MUISAMBO WA KULONGA 30
LOONO 97 Muwa wi mwiyi dyʼEfile Mukulu
Mianda ya kumpala ya mu Bible ibolongiele ikiayikukuasha mpa na lelo uno su?
“Nyi buakinyi nakumina kuinutentekiesha misango yoso ino mianda sunga biekala’shi anuiyiwuku na bashimate mu bia binyibinyi bi muanudi.”—2 MP. 1:12.
KIʼATUISAMBILA
Atulongo mushindo ulombene nkukuasha mianda ya kumpala ibolongiele mu Bible lelo uno.
1. Malongiesha a kitako a mu Bible abaadi na bukitshishi kinyi kodi nsaa ibolongiele bia binyibinyi?
MALONGIESHA a kitako a mu Bible ngashintule nshalelo eetu. Bu kileshesho, nsaa ibatulongieleʼshi eshina diʼEfile Mukulu nyi Yehowa, tubelele etambula dia kumpala bua kufika ba kuuku baye. (Yesh. 42:8) Pabatulongiele bia binyibinyi pabitale akikitshikaa su muntu baafu, tʼatuikalakashaa dingiʼshi bakuetu bafue bakuete kukienga. (Mul. 9:10) Na pabatulongiele mulayilo wʼEfile Mukulu pabitale Mpaladiso pa nsenga, tʼatuikalakashaa dingi bua mafuku aafiki. Tubaadi bashinkamisheʼshi, tʼatuikala na muwa penda munda mua kapindi kapeela nya, kuambaʼshi bipua 70 sunga 80, kadi bua loso.—Mis. 37:29; 90:10.
2. Mbikunyi abilesha 2 Mpiele 1:12, 13 shi, sunga bena Nkidishitu banyingie mu kikudi abaadi bapete bukuashi bua malongiesha a kitako a mu Bible?
2 Tʼabitungu tuilue muulo wa malongiesha a kitako a mu Bible. Mu mukanda waye wa kabidi, Mpiele mutumibua baadi mufundile bena Nkidishitu abaadi “bashimate mu bia binyibinyi.” (Badika 2 Mpiele 1:12, 13.) Anka mu aa mafuku, mu kakongie mubaadi bantu be bubi abaadi abakiebe kupambusha bakuetu mu bia binyibinyi. (2 Mp. 2:1-3) Mpiele baadi akumiina kunyingisha bakuabo balume na bakashi buaʼshi bekaluile ku madimi abaadi aalongiesha baaba bantu. Bua kuibikita, baadi muibatentekieshe mianda ibabaadi bapue kulonga. Ano malongiesha abaadia kuibakuasha bua kulama lulamato luabo mpa na ku nfudiilo.
3. Tuusha kileshesho akilesha buakinyi abitungu bena Nkidishitu boso batungunukie na kunangushena ku malongiesha a kitako a mu Bible.
3 Sunga tuekala mu bia binyibinyi takudi bipua bi bungi, tui kulongiela mianda i bungi ku malongiesha a kitako a mu Bible. Tuate kileshesho: Nyina bana auku kuteeka kalolo na muana aaye mukashi kialongo bia kuteeka bekufubisha bitobuanga bimune bua kuteeka muita. Anka muenda mafuku, uno nyina bana mulongie bia kufubisha bitobuanga mu mishindo ilekene bua’shi mabishi atuukie buwa. Mu mushindo umune, bantu bapue kufubila Yehowa munda mua mafuku e bungi, mbalongie malongiesha e bungi mu bifundue kukila baaba bakiababanga kulonga Bible. Buakinyi? Muanda nshalelo eetu na mianda yatudi bakite mu mudimo wa Yehowa ngishintulukie kasha tuabatshishibua. Nsaa yatunangushena pabitale malongiesha a mu Bible abatudi balongie kala, atumono mishindo ipia ya adi alombene kuitukuasha lelo uno. Tutaleyi kilombene bena Nkidishitu abapu kufubila Yehowa takudi bipua bi bungi, kulongiela ku malongiesha asatu a kitako a mu Bible.
YEHOWA NYI MUPANGI
4. Kulonga’shi Yehowa nyi Mupangi kubaadi na bukitshishi kinyi kuatudi?
4 “Baadi mupangie bintu bioso nyi Efile Mukulu.” (Eb. 3:4) Atuukuʼshi nsenga na bintu bioso bi panka mbebipangie kui Mupangi sha binangu bi bungi na sha bukome boso. Naye muitupangie, biabia, etuuku kalolo kakile. Na muanda wi na muulo ngofu, etupasukilaa. Euku ki buwa buetu. Kuuka bino bia binyibinyi biaʼshi Yehowa nyi mupangi, bibaadi na bukitshishi bukata kuatudi, mbitukuashe bua kuikala na nshalelo e buwa e na kepatshila.
5. Mbia binyibinyi kinyi bilombene kuitukuasha bua kuikala na kuiyisha? (Yeeshaya 45:9-12)
5 Bia binyibinyi bia’shi Yehowa nyi Mupangi bi kuitukuasha bua kuikala na kuiyisha. Kunyima kua Yobo kuakula mianda i bubi pabitale Yehowa, na kuleshaʼshi aye nyi mululame, Yehowa baadi mumutentekiesheʼshi Aye nyi Mupangi sha bukome booso. (Yob. 38:1-4) Bino bibaadi bitentekieshe Yoboʼshi bioso abikitaa Yehowa mbilulame. Mu kuipushena na bino, mutemuki Yeshaya bafundile kunyimaʼshi: “Ema ndilombeene kulungula eedimbumbuʼshi: ‘Kyookitshi nkinyi?’”—Badika Yeeshaya 45:9-12.
6. Buakinyi kunangushena ngofu pabitale binangu na bukome bua Mupangi eetu kui na muulo ngofu? (Tala dingi bifuatulo.)
6 Apende muina Nkidishitu na kupeta kiukilo, mulombene kubanga kuikulupila pamutue pa kukimba bukunkushi kui Yehowa na Muiyi diaye. (Yob. 37:23, 24) Biabia, su muntu anangushena ngofu pabitale binangu bishi bia kupuandikisha na bukata bua Mupangi aaye, bi kuikala na bukitshishi kinyi kuadi? (Yesh. 40:22; 55:8, 9) Bino bia binyibinyi bia kitako abitukuasha bua kuikala na kuiyisha na kushinkamishaʼshi binangu bia Yehowa nyi bi na muulo.
Nkinyi ki kuitukuasha bua kuikala na binangu bi buwa pabitale mmueneno eetu? (Tala kikoso 6)c
7. Nkinyi kibaadi kikuashe Rahela bua kukumiina bukunkushi bupia?
7 Rahela, mushale mu Slovénie, mmumoneʼshi kunangushena pabitale Mupangi aaye nkumukuasha bua kukumiina kushintuluka akukitshikaa mu ndumbuluilo. Ambaʼshi: “Ingi nsaa bibaadi bukopo buaʼshi nkumiine bitshibilo bia baaba abakunkusha. Bu kileshesho, sunga kunyima kuʼami kutala video a Mianda ipia ayifiki kui Kasaka ka Bakunkushi-Bakulu No. 8, 2023, bibaadi binkalakashe panamuene bua musango wa kumpala mukuetu e na miefu eele muisambo. Biabia natekiele Yehowa bua’shi ankuasha ngubile kuno kushintuluka.” Rahela mushinkamisheʼshi bu bi Yehowa muikale Mupangi a eyilu na senga, e na ngobesha ya kukunkusha muilo waye mu mushindo wi buwa. Su abikuelela bukopo bua kukumiina mpushisho mupia sunga bukunkushi bupia, buakinyi tue mulombene kuiyisha bua kunangushena pa bukata bua binangu na bukome bua Mupangi eetu?—Lom. 11:33-36.
BUAKINYI EFILE MUKULU MMUTADIILE MAKIENGA
8. Mbukuashi kinyi bodi mupete pa kuuka buakinyi Efile Mukulu mmutadiile makienga?
8 Buakinyi Efile Mukulu mmutadiile makienga? Bantu bashi bobeshe kualuula luno lukonko mbafiitshile Efile Mukulu munda na kupuandikisha’shi te kuanka. (Nki. 19:3) Anka, obe we mulongieʼshi, akifuishaa makienga, mmuluisho watudi bapiane na kukutua kua kupuidika, ta Yehowa eafuishaa. We mulongie dingiʼshi luishinko lua Yehowa ndukuashe bantu be bungi bua kulonga bua kumuuka na bua kuimuena abo banabeneʼshi Yehowa e na lukalo lua kupua makienga bua loso. (2 Mp. 3:9, 15) Kuuka buakinyi Efile Mukulu mmutadile makienga kubaadi kukunyingishe na nkukuasha bua kuifubuila pepi naye.
9. Nsaa nkinyi ayitungu’shi tutentekieshe buakinyi Yehowa mmutadile makienga?
9 Patukiatutengielaʼshi Yehowa afudiishe makienga, abitungu tuikale na luishinko. Anka, nsaa ayifu muntu atudi bafule, sunga nsaa yatudiʼtue sunga bena kifuko netu mu nkalakashi, yabetukitshina mianda na kukutua kululama, tuikufiita munda na kumonaʼshi Yehowa bayisha bua kufudisha makienga. (Aba. 1:2, 3) Mu nsaa i bino, bi buwa tunangushene buakinyi Yehowa mutadiileʼshi bantu balulame bakienge. (Mis. 34:19) Tui kunangushena dingi ku mulayilo waye wa kukatusha makienga bua loso.
10. Nkinyi kibaadi kikuashe Anne bua kunyingiila kunyima kua lufu lua nyinaye?
10 Kuuka bia binyibinyi pabitale makienga kui kuitukuasha bua kunyingiila. Anne, mushale mu kisangi kia Mayotte, mu Océan Indien, amba’shi: “Lufu lua mama alunyinyongoshaa ngofu. Anka, nsaa yoso natentekieshaaʼshi Yehowa tanyi nsulo ya makienga. Akumiina kupua makienga oso na kusangula bakuetu boso bapue kufua. Kunangushena ku bino bia binyibinyi akumpaa butaale na kunyingisha.”
11. Kuuka buakinyi Yehowa mutadiile makienga akuitukuasha bua kutungunuka na kulungula mukandu wi buwa naminyi?
11 Kuuka bia binyibinyi pabitale buakinyi Efile Mukulu mmutadiile makienga kui kuitutakula bua kutungunuka na kulungula mukandu wi buwa. Kunyima kua kupatuulaʼshi luishinko lua Yehowa alupushisha kipandilo bua bantu abelanga, Mpiele bafundileʼshi: ‘Nangushenayi [ku mushindo wa] bantu abatunguʼshi nuikale, bantu be na muikelo wiselele, na bikitshino bia kulamata Efile Mukulu.’ (2 Mp. 3:11) Mu “bikitshino bia kulamata kui Efile Mukulu” mui mudimo wetu wa bulungudi. Nka bu Nshetu, tuibafule bantu. Atukumiinaʼshi bakekale mu nsenga ipia yʼEfile Mukulu ya kululama. Na luishinko loso, Yehowa kuete kupa bantu ba mu terituare eenu mushindo wa kumulanguila. We na kinemo kikata kia kufuba pamune nʼEfile Mukulu bua kukuasha bantu be bungi bua’shi bamuukie kumpala kuaʼshi nfudiilo ifikie!—1 Ko. 3:9.
TUI MU “MAFUKU A KU NFUDIILO”
12. Kuuka’shi tui mu “mafuku a ku nfudiilo” akuitushinkamisha kinyi?
12 Bible alesha kalolo bi muikeelo wa bantu mu “mafuku a ku nfudiilo.” (2 Ti. 3:1-5) Patutala bi muikeelo wa bantu betuifunyishe, atumono patookaʼshi abiakula Bible mbia binyi. Na patumono abinyisha kuluila muikeelo wa bantu, atunyisha kushinkamishaʼshi Eyi diʼEfile Mukulu ndia kukulupila.—2 Ti. 3:13-15.
13. Muyile kileshesho kia Yesu ki mu Luka 12:15-21, nkonko kinyi yatudia kuiyipusha?
13 Kuuka dingiʼshi tui mu mafuku a ku nfudiilo akuitukuasha bua kutuula binangu ku mianda i na muulo. Tuikulonga buakinyi bi na muulo kukita bino ku kileshesho kia Yesu ki mu Luka 12:15-21. (Badika.) Buakinyi Yesu etamina mpeta bu “muntu mukutue binangu”? Ta pa muanda waʼshi baadi na bupeta nya, kadi pa muanda baadi mutuule mianda ishi na muulo pa mbalo ya kumpala. Baadi “muilamine bupeta, kadi [ta baadi] mpeta ku meso ku’Efile Mukulu.” Kufubisha nsaa yaye kushi binangu ta ku baadi buwa muanda baadi na mafuku apela akuikala na muwa. Efile Mukulu balunguile yawa muntuʼshi: “Buno bufuku abakutekie muwa obe.” Lelo uno, apende na kuifubuila nfudiilo a uno ndumbuluilo, tuiyipusheʼshi ‘Ne mutuule binangu biande ku mianda i na muulo su? Bipatshila kinyi biankumiinaʼshi bana bande befundile? Nemuilamine bupeta buande, kuambaʼshi, bukome, nsaa, na makuta ande su nebilaminaa muiyilu?’
14. Nka bu abibilesha kileshesho kia Miki, buakinyi bi na muulo tutentekiesheʼshi tui mu mafuku a ku nfudiilo?
14 Pʼatunangushena ngofu pabitale bitunduilo abishinkamishaʼshi tui mu mafuku a ku nfudiilo, mbilombene kuitukuasha bua kuuka bitshibilo biatudia kuata. Bino nyi bibaadi bikitshikile ungi mukuetu mukashi abetamina bu Miki. Ambaʼshi: “Panapetele diplome, nadi nakumiina kuenda ku université bua kulonga nyema. Nadi dingi nakumiina kuikala mbala-mashinda a mieshi yoso na kuenda mu kukuasha mbalo i lukalo. Anka bangi bakuetu balume na bakashi ba mu kakongie, abaadi bandungule bua kunangushena su abikala bimbofuile bua kulonga kalasa kanadi nakumiina kulonga na kuikala mbala-mashinda sunga kuenda mbalo i lukalo. Abaadi bantentekiesheʼshi uno ndumbuluilo afudiila binobino. Abaadi dingi batentekiesheʼshi mu nsenga ipia, nakalongo bungi bua nyema yoso yankumiina bua loso. Biabia, natshile kitshibilo kia kulonga kalasa kashakangata bipua bi bungi. Bino bibaadi binkuashe bua kupeta mudimo unkuashe bua kuikala mbala-mashinda na kuenda mu Équateur mubaadi lukalo lua balungudi.” Miki na mulume aaye bakuete kufuba binobino mu mudimo wa kifunda mu dino eumbo.
15. Bantu bashabetuteemesha lelo uno, mbalombene nkakumiina mukandu wi buwa su? Tuusha kileshesho. (Tala dingi bifuatulo.)
15 T’abitungu tubofule su bantu abapele kuteemesha mukandu wi buwa. Bantu mbalombene kushintuluka. Tala kileshesho kia mukuabo na Yesu, Yakobo. Baadi mumone tutu aaye Yesu kuakulu, baadi mumumone kuafiki Mesiya, na kulongiesha mu mushindo ushalongieshe ungi muntu. Anka, munda mua bipua, Yakobo tamufikie mulongi a Yesu. Bafikile mulongi aaye nka penda kunyima kua lusangukilo lua Yesu, na Yakobo nkufika mulongi sha kisumi kikata!a (Yo. 7:5; Nga. 2:9) Biabia tokookanga kulungula bena kifuko nobe bashalesheshe lukalo lua kuteemesha mukandu wi buwa, na baaba abaadi bapele nkuteemesha kumpala. Tentekieshaʼshi tui mu mafuku a ku nfudiilo, biabia mukandu wetu ngua kukita bukidibukidi. Mianda yuebalungula lelo uno, inkebakuma ku mashiba mu mafuku aafiki, pangi mpa na kumpala kuaʼshi mpombo ikata ibangie.b
Nkinyi ki kuitukuasha bua kutungunuka na kulungula bena kifuko netu mukandu wi buwa? (Tala kikoso 15)d
IKALA NA LUTUMBU BUA MITENTEKIESHO YA YEHOWA
16. Mushindo kinyi ukukuashe mitentekiesho ya Yehowa? (Tala dingi kashibo akamba’shi “Fubisha bia binyibinyi bia mu Bible bua kukuasha bangi.”)
16 Bingi biakudia bia mu kikudi biatupetaa, abikalaa bia bantu bashapushiishe bia binyibinyi bia kitako bia mu Bible. Bu kileshesho, miisambo ya bantu boso ya mu bisangilo bietu bia ku nfudiilo kua lubingo, ingi miisambo na ma video bi mu jw.org, na mikanda yatutushaa bua bantu boso, mbeyikite bua bantu bashi Tumonyi tua Yehowa. Sunga mbiabia, ino mitetekiesho ayitukuashaa. Ayinyingisha kifulo kietu bua Yehowa, kunyingisha lukumiino luetu Muiyi diaye, na kuitukuasha bua kulongiesha bangi kalolo bia binyibinyi bia kitako bi mu Bible.—Mis. 19:7.
17. Nsaa kinyi ayitungu’shi tunangushene ku malongiesha a kitako a mu Bible?
17 Atue Tumonyi tua Yehowa, atuikalaa na muloo wi bungi nsaa yʼatupete mpushisho mupia a kifundue. Anka, tui na dingi lutumbu bua binyibinyi bia kitako bibaadi bitukakie mu bia binyibinyi bua musango wa kumpala. Nka bu bibatumono, bino bia binyibinyi bikiʼabitukuasha mpa na lelo. Nsaa yatupete bukunkushi bua ndumbuluilo, kadi atumonoʼshi mueneno sunga mushindo wetu wa kukita mianda nyi wi buwa, tutentekieshe na kuiyisha kosoʼshi Yehowa sha binangu na sha bukome boso, nyi kuete kukunkusha uno ndumbuluilo. Nsaa yatudiʼtue sunga muntu atudi bafule mu nkalakashi, tuikale na luishinko na tunangushene buakinyi Yehowa mutadiile makienga. Na nsaa yatuata bitshibilo pabitale mushindo wa kufubisha nsaa, sunga bintu bietu, tutentekiesheʼshi tui mu mafuku a ku nfudiilo, kubashala mafuku apela buaʼshi nfudiilo ifikie. Biabia, mitentekiesho ya Yehowa itungunukie na kuituikasha na binangu na kuitukuasha bua kumufubila na lulamato.
LOONO 95 Etaata adyende na kutama
b Tala muisambo awambaʼshi “Nkinyi ki’atuwuku pabitale biimu bia Yehowa bia mu mafuku aafiki? wi mu Kitenta kia Mulami kia mueshi wa 5/2024, esak. 8-13.
c BI MU KIFUATULO: Mukulu atuusha bi biaye binangu, kadi tabebikumiine kui bangi bakulu. Kunyima kuaye kutala nyenyenyi, bibamutakula bua kuikala na nkatshinkatshi pabitale mueneno aaye.
d BI MU KIFUATULO: Kamonyi ka Yehowa akelongiela bitunduilo abileshaʼshi tui mu mafuku a ku nfudiilo. Bino bibamutakula bua kuitamina tata aaye na kumulungula mukandu wi buwa.