Nkonko ya bantu ababadikaa

“Mikeyilu [kinyi] yabadi basangule” yabadi bateemune mu 1 Timote 5:21?

Mpoolo mutumibua baadi mufundile Timote’shi: “Nakukankamika kumpala ku’Efile Mukulu na kua Nkidishitu Yesu na kumpala kua mikeyilu yabadi basangule bua kukookiela ano malango kushi ntondo sunga kuelela bangi binangu bibubi.”​—1 Ti. 5:21.

Kia kumpala, bua kuitukuasha bua’shi tuukie’shi mmikeyilu kinyi yabadi basangule, atuisambila mikeyilu ishi mu kisaka kia ino mikeyilu. Abipushika kalolo’shi, ta mbano bantu 144 000 nya. Pa baadi Mpoolo mufundile Timote, lusangukilo lua bena Nkidishitu bedibue muimu lua kuenda muiyilu ta lubaadi lubande kubanga nya. Batumibua na bangi bedibue muimu ta babaadi babande kuikala bu bipangua bia mu kikudi, biabia ta be mu kisaka kia “mikeyilu yabadi basangule” nya.​—1 Ko. 15:50-54; 1 Te. 4:13-17; 1 Yo. 3:2.

Dingi, “mikeyilu yabadi basangule” ta ngino mikeyilu ibaadi itombokie mu kipungo kia mpeshi a kabutu nya. Yaya yoso mikeyilu ibaadi ilonde Satana na yafika bu bademo, ngikale beshikuanyi ba Yesu. (Kib. 6:2; Luk. 8:30, 31; 2 Mp 2:4) Mu mafuku aafiki, bano bademo abakedibua mu buina bula munda mua bipua 1 000, na kunyima abakabutudibua pamune na Diabulu.​—Yu. 6; Kbf. 20:1-3, 10.

“Mikeyilu yabadi basangule” ibaadi Mpoolo aakuila, nyi mmikeyilu i muiyilu ikuete kukuatshishena “Efile Mukulu na Yesu Nkidishitu.”

Kui binunu na binunu bia mikeyilu i na lulamato. (Eb. 12:22, 23) Ta tui balombene kuamba’shi mikeyilu yoso ayipetaa midimo i mumune nsaa imune nya. (Kbf. 14:17, 18) Tentekiesha’shi ungi musuusa, babapeele muikeyilu umune mudimo wa kubutula basalayi ba bena Asiri 185 000. (2 Bf. 19:35) Mikeyilu i bungi i na mudimo wa “kukatusha mu Bufumu bua [Yesu] bintu bioso abikokosha na bantu abayipaa miiya.” (Mat. 13:39-41) Ingi mikeyilu “ayikabungu basangulue baye” bua’shi bende muiyilu. (Mat. 24:31) Na dingi ingi mikeyilu mbeyipe mudimo wa ‘kuitulama mu mashinda eetu oso.’​—Mis. 91:11; Mat. 18:10; tala Mateo 4:11; Luk. 22:43.

“Mikeyilu yabadi basangule” yabadi bateemune mu 1 Timote 5:21, nyi mikeyilu yabadi bapue kupa mudimo wa kupasukila muilo w’Efile Mukulu. Mu verse i kunundu, Mpoolo mmutuushe elango di buwa bukile pabitale bakulu, abatungu’shi banemekibue mu kakongie. Bakulu namu ku luabo lupese, abitungu baate mashito aabo na muulo, ta bekalanga na “ntondo sunga kuelela bangi binangu bibubi.” Na t’abitungu’shi baate bitshibilo kushi kubanda kunangushena kalolo nya. Kabingilo ke na muulo ka buakinyi abitungu bakulu balonde elango diyokielue dia Mpoolo nka’shi, bakuete kufuba “kumpala ku’Efile Mukulu na kua Nkidishitu Yesu na kumpala kua mikeyilu yabadi basangule.” Bino abipushika kalolo’shi, ingi mikeyilu beyipe mudimo wa kukuasha kakongie bu: Kukaluila kakongie, kukunkusha mudimo wa bulungudi, na kutuadila Yehowa rapore ya mianda ibabamono.​—Mat. 18:10; Kbf. 14:6.