Lusa lua Yehowa lui nkukuasha naminyi?

1. Buakinyi lusa lua bana ba bantu, lui bukopo kupusha kiinyi ki’alupatuula?

“NAKUFUILA LUSA.” Kino kishima akibatamishaa eshimba, bikishekishe su ouku’shi wekeele muakule sunga mukite kintu kampanda kitape muntu kuishimba! Biabia, kino kishima “nakufuila lusa,” akileesha kinyi binyibinyi? Muntu wekeele mutape kuishimba, kuete kuakula’shi kipuano kiobe naye kibaaluka bi’akikalanga kumpala su? Su akiebe kuamba penda’shi t’akumiina dingi nuisambile wawa muanda? Lusa lua bana ba bantu, lui bukopo kupusha kiinyi ki’alupatuula.

2. Lusa lua Yehowa mbeluleeshe mu Bifundue naminyi? (Tala dingi mayi e kuushi ku’esaki.)

² Mushindo awitufuilaa Yehowa lusa atue bantu bashi bapuidikie, nguilekeene ngofu na mushindo w’atuifuidishenaa lusa ku muntu na muntu. Ta kui muntu mulombene kufuila mukuabo lusa mu mushindo awibikitaa Yehowa nya. Kayimba ka misambo bakuile bua Yehowa’shi: “Lusa lua binyibinyi lui poodi, buabadia kuikala abakutshinyi.”a (Mis. 130:4) Eyendo, lusa lua Yehowa, ngi “lusa lua binyibinyi.” Nka penda Yehowa ngi etuleesha akipushisha binyibinyi lusa. Mu angi ma verse bafundi ba Bible, mbafubishe kishima kia mu kiina Ebelu bua kuleesha lusa lua Yehowa, kadi ki’abash’afubiishe bua kuleesha lusa lua bana ba bantu.

3. Lusa lua Yehowa nduilekeene na luetu mushindo kinyi? (Yeeshaya 55:6, 7)

³ Su Yehowa bafuila muntu kampanda lusa, muluisho wa yawa muntu ubakatushibua bua loso. Na tui balombene kuikala dingi mu kipuano ki buwa na Yehowa. Tui na lutumbu lukata bua lusa lua Yehowa, muanda etufuilaa lusa mu mushindo wa kukaanya na kalolo koso.​—Badika Yeeshaya 55:6, 7.

4. Yehowa etukuasha bua kupusha akileesha lusa lua binyibinyi naminyi?

⁴ Su lusa lua Yehowa nduilekeene na luetu atue bantu bakutue kupuidika, tui kupusha naminyi akileesha lusa lua binyibinyi? Yehowa afubisha bileshesho bi buwa bua kuitukuasha bua’shi tupushe mushindo w’etufuilaa lusa. Mu uno muisambo, atutaluula bingi bia ku bino bileshesho. Abituleesha mushindo aukatushaa Yehowa muluisho, na mu yaya nsaa imune, alushuula netu kipuano kibaadi kiluile pa muanda wa muluisho. Bu bi’atutaluula bino bileshesho bioso, atutamisha kifulo na lutumbu luetu bua Nshetu sha lusa lukata, etuleeshaa lusa luaye mu mishindo i bungi.

YEHOWA AKATUSHAA MULUISHO

5. Nkinyi akikitshikaa su Yehowa balekieela miluisho yetu?

⁵ Mu Bible, mbapuandikishe miluisho na kiita ki bushito. Pabitale miluisho yaye, Nfumu Davide bambile’shi: “Muanda bito byande bibaakidi mutwe wande; abinneemmeena ngofu ikile, buu kintu kii bushito.” (Mis. 38:5) Anka Yehowa alekielaa miluisho ya nkitshishi a bubi elanga kuishimba. (Mis. 25:18; 32:5) Kishima kia mu kina Ebelu kiabaadi baluule bu “kulekiela,” akipushisha “kutentula bushito.” Abitungu tumone Yehowa bu muntu e bukome, atentulaa mu kinfuanyi bushito bua muluisho bui ku mapampa eetu na ebukatusha.

6. Yehowa asumbulaa miluisho yetu kui bula bui naminyi?

⁶ Bible afubisha kingi kileshesho, bua kuleesha’shi Yehowa asumbulaa miluisho yetu kula netu. Misambo 103:12 ayamba’shi: ‘Bi bula bwi pankatshi a kutunduka nguba na kupona, nyi bi bula bwa kw’asumbulaa bilubilo bietu.’ Kutunduka nguba kui bula ngofu na kupona nguba. Ino mpese ibidi ta yanafumankane efuku su ndimune. Bino abileesha’shi, Yehowa ataa miluisho yetu enda nayo kula kuatushi bia kupuandikisha. Bino abitushinkamiisha’shi Yehowa etufuilaa lusa bua loso!

7. Bible aleesha’shi Yehowa akitaa na miluisho yetu kinyi? (Mika 7:18, 19)

⁷ Sunga abi’ataa Yehowa miluisho yetu mu kinfuanyi enda nayo kula, atungunukaa nka na kuiyitentekiesha su? Nya. Nfumu Esekiya bafundile pabitale Yehowa’shi: “Boosumbula milwisho yande yooso ku mongo kwobe.” (Yesh. 38:9, 17) Uno ngakuilo a mu kinfuanyi aleesha’shi Yehowa asumbulaa miluisho ya bantu abelanga ku mashimba kui bula, na t’eyitalaa dingi. Bino bibakuile Esekiya, be kuibialuula dingi’shi: “We muikashe [miluisho yande] nka bu’shi ntshi muiyikite.” Bible mmushimikie kasele pabitale uno ngakuilo mu kingi kileshesho ki mu mukanda wa Mika 7:18, 19. (Badika.) Muanka, Yehowa e nka bu akula’shi mmusumbule miluisho yetu muushi mui bula mua kalunga ka meema. Mu mafuku a kala, bi baadi bukopo bua kupeta kintu kipone muushi mua kalunga ka meema.

8. Mmianda kinyi ibatupu kulonga?

⁸ Ku bukuashi bua bino bileshesho, tubalongo’shi su Yehowa b’etufuila lusa, e nka bu b’etuangula bushito bua miluisho yetu. Mu binyibinyi, nka bu bibaakuile Davide’shi: “Ba sha muloo mbaaba babadi bafuile lusa ku bilubilo biabo, na baaba babadi babuikiile miluisho yabo; sha muloo nguno abash’abakabadikila bilubilo biaye kui Yehowa.” (Lom. 4:7, 8) Lualua ngi lusa lua binyibinyi!

YEHOWA AKUMUNAA MILUISHO

9. Ngakuilo kinyi a mu kifuanyi mufubishe Yehowa bua kuitushinkamiisha’shi etufuilaa lusa ku miluisho yetu?

⁹ Ku bukuashi bua nkuulo, Yehowa e na ngobesha ya kukumuna miluisho ya bantu abelanga ku mashimba. Tubandeyi kutaluula mushindo wabaleesha mu Bible ki’abakuete kukita kui Yehowa. Mu ngakuilo a mu kinfuanyi, abaleesha Yehowa bu kuete kutumpa na kusampuula bua kukatusha ino miluisho yoso. Bino abitoosha nkitshishi a bubi ku miluisho. (Mis. 51:7; Yesh. 4:4; Yel. 33:8) Yehowa nabene aleesha bipeta abituuku nsaa y’akitshi bino, amba’shi: “Sunga miluisho yenu yekala imongie pididi bu nkula, ayikatooko nka selele bu milemba.” (Yesh. 1:18) Abikalaa bukopo bukile bua kutumpa kilamba na kuikikatusha elangi dimonga. Biabia, kukiila ku uno ngakuilo a mu kinfuanyi, Yehowa etushinkamiisha’shi mmulombene kuituikasha selele ku miluisho yetu sunga mbi’ayish’ayimuekaa ku meso kua bantu.

10. Ungi ngakuilo kinyi a mu kinfuanyi abadi bafubishe kui Yehowa bua kuleesha mushindo w’etufuilaa lusa?

¹⁰ Nka bu biabekeele bebileshe mu muisambo ushaale, miluisho mbeyipuandikishe na mabaasa. (Mat. 6:12; Luk. 11:4) Nsaa yoso, tukuete kuluishishanga Yehowa, bi nka bu’shi tukuete kuatanga mabaasa kuadi misuusa na misuusa. Tatudi na mabaasa aaye e bungi bukile! Biabia su Yehowa betufuila lusa, binka bu’shi bashimi mabaasa oso atuikadikanga baate kuadi na teabadika’nyi dingi. T’atekaa dingi bua’shi tufute miluisho yadi mupue kuitufuila lusa nya. Nka bu abipushaa muntu ababalekieela ebaasa muloo, atupushaa muloo nsaa ayitufuila Yehowa lusa.

11. Nsaa ayakula Bible’shi miluisho yetu “mbeyishime,” abipushisha kinyi? (Bikitshino 3:19)

¹¹ Yehowa t’alekieela nka penda mabaasa eetu sunga miluisho yetu nya, kadi eyishimishaa. (Badika Bikitshino 3:19.) Bua kupusha uno ngakuilo a mu kinfuanyi kalolo, abitungu tutentekieshe’shi mu mafuku a kala, Ancre ababaadi abafubisha, baadi musangie na mema, carbone, na gome a kushima naye. Muntu, baadi mulombene kuata kilamba ki mema akumuna nakio biabia bintu biabadi bafunde. Biabia, nsaa “y’abashimisha ebaasa dietu” abileesha’shi babedikatusha bua loso. Ta kui muntu mulombene kumona dingi mianda yabadi bashime. Bi nka bu kuamba’shi diadia ebaasa t’adikalanga kuanka. Tui na lutumbu lukata lua kuuka’shi su Yehowa betufuila lusa ku miluisho yetu, bi nka bu’tue bashi bakite miluisho!​—Mis. 51:9.

12. Uno ngakuilo a mu kinfuanyi aleesha kubuikila ekumbi, apushisha kinyi kuatudi?

¹² Yehowa afubisha yawa ngakuilo umune a mu kinfuanyi, bua kuleesha mushindo w’ashimishaa miluisho yetu. Akula’shi: “Nakashimisha bubi buenu nka bu ekumbi dibakidi, na miluisho yenu nka bu ekumbi dikata dibashikiila.” (Yesh. 44:22, NWT) Nsaa y’abetufuila lusa kui Yehowa ku miluisho yetu, bi nka buye beyibuikila n’ekumbi dikata bi’ayisha kumueka dingi.

13. P’abetufuila lusa kui Yehowa ku miluisho yetu atupushaa naminyi?

¹³ Bino bileshesho bioso abitulongiesha kinyi? Abitulongiesha’shi, nsaa ayitufuila Yehowa lusa ku miluisho yetu, ta tui balombene kutungunuka na kuinyongola bua miluisho ibatukitshine kala mu nshalelo eetu nya. Ku bukuashi bua mase a Yesu Nkidishitu, mabaasa eetu ngapue kushimibua bua loso. Nsaa y’abetufuila lusa kui Yehowa ku miluisho yetu, bi nka bu’shi ta tubaadi beyikite. Nsaa y’atuilanga ku miluisho yetu, ngi nsaa y’abetufuila lusa kui Yehowa.

YEHOWA AKUMIINA’SHI TUALUSHUULE NAYE DINGI KIPUANO KI BUWA

14. Buakinyi tui balombene kukulupila lusa lua Yehowa? (Tala dingi bifuatulo.)

¹⁴ Lusa lua binyibinyi alufiki kui Yehowa, aluitukuasha buatudia kuikala mu kipuano ki buwa naye. Lusa luaye aluitukuasha buatudia kuleka kutungunuka na kuitopeka. T’abitungu tuikale na moo wa’shi Yehowa ki muitulamine nsungu, na’shi akimbi bia’shi etunyokie nya. T’etukitshinaa mianda muyile bikitshino bietu nya. Buakinyi tui balombene kukulupila mui Yehowa nsaa y’akula’shi betufuila lusa? Yehowa balunguile mutemuki Yelemiya’shi: “Ami Yehowa nakebalekyêla bubi bwâbo, Ntankatentekyeshanyi milwisho yâbo ooo.” (Yel. 31:34, EEM) Pa baadi Mpoolo atentekiesha bino bishima bioso, baadi mufubishe kingi kishima ki mumune na bino, amba’shi: “Ntankatentekiesha dingi miluisho yabo.” (Eb. 8:12) Mu binyibinyi, bino abikiebe kuleesha kinyi?

15. Abipushisha kinyi apakula Yehowa’shi t’anatentekieshe dingi miluisho yetu?

¹⁵ Mu Bible, kishima “kutentekiesha” t’akileeshaa misuusa yoso muntu atentekiesha kintu kampanda sunga kuikinangushena nsaa yoso nya. Biabia, ki kuleesha muntu kuete akitshi muanda kampanda. Ntomboshi abaabadi bapudikie ku mutshi wa makienga pamune na Yesu, batekiele’shi: “Yesu, ontentekieshe p’okatuele mu Bufumu bobe.” (Luk. 23:42, 43) Batekiele Yesu bua’shi amukitshine kintu kampanda yaya nsaa. Yesu balunguile yawa muana mulume ntomboshi’shi akamusangula. Biabia, nsaa i Yehowa amba’shi t’atentekiesha miluisho yetu, abileesha’shi t’anabadikie bikitshino bietu bi bubi dingi. T’anetunyokie mu mafuku aafiki bua miluisho yetu yadi mupue kuitufuila lusa nya.

16. Bible aleesha bulungantu abutukila ku lusa lua binyibinyi mushindo kinyi?

¹⁶ Bible afubisha ungi ngakuilo a mu kinfuanyi bua kuitukuasha bua’shi tupushe kalolo akileesha bulungantu abutuukila mu lusa lua binyibinyi. Pa muanda wa’shi tui bantu bakutue kupuidika, tui bekale “ba mpika ba muluisho.” Biabia, nsaa yabetufuila lusa kui Yehowa, tui nka bu bampika “bapososhibue ku bupika bua muluisho.” (Lom. 6:17, 18; Kbf. 1:5) Eyendo, p’atuuku’shi Yehowa mmuitufuile lusa, tui balombene kuikala na muloo nka bu ba mpika bapososhibue.

17. Lusa alutuushaa kipeta kia kupashibua naminyi? (Yeeshaya 53:5)

¹⁷ Badika Yeeshaya 53:5. Bible amba’shi muanda tui bantu bankitshishi ba miluisho, tui bekale nka bu be na maladi a lufu. Muanda Yehowa mmutuushe mulambu wa nkuulo ya Muana aaye, tui nka bu bantu abakula ngakuilo a mu kinfuanyi’shi tui bapande. (1 Mp. 2:24) Nsaa y’atukitshi muluisho, tubaluisha kipuano kietu na Yehowa, anka, ku bukuashi bua nkuulo, Yehowa mmulombene kuitufuila lusa, na tui balombene kuikala naye dingi mu kipuano. Anka abipushaa muntu mupande ku maladi e bukopo muloo wi bungi, n’atue namu atupushaa muloo nsaa yatuikala bapande mu kikudi na kukuminyibua dingi na Yehowa bu kipeta kia lusa luaye.

BI LUSA LUA YEHOWA NA BUKITSHISHI MU NSHALELO EETU

18. Nkinyi kibatulongiela ku ngakuilo a mu kinfuanyi e mu Bible pabitale lusa lua Yehowa? (Tala dingi kashibo akamba’shi: “Abitufuilaa Yehowa lusa.”)

¹⁸ Mmianda kinyi ibatulongo mu kutaluula ngakuilo ya mu kinfuanyi i mu Bible pabitale lusa lua Yehowa? Nsaa y’abetufuila lusa kui Yehowa ku miluisho yetu, bi nka bu’shi ta tui bakite miluisho na tui balombene kushinkamisha’shi t’anaketunyokie mu mafuku aafiki bua miluisho yetu yadi mupue kuitufuila lusa. Bino abitukuasha buatudia kuikala mu kipuano ki buwa na Nshetu e muiyilu. Na mu yaya nsaa imune, atutentekiesha’shi lusa lua binyibinyi nyi nkia buntu akifiki ku kifulo na kalolo bia Yehowa bi’aleesha bantu bankitshishi ba miluisho. Kino kia buntu ta mmuitupe kianka muanda wa’shi ki bu kitungo kiadi nakio kuatudi nya.​—Lom. 3:24.

19. (a) Buakinyi tui balombene kuleesha lutumbu? (Bena Loma 4:8) (b) Nkinyi ki’atukesambila mu muisambo aulondo?

¹⁹ Badika Bena Loma 4:8. Tui na lutumbu lukata bua “lusa lua binyibinyi” lua Yehowa Efile Mukulu! (Mis. 130:4) Biabia, bua’shi betufuile lusa kui Yehowa, abitungu tukite kintu kampanda ki na muulo. Yesu baadi mupatuule’shi: “Kadi su tanufuila bangi lusa bua bilubilo biabo, Nshenu takenufuila namu lusa bua bilubilo bienu.” (Mat. 6:14, 15) Biabia, abitungu tuambule Yehowa na kufuila bangi lusa. Kadi tui kukita bino naminyi? Muisambo wetu aulondo, auketuleesha mushindo watudia kuibikita.