Yehowa mmunkwashe mu mudimo waye

NE MUTANDJIKWE mu kipwa kya 1926 mu États-Unis mu kibundji kya Crooksville, Ohio. Papa na Mama tababaadi abalangwila nya, kadi abetulungwile atwe bana baabo mwanda (8) bwa kwenda mu kipwilo. Nabangile kwenda mu kipwilo kya mishoonyi. Panalombeeshe bipwa 14, mukata a kipwilo bampeele bwedi mwanda naadi nende mu kipwilo mu dya Lubingo mooso munda mwa kipwa kishima.

Mu aa mafuku, ungi mwina mutumba abetanyinaa bu Margaret Walker, umune a ku Batemwe ba Yehowa, babangile kutembela mama na kumulungula myanda ya mu Bible. Dingi efuku, n’atshile kitshibilo kya kupetekyelwa nsaa yabalongo. Nyin’ami bamwene’shi nebakalakasha kwabalongo, aye nkuntuusha pasha. Kadi natungunukile na kuteemesha kwabesamba. Kunyima kwa’ye kumutembela ingi misango ibidi, Margaret bangipwishe’shi, “Ouku eshina dy’Efile Mukulu?” Namwalulwile’shi “bantu booso abauku’shi​—nyi Efile Mukulu.” Akupu bambile’shi, “Ata Bible oobe obadikye mu Misambo 83:18.” N’atshile Bible ami nkusangana’shi eshina dy’Efile Mukulu nyi Yehowa. Nayile kabilo kwi bakuuku bande nebalungula’shi, “Panwaluka kwenu, badikayi mu Bible mu mukanda wa Misambo 83:18 bwa kumona eshina dy’Efile Mukulu.” We kwamba’shi nabangile bulungudi nka paapa.

Nabangile kulonga Bible ami nkutambula mu kipwa kya 1941. Kunyima kwa mafuku apeela babaadi bansangule bwa kukunkusha kulonga kwa mukanda mu kakongye. Naadi mukankamikye nyin’ami na bakwetu bwabadya kufika, na bababangile booso bwabo kutwela mu kulonga kwa mukanda kunaadi nakunkusha. Papa tabaadi mukumiine nya.

KUBINGWABINGWA KU NSHIBO

Babaadi bampe angi mashito mu kakongye, ami nkukimba mikanda ibungi yabadi batuushe kwi Batemwe ba Yehowa. Dingi efuku, Papa batonkyele munwe ku mikanda yande amba’shi: “Omono akyaa kitafi kya mikanda? Nakyebe wekituushe pasha, wende nakyo kungi.” Nakatukile kwetu ami nkwenda mu kushaala mu kibundji ki peepi kya Zanesville, Ohio, kadi naadi naluka mu kukankamika bakwetu.

Papa batompele bya kupelesha Nyin’ami bwa kutwela mu bisangilo. Ingi nsaa pabaadi mwishinda dya ku bisangilo baadi amulondo bwa kumwalusha. Kadi nyin’ami baadi atuuku ku kiibi kya ku nfindo bwa kwenda mu bisangilo. Nalungwile Nyin’ami’shi: “Tabikukalakashanga. Akooko nkulonda.” Kunyima, Papa balekyele kupelesha nyin’ami aye nkubanga kutwela mu bisangilo kushii lukalakashi.

Pababangile Kalasa ka mudimo wa teokrasi mu kipwa kya 1943, nabangile kukita midimo ya balongi mu kakongye keetu. Malango anaadi napete kunyima kwa midimo ya mu kalasa abaadi ankwashe bwa kwela miisambo kalolo.

KUPELA KUTWELAKANA MU MYANDA YA NGOSHI

Mu kipwa kya 1944, mu Ngoshi ya kabidi ya nsenga ishima, babaadi bankitshishe bwa kutwela busalayi. Abaadi batume kwi Fort Hayes mu Columbus, Ohio, bwa’shi ampime na kuusha esaki dya kutala su ne mulombeene kwenda busalayi. Nalungwile dingi yawa mukata’shi ntshi bya kutwela busalayi nya. Abaadi banfungule. Kunyima kwa mafuku apeela, ungi mukata a basalayi bafikile kwande andungula’shi: “Corwin Robison, nafiki mu nkukwata.”

Kunyima kwa’mi kukita mbingo ibidi ku tumilaadi, nsushi bambile’shi: “Su nnami e na matalwa, ntshi nadya nkupoosola. We na kya kwakula su?” Namwalulwile’shi: “Mwanana, ne mupwe kwikala mu mulongo wa bafubi. Muntu ooso ampetaa ku nshibo kwaye mmulongi ande, na ne mulungule mukandu wibuwa wa Bufumu kwi bantu bebungi.” Nsushi balungwile bangi bantu abasambisha’shi: “Tanwi bashaale pano bwa kutshibila uno nsongwalume su mmulungudi sunga’shi ta mulungudi nya. Nwi pano bwa kumutshibila su mulombeene kutwela busalayi sunga’shi ta mwibulombeene.” Munda mwa minite ishadile pa makumi asatu, bansushi babaadi bantshibile kibawe. Abaadi bantshibile bipwa bitaano bya lukano mu Ashland, kibundji kya Kentucky.

YEHOWA MMUNKALWILE MU LUKANO

Nashadile munda mwa mbingo ibindi mu lukano mu Columbus, Ohio munaadi mukishe efuku dyande dya kumpala mu kadimbo ka lukano. Natekyele Yehowa’shi: “Ntshi bya koobesha kushaala mu kano kadimbo bipwa bitaano nya. Ntshinaadi nauku kya kukita.”

Efuku dya kabidi, mulami a lukano baadi muntushe mwanka. Naadi mwifunye kwi beena lukano booso, tubaadi atwilamina kwididishi na ungi kipambe mwina lukano. Baadi mungipushe’shi: “Ka muntu keepi’be, we muno bwakinyi?” Namulungwile’shi, “ne Temwe a Yehowa.” Yawa muntu angipusha’shi, “We nnanyi? Byabya bwakinyi we mu lukano?” Ami nkumulungula’shi “Batemwe ba Yehowa tabendaa mu ngoshi bwa kwipaa bantu.” Aye nkwakula’shi: “Mbakutweshe mu lukano mwanda t’okumiina kwipaa bantu. Aku namu mbatweshe bangi mu lukano mwanda wa kwipaa bantu. Byabya abipushika?” Ami nkwaluula’shi: “Tabipushika nya.”

Akupu yawa kipambe bambile’shi: “Panaadi mu lungi lukano munda mwa bipwa 15, nabadikile ungi mukanda wenu.” Panapushile akula byabya, natekyele Yehowa’shi, “Nkwashe namu bwa’shi uno muntu akile lupese lwande.” Mu yaya nsaa immune, ungi mwina lukano baadi n’eshina bu Paul nkwakula’shi: “Su muntu bakukumu, ondungule. Ami nabeene nemoneena naaye.” Mafuku ooso anaadi mwamwa mu lukano, ntshinaadi na kilumbu su nkimune na bantu 50 batubadi nabo mu lukano.

Pabaadi pankatushe mukata a basalayi antuma mu lukano lwa Ashland, napetele bakwetu banyingye mu kikudi babaadi mwanka. Abankwashile na kukwasha bangi bwatudya kushaala mu kipwano na Yehowa. Abetupeele bipindji bya Bible bya kubadika ku lubingo, akupu tubaadi atulumbuula nkonko na myaluulo bwa bisangilo bibaatudi atwitamina bu nyuki ya Bible. Tubaadi mu kadimbo kakata kabaadi na nsala mbwipi. Mwanka kubaadi mukwetu umune baadi abila ma teritware atudya kulungula. Baadi andungula’shi: “Robison, obe olungula luno lusala na alwaa lungi. Muntu ooso abadi batuule ku lwalwa lusala nyi odya kulungula. Kumpala kwadya kukatuka omulungule mukandu wibuwa.” Uno nyi mushindo ubaatudi atulungula mukandu wibuwa kushi kafutakanyi.

BINAPETELE AMI BATUUKU MU LUKANO

Ngoshi ya kabidi ya nsenga ishima ibapwile mu kipwa kya 1945, anka naadi mushaale mu lukano kunyima. Naadi mukalakashwe pabitale kifuko kyetu mwanda Papa bandungwile’shi, “Su na kukatusha pano, namono bya koobesha bano abashala.” Kunyima kwa kutuuka mu lukano, abaadi ba mbasushe. Bantu musambo ba mu kifuko kyetu abaadi abatwele mu bisangilo na ungi mukwetu mukashi baadi mubatshishibwe sunga mbibaadi Papa ebakyengyesha.

Pababangile Ngoshi ya mu Koré mu kipwa kya 1950, babaantumine dingi mu ngoshi bwa musango wa kabidi. Babandungwile bwa kwenda ding kwi Fort Hayes. Kunyima kwa kukita bipimo, ungi mukata a basalayi bandungwile’shi, “obe nyi e na bipeta bibuwa kukila bya bantu booso be pano.” Namulungwile’shi, “Bibuwa, anka ntanyende busalayi nya.” Naadi mwakule mayi e mu 2 Timotee 2:3 na kukumbasha’shi, “Ami ne mupwe kwikala musalayi a Kidishitu.” Kunyima kwaye kuumina kipindji kila, bakwile’shi, “We kukatuka.”

Kunyima kwa mafuku apeela, natwelele mu kisangilo kya kwenda ku Betele mu kikongeeno mu kibundji kya Cincinnati, Ohio. Mukwetu Milton Henschel betulungwile’shi abaadi na lukalo lwa bakwetu abakumiina kufuba bibukopo ku Betele bwa mudimo wa Bufumu. Naadi mutekye bwa kufuba mudimo wa ku Betele, abo nkukumiina. Mu mweshi wa Mwanda mu kipwa kya 1954, nabangile kufuba ku Betele a ku Brooklyn.

Misusa yooso, naadi na mudimo wibungi ku Betele. Munda mwa bipwa bibungi, naadi mufube bikata mu kutuusha kwa mikanda, mu biro bya kwibaka mashibo, kutambusha byamo, na kulumbuula ma nkufidi. Naadi nafubu dingi ku Mashibo a bikongeeno a mu kibundji kya New York.

Ne mufule programe a ku Betele bu lulangwilo lwa nakashika na kulonga kwa mu kifuko kwa Kitenta kya Mulami, mpa na kulungula mukandu wibuwa na beena kakongye. Nsaa yonangusheena kalolo, ino nyi myanda ayitungu’shi bifuko byooso bya Batemwe ba Yehowa beekale abeyikitshi pa kyubishi. Nsaa i ba nambutwile na bana baabo abataluula kifudwe kya kwifuku pamune, abakitshi lulangwilo lwa mu kifuko, kutwela mu bisangilo bya kakongye, na kulungula mukandu wibuwa na katshintshi, booso bwabo abekala mu kipwano na Yehowa.

Ne mupete bakuuku bebungi ku Betele na mu kakongye. Bangi mbediibwe mwimu na mbapwe kwenda mwiyilu. Bangi namu ta mbediibwe mwimu. Anka bafubi ba Yehowa booso, mpa na beena Betele ta mbapwidikye nya. Panaadi napete kilumbu na mukwetu kampanda, naadi nakimbi byatudya kwalusha butaale bukidi. Nanangusheenaa pa mayi e mu Mateo 5:23, 24 na kukimba bya kupudisha bilumbu. Ta mbibofule bwa kwakula’shi “nfwile namu lusa” nya, kadi kuteka lusa nyi mushindo wa kupudisha bilumbu.

BIPETA BIBUWA MU MUDIMO WANDE

Binobino kulungula mukandu wibuwa ku nshibo na nshibo akungyelela bukopo mwanda wa bununu, kadi ntshi mwimikye nya. Naadi mulongye ki Chinois Mandarin nasankila kulambukisha ba Chinois banfumankana naabo mu museese. Ingi nsaa ku nakashika, nabilaa bantu abakumiina ma jurnale 30 sunga 40.

Naadi mwalukiile mu nkatala ba Chinois bekele bakumiine! Dingi efuku, bu bibaadi kangi kansongwakashi akeele musaase wa kuudisha bikuba, anko nkuntala na kunsepesha. Ami nkusepa na nkumupa Kitena kya Mulami na Reveillez-vous! mu ki Chinois. Aye nkwata akupu nkundungula’shi eshina dyaye mbu Katie. Kunyima, nsaa yooso ibaadi Katie ammono, baadi afiki bwatudya kwisamba. Ami nkumulongyesha mashina a bikuba na mitshi mu Anglais, na Katie baadi eambuula kishima ku kishima. Naadi mumupatulwile dingi maverse a mu Bible, aye nkukumiina mukanda wa Akilongyesha Bible. Kunyima kwa mbingo, ntshinaadi namumono dimo nya.

Kunyima kwa myeshi, ami nkupa ungi nsongwakashi jurnale baadi ele musaase wa kupana bintu, aye nkutambula. Dingi dyalubingo, baadi muntambikye telefone aaye, andungula’shi, “ata wakule na muntu e mu Chine.” Ami nkumulungula’shi “ntanguuku muntu mu Chine nya.” Aye nkupela kupusha, byabya natshile telefone nakula’shi, “aalo nami Robison.” Yawa namu nkungaluula’shi “Robby nami Katie.” “Ntampwile kwaluka mu Chine.” Ami nkukaanya, mu “Chine?” Katie nkwaluula’shi, “oolo. Robby, ouku yawa nsongwakashi bakutambika telefone? Mmukwetu. Wekeele mundongyeshe myanda ibuwa. Mulongyeshe namu yanka.” Ami nkwakula’shi, “Katie, nakitshi kyooso akitungu kukita. Nakutumbula bwa bibondungula mbalo yoodi.” Kunyima kwa mafuku, naadi mutentekyeshe na mukwabo mukashi na Katie. Mbalo yooso i bano ba nsongwakashi nakulupila’shi bakwete kulonga bibungi pabitale Yehowa.

Naapu kufubila Yehowa munda mwa bipwa 73, na ne na muloo wibungi bibaadi munkwashe bwa kupela kutwelakana mu ngoshi na kushaala na lulamato mu lukano. Na dingi, bakwetu abandungula’shi babaadi banyingishiibwe p’ami kushaala na lulamato pabaadi apankyengyesha Nshaami. Binobino, Nyin’ami na bakwetu basamombo mbapwe kubatshishibwa. Na dingi mweneno a Nshami mmwende na kushintuluka, aye nkubanga na kutwela mu bisangilo ingi nsaa kumpala kwa’ye kufwa.

Su Efile Mukulu akumiina, bakwetu na bakuuku bande bapwe kufwa abakasanguka mu ndumbulwilo mupya. Banda kunangusheena muloo watukapusha patukalangwila Yehowa bwa looso pamune na bantu batudi bafule!a