Bia kuikala kuuku a binyibinyi

TOODI mupete muanda, kadi okutua muntu ankukuasha? Pa muanda tui mu “bipungo bibukopo,” tui kubofula na tuakutua muntu akuisamba naye. (2 Ti. 3:1) Anka, nsaa yatudi na muanda, kui bantu be kuitukuasha. Bible akula’shi ba kuuku ba binyibinyi be nkukuasha mu “mpombo.”​—Nki. 17:17, BB.

MUSHINDO ULOMBENE NKUKUASHA KUUKU A BINYIBINYI

Ba kuuku babaadi Mpoolo mutumibua ende nabo mu ngiendo ya bu misionere babaadi bamukuashe mu mishindo ilekene. (Kol. 4:7-11) Pabaadi Mpoolo mu lukano mu Looma, ba kuuku baye abaadi bamukitshine mianda yashibaadi na mushindo wa kukita aye nabene. Bu kileshesho, Epafrodite baadi mutuadile Mpoolo bintu bibaadi nabio lukalo bibaadi bakuetu balume na bakashi ba mu Fidipe bamutumine. (Fid. 4:18) Tishike baadi mutuale mikanda ya Mpoolo mu tukongie tuilekene. (Kol. 4:7) Ku bukuashi bua ba kuuku baye, Mpoolo baadi mulombashe mudimo waye sunga bibaadi mu lukano. Lelo uno, mbikunyi biodia kuikala kuuku a binyibinyi?

Bileshesho bia ano eetu mafuku, abilesha muulo wa kuikala kuuku a binyibinyi. Tala kileshesho kia mukuetu mukashi baadi muikale lole a binyibinyi a Elisabet, mbala-mashinda a mieshi yoso mushale mu Espagne. Nsaa ibabaadi bakuate nyinaye na Elisabet mukumbo wa cancer ke bukopo, uno mukuetu mukashi baadi mumutumine mesaje e bungi aanyingisha e na bifundue bia mu Bible. Elisabet amba’shi: “Ano mesaje, abaadi ampe bukome bua kunyingiila kushi’mi kuipusha bupenka.”​—Nki. 18:24.

Tui kunyingisha bu kuuku buetu na bena Nkidishitu netu pa kuenda nabo mu bulungudi sunga ku bisangilo. Bu kileshesho, we mulombene nkata muntu mununu kuaye bua kuenda naye mu bulungudi sunga mu bisangilo su? Su bokitshi biabia, anuinyingishena. (Lom. 1:12) Anka, kui bangi bakuetu bashi bia kutuuka mu mashibo aabo. We kuikala kuuku a binyibinyi buabo su?

IKALA KUUKU A BINYIBINYI BUA BAABA BASHI BIA KUTUUKA MU MASHIBO AABO

Bangi bakuetu be na Nkidishitu be na maladi sunga lungi lukalakashi aluibakutshisha kutuela bisangilo ku nshibo ya Bufumu. Bino nyi bibaadi bikitshikile ungi mukuetu abetamina bu David, ababaadi bakuate na mukumbo wa cancer. Munda mua mieshi isamombo, abaadi abamubuku. Munda mua ano oso mafuku, mukuetu David na mukashi aaye Lidia abaadi abatuelela bisangilo ku bukuashi bua video.

Bukuashi kinyi bubabaadi bapete kui ba kuuku babo mu kakongie? Kunyima kua bisangilo bioso, bangi bakuetu abaadi abatuelela bisangilo ku Nshibo ya Bufumu, abaadi abakitshi muabo moso bua kuisamba na David na Lidia ku bukuashi bua video. Na dingi, pabaadi David na Lidia abatuusha ngaluulo, bakuabo bena Nkidishitu abaadi abebafundila mesaje bua kuibanyingisha. Bibatushishe bipeta kinyi? David na Lidia ta mbepushe bupenka.

Tui kuata mpango ya kulungula mukandu wi buwa na bakuetu bashi bia kutuuka mu mashibo aabo su? Tui kushintuula tungi tu mianda mu biubishi bietu bua kulungula nabo, paapa atulesha’shi tatuibebayilue. (Nki. 3:27) Buakinyi tue kukita programe bua kufunda nabo mikanda, sunga kulungula nabo ku bukuashi bua telefone? Bakulu mbalombene kuata mpango bua’shi baaba bashi bia kutuuka ku mashibo aabo balondesha kisangilo kia bulungudi ku bukuashi bua video. David na Lidia abaadi basankile ino mpango. David amba’shi: “Penda nka kuikala pamune na kasaka ketu ka bulungudi bua kuisamba bua kapindi kapela na kuteka nkuitunyingishe ngofu.” Na dingi, we kuipusha mukuetu shi biakukatuka kuaye ku nshibo su akumina’shi wekale ofiki na mulongi oobe bua’shi nulongiele kuakua.

Nsaa y’atufubu pamune na bakuetu balume na bakashi bashi biakutuuka mu mashibo aabo na kumona nyikashi yabo i buwa, atuifubuila pepi nabo. Bu kileshesho, nsaa y’olungula mukandu wi buwa na bano balungudi na kumona bi’abafubisha kalolo Eyi di’Efile Mukulu bua kukuma mashimba a bantu, onyisha kunyingisha kipuano kiobe nabo. Nsaa yatukuasha bakuetu balume na bakashi bua kutuela bisangilo sunga bua kulungula mukandu wi buwa, atumono nyikashi yabo i buwa na bino abitukuasha bua kuikala ba kuuku babo.​—2 Ko. 6:13.

Pabaadi Mpoolo mu nkalakashi, kuuku aaye Tite bayile mu kumutala na bua kumukuasha. (2 Ko. 7:5-7) Uno muisambo awitutentekiesha’shi, tui kunyingisha bangi kushi penda mu ngakuilo, kadi mpa na pa kuikala nabo bua kuibakuasha.​—1 Yo. 3:18.

IKALA KUUKU A BINYIBINYI MU NSAA YA KUBINGUABINGUA

Bakuetu balume na bakashi be mu Russie mbetulekiele kileshesho ki buwa pabitale kuikuashena. Tala kileshesho kia Sergey na mukashi aaye Tatyana. Kunyima kua ba mpulushi kufika kuabo na kukimba bintu mu nshibo yabo, abaadi bende nabo bua kuibela nkonko. Tatyana abamutushile kumpala na aluka ku nshibo. Segey amba’shi: “Nka Tatyana kiafiki ku nshibo, ungi mukuetu mukashi sh’eshimba dinyingie bafikile. Bangi ba kuuku betu abafikile bua kumukuasha bua kulonga bintu mu nshibo.”

Sergey alomba’shi: “Nemufule ngofu mayi e mu Nkindji 17:17, aamba’shi: ‘Kuuku a binyibinyi alesha kifulo mafuku oso, na mukuabo na muntu ekuanka bua ku mukuasha mu mpombo. Ano mayi ngafikie na muulo ukata mu kipungo kia kubinguabingua, kua’shi biakobesha ami nabene. Yehowa mumpe ba kuuku bashi na moo bua kuikala ku lupese luande.”a

Nsaa yatudi na nkalakashi i bukopo, tui na lukalo lua ba kuuku ba kuitukuasha. Atukekala nabo dingi lukalo lukata mu mpombo ikata. Biabia tukiteyi muetu moso bua kuikala ba kuuku ba binyibinyi kubanga binobino!​—1 Mp. 4:7, 8.