MIISAMBO YA MBANGILO | BA MWIKEYILU—BE KWANKA BINYIBINYI SU? MWANDA WABO NGWITUTALE NAMINYI?
Bya binyibinyi pabitale ba mwikeyilu
Okumina kuuka bya binyibinyi pabitale ba mwikeyilu su? Ba mwikeyilu mbantu kinyi? Mbatukile kunyi, na be na mudimo kinyi? Su okumina kuuka bya binyibinyi pa uno mwanda, ta kwi ingi mbalo yodi mulombene kupeta ngalulo ibuwa kukila mu Bible Eyi dy’Efile Mukulu nya. (2 Timote 3:16) Bible etulungula kinyi?
Nka bu bi Efile Mukulu nyi nkikudi, na ba mwikeyilu namu nyi mbikudi bishi’abimwenekaa mwanda ta be na mbidi ya “musamba na mifufwa” nya. Ba mwikeyilu basha lulamato mbashale mwiyilu na abemonenaa n’Efile Mukulu.—Luka 24:39, Kilombeeno kipya 2014; Mateo 18:10; Yowano 4:24.
Ingi misango ba mwikeyilu abadi abafwala mbidi ya bantu bwabadya kulombasha midimo ibabadi abebapa kwi Efile Mukulu pano pa nsenga, na kunyima kwa kulombasha midimo yabo abadi abeyifuulu.—Bansushi 6:11-23; 13:15-20.
Sunga byekala’shi mu Bible mbayitanyine ba mwikeyilu bu bana balume, na nsaa yabafwala mbidi ya bu bantu abatukaa bu bana balume, munkatshi mwabo ta mwi ba mwikeyilu balume na bakashi. Tabeyibakishenaa na kwitandena nya. Na dingi, ba mwikeyilu ta mbapangibwe bu bantu ababandaa kwikala bu mwana tooka, bu mwana mukinga na kufika bu muntu mukulu kunyima nya. Yehowa ngi badi mupangye ba mwikeyilu; ngi bwakinyi mu Bible abebetanyina bu “bana b’Efile Mukulu [a binyibinyi].”—Yoobo 1:6; Misambo 148:2, 5.
Bible akula’shi: kwi ‘ndimi ya bantu na ya miikeyilu,’ na bino abilesha’shi bantu ba mu kikudi be na ludimi lwabesambaa. Sunga byekala’shi Efile Mukulu badi mufube na ba mwikeyilu bwa kwisamba na bantu, ta mwitupe matalwa a kulangwila ba mwikeyilu sunga kwela nteko kwabadi nya.—1 Beena-Kodinda 13:1; Kibafumbwilwe 22:8, 9.
Ba mwikeyilu be binunu na binunu, pangi bungi bufikye ku midiyo na midiyo.a—Ndanyele 7:10; Kibafumbwilwe 5:11.
Ba mwikeyilu nyi “mbimankinda” bya bukome, kwamba’shi be na bukome bwi bungi kukila bantu—na dingi be na binangu bitabukile bya bantu. Abimweneka’shi be na ngobesha ya kutambuka lubilo ngofu, na kutambuka kipindji ki bula kukila bukata bwa ino nsenga yatumono.—Misambo 103:20; Ndanyele 9:20-23.
Sunga bekala na binangu na bukome bwibungi, ba mwikeyilu be na mikalo, na kwi bingi bintu byabashi’abauku.—Mateo 24:36; 1 Mpyeele 1:12.
Ba mwikeyilu mbapangibwe na ngikashi bu y’Efile Mukulu, na dingi be na bulungantu bwa kwisangwila. Byabya, nka bu bantu, mbalombene kusangula kukita myanda ibuwa sunga ibubi. Mwanda wa malwa, bamo ba mwikeyilu abadi basangule bwa kutombokyela Efile Mukulu.—Yunda 6.
a Kishima kya mu kina Greke kyabadi bele mu Kibafumbwilwe 5:11 akilesha “makumi a binunu misusa binunu makumi,” bino abilesha’shi kwi midiyo binunu na binunu bya bipangwa bya mu kikudi!