Kia kukita bua kuela nteko ayikatukila muishimba

1-2. (a) Nkinyi ki kuitukutshisha kufunguila Yehowa eshimba dietu? (b) Atuuku naminyi’shi Yehowa ateemeshaa nteko yetu?

WE MUMONE’SHI ingi nsaa mu nteko yobe walushuula nka mianda imune sunga’shi ayikalaa kinundunundu? Su mbiabia tue bupenka. Pa muanda wa bintu bi bungi biatudi nabio bia kukita, ingi nsaa atuelaa nka ka luteko keepi. Sunga’shi ingi nsaa atupela kufunguila Yehowa eshimba dietu pa muanda atumono’shi ta tui balombene kuisamba naye.

² Bible etushinkamisha’shi ki na muulo kui Yehowa ta nteko yatuele na bishima bi buwa, anka nteko yatuele na kuiyisha na ayikatukila muishimba. Ateemesha ‘nteko ya beyishe.’ (Mis. 10:17) Ateemeshaa kishima kioso kiatuakula muanda etupasukilaa.​—Mis. 139:1-3.

3. Nkonko kinyi yatualuula mu uno muisambo?

³ Biabia tuikuiyipusha’shi: Buakinyi tui kuipusha bulungantu bua kuteka Yehowa? Mbikunyi biatudia kuela nteko ayitukuasha bua kuifubuila pepi na Yehowa? Kunangushena ku nteko i mu Bible kui kuitukuasha naminyi bua kuela nteko ayikatukila kuishimba? Na tui kukita kinyi su ta tui na bishima bia kuakula mu nteko yetu? Tutaleyi ngaluulo ku ino nkonko.

TOTADILANGA KINTU SU NKIMUNE KIKUKUTSHISHE KUTEKA YEHOWA

4. Nkinyi ki kuitukuasha bua kuipusha bulungantu bua kuteka Yehowa? (Misambo 119:145)

⁴ Nsaa yatupusha’shi Yehowa nyi kuuku e buwa akumiina’shi tuikale kalolo, atuipusha bulungantu bua kumuteka. Mufundi a Misambo 119 baadi amono Yehowa mu uno mushindo nsaa ibaadi amutekie. Ta baadi mukutue mianda mu nshalelo aaye. Abaadi bamudimbila mianda kui bantu (Mis. 119:23, 69, 78) Ingi nsaa, baadi dingi abofula pa muanda wa miluisho yaye. (Mis. 119:5) Sunga mbiabia, baadi epusha bulungantu bua kufunguila Yehowa eshimba diaye.​—Badika Misambo 119:145.

5. Buakinyi t’abitungu tutadile kintu su nkimune kitukutshishue kuteka Yehowa? Tuusha kileshesho.

⁵ Yehowa akumiina’shi mpa na bantu bakite miluisho ikata bamutekie. (Yesh. 55:6, 7) Biabia tatutadilanga’shi kintu su nkimune kitukutshishue kuteka Yehowa. Bu kileshesho, puandikisha’shi boshimina mu mutamba, kadi bomono muntu mulombene nkulesha eshinda. We kuikoka bua kumuteka bukuashi pa muanda opusha buufu tala akusepa’shi boshimina? Nya. Mu mushindo umune, su tuakutua kuuka kitshibilo kia kuata sunga kukita muluisho, tuipushe bulungantu bua kuteka Yehowa.​—Mis. 119:25, 176.

KIA KUKITA BUA KUELA NTEKO AYIKATUKILA MUISHIMBA

6-7. Kunangushena ku nyikashi ya Yehowa kui kuitukuasha bua kuela nteko ayikatukila muishimba naminyi? Tuusha kileshesho. (Tala dingi mayi e kuushi ku’esaki.)

⁶ Nsaa yatufunguila Yehowa eshimba dietu, atuifubuila pepi naye. Biabia, nkinyi ki kuitukuasha bua kuela nteko ayikatukila muishimba?

⁷ Nangushena pa nyikashi ya Yehowa.a Nsaa yatunangushena pa nyikashi yaye, atunyisha kuipusha bulungantu bua kumufunguila eshimba dietu. (Mis. 145:8, 9, 18) Tala kileshesho kia Kristine, sha nshaye baadi na kikiso. Amba’shi: “Bibaadi bukopo bua kuteka Yehowa bu Nshami sha kifulo. Nadi dingi napuandikisha’shi ansumbushena pa muanda wa kukutua kuande kua kupuidika.” Eyikashi kinyi dia Yehowa dibaadi dimukuashe? Amba’shi: “Kifulo kia lulamato kia Yehowa kibaadi kinshinkamiishe’shi munfule. Nauku’shi ekala nsaa yoso ku lupese luande. Sunga nakita miluisho, atungunuka nka na kunfula na kunkuasha. Panangushena pabitale kifulo kia Yehowa, nepusha bulungantu bua kumulungula mianda ayinsankisha na ayinyinyongosha.”

8-9. Buakinyi bi buwa kunangushena kumpala mianda ya kuakula mu luteko? Tuusha kileshesho.

⁸ Nangushena mianda ya kuteka. Kumpala kua kuteka, eyipushe ino nkonko: ‘Lukalakashi kinyi luandi nalo binobino? Abitungu’shi nfuile muntu kampanda lusa su? Kui kintu kampanda kishintulukie mu nshalelo ande, na ne na lukalo lua bukuashi bua Yehowa? (2 Bf. 19:15-19) Dingi, tentekiesha mushindo ubaadi witulongieshe Yesu’shi tutekie na, kunangushena kia kuteka Yehowa pabitale eshina diaye, Bufumu buaye na kikiebe ki’eshimba diaye.​—Mat. 6:9, 10.

⁹ Nsaa ibabalunguile mukuetu mukashi abetamina bu Aliska’shi mulume aaye bashala na mafuku apela kumpala kua’shi afue pa muanda wa mukumbo wi bukopo, bibaadi abimuelela bukopo bua kuteka. Atentekiesha’shi: “Nadi mukalakashue ngofu mu mushindo wanshi nadi nauku kia kuakula mu luteko.” Nkinyi kibaadi kimukuashe? Amba’shi: “Kumpala kua kuteka, nadi nata kapindi bua kubunga bishima bia kuakula, na bino bibaadi abinkuasha bua kupela kuteka nka penda pabitale mukumbo wa mulume ande na mianda intale ami nabene. Pa muanda wa bino, nadi napusha butaale na nadi na mianda i bungi ya kuteka.”

10. Buakinyi abitungu tuele nteko ila? (Tala dingi bifuatulo.)

¹⁰ Ela nteko ila. Sunga biekala’shi nteko iipi ilombene kuikala buwa, tui kuakula bioso biatuipusha nka su tuela nteko ila.b Elijah mulume a Aliska amba’shi: “Nateka misuusa i bungi kuifuku, anka n’epushaa pepi ngofu na Yehowa nsaa yangiele nteko ila. Yehowa t’atengiela’shi mpudishe luteko bukidi bukidi, nyi buakinyi nelaa nteko ila.” Tompa kukita bino: Kimba nsaa na mbalo itaale ishi lukalakashi bua kuela nteko ila, we kuteka mpa na eyi di bukopo.

NANGUSHENA KU NTEKO I MU BIBLE

11. Bukuashi kinyi bodia kupeta pa kunangushena ku nteko i mu Bible? (Tala dingi kashibo akamba’shi “Wepusha bubo su?”)

¹¹ We kupeta bukuashi pa kunangushena ku nteko ya bafubi ba Yehowa ba kala na ku ngono ya kishila i mu Bible. Pomono mushindo ubaadi bafubi ba Yehowa abamufunguila mashimba aabo, bi nkutakula nobe namu bua kuibikita. We kupeta bishima bipia bia lutumbu bia kuela mu nteko yobe. Na we kupeta nteko ipushene na mianda yodi nayo.

12. Nkonko kinyi ayitungu’shi tuiyipushe nsaa yatunangushena pabitale nteko i mu Bible?

¹² Nsaa yobadika nteko i mu Bible, eyipushe’shi: ‘Nnanyi eele luno luteko, nshalelo aaye baadi naminyi, na buakinyi eluele mu uno mushindo? Nekuambula bino bishima bi mu luno luteko su? Abindongiesha kinyi?’ Bi nkuteka kapindi bua kukimbuula bua kupeta ngaluulo ku ino nkonko, anka kuibikita kui na muulo. Tutaleyi bileshesho bia nteko inanka.

13. Ndilongiesha kinyi diatulongiela ku luteko lua Ana? (1 Samuele 1:10, 11) (Tala dingi ki ku kipusu.)

¹³ Badika 1 Samuele 1:10, 11. Nsaa ibaadi Ana muele luno luteko, baadi na mianda ibidi ikata. Baadi nkunga, na mukuanaye baadi mumuikeeshe nshalelo bukopo. (1 Sa. 1:4-7) Su nobe namu we na muanda aukukalakasha kadi usha’upu, we kulongiela kinyi ku luteko lua Ana? Belele luteko lula na alungula Yehowa bioso bi’epusha, na kunyima kua paapa aye nkuipusha kalolo. (1 Sa. 1:12, 18) Natue namu tui kuipusha biya su “tuasumbuila Yehowa bushito [buetu]” pa kumulungula biatuipusha pabitale muanda kampanda awitukalakasha.​—Mis. 55:22.

14. (a) Nkinyi kingi kiatulongiela ku kileshesho kia Ana? (b) Kubadika na kunangushena Bible kui kuitukuasha naminyi bua kuuka mianda ya kuteka? (Tala mayi e kuushi ku’esaki.)

¹⁴ Bipua bipela kunyima kua Ana kutanda Samuele, bayile naye kui tshite muakuidi mukata Eli. (1 Sa. 1:24-28) Mu luteko luaye, baadi mutumbule Yehowa muanda baadi mumumone kua pasukila na kukaluila bafubi baye ba sha lulamato.c (1 Sa. 2:1, 8, 9) Baadi nka na mianda mu nshalelo aaye, anka pamutue pa kunangushena nka ku yaya mianda, baadi mutuule binangu biaye ku miabi ibaadi imuelele Yehowa. Abitulongiesha kinyi? Tui kunyingiila nkalakashi su tuatula binangu ku mushindo ukuete kuitukuasha Yehowa mpa na binobino.

15. Nsaa yatumono mianda ya kukutua kululama, tui kulongiela kinyi ku luteko lua Yelemiya? (Yeelemiya 12:1)

¹⁵ Badika Yeelemiya 12:1. Pabamuene Yelemiya’shi mianda ya bantu babi ayende kumpala, baadi mukalakashue. Baadi dingi mukalakashue mu mushindo ubabadi abamukitshina mianda kui bena Isalele naye. (Yel. 20:7, 8) Natue namu tui kupusha nka bu’ye muanda bakuete abetusengie na tukuete kumona bantu babi bu bashi na mianda mu nshalelo aabo. Yelemiya balunguile Yehowa’shi mutapikie kuishimba pa kumona yaya mianda, anka tabaadi muambe’shi Yehowa mukutue kululama. Baadi mushinkamishe’shi Yehowa akitshi mianda na kululama, muanda baadi mumone bibaadi munyookie muilo waye untomboshi. (Yel. 32:19) Natue namu tui kulungula Yehowa mu luteko’shi tuibatapikie kuishimba nsaa yatumono bantu abakitshi mianda i bubi. Anka atulesha lukulupilo luetu mui Yehowa’shi pa nsaa ilombane akalumbuula mianda ya kukutua kululama.

16. Tui kulongiela kinyi ku luteko lua muina Levi? (Misambo 42:1-4) (Tala dingi bifuatulo.)

¹⁶ Badika Misambo 42:1-4. Uno musambo abaadi beufunde kui muina Levi shi baadi bia kulanguila ku ntempelo pamune na bena Isalele naye. Musambo waye aulesha bibaadi epusha. Tui kuipusha bu’ye su tuakutua mushindo wa kutuuka mu nshibo pa muanda wa maladi, sunga’shi tuekala mu lukano pa muanda wa lukumiino luetu. Ingi nsaa tuikupusha biya, ingi nsaa namu tuakutua kuipusha biya. Sunga biekala naminyi, abitungu tuibilungule Yehowa. Bino bi kuitukuasha bua kuipusha bi buwa na kumona muanda wetu mu ungi mushindo. Bu kileshesho, muina Levi baadi mumone’shi e na mishindo ipia ya kutumbisha Yehowa. (Mis. 42:5) Baadi dingi anangushena ku mushindo ubaadi Yehowa amupasukila. (Mis. 42:8) Kufunguila Efile Mukulu eshimba dietu akuitukuasha bua kuipusha kalolo na kupetuula bukome bua kunyingiila.

17. (a) Nkinyi kiatulongiela ku luteko lua mutemuki Yona? (Yona 2:1, 2) (b) Bingi bishima bia mu Misambo bi kuitukuasha naminyi nsaa yatudi mu nkalakashi? (Tala mayi e kuushi ku’esaki.)

¹⁷ Badika Yona 2:1, 2. Mutemuki Yona belele luteko pabaadi munda mua mushipa ukata. Sunga bibaadi mukutue kukookiela Yehowa, Yona baadi mushinkamishe’shi Efile Mukulu ateemesha eyi diaye. Mu luteko luaye, Yona baadi mufubishe bishima bi bungi bi mu Misambo.d Abimueka patooka’shi baadi auku kalolo bino bifundue. Biabia, pabaadi muibitentekieshe, baadi mushinkamishe’shi Yehowa amukuasha. Mu mushindo umune, su tualamiina angi ma verse, tui kuiatentekiesha na ekuitunyingisha nsaa y’atutekie Yehowa mu nkalakashi.

TUNGUNUKA NA KUIFUBUILA PEPI NA YEHOWA MU LUTEKO

18-19. Su tuakutua kuuka kia kuakula mu nteko yetu, kishinkamisho kinyi ki mu Bena Loma 8:26, 27? Tuusha kileshesho.

¹⁸ Badika Bena Loma 8:26, 27. Ingi nsaa tui kuinyongola ngofu mu mushindo watush’atuuku sunga kia kuakula mu nteko yetu. Anka ta tui bakutue bukuashi. Mu nsaa i bino, kikudi kiselele ki’Efile Mukulu ‘akituakuila.’ Mu mushindo kinyi? Ku bukuashi bua kikudi kiaye, Yehowa baadi mutakule bafundi ba Bible buabadia kufunda nteko i bungi Muiyi diaye. Su tuakutua kia kuakula mu nteko yetu, Yehowa ekukumiina bingi bishima bi mu ino nteko bu bietu, na etualuula.

¹⁹ Bino binangu bibaadi bikuashe mukuetu mukashi a mu Russie abetamina bu Yelena. Abaadi bamukuate mu lukano pa muanda wa kuteka na kubadika Bible. Yelena baadi mukalakashue ngofu mu mushindo washi baadi auku kia kuakula mu luteko. Amba’shi: “Natentekiesha’shi nsaa yandi mukalakashue ngofu na ntanguku kia kuakula mu luteko, Yehowa akumiina nteko iyokielue ya bafubi baye ba kala . . . nka bu’shi nami batekie. . . . Bino bibaadi binyingishe ngofu mu kipungo ki bukopo bukile.”

20. Tui kukita kinyi bua kuilumbuula kumpala kua kuteka nsaa yatudi mu nkalakashi?

²⁰ Nsaa yatudi benyongole, tui kubanga kuela luteko, akupu tuabanga kunangushena ku bingi bintu. Bua kulumbuula binangu bietu, tui kubadika n’eyi di bukopo mukanda wa Misambo. Tui balombene dingi kufunda biabia biatuipusha, bu bibakitshine Nfumu Davide. (Mis. 18, 34, 142; mayi a mbangilo.) Eyendo, ta kui miiya pabitale bia kuilumbuula bua kuteka. (Mis. 141:2) Kita biabia biomono bu bi buwa.

21. Buakinyi tui kuteka Yehowa n’eshimba dioso?

²¹ Abitunyingisha pa kuuka’shi Yehowa auku biatuipusha mpa na kumpala kua’shi tuakule muanda oso wawa. (Mis. 139:4) Anka, akumiina kuteemesha kuatumulungula biatuipusha na kulesha mushindo watudi bamukulupile. Biabia, totadilanga kintu su nkimune kikukutshishue kuteka Nshobe e muiyilu. Fubisha bishima bia nteko i Muiyi diaye. Mutekie n’eshimba diobe dioso. Mulungule mianda ayikusankisha na ayikuinyongosha. Bu bi Yehowa kuuku oobe a binyibinyi, e kala nka kuanka bua nkukuasha!