Mikaele, Mukata a bamwikeyilu nnanyi?

MU BIBLE tabakula menemene pabitale mwikeyilu Mikaele nya. Byabya misusa ibungi abamutemuna nka pakwete kukita mwanda kampanda. Mukanda wa Danyele, aulesha Mikaele pa kwete kulwa na bamwikeyilu bebubi, mu mukanda wa Yuude aulesha pa kwete kutontoola na Satana; mu mukanda wa Bifumbulwe, kwete kukunkusha kisaka kya ngoshi yabalu na Diabulu na bademo baaye. Nsaa yakwete kukalwila bufumu bwa Yehowa na kulwa na beshikwanyi b’Efile Mukulu, Mikaele akitshi myanda ipushene n’eshina dyaaye adyamba shi:​—“Nnanyi e bu Efile Mukulu?” Kadi Mikaele nnanyi?

Ingi nsaa bangi bantu abaukibwa mu mashina ebungi. Bu kileshesho, abaadi abetamina dingi Yaakobo bu Isaleele, na Mpyeele mutumibwa bu Simone. (Kibangilo 49:1, 2; Mateo 10:2) Bible alesha shi Mikaele ndingi eshina dya Yesu Kidishitu, kumpala na kunyima kwa muwa waye pa nsenga. Tubande kutala Bifundwe bwa kuuka akibishinkamisha.

Mukata a bamwikeyilu. Eyi dy’Efile Mukulu adyakula pabitale Mikaele shi “mukata a bamwikeilu.” (Yuude 9, Kilombeno kipya 2009) Kino kishima akilesha “mwikeyilu e panundu.” Lamiina shi Mikaele abamwitamina bu mukata a bamwikeyilu. Byabya abilesha shi kwi nka penda mwikeyilu umune e byabya. Mu Bible kishima “mukata a bamwikeyilu” akilesha penda mwikeyilu umune kushi bamwikeyilu bebungi. Byabya nka penda Yesu ndjo abetamina bu mukata a bamwikeyilu. Mukanda wa 1 Beena-Tesalonika 4:16 aulesha bino pabitale Yesu Kidishitu: “Akukapushika musase ukata, eyi dya mwikeilu mukile bukata . . . Mwanana na beene akaiki mwiilu.” Byabya eyi dya Yesu abedilesha bu dya mwikeyilu mukile bukata. Uno verse alesha shi Yesu aye nabeene ndjo winyi Mikaele mukata a bamwikeyilu.

Mukata a basalayi. Bible alesha shi: “Mikaele na mikeyilu yaaye babalwile ngoshi na nyoka . . . nyoka naamu pamune na mikeyilu yaaye baadi alu ngoshi.” (Bifumbulwe 12:7) Byabya, Mikaele ndjo Mukata a kisaka kya beena ngoshi ba mwiyilu bamwikeyilu basha bulamate. Mukanda wa Bifumbulwe aulesha dingi Yesu bu mukata a kisaka kya bamwikeyilu baasha kululama. (Bifumbulwe 19:14-16) Na dingi Mpoolo mutumibwa alesha “Mwanana Yesu” na ‘bamwikeyilu baaye ba bukome bukata.’ (2 Beena-Tesalonika 1:7, Kilombeno kipya) Byabya Bible akula pabitale Mikaele na “mikeyilu yaaye” na dingi bwa Yesu na “mikeyilu yaaye.” (Mateo 13:41; 16:27; 24:31; 1 Mpyeele 3:22) Bu bi mu Eyi dy’Efile Mukulu ta mwi mbalo su ngimune yabalesha bisaka bibidi bya beena ngoshi, bamwikeyilu basha bulamate be mwiyilu​—kimune akikunkushibwa na Mikaele kingi naamu akikunkushibwa na Yesu—twi balombeene kushinkamisha shi Mikaele nyi Yesu Kidishitu pakwete kufuba mwiyilu.a

[Mwanda wi mushi mwesaki]