulo. Pa naadi muteemesha lualuulo luaye, nambile’shi: ‘Bino bibakula n’ebiuuku. Nadia kuela kuela mboko kuiyilu bua kutuusha lualuulo.’ Nabangile kuilumbuula kalolo buandia kutuusha ngaluulo mu bishima biande. Muanda wi na muulo ukata ngua’shi, naadi munyingie mu kikudi pamune na bakuetu. Naadi mubatshishibue mu kipua kia 1941.

KULONGIESHIBUA NA YEHOWA KU BIKONGENO

Natentekiesha bikishekishe kikongeno kibatuelele mu kipua kia 1942, mu kibundi kia Cleveland mu Ohio. Angi mambalo akile pa 50 mu États-Unis, abaadi aalondesha kiakia kikongeno ku ma telefone. Kifuko kietu kibaadi kishaale mu tushibo tua mapema na bingi bifuko pepi na mbalo ibaadi ayikitshikila kikongeno. Pa babangile Ngoshi ya Kabidi ya Nsenga ishima, ababangile kubingabinga Tumonyi tua Yehowa ngofu. Ku kiolua, naadi mumone kisaka kia bakuetu balume batule miotoka yabo na malampi a miotoka yabo abaadi aamunyika mu camp. Abo boso babaadi bepushene’shi, kuikale muntu muimane pa motoka oso bua kulama bufuku bushima. Pabakudi muntu afiku mu kukita kafutakanyi, bakuetu balume babaadi abatembesha malampi bua kumunyika baaba abafiku mu kukita kafutakanyi bua kuibelesha mufito mmeso, kubanga kudidisha sone. Bangi namu babaadi balombene kufika lubilo bua kukuasha. Nambile’shi: ‘Muilo wa Yehowa ngupue kuilumbuula kalolo bua muanda oso wawa!’ Anka ta kubaadi kukitshikie muanda wi bubi su ngumune na pa muanda wa buno bulami, naadi mupete mushindo wandia kulaala.

Kunyima kua bipua, pantentekiesha kiakia kikongeno, mama ta baadi atshinyi sunga kuinyongola. Baadi mutuule lukulupilo luaye loso mui Yehowa na mui ndumbuluilo aaye. Nta na ndube kileshesho kiaye ki buwa nya.

Kumpala kua’shi kino kikongeno kituele, mama baadi mufikie mbala-mashinda a mieshi yoso. Baadi mutuule binangu biaye ku miisambo ibaadi ayisambila pabitale mudimo wa nsaa yoso. Pabatudi muishinda atualuka kuetu, mama bambile’shi: “Nakumiina kutungunuka na kuikala bu mbala-mashinda, anka ntshi bia kuibuikadika, akupu napasukila nshibo yetu kalolo nya.” Biabia baadi muitutekie bua’shi tumukuashe. Tubaadi bakumine, ngi aye nkubanga kupa muntu oso a kuatudi kadimbo kamune sunga tubidi bua kuitulumbuula kumpala kua kudia kidibua kia ku namashika. Kunyima kua’tue kuenda ku kalasa, mama baadi atala mu nshibo su mulumbuule kalolo, kunyima baadi ende mu bulungudi. Mama baadi na mianda i bungi ya kukita, anka ta baadi asumbushene bana baye nya. Pabatudi atualuka kuetu ku nshibo bua kudia kia kudia kia mu kaanya, kunyima kua kutuuka ku kalasa, mama baadi nka patudi nsaa yoso. Angi mafuku su tubatuuku ku kalasa, tubaadi atuende naye mu bulungudi, muamua ngi mubaadi etukuasha buatudia kupusha akilesha kuikala mbala-mashinda.

KUBANGA MUDIMO WA NSAA YOSO

Nabangile bu mbala-mashinda na bipua 16. Sunga mbibaadi papa mukutue kuikala Kamonyi ka Yehowa bukidi, baadi apusha buwa pa naadi nende mu mudimo wa bulungudi. Dingi efuku ku kiolua, namulunguile’shi sunga mbia kuete kukita muande moso, ta mpetele namu muntu su ngumune akumiina’shi tulongie naye Bible nya. Kunyima kua kuikisha, namuipuishe’shi: “Okumiina namu ndongie nobe Bible su?” Papa baadi munangushene munda mua kapindi kapela, aye nkukumiina kulonga Bible. Biabia, papa ngi baadi mulongi ande a Bible a kumpala. Kino nyi nkinemo kikata kinaadi mupete!

Tubalongiele mukanda wa “La vérité vous affranchira.” Bu bibatudi atutungunuka na kulonga, naadi mumone’shi papa kuete ankuasha ngofu buandia kulumbuula mushindo wandia kuilongiela Bible, na bua kumulongiesha bangi kalolo. Bu kileshesho, dingi efuku ku kiolua kunyima kua’tue kubadika kikoso, papa bambile’shi: “Namono’shi bino ngi abiakula mukanda. Biabia, ouku naminyi’shi uno mukanda awaukula bi abinyibinyi?” Ntshi naadi mubande kuilumbuula bua kualuula ku lukonko luaye nya, ngi buakinyi nambile’shi: “Bua binobino, ntshi mulombene nkushinkamiisha bianka nya, kadi p’atulongo musuusa aufiki, ne mulombene nkupa lualuulo.” Na ngi binaadi mukite. Naadi mupete ma verse abaadi aakuatshishena muanda ubatudi atuisambila. Kunyima kua biabia, naadi muukie bia kukimbuula bua’shi mmone biandia kuikala nalumbuula kulonga kuetu kalolo. Bino bibaadi binkuashe buandia kuikala mulongi a Bible e buwa, na bibaadi bikuashe mpa na papa. Papa baadi atumikila mianda ibaadi alongo na baadi mubatshishibue mu kipua kia 1952.

NATUNGUNUKILE NA KULONGA MIANDA I BUNGI KU BETELE

Nakatukile kuetu ku nshibo pa naadi na bipua 17. Jetha baadi muikale misionere, Don namu baadi muikale muina Betele. Boso babidi, babaadi bafule mudimo wabo ngofu na babaadi banyingishe bikile. Biabia, naadi muushe formilere a ku Betele na a ku kalasa ka Galaade, na ami nkubanga kutengiela’shi Yehowa aate kitshibilo kia mbalo y’akumiina’shi nkamufubile. Bu kipeta, babaadi bangitanyine ku Betele mu kipua kia 1946.

Munda mua bipua bi bungi, naadi mufube mu midimo ilekene ku Betele, biabia ami nkupeta mushindo wa kulonga mianda i bungi ipia. Ne mufube ku Betele munda mua bipua 75, na mu biabia bioso bipua, ne mulongie bia kukuasha mu kukita mikanda, na kufuba mu mianda ya makuta. Nalongiele bia kuula bintu bibaatudi nabo lukalo ku Betele, bia kutuma bintu bi na muulo mu angi ma mbalo. Kintu ki na muulo ngofu nkia’shi, naadi na muloo bua mianda inaadi ya mu kikudi inaadi nalongo mu lulanguilo lua ku namashika, na ingi miisambo imeene mu Bible.

Naadi dingi mupushe’shi muinande mulume Karl, baadi naye muikale muina Betele mu kipua kia 1947. Karl baadi mulongi na mulongieshi e buwa bukile a Bible. Dingi efuku naadi mumutekie bua’shi ankuashe bua kulumbuula muisambo ubabaadi bampe. Naadi mupatuluile Karl’shi nakongola mikanda i bungi bukile, kadi tanguuku mukanda wa kufubisha. Karl baadi munkuashe pakungipusha’shi: “Joel, mutue wa muanda wa muisambo oobe awamba naminyi?” Musuusa nka umune naadi mupushe kibaadi akiebe kuakula, bibaadi abintungu’shi nfubishe nka mianda ayipatuula mutue wa muanda wa muisambo wande kushi kuimuela ingi mianda. Ta ndubaa aa mayele abaadi mundeeshe nya.

Bua’shi tuikale na muloo ku Betele, abitungu tuikale atutuku mu bulungudi nsaa yoso, p’atukitshi biabia, atupete mianda ayitunyingisha. Muanda umune wa nkia ntentekieshaa kalolo, ubaadi ukitshikie ku kiolua mu kibundi kia Bronx mu New York. Ami na mukuetu mulume tubaadi bakookole kua ungi muana mukashi baadi mukumiine Kitenta kia Mulami na Réveillez-vous! bibatumupeele. Tubaadi belubule kuadi, tuakula’shi: “Kino kiolua tukuete kukuasha bantu buabadia kulonga mianda ayinyingisha i mu Bible.” Yawa muana mukashi betualuluile’shi: “Su mmianda itale Bible, tuelayi.” Tubaadi babadikie na kuisambila bifundue bi bungi pabitale Bufumu bu’Efile Mukulu na kufika kua nsenga ipia. Mianda ibatudi abesamba ibaadi imukaanyishe, ngi aye nkuitanyina ba kuuku baye bua’shi lubingo alufiki nabo namu bapetekielue. Kunyima kua mafuku, yawa muana mukashi na mulume aaye, abafikile bafubi ba Yehowa ba sha lulamato.

NAADI MULONGIELE INGI MIANDA KUI MUKASHI ANDE

Naadi muate kitshibilo kia kuibakila. Kunyima kua bipua 10, napetele mukashi e buwa bukile. Nkinyi kibaadi kinkuashe buandia kupeta mukashi e buwa? Naadi mutekie Yehowa ami nkunangushena pabitale kiankumiina kukita pamune na mukashi aande kunyima kueyibakishi.’

Kunyima kua kikongeno kibakitshikile mu 1953 mu Yankee Stadium, naadi muimoneene na mukuetu mukashi abetanyinaa bu Mary Aniol. Mary na Jetha babaadi batuele mu kalasa ka kabidi ka Galaade, na Mary baadi mufube bu misionere mbalo imune na mukuetu mukashi. Na muloo wi bungi, Mary baadi mundondele pabitale mudimo wa bu misionere pabaadi mu Caraïbes na bantu babaadi mulongie nabo Bible muenda bipua. Bu bibatudi atuende na kuiwukeena, tubamuen’shi tui na bipatshila bia mu kikudi bi mumune. Kifulo kietu kibaadi kitame ngofu, na tubaadi beyibakishene mu mueshi wa Kananka mu kipua kia 1955. Mu mishindo i bungi, Mary baadi muleeshe’shi mmuikale kia buntu akifiki kui Yehowa na nkileshesho ki buwa kuambula. Mary baadi na muloo mu mudimo oso ubaabadi abamupa. Mary baadi afubu ngofu, baadi apasukila bangi n’eshimba diaye dioso, na misuusa yoso baadi atuulu mianda ya Bufumu pa mbalo ya kumpala. (Mat. 6:33) Tubaadi bafube mu mudimo wa kifunda munda mua bipua bisatu, na mu kipua kia 1958, babaadi betuitanyine ku Betele.

Naadi mulongiele mianda i bungi kui Mary. Bu kileshesho, ku mbangilo ku’eyibakishi dietu, tubaadi baate kitshibilo kia kubadikanga Bible pamune, tuabadikanga vesrse ifikie ku 15. Kunyima kua umune a kuatudi kupua kubadika, tubaadi abesambila yaya verse na kukimba mushindo watudia kuiyitumikila mu nshalelo etu. Mary baadi andungula ke bungi mianda ibaadi mulongie ku kalasa ka Galaade, sunga mianda ibaadi mumone mu mudimo wa bu misionere. Ino mianda inaadi mulongiele kui Mary, nginkuashe buandia kulumbuula mushindo wandia kuela miisambo, na kumona mushindo wandia kunyingisha bakuetu bakashi.​—Nki. 25:11.

Mary mukashi ande a kifulo, mmufue mu 2013. Nkuete kutengiela bua nkamumona mu nsenga ipia! Pankiantengiela, ne muate kitshibilo kiandia kutungunuka na kulonga, na kukulupila mui Yehowa n’eshimba diande dioso. (Nki. 3:5, 6) Nkuete kupeta kunyingishibua na muloo, nsaa ya nangushena pabitale mianda y’abakakitshi kui muilo wa Yehowa mu nsenga ipia. Atukalongo dingi mianda ipia pabitale Mulongieshi eetu Mukata! Eyendo, nta na ndekie kutumbula Yehowa bua mianda yoso yadi mundongieshe, mpa na biadi mundeshe kalolo.