Lumbuula eshimba diobe

Nsaa y’atuilongiela Bible, atukumiina’shi mianda y’atulongo pabitale Yehowa ikume mashimba eetu, sunga’shi ikale na bukitshishi mu binangu bietu, ku bi’atupusha, na ku nkalo yetu. Esela mmuitulekiele kileshesho ki buwa pabitale uno muanda nsaa ibaadi “mulumbuule eshimba diaye bua kutaluula Muiya wa Yehowa.” (Esel. 7:10) Tui kulumbuula mashimba eetu naminyi?

Teka. Banga kuilongiela koso na luteko. Teka Yehowa bua’shi akukuashe omone bia kupusha na kutumikila mianda y’olongo.​—Mis. 119:18, 34.

Ikala muiyishe. Efile Mukulu mmufie baaba boso be na kuitatula bia binyibinyi, na abanangushena’shi ta be na lukalo na bukuashi buaye bua kupusha Bible kalolo. (Luk. 10:21) T’atuilongielanga bua penda kudila kukaanyisha bangi bua’shi betumone’shi atuuku mianda i bungi. Na kuiyisha koso, shintuula binangu biobe su ta bi mu kuipushena na bia Yehowa.

Teemesha ngono yetu ya Bufumu. Ngono i na bukitshishi bukata, i kukuma mashimba eetu, na kuitulumbuula bua kulanguila Efile Mukulu. Kuteemesha loono lua Bufumu kumpala kua kipindi kioso kia kuilongiela, kui nkukuasha bua kulumbuula eshimba diobe.