Buakinyi bi buwa tutekie bangi malango?

1. Nkinyi kiatudia kukita bua kuata bitshibilo bi buwa abituusha bipeta bi buwa? (Nkindji 13:10; 15:22)

ATUE boso atukumiinaa kuata bitshibilo bi buwa, na abituusha bipeta bi buwa. Eyi di’Efile Mukulu adileshaʼshi bua kukita bino, abitungu tutekie malango.​—Badika Nkindji 13:10; 15:22.

2. Yehowa muitulee kinyi?

² Kushi mpaka, muntu mulombene kuitupa malango e buwa, nyi Nshetu Yehowa. Mmulee bua kuitukuasha, amba’shi: “Nakakupa elango. Dingi, meso ande aakekala podi.” (Mis. 32:8, EEM.) Uno verse alesha’shi, Yehowa t’emena penda pa kuitupa elango, kadi etukuasha dingi bua kuiditumikila.

3. Mu uno muisambo, nkonko kinyi yatualuula?

³ Mu uno muisambo, atufubisha Eyi di’Efile Mukulu bua kualuula ino nkonko inanka: (1) Bua’shi malango e buwa ankuashe, eyikashi kinyi aditunguʼshi ngikale nadio? (2) Nnanyi e kumpa malango e buwa? (3) Ne kukita kinyi bua kulesha’shi nakumiina bampe malango? (4) Buakinyi t’abitungu’shi ntekie bangi bua’shi bangatshile bitshibilo?

EYIKASHI KINYI ADITUNGU’SHI NGIKALE NADIO?

4. Su atukumiina’shi malongo e buwa etukuashe, eyikashi kinyi aditungu’shi tuikale nadio?

⁴ Abitungu tuikale beyishe bua’shi malango abetupa etukuashe. Abitungu tuukie’shi, ta tui’nka na kiukilo kia kuata bitshibilo bi buwa nsaa yoso. Su ta tuibeyishe, Yehowa tamono bia kuitukuasha, nyi buakinyi malango atupete Muiyi diaye, aekala nka bu mema aalaala p’ebue. (Mik. 6:8; 1 Mp. 5:5) Anka, su tuekala beyishe, atuikala na bukidi bua kuteemesha na kutumikila malango a mu Bible.

5. Mmianda kinyi ibaadi Davide mukite ibaadia kumuikasha na kuitatula?

⁵ Tala kiatudi balombene kulongiela kui Nfumu Davide. Mianda ibaadi mukite ibaadia kumutakula mu kuitatula. Kumpala kua’shi afikie bu Nfumu, baadi mupue kuenda nkumo bua ngobesha yaye ya kuimba. Abaadi mpa na bamuitamine bua kuimbila nfumu. (1 Sa. 16:18, 19) Kunyima kuabo kumuela muimu bu nfumu, Yehowa baadi mumupe bukome kukiila ku kikudi kiaye kiselele. (1 Sa. 16:11-13) Baadi muukibue ngofu munkatshi mua muilo waye bua kuipaa beshikuanyi, mpa na kipambe kia bena filistine, Goliate. (1 Sa. 17:37, 50; 18:7) Su mmuntu sha kuitatula baadi mukite ino yoso mianda, badia kunangushena’shi te na lukalo lua malango a bangi bantu. Kadi Davide ta baadi mukite biabia nya.

6. Atuuku naminyi’shi Davide baadi atumikila malango? (Tala dingi kifuatulo ku kipusu.)

⁶ Kunyima kuaye kufika bu nfumu, Davide baadi musangule ba kuuku ba kumupa malango. (1 Mi. 27:32-34) Bino tabitukanyisha, muanda kumpala kua’shi afikie bu nfumu, Davide baadi ateemesha malango a bangi. Ta baadi ateemesha penda malango a bana balume, kadi baadi mpa na muteemeshe elango dia Abigaile. Baadi mukashi a Nabale, muntu baadi na kuitatula, shi na lutumbu, sha busumua na shanemekaa bangi. Na kuiyisha koso, Davide baadi mutumikile elango diaye, bu kipeta aye nkukutua kukita muluisho ukata.​—1 Sa. 25:2, 3, 21-25, 32-34.

7. Malongiesha kinyi atupete ku kileshesho kia Davide? (Mulungudi 4:13) (Tala dingi bifuatulo.)

⁷ Kileshesho kia Davide akitulongiesha mianda i bungi. Bu kileshesho, tui kuikala na ngobesha ya kukita kintu kampanda sunga kuikala na matalua kui bangi. Sunga mbiabia, tatukumanga kunangushena’shi atuuku mianda yoso na’shi ta tui na lukalo lua malango a bangi. Anka bu Davide, abitungu tukumiine malango e buwa abetupa kui muntu oso yawa. (Badika Mulungudi 4:13.) Su tubakitshi bino, t’atukitshi miluisho ikata ayituinyongosha na kuinyongosha bangi.

NNANYI EKUMPA MALANGO E BUWA?

8. Buakinyi Yonatane baadi mulombene kupa Davide elango di buwa?

⁸ Tala dingi dilongiesha di’atulongiela ku kileshesho kia Davide. Baadi ateemesha malango a bantu abaadi mu kipuano ki buwa na Yehowa, na abaadi abapusha lukalakashi luaye kalolo. Bu kileshesho, bu bibaadi akumiina kuuka su ekualusha dingi kipuano kiaye na Nfumu Saule, Davide baadi muteemeshe elango dia Yonatane, muana a Saule. Buakinyi Yonatane baadi mulombene kumupa elango di buwa? Muanda Yonatane baadi mu kipuano ki buwa na Yehowa na baadi auku Saule kalolo. (1 Sa. 20:9-13) Bino abitulongiesha kinyi?

9. Nnanyi ekuitupa elango di buwa? Patuula. (Nkindji 13:20)

⁹ Nsaa yatudi na lukalo lua malango, bi buwa tuiatekie kui muntu e mu kipuano ki buwa na Yehowa na mupue kumona wawa muanda.a (Badika Nkindji 13:20.) Bu kileshesho, puandikisha’shi, mukuetu mulume ki nsongua akimbi mukuetu mukashi nsongua e buwa a kuiyibakishena naye. Nnanyi e kumupa elango di buwa? Muntu shi muibakile mulombene kumupa elango di buwa dia mu Bible. Anka, uno mukuetu mulume e kupeta malango e buwa kui mulume na mukashi beyibakishena banyingie mu kikudi abamuuku kalolo, na bapue kuiyibakishena takudi mafuku.

10. Nkinyi kitatutaluula binobino?

¹⁰ Tubamono eyikashi aditungu’shi tuikale nadio na muntu mulombene kuitupa elango. Binobino tutaluuleyi kia kukita bua kulesha’shi atukumiina betupe malango na buakinyi t’abitungu’shi tutekie bangi bua’shi betuatshile bitshibilo.

NE KUKITA KINYI BUA KULESHA’SHI NAKUMIINA BAMPE MALANGO?

11-12. (a) Ingi nsaa, tui kukita kinyi? (b) Nkinyi kibakitshine Nfumu Roboame nsaa i baadi ayitungu’shi aate kitshibilo ki na muulo ukata?

¹¹ Ingi nsaa, muntu ekulesha’shi akumiina bamupe elango, aku namu akiebe penda kuuka su bantu abakumiina kitshibilo kiaye. Muntu e bino, te na lukalo lu’elango. Kulonga kileshesho kia kia nfumu Roboame kui kumukuasha.

¹² Roboame bekeele nfumu mu Isalele kunyima kua lufu lua nshaye Salomone. Roboame baadi mupiane eumbo dibaadi adiende kumpala, kadi bantu abaadi abamono’shi Salomone baadi ebatekie bua kukita midimo i bukopo. Nyi buakinyi bantu abaadi batekie Roboame bua’shi su ebabofuisha mudimo wi bukopo. Roboame bebatekiele bua’shi bamupe nsaa ya kunangushena ku kitshibilo kiadia kuata. Babangile bi buwa p’aye kuteka elango kui bantu bakulu abaadi bakuashe Salomone. (1 Bf. 12:2-7) Anka, baadi mupele elango dibabadi bamupe kui bano bantu bakulu. Buakinyi baadi mukite bino? Pangi baadi mupue kuata kitshibilo pabitale kiadia kukita, na baadi mukulupile’shi bantu bakulu abamukuatshishena. Biabia nsaa i baadi mutekie ba nsongualume babaadi mukule nabo, abaadi bamukuatshishene, na aye nkuteemesha elango diabo. (1 Bf. 12:8-14) Roboame baadi mualuule muilo nka bibaadi ba kuuku baye bamulungule. Bu kipeta, muilo nkuiabuula na kubanga nka paapa ta baadi dingi mu kuiyikeela.​—1 Bf. 12:16-19.

13. Tui kuuka naminyi su tuibalumbule binangu na mashimba eetu?

¹³ Kileshesho kia Roboame akitulongiesha kinyi? Nsaa yatutekie elango abitungu tulumbule binangu na mashimba eetu. Tui kuibikita mushindo kinyi? Tui kuiyipusha’shi, ‘Natekaa elango akupu nedipela musango umune muanda ta nyi biankuminanga su?’ Tuate kileshesho.

14. Nsaa yabetupa elango, nkinyi kiatudi balombene kutentekiesha? Tusha kileshesho. (Tala dingi kifuatulo.)

¹⁴ Banda kunangushena’shi mukuetu mulume bapete mudimo wʼabamufutu kalolo. Kumpala kua’shi eukumiine, ekuteka elango kui mukulu. Mukuetu mulume alungula mukulu’shi mudimo aumutekie bua’shi ende kula na kifuko kiaye munda mua mafuku e bungi. Mukulu atentekiesha mukuetu mulume Eyi dia kulonda dia mu Bible buadia kutuula nkalo ya mu kikudi ya kifuko kiaye pa mbalo ya kumpala. (Ef. 6:4; 1 Ti. 5:8) Mukuetu mulume ta musankie na dino elango, biabia batungunuka na kuipusha bangi bantu mu kakongie na bangi abamulungula’shi mulombene kukumiina uno mudimo. Mukuetu mulume kuete kukimba elango su mupue kuata kitshibilo aye nabena na akimbi muntu akumukuatshishena ku kitshibilo kiaye su? Tutentekieshe’shi eshimba dietu ndilamalama. (Yel. 17:9) Ingi nsaa elango diatudi nadio lukalo nyi diatukumiina kuteemesha.

BUAKINYI TABITUNGU’SHI NTEKIE BANGI BUA’SHI BANGATSHILE BITSHIBILO?

15. Kinyi akitunguʼshi tudimukile, na buakinyi?

¹⁵ Muntu oso ena bushito bua kuiatshila bitshibilo. (Nga. 6:4, 5) Nka bu biatubebimono, muntu sha binangu akimbaa malango muiyi d’Efile Mukulu na kui bena Nkidishitu banyingie mu kikudi kumpala kua kukita muanda kampanda. Biabia, tatutadilanga bangi bua’shi betuatshile bitshibilo. Bangi abepushaa bantu babadi bakulupile’shi, “We kukita naminyi su opeta muanda wi bino?” Bangi namu be kuambula bitshibilo bia bangi kushi kuela binangu.

16. Lukalakashi kinyi lubatukile mu kakongie ka bena Kodinda pabitale kudia muita ulambulue ma nkishi, na nnanyi baadi na kiakuata kitshibilo kia kuambaʼshi abitungu kuiwudia sunga kupela kuiwudia? (1 Bena Kodinda 8:7; 10:25, 26)

¹⁶ Nangushena ku kitshibilo kibaadi na kia kuata bena Nkidishitu ba mu kakongie ka Kodinda pabitale kudia muita wabadi balambule ma nkishi. Mpoolo baadi mufundile bano bena Nkidishitu’shi: “Atuukuʼshi nkishi nkintu kia bisumanga, na kui Efile Mukulu nka umune.” (1 Ko. 8:4) Na uno muanda mu binangu, bangi bena kakongie abaadi baate kitshibilo kia kudia muita wabadi balambule ma nkishi mpa na kuiupana. Bangi abaadi bate kitshibilo kia kupela kudia uno muita muanda kondo kabo kʼeshimba kabadia kuibatopeka. (Badika 1 Bena Kodinda 8:7; 10:25, 26.) Kino kibaadi kitshibilo kia muntu pa bupenka. Mpoolo ta baadi mulungule bena Kodinda bua kuatshila bangi bitshibilo efuku su ndimune sunga kuibalungula bua kukita biabia bikite bangi. Oso a kuabadi “akemana kumpala ku’Efile Mukulu bua kusambishibua muyile bikitshino biaye.”​—Lom. 14:10-12.

17. Nkinyi ki kukitshika su tuambula abikitshi bangi? Tuusha kileshesho. (Tala dingi kifuatulo.)

¹⁷ Muanda wi bino wi kukitshika lelo uno naminyi? Tala kileshesho kia tuntu tupela tua mu mase. Muina Nkidishitu oso e kuata kitshibilo kia kukumiina sunga kupela tuno tuntu tupela tua mu mase.b Bi kuituelela bukopo bua kupusha uno muanda kalolo, anka abitungu tuiatshile kitshibilo pabitale uno muanda. (Lom. 14:4) Su tuambula bikite ungi muntu, kondo ketu k’eshimba ke kubofula. Tuikulongiesha kondo ketu k’eshimba nsaa yatuikafubisha. (Eb. 5:14) Biabia, nsaa kinyi yatudia kuteka muina Nkidishitu munyingie mu kikudi elango? Nyi nkunyima kuatue kukimbuula, anka tuki’nka na lukalo lua bukuashi bua kupusha mushindo wipushene mayi a kulonda a mu Bible na muanda wetu.

TUNGUNUKA NA KUTEKA ELANGO

18. Yehowa muitukitshine kinyi?

¹⁸ Yehowa muitukulupile ngofu p’aye kuitutadila bua’shi tuiatshile bitshibilo. Mmuitupe Eyi diaye Bible. Na mmuitupe ba kuuku ba sha binangu balombene kuitukuasha bua kunangushena ku mayi aye a kulonda e mu Bible. P’aye kukita bino, mmulombashe bushito buaye bua bu Nshetu. (Nki. 3:21-23) Tui kukita kinyi bua kumulesha lutumbu?

19. Tui kusankisha Yehowa mushindo kinyi?

¹⁹ Tuate kino kileshesho: Baledi abekalaa na muloo wi bungi wa kumona bana babo abakulu na abafiki bafubi ba Yehowa ba sha binangu balombene kukuasha bangi. Mu mushindo umune, Yehowa ekalaa na muloo p’etumono atutunguka na kuenda kumpala mu kikudi, kuteka malango, na kuata bitshibilo abilesha’shi tuibamufule.