Ata bitshibilo abisankisha Yehowa

1. Lukalakashi kinyi luatudi nalo atue boso?

EFUKU DIOSO atuataa bitshibilo. Bingi mbibofule, bu kuata kitshibilo pabitale kia kudia ku nakashika sunga nsaa ya kuenda mu kulaala. Bingi bitshibilo namu bi bukopo kuata. Mbilombene kuikala na bukitshishi ku mbidi yetu, muloo wetu na wa kifuko kietu, na mushindo wa kufubila Yehowa. Atukumiina kuata bitshibilo abitupa muloo atue banabene mpa na kifuko kietu. Na muanda wi na muulo ngofu, atukulupila’shi bitshibilo bietu abisankisha Yehowa.​—Lom. 12:1, 2.

2. Mianda kinyi ayikukuasha bua kuata bitshibilo bi buwa?

² We kuata kitshibilo ki buwa nka su (1) ouka mianda yoso kalolo, (2) otaluula bi mueneno a Yehowa pabitale wawa muanda, na (3) onangushena pabitale bipeta abitukila ku kiakia kitshibilo. Mu uno muisambo, atuisambila ino mianda, na awitukuasha bua kumona mushindo wa kulongiesha lushinguluilo luetu.​—Nki. 2:11.

UUKA MIANDA YOSO KALOLO

3. Tuusha kileshesho akilesha muulo wa kuuka mianda yoso kalolo kumpala kua kuata kitshibilo.

³ Kintu kia kumpala akitungu kukita bua kuata kitshibilo ki buwa nyi kuuka mianda yoso kalolo. Buakinyi bi na muulo? Puandikisha’shi muntu e na mukumbo bende mu kutala munganga. Munganga e ku mufundila buanga musango umune kushi kumupima sunga kumuela nkonko? Nya. Nobe namu w’ata bitshibilo bi buwa nka su ouka mianda yoso kalolo pabitale wawa muanda. We kuibikita naminyi?

4. Muyile Nkindji 18:13, kinyi kiodia kukita bua kuuka mianda i bungi? (Tala dingi kifuatulo.)

⁴ We kuuka mianda i bungi pa kuela nkonko. Puandikisha’shi abakuitamina ku musangeelo. We kuiyipusha’shi, nekuende su? Su touku mpango yate muntu mukuitamine ku musangeelo, we kumuipusha’shi: “Kunyi na nsaa kinyi ayikitshika musangeelo? Akuila bantu bungi kinyi? Nnanyi akunkusha musangeelo? Mba nanyi abekala kuanka? Mianda kinyi yanudi balumbuule bua bantu abafiki? Akuikala maalua?” Ngaluulo ku ino nkonko ayikukuasha bua kuata kitshibilo ki buwa.​—Badika Nkindji 18:13.

5. Nkinyi kiodia kukita kunyima kobe kuuka mianda yoso?

⁵ Kunyima kua kupeta ngaluulo, nangushena ngofu pabitale kilombene nkakitshika kuanka. Bu kileshesho, su ouka’shi akuikala bantu bash’abakokielaa mayi a kulonda a mu Bible, sunga’shi akuikala maalua na muntu oso atomo muakiebela. Tomono’shi uno musangeelo ngulombene kuikala wi bubi su? (1 Mp. 4:3) Ku lungi lupese, we kukita kinyi su nsaa yabaadi beutuule ayikukutshisha kuenda mbisangilo sunga mu bulungudi? Su ouka ino mianda yoso, abikubofuila bua kuata kitshibilo ki buwa. Anka kui kingi kintu akitungu kukita. Ouku bi’opusha pabitale wawa muanda; anka Yehowa apushaa naminyi pabitale wanka?​—Nki. 2:6.

UUKA BI MUENENO A YEHOWA PABITALE WAWA MUANDA

6. Muyile Yakobo 1:5, buakinyi abitungu tutekie Yehowa bukuashi?

⁶ Teka Yehowa bua’shi akukuashe opushe bi mueneno aaye pabitale wawa muanda. Yehowa mulee bua kuitupa binangu abitukuasha bua kushinguula kitshibilo ki buwa akimusankisha. Etupeyaa bino binangu “na kalolo kushi kuitutopeka.”​—Badika Yakobo 1:5.

7. Tui kukita kinyi bua kuuka bi mueneno a Yehowa pabitale muanda kampanda? Tuusha kileshesho.

⁷ Su bopu kuteka bukunkushi bua Yehowa, kimba lualuulo luaye. Bu kileshesho: Su oshimina obe e mu luendo, we mulombene kuipusha bana-kibundi bua’shi bakukuashe. Biabia, we kubanga kuenda abo bashakupeele lualuulo? Nya. Oteemesha kalolo bi’akuludika. Mu mushindo umune, kunyima kobe kuteka Yehowa binangu, tompa kupeta lualuulo pa kukimba miiya i mu Bible na mayi a kulonda epushene na muanda oobe. Bu kileshsho, nsaa yuata kitshilo kia kuenda ku musangeelo watupuile kuisambila, we kutaluula akiakula Bible pabitale misangeelo i bubi, ba kuuku be bubi, na muulo wa kutuula mianda ya Bufumu pa mbalo ya kumpala kua mianda yetu’tue banabene.​—Mat. 6:33; Lom. 13:13; 1 Ko. 15:33.

8. We kukita kinyi su we na lukalo lua bukuashi bua kupeta ingi mianda? (Tala dingi kifuatulo.)

⁸ Anka, ingi nsaa we kuikala na lukalo lua bukuashi bua kuuka mianda y’okimbi. We kupeta bukuashi kui bakuetu balume na bakashi banyingie mu kikudi. Anka, we kupeta dingi bukuashi pa kukimbuula obe nabene. Kui mianda i bungi ilombene nkukuasha mu mikanda yetu ayitukuasha bua kuilongiela bu Mukanda aukwasha ba Temwe ba Yehowa bwa kukimbuula myanda na Bifundue abikuasha mu nshalelo a buina Nkidishitu. Tentekiesha kepatshila kobe: kuata kitshibilo akisankisha Yehowa.

9. Nkinyi ki kuitukuasha bua kushinkamisha’shi kitshibilo kietu akisankisha Yehowa? (Bena Efeso 5:17)

⁹ Nkinyi ki kuitukuasha bua kuata kitshibilo akisankisha Yehowa? Kia kumpala, abitungu tuukie Yehowa kalolo. Bible amba’shi: “Kuuka Efile Mukulu akupanaa binangu.” (Nki. 9:10) Oolo, mpushisho e buwa etukuasha bua kuuka nyikashi ya Yehowa, mpango yaye, mianda yadi mukumiine na mushikue. Eyipushe’shi, ‘Muyile mianda yanguuku pabitale Yehowa, kitshibilo kinyi kiandia kuata akimusankisha?’​—Badika Bena Efeso 5:17.

10. Buakinyi mayi a kulonda a mu Bible e na muulo kukila bipikua?

¹⁰ Ingi nsaa, bua kusankisha Yehowa, tui kukita kintu akikalakasha bena kifuko netu. Bu kileshesho, bangi baledi abatakulaa ba nsonguakashi babo bua’shi beyibakishene na muntu mpeta, sunga muntu mulombene kuibapa eondo di bungi, anka ta bekalaa na lukalo lua muntu munyingie mu kikudi nya. Eyendo abakiebe’shi muana abo mukashi ekale na nshalelo e buwa, kadi nanyi mulombene kumukuasha buadia kunyinga mu kikudi? Yehowa mulombene kuibimona mushindo kinyi? Atupete lualuulo mu Mateo 6:33. Muanka, Yesu anyingisha bena Nkidishitu buabadia kutungunuka na ‘kukimba Bufumu kumpala.’ Biabia atupeyaa baledi betu kinemo na kunemeka bakuetu, anka kintu ki na muulo nyi nkusankisha Yehowa.

NANGUSHENA PABITALE BIPETA ABITUKILA KU KIAKIA KITSHIBILO

11. Eyikashi kinyi diabadi baleshe mu Bena Fidipe 1:9, 10 adikukuasha bua kuata kitshibilo ki buwa?

¹¹ Su bopu kupeta mayi a kulonda a mu Bible pabitale muanda oobe, we mulombene kunangushena kalolo. (Badika Bena Fidipe 1:9, 10.) Lushinguluilo alukukuasha bodia kunangushena ku bipeta bilombene kutuka mu muanda oso. Ingi nsaa mbibofule kuata kitshibilo, anka ingi namu bi bukopo kuata bitshibilo. Lushinguluilo lui nkukuasha bodia kuata bitshibilo bi buwa sunga mu muanda wi bukopo.

12-13. Lushinguluilo ndulombene nkukuasha bua kuata kitshibilo ki buwa pabitale mudimo naminyi?

¹² Banda kupuandikisha uno muanda. Okimbi mudimo bua kukuasha kifuko kiobe. Kubamueneka midimo ibidi. Buepusha bua kuuka’shi mudimo kinyi w’ekala ofubu, bungi bua mafuku ofubu ku lubingo, na bungi bua nsaa yuekala okitshi muishinda bua nkafika ku mudimo. Yoso midimo ibidi i buwa bua bena Nkidishitu. Pangi bokumiina mudimo umune, muanda abakufutu makuta e bungi. Anka kui ingi mianda ayitungu kutaluula kumpala kua kuata kitshibilo.

¹³ Bu kileshesho, ino yoso midimo i na programe muikutuene na nsaa ya bisangilo su? Ino yoso midimo ilombene nkuata nsaa ya kukisha na kifuko kiobe na kuikikuasha mu kikudi su? Kuiyipusha ino nkonko nkulombene nkukuasha bua kutuula “mianda ina muulo ukata” pa mbalo ya kumpala, kuamba’shi, lulanguilo lobe na nkalo ya kifuko kiobe kumpala kua bintu bia ku mbidi. Paapa w’ata kitshibilo ki buwa na Yehowa akuelela miabi.

14. Kufubisha lushinguluilo na kulesha kifulo akuitukuasha naminyi bua kupela kukokosha bangi?

¹⁴ Lushinguluilo ndulombene kuitutakula mu kutaluula bukitshishi bulombene kuikala nabo bitshibilo bietu kui bangi, paapa t’ atuikala ‘atukokosha bangi.’ (Fid. 1:10) Uno muanda wi na muulo ngofu bikishekishe puata kitshibilo pabitale nfuadilo na muenekielo. Bu kileshesho, we kuikala mukumiine nfuadilo kampanda sunga mushindo kampanda wa kuilengiesha. Biabia, we kukita kinyi su abikalakasha be na kakongie sunga bantu bashi be na kakongie? Lushinguluilo aluitukuasha bua kunemeka bi’abepusha. Kifulo akitutakula bua kukimba buwa bua “bangi bantu” na bua kuikala na kuiyisha. (1 Ko. 10:23, 24, 32; 1 Ti. 2:9, 10) Paapa atuata kitshibilo akilesha kifulo na kanemo bua bangi.

15. Nkinyi akitungu’shi onangushena kumpala kua kuata kitshibilo ki buwa?

¹⁵ Su okiebe kuata kitshibilo ki na muulo, nangushena ku bipeta. Yesu bakuile’shi: “banda kuela makumi.” (Luk. 14:28) Nangushena ku bungi bua nsaa, makuta, na bukome abutungu bua’shi olombasha kitshibilo. Ingi nsaa we kuisamba na kifuko kiobe, bua kumona muina kifuko mulombene nkukuasha bua’shi kitshibilo kilombane. Buakinyi kuata ino mpango kui na muulo? Ngilombene kulesha’shi, abitungu oshintule kitshibilo sunga kukita kintu kampanda. Na nsaa yuepusha kifuko kiobe na kuikiteemesha, nkilombene nkukuasha bua’shi kitshibilo kiobe kilombane.​—Nki. 15:22.

ATA KITSHIBILO KI’OLOMBASHA

16. Mianda kinyi ayitungu’shi okite bua kuata kitshibilo ki buwa? (Tala dingi kashibo akamba’shi “Kia kukita bua kuata kitshibilo ki buwa.”)

¹⁶ Su okita ino yoso mianda ibatuisambila, wata kitshibilo ki buwa. Su bouku mianda i bungi na kutaluula mayi a kulonda, wata kitshibilo akisankisha Yehowa. We kuteka Yehowa bua nkukuasha bua’shi wate kitshibilo ki’olombasha.

17. Nkintu kinyi ki na muulo akitukuasha bua kuata bitshibilo bi buwa?

¹⁷ Sunga wekala muate bitshibilo bi buwa mafuku ashale, ntetekiesha’shi kintu ki na muulo akikukuasha bua kuata kitshibilo ki buwa, nyi nkukulupila mu binangu bia Yehowa, kushi mu binangu biobe’be nabene sunga kiukilo kiobe. Nka penda Yehowa nyi mulombene nkupa kiukilo, lushinguluilo na kapatupatu, ngikashi i na muulo bua kuikaka na binangu. (Nki. 2:1-5) Yehowa e nkukuasha bua kuata bitshibilo abimusankisha.​—Mis. 23:2, 3.