Yehowa baadi muitukuashe bua ‘kukula mbalo ibaabadi betukune’

Mukuetu Kassholm na mukashi aaye babaadi batuele mu Kalasa ka Galade mu kipua kia 1979, na munda mua bipua babaadi “bebakune,” sunga’shi bebatume bua kufuba mu Iran, mu Maurice, mu Birmanie, mu Tanzanie, mu Ouganda na mu Zaïre. Mu Kalasa ka Galade nyi mubabadi bebape elango kui mulongieshi aabo Jack Redford diatutemunanga, dibaadi dibakuashe nsaa ibaabadi “bebakune,” “bebashuule,” na “kuibakuna dingi” misagngo i bungi. Tuibatemesheyi.

Tubangie na Mats: we kuitulungula namu biboodi mupete bia binyibinyi.

Mats: Papa baadi mushale mu Pologne mu kipungo kia Ngoshi ya Kabidi ya nsenga ishima, misusa i bungi baadi amono bu nsesa bua kipuilo kia Katolike. Anka baadi akula nsaa yoso’shi: “Bia binyibinyi bi nka mbalo kampanda!” Kunyima kua mafuku, nadi mushinkamishe’shi kibaadi akula nkia binyibinyi. Nadi naulu mikanda ya kala i bungi ya kubadika. Dingi efuku naudile mukanda wi bulese wi na mutue wa muanda awamba’shi: La vérité qui conduit à la vie éternelle. Wawa mutue wa muanda ubaadi ukakie binangu biande na ami nkubadika mukanda oso ushima nka buabua bufuku. Pabubatookiele, natunduile’shi napete bia binyibinyi!

Kubanga mu mueshi wa Kananka 1972, naadi mubadikie mikanda i bungi ya Tumonyi tua Yehowa na ami nkupeta ngaluulo ku nkonko inaadi neyele pabitale Bible. Napushishe nka bibapushishe nsunga a mu lukindi lua Yesu, kunyima kua kupeta ebue dia muulo ukata, bapaanyine bintu bioso bibaadi nabio bua kuidiula. Naadi “mupaane” kepatshila kanaadi nako ka kuenda ku Université na kufika bu doktere penda bua’shi ngule “ebue dia muulo” dia bia binyibinyi dinaadi mupete. (Mat. 13:45, 46) Naadi mubatshibue muifuku dia 10 dia mueshi w’Ekumi na wa kabidi mu 1972.

Mu kipua kibalondele, baledi bande na muin’ande mulume abakuminyine bia binyibinyi na abo nkubatshishibua. Nabangile mudimo wa nsaa yoso mu mueshi wa Musambo 1973. Munkatshi mua ba mbala-mashinda ba mu kakongie ketu mubaadi ungi mukuetu mukashi e buwa na munyingie mu kikudi abetamina bu Ann-Catrin. Tubaadi befulene na atue nkuiyibakishena mu 1975, tubaadi bakishe bipua binanka mu Suède, mu kibundi kia Strömsund, mubaadi bantu be bungi abakumiina kulonga Bible.

Ann-Catrin: Papa baadi mulongie bia binyibinyi pabaadi kumpuilo kua Université mu Stockholm. Mu kiakia kipungo naadi penda na mieshi isatu, anka baadi ende nami mu bisangilo na mu bulungudi. Mama tabaadi ebikumiina na baadi atompo kulesha Papa’shi Tumonyi tua Yehowa tatui na bia binyibinyi. Anka tabaadi mobeshe, kunyima kua mafuku aye namu dingi baadi mubatshishibue. Ami naadi mubatshibue panaadi na bipua 13, na nabangile bu mbala-mashinda ami na bipua 16. Kunyima kua kufuba mu Umeå, mubaadi lukalo lukata lua balungudi ba Bufumu, nafikile mbala-mashinda a nsaa yoso.

Kunyima kua kuiyibakishena na Mats, tubaadi na muloo wa kukuasha bantu be bungi buabadia kulonga bia binyibinyi. Munkatshi muabo mubaadi Maivor, nsonguakashi baadi mulekie mudimo wa sport bua kufubila Yehowa ngofu, na baadi mufube bu mbala-mashinda na muin’ande mukashi. Babatuelele mu Kalasa ka Galade mu 1984, na bakuete kufuba lelo uno bu misionere mu Équateur.

Mu ma mbalo oso anudi bafube bu ba misionere, mmushindo kinyi wanudi batumikile elango dia “kukula mbalo yabadi benukune”?

Mats: Misusa i bungi babaadi “betukune dingi mu ma mbalo apia elekene. Anka tubaadi bekitshishe bua kushaala “bashimate” mui Yesu pa kukita muetu moso bua kumuambula, bikishekishe kuiyisha kuaye. (Kol. 2:6, 7) Bu kileshesho, pamutue pa kutengiela’shi Tumonyi tua Yehowa tua muiumbo tulonde wetu mushindo wa kukita mianda, tubaadi atuitatshisha bua kulonga buakinyi bakuete kukita mianda mu mushindo kampanda. Tubaadi atukumiina kupusha bi’abanangushena na bi bipikua biabo. Nsaa yoso yatubaadi atuambula Yesu, tubaadi atupusha nka bu’shi tui ‘bakunyibue pepi na musulo wa mema, na atukulu mbalo yoso ibaabadi abetutumu.​—Mis. 1:2, 3.

Ann-Catrin: Bua’shi mutshi ukule kunyima kua’bo kuiukuna dingi, awikalaa na lukalo lua kaanya. Misusa yoso Yehowa baadi bu “nguba” buetu. (Mis. 84:11) Yehowa mmuitupe bakuetu ba mu kikudi balume na bakashi basha kifulo. Bu kileshesho, mu kakongie ketu kapeela ka mu Téhéran, mu Iran, abaadi abetulesha kalolo ke mumune na ka mu mafuku a kala kabadi baleshe mu Bible. Tubaadi atupusha buwa kushaala mu Iran, anka mu mueshi wa Musambo 1980, mbulamatadi baadi mukandikie mudimo wa Tumonyi tua Yehowa, na abo nkuitulungula’shi abitungu tukatukie muiumbo munda mua nsaa 48. Babaadi betutume mu Zaïre (muabetamina lelo uno bu Congo) mu Afrique.

Panapushishe’shi abetutumu mu Afrique, nadidile. Binaadi mupushe abakula pabitale nyoka na mikumbo mu Afrique, bi baadi binkuatshishe moo. Anka ba kuuku betu babidi babaadi bafube muanka munda mua bipua bi bungi abetulunguile’shi: “Kasha tanuayile muanka! Bandayi kutompa anuimuena, na anufulu Afrique ngofu.” Ki’abakuile nkia binyi! Bakuetu balume na bakashi bena kifulo na muloo. Biabia, nsaa ibabidi abitungu’shi tukatukie mu Zaïre bipua bisamombo kunyima pa muanda abaadi bakandikie mudimo wetu, naadi muisepele, muanda namuene’shi nkuete kuteka Yehowa’shi: “Etulekie namu mu Afrique.”

Miabi kinyi yanudi bapete munda mua bino bipua bioso?

Mats: Ne kuteemuna bu kuuku buatudi badie na ba misionere ba mu maumbo elekene. Dingi, mu angi ma mbalo tubaadi na muloo wa kulonga Bible na bantu be bungi, muntu oso a kuatudi baadi na balongi bafikie ku 20! Na dingi, ntshi mulombene kuluba kifulo na kalolo ka kupaana ka bakuetu balume na bakashi ba mu Afrique. Pabatudi atukunku tukongie mu Tanzanie, tubaadi atulaala mu motoka na bakuetu abaadi abakitshi muabo moso bua’shi tupete bioso biatudi nabio lukalo sunga mbibaabadi balanda. (2 Ko. 8:3) Kingi kintu kibaadi na muulo ukata nyi nkino kiatuitamina bu nsaa ya kulonda mianda ya muifuku. Efuku dioso ku kiolua, ami na Ann-Catrin tubaadi atushaala bua kuisamba pabitale mianda ibakidika diadia efuku, na kutumbula Yehowa bu biekalanga netu.

Ann-Catrin: Buande’mi, muloo ukata ngua kuikala na bakuetu balume na bakashi ba mu nsenga ishima. Tui balongie ndimi ipia, bu ludimi lua Persan, Français, Luganda, na Swahili, tui beukie mpa na bipikua bi buwa bi bungi. Tui bakuashe bantu bapia be bungi, tuapeta ba kuuku ba binyibinyi, na kufubila Yehowa nabo pamune.​—Sef. 3:9.

Tui bamone dingi bipangua bia Yehowa bi buwa bilekene. Nsaa yoso ibaatudi atukumiina kuenda mbalo ipia y’abetutumu, tubaadi atupusha nka bu’shi tui mu luendo na Yehowa kadi aye nyi etukunkusha. Mmuitulongieshe bintu biatushibaadi balombene kulonga mu’tue banabene.

Nkalakashi kinyi yanudi bapete, na mmushindo kinyi wanudi beyinyingiile?

Mats: Kunyima kua bipua tubaadi bakumbe mikumbo bu malaria. Na misango i bungi babaadi babaale Ann-Catrin bukidibudiki. Tubaadi dingi atuikalakasha pabitale baledi betu abaadi abende na kununupa, biabia atutumbula bakuetu ba mu kifuko babaadi abebalama nsaa yatudi mu mudimo wetu. Mbapasukile baledi betu pa kuibalesha luishinko, muloo, na kifulo. (1 Ti. 5:4) Sunga mbibaatudi bakite muetu moso bua kuibakuasha patudi kula, ingi nsaa tubaadi atuinyongola na kupuandikisha’shi tubadia kukita bikile paapa.

Ann-Catrin: Mu 1983, patubaadi mu Zaïre, nadi mukumbe mukumbo wi bukopo wa cholera. Doktere balunguile Mats’shi: “Mukatushe mu dino eumbo nka lelo uno!” Pabubatookiele, tubatuelele mu ndekie a cargo, penda ndekie umune baadi kuanka ende mu Suède.

Mats: Tubaadi badile ngofu muanda tubaadi atupuandikisha’shi mudimo wetu wa bu misionere awimana. Mu kuilekena na bibaadi biakule doktere, Ann-Catrin baadi mupande. Na kunyima kua kipua, tubaadi balukiile mu Zaïre, wawa musango, mu kakongie kapeela ka ludimi lua Swahili mu Lubumbashi.

Ann-Catrin: Patubaadi mu Lubumbashi, naadi mutande muana mufuile munda. Sunga tatubaadi na lukalo lua kutanda muana, naadi muinyongole ngofu pa kushimisha yawa muana. Anka mu kiakia kipungo ki bukopo, Yehowa baadi muitupe kia buntu kiatushibaadi abakulupila. Tubabangile kulonga Bible na bantu be bungi kukila kumpala. Munda mua mieshi ipeela, kakongie ka balungudi 35 kabafikile ka balungudi 70, na bungi bua bantu abatuele mu bisangilo bubakatukile pa bantu 40 buafika bua bantu 220. Tubaadi bepaane ngofu mu bulungudi na Yehowa nkuituelela miabi, bino bibaadi binyingishe. Tukuete nka kunangushena na kuisamba ngofu pabitale yawa muana etu. Atutengiela na muloo oso kumona mushindo wabakapaasha elonda di mu mashimba etu kui Yehowa mu mpaladiso.

Mats: Kunyima kua mafuku, Ann-Catrin babangile kupusha mbidi ayimubofula na kukooka. Mu aa mafuku abaadi bankuate na mukumbo wa cancer ka muila, bi baadi abitungu’shi bambaale. Kadi lelo uno ne biya, na Ann-Catrin kuete kukita mupunda ngobesha yaaye.

Tui basangane’shi ta nka penda atue nyi abanyingiila bintompuanga nya. Kunyima kua génocide a mu Rwanda mu 1994, tubayile mu kutala bakuetu balume na bakashi babaadi mu ma camps a bantu bafilukie. Pa kumona lukumiino luabo, kunyingiila kuabo, na kalolo kaabo ka kupaana mbitulongieshe’shi Yehowa e na bukome bua kukuasha bantu baaye pabadi mu bitompuanga.​—Mis. 55:22.

Ann-Catrin: Tubapetele lungi lukalakashi kunyima kua kupetekielua mu nsaa ya kufungula kua Betele a mu Ouganda mu 2007. Kunyima kua programe, tubatuelele muishinda na ba misionere 25 na bena Betele ba mu Nairobi, mu Kenya. Kumpala kua kufika ku mikalo ya mu Kenya, ungi motoka ubaadi aufiki lungi lupese, ubatuelele lupese luatudi ao nkuikupila motoka wetu. Yawa baadi atambusha pamune na bakuetu batano abafuile nka musango umune; mungi mukuetu mukashi baadi mukafuile ku lupitalo. Atukulupila kukemonena na baaba bakuetu dingi!​—Yob. 14:13-15.

Malonda anaadi nao abaadi apande. Anka ami na Mats na bangi bakuetu tubaadi batungunukie na kukienga na kenyongoshi pa muanda wa aa masaku. Buande’mi kenyongoshi kabaadi akankuata bufuku, napusha nka abikalaa muntu e na mukumbo w’eshimba. Bibaadi abinkuatshisha moo. Anka kuteka Yehowa ngofu, kubadika na kunangushena ku Bifundue kubaadi akuitukuasha bua kupeta butaale. Tubaadi dingi bende kui munganga auku bia kubuka kenyongoshi na bibaadi bitukuashe ngofu. Binobino tatui na dingi kenyongoshi ke bungi, na tubatekiele Yehowa buadia kuitukuasha tunyingishe bangi bakuete kulua na kenyongoshi ke bukopo.

Nsaa yanulesha mushindo wanudi banyingiile nkalakashi yenu, nubalesha’shi Yehowa baadi muinutuale nka bu “mayi abishi.” Bino abilesha kinyi?

Mats: Kino kishima akifiki mu ludimi lua Swahili akiamba’shi “Tumebebwa kama mayai mabichi,” Sunga’shi: “Tui batuadibue nka bu mayi abishi.” Anka abikitaa muntu mutuale mayi abishi, eabembeleshaa bua’shi taatanyikanga, Yehowa mmuitukuashe na kalolo koso mu mbalo yoso yatudi bafube. Nsaa yoso tubaadi atupete biatudi nabio lukalo, mpa na kukila paapa. Ungi mushindo watudi bapushe kifulo na bukuashi bua Yehowa nyi mmushindo wabadi betuule pa mbalo yetu kui Kasaka ka Bakunkushi-Bakulu.

Ann-Catrin: Nakiebe kutemuna kileshesho akilesha biabadi betukuashe kui Yehowa na kalolo koso. Dingi efuku abaadi bangitamine ku telefone bandungula’shi Papa e na maladi mu lupitalo mu Suède. Mats abaadi ba ki’abakatuka mu kumubuka mukumbo wa malaria, na tatubaadi na mushindo wa kuula billet bia ndekie bua kuenda kuetu nya. Tubatshile kitshibilo kia kupaana motoka wetu. Nka paapa abaadi betuitamine ku telefone misusa ibidi; wa kumpala mba mulume na mukashi abaadi bapushe muanda watubaadi nao na abaadi abakumiina kuituudila billet umune. Wa kabidi baadi ungi mukuetu mukashi mununu baadi mulame makuta aaye mu kashete na afunda kuanka’shi: “A kupa muntu e na lukalo.” Mu minite ipeela, Yehowa baadi muitukuashe buatudia kupeta billet biatubaadi nabio lukalo!​—Eb. 13:6.

Bipua 50 bianudi bakishe mu mudimo wa nsaa yoso mbinulongieshe kinyi?

Ann-Catrin: Ne mulongie’shi bukome buetu bui mu “kushaala baumine na kuikala na lukulupilo.” Nsaa y’atukulupila mui Yehowa, aye namu akitshi bua’shi ngoshi ikale yaaye. (Yesh. 30:15, NWT; 2 Mi. 20:15, 17) Pa muanda tui bamufubile mupunda ngobesha yetu mbalo yoso yadi muitutume, tui bapete miabi yatushibaadi balombene kupeta mu ungi mushindo.

Mats: Dilongiesha dikata diandi mupete ndia kukulupila mui Yehowa mu muanda oso na kumona mushindo wankuasha. (Mis. 37:5) Kasha takutshilue kulombasha mulayilo waye wa kunkuasha nya. Na lelo uno dingi, mu mudimo wetu wa ku Betele a mu Birmanie, tukuete kumona biakuete kutungunuka na kuitukuasha.

Atukulupila’shi ba nsongua be bungi abakumiina kutamisha mudimo wabo abakapusha bi kifulo kia lulamato kia Yehowa, nka biabidi buetu. Atushinkamisha’shi nyi abikakitshika su batadiila Yehowa bua’shi ebakushe, mbalo yoso y’ebakunu.