Tentekiesha bua kuteka bua bangi

1. Atuuku naminyi’shi nteko yetu i na muulo kui Yehowa?

LUTEKO nyi mpango i buwa bukile. Banda kunangushena; Yehowa mupe ba mikeyilu ingi midimo. (Mis. 91:11) Dingi, mupe Muana aaye mashito e na muulo ngofu. (Mat. 28:18) Biabia, nnanyi adi mupe bushito bua kuteemesha nteko? Naye nabene. Yehowa aye nabene nyi “apushaa nteko.”​—Mis. 65:2.

2. Nkileshesho kinyi kitulekiele Mpoolo pabitale kuteka bua bangi?

² Eyendo’shi tui kuteka Yehowa mu bulungantu boso pabitale mianda yetu, anka abitungu tutekie bua bangi. Nyi bibaadi abikitshi Mpoolo mutumibua. Bu kileshesho, baadi mufundile kakongie ka mu Efeso’shi: “Nkuete kutungunuka na kuinutemuna mu nteko yande.” (Ef. 1:16) Mpoolo baadi dingi atekiela bantu pa bupenka. Bu kileshesho, balunguile Timote’shi : “Ne na lutumbu lukata kui Efile Mukulu, . . . ntakooko kukutentekiesha mu nteko yande bufuku na kanya.” (2 Ti. 1:3) Mpoolo baadia kuteka bua yaye mianda ibaadi nayo. (2 Ko. 11:23; 12:7, 8) Anka baadi aata nsaa yakuteka bua bangi.

3. Buakinyi tui kuilua kuteka bua bangi?

³ Ingi nsaa tui kuluba kuteka bua bangi. Buakinyi? Mukuetu mukashi abetamina bu Sabrinaa atuusha kabingilo kamune. Amba’shi: “Mu uno ndumbuluilo, tui na mianda i bungi ya kukita. Tui kutuma binangu nka mu kuteka bua mianda na nkalo yetu’tue banabene.” Bino tabidi bikukitshikile su? Su nabio, uno muisambo aukukuasha. Aupatuula (1) buakinyi bi na muulo kuteka bua bangi na (2) mushindo wa kuibikita.

BUAKINYI ABITUNGU KUTEKA BUA BANGI?

4-5. Kuteka bua bangi nkulombene kuikala ‘na bukome na nkulombene binyibinyi kuibakuasha’ naminyi ? (Yakobo 5:16)

⁴ Kuteka bua bangi “kui na bukome na nkulombene binyibinyi kukuasha muntu.” (Badika Yakobo 5:16.) Kuteka bua bangi kui kushintula nshalelo aabo su? Oolo. Bu bibaadi Yesu auku’shi Mpiele mutumibua amutunu mu kapindi kapela, bamulunguile’shi: “Ne mutekie Efile Mukulu na kuiyaya pa muanda oobe, bua’shi lukumiino lobe talubofulanga.” (Luk. 22:32) Mpoolo baadi auku’shi luteko lui kushintula nshalelo a muntu. Nsaa ibaadi mu lukano mu Loma kua’shi musoole muanda, baadi mufundile Filemone’shi: “Nakulupila’shi ku bukuashi bua nteko yenu abakangalusha kuanudi.” (Filemone 22) Nyi bibaadi bikitshikie. Abaadi bafungule Mpoolo na apeta dingi mushindo wa kulungula mukandu wi buwa.

⁵ Eyendo, bino tabikiebe kupushisha’shi p’atutekie atukitshisha Yehowa pabukopo. Amonaa nkalo ayilesha bafubi baye, na ingi nsaa ataa kitshibilo kia kuibaluula. Kuuka bino akuitukuasha bua kuteka Yehowa n’eshimba dietu dioso pabitale muanda wetu, akupu tuiutule mu masa aaye na lukulupilo loso.​—Mis. 37:5; tala 2 Bena Kodinda 1:11.

6. Kuteka bua bangi akuitukuasha bua kuibamona naminyi? (1 Mpiele 3:8)

⁶ Kuteka bua bangi akuitukuasha bua kuikala na “lusa lukata.” (Badika 1 Mpiele 3:8.) Muntu sha lusa amonaa makienga a ungi muntu, na ekalaa na lukalo lua kukita kintu kampanda bua kumukuasha. (Mak. 1:40, 41) Ungi mukulu abetamina bu Michael amba’shi: “Nsaa yantekie bua nkalo ya bangi, nanyisha kumona nkalakashi yabadi nayo na bino abintakula bua kunyisha kuibafula. Nanyisha kuifubuila pepi nabo, sunga bakutua kuibiuka.” Ungi mukulu abetamina bu Richard alesha ungi muabi. Amba’shi: “Nsaa yatutekie bua ungi muntu, abitutakula bua kumukuasha.” Akumbasha dingi’shi: “Nsaa yatukuasha muntu atutekielanga, abikuasha bua kupeta lualuulo ku luteko lua tumutekielanga.”

7. Kuteka bua bangi akuitukuasha naminyi bua kuikala na mueneno e buwa pabitale mianda yetu? (Bena Fidipe 2:3, 4) (Tala dingi bifuatulo.)

⁷ Kuteka bua bangi akuitukuasha bua kuikala na mueneno e buwa pabitale mianda yetu. (Badika Bena Fidipe 2:3, 4.) Bu biatudi mu ndumbuluilo abakunkusha kui Satana, oso a kuatudi e nka na mianda. (1 Yo. 5:19; Kbf. 12:12) Su tuekala na kiubishi kia kuteka bua bangi, abitutentekiesha’shi “[Bakuetu] boso be mu nsenga ishima, bakuete kufumankana na ano makienga e mumune.” (1 Mp. 5:9) Ungi mbala-mashinda abetamina bu Katherine amba’shi: “Kuteka bua bangi akuntentekiesha’shi nabo namu abafumankanaa na nkalakashi. Kuuka bino akunkuasha bua kupela kuikalakasha ngofu pabitale mianda yande.”

BE NA LUKALO LUA NTEKO YETU

8. Mba nnanyi batudia kutemuna mu nteko yetu?

⁸ Mba nnanyi batudia kutemuna mu nteko yetu? Tui kuteka bua baaba be na maladi, ba nsongua babasengie sunga babatakula mu kukita mianda i bubi ku kalasa, sunga bantu banunu. Tui kuteka bua bena Nkidishitu netu babakuete kubingabinga kui be na kifuko nabo sunga kui mbulamatadi. (Mat. 10:18, 36; Bik. 12:5) Tui kuteka dingi bua bakuetu basuukie baleka bintu biabo pa muanda wa ngoshi. Na baaba abakiengie pa muanda wa masaku aatukila ku bipangua. Tui kukutua kuuka mashina a bano bakuetu balume na bakashi. Anka patutekie buabo, atulesha’shi atulondo muiya wa Yesu wa ‘kuifulena.’​—Yo. 13:34.

9. Buakinyi abitungu tutekie bua bakuetu abakunkusha ndumbuluilo a Yehowa na bakashi babo?

⁹ Tui kuteka dingi bua bakuetu abakunkusha ndumbuluilo a Yehowa. Bu bena Kasaka ka Bakunkushi-Bakulu na bakuashi baabo, bena Komite a Filiale, bakunkushi ba midimo mu ma filiale, bakunkushi ba bifunda, bakulu ba tukongie na bafubi ba midimo. Be bungi ba ku bano bakuetu balume be na yabo nkalakashi, anka mbepaane bua kuitukuasha. (2 Ko. 12:15) Bu kileshesho, ungi mukunkushi a kifunda abetamina bu Mark amba’shi: “Lukalakashi lukata luandi nalo nyi kuikala kula na baledi bande batabadi banunu. Boso be na maladi. Sunga biabidi’shi bakuete kuibapasukila kui taata ande na mulume aaye, abinkalakashaa bua kumona’shi ntshi biakukita bi bungi bua kuibakuasha.” Biatuuka nkalakashi i nayo bano bakuetu sunga kukutua kuiyiuka, bi buwa tutekie buabo. (1 Te. 5:12, 13) Tui kuteka dingi bua bakashi ba bano bakuetu balume, muanda bakuete kukuasha balume babo bua’shi batungunukie na midimo yabo.

10-11. Nteko y’atuelelaa bakuetu balume na bakashi mu kibungi ayisankishaa Yehowa su? Patuula.

¹⁰ Nka bu bibatupu kuibimona, ke bungi atutekaa bua kisaka kia bakuetu balume na bakashi. Bu kileshesho, sunga tatuuku muntu su ngumune, tui kuteka Yehowa bua’shi akuashe boso be mu nkano na kusamba baaba bafuishe. Ungi mukulu abetamina bu Donald amba’shi, “Kui bakuetu balume na bakashi be bungi be na nkalakashi, mu mushindo w’atuibatekielaa nka mu kibungi, kuamba’shi kutekiela boso be mu nkalakashi.”

¹¹ Ino nteko ayisankishaa Yehowa su? Oolo. Muanda t’atuuku nkalo yoso ya muina Nkidishitu netu. Biabia, ta bi bubi kuteka bua bakuetu balume na bakashi mu kibungi. (Yo. 17:20; Ef. 6:18) Nteko i bino ayilesha’shi ‘tuibafule bakuetu boso.’​—1 Mp. 2:17.

NSAA YA KUTEKIELA MUNTU PA BUPENKA

12. Kuikala na kabekieleshi kui kuitukuasha naminyi bua kutemuna eshina dia mukuetu mu nteko yetu?

¹² Ikala na kabekieleshi. Kukatusha kuteka bua bakuetu balume na bakashi mu kibungi, bi buwa tutemune eshina dia mukuetu mu nteko yetu. Mu kakongie kenu mui muntu e na mukumbo wi bukopo ush’aupu? Mui nsongua mubofule pa muanda abamutakula bua kukita mianda i bubi kui bena kalasa naye? Mui muledi akitshi muaye moso bua kukusha bana baye bupenka “muyile malango na buludiki bua Yehowa”? (Ef. 6:4) Pa kuikala na kabekieleshi, onyisha kufula bena Nkidishitu nobe na kuituula pa mbalo yabo, bino abikutakula bua kutemuna bakuenu mu nteko yobe.b​—Lom. 12:15.

13. Tui kukita kinyi bua kutemuna mashina a bakuetu sunga batush’amuene mu nteko?

¹³ Temuna mashina a bangi mu nteko yobe. Tui kukita bino mpa na bua bantu batush’amuene. Tala kileshesho kia bakuetu balume na bakashi babadi bakuate mu lukano mu Crimée, Erythrée, Russie na mu Singapour. Mu jw.org we kupeta mashina a baaba boso be mu lukano.c Ungi mukunkushi a kifunda abetamina bu Brian amba’shi: “Nemumone’shi kufunda eshinda dia muina Nkidishitu e mu lukano akupu nkuidibadika n’eyi di bukopo, akunkuashaa bua kutentekiesha baaba boso be mu lukano na kuteka buabo.”

14-15. Mbikunyi biatudia kuteka bua mianda kampanda?

¹⁴ Teka bua mianda kampanda. Michael, atatupuile kutemuna amba’shi: “Nsaa yambadika miisambo i mu jw.org pabitale bakuetu be mu lukano, natompo kupuandikisha binadia kuipusha su nadia kuikala mu lukano. Nadia kuikalakasha bua mukashi aande, na kukita bia’shi ekale na bioso biadi nabio lukalo. Kukita bino akunkuasha bua kuuka kintu kampanda kia kuteka bua bakuetu bebakile be mu lukano.”​—Eb. 13:3.

¹⁵ Nsaa yatupuandikisha bilombene kuikala nshalelo a bakuetu be mu lukano, tui kupeta mianda kampanda ya kuteka buabo. Bu kileshesho, tui kuteka bua’shi balami ba lukano bekale nabo kalolo, na’shi bakata ba mbulamatadi batadile bakuetu balanguile mu bulungantu. (1 Ti. 2:1, 2) Tui kuteka bua’shi kakongie ke yaya mbalo kanyingishibue na kileshesho kia lulamato kia mukuetu e mu lukano, sunga’shi baaba bashi bena kulanguila netu bamone muikeelo wi buwa wa mukuetu, na bakumiine mukandu wi buwa. (1 Mp. 2:12) Tui kukita dingi nka bino bua bakuetu balume na bakashi be mu nkalakashi. Pa kuikala na kabekieleshi, pa kutemuna mashina a bakuetu mu nteko yetu, na pa kuteka bua mianda kampanda, atulesha’shi ‘tubafuimisha kifulo kiatudi nakio ku muntu na muntu.’​—1 Te. 3:12.

TUIKALE NA NKATSHINKATSHI PABITALE NTEKO YETU

16. Mbikunyi biatudia kuikala na nkatshinkatshi pabitale nteko yetu? (Mateo 6:8)

¹⁶ Nka bu bibatupu kuibimona, nteko i kushintula nshalelo a muntu. Anka abitungu tuikale na nkatshinkatshi. Nsaa yatutekie, tatukitanga bu’shi atulungula Yehowa muanda wash’auku, sunga kumulungula mushindo wi buwa wadia kupua muanda kampanda. Yehowa auku bioso bi nabio bafubi baye lukalo kumpala kua’shi bamulungule sunga’shi tumulungule bianka. (Badika Mateo 6:8.) Biabia, buakinyi abitungu tutekie bua bangi? Kukatusha bitatupuile kuisambila mu uno muisambo, kuteka bua bangi akulesha’shi atuibapasukila. Kifulo akitutakula bua kuteka bua bangi. Yehowa e na muloo p’amono bafubi baye abambula kifulo kiaye.

17-18. Kileshesho kinyi ki kuitukuasha bua kuteka bua bangi?

¹⁷ Sunga tuamona’shi nteko yetu tayikite kintu, ayilesha’shi tuibafule bakuetu balume na bakashi, na Yehowa bebimono. Kino kileshesho ki kuitukuasha bua kuibipusha kalolo: Puandikisha kifuko ki na bana babidi, ka nsongualume na ka nsonguakashi. Ka nsongualume ke na maladi. Ka nsonguakashi akesendeela nshako’shi: “Papa kita namu kintu kampanda bua mukuetu mulume. E na maladi biabia.” Nshaye mmupue kuata mpango; mmufule muana aaye mulume na kuete kumupasukila. Anka nshe-bana e na muloo wa kumona’shi muana aaye mukashi apasukila mukuabo mulume mu mushindo ubamutekie’shi amupasukile.

¹⁸ Bino nyi abitunyingisha Yehowa’shi tukite, tupasukile bakuetu balume na bakashi na tutekie buabo. Patukitshi bino atulesha’shi t’atuipasukila nkatue banabene, kadi tuibafule bakuetu balume na bakashi n’eshimba dioso, na Yehowa kuete kuibimona. (2 Te. 1:3; Eb. 6:10) Dingi, nka bu bibatupu kuibimona, nteko yetu ikushintula nshalelo a muntu. Biabia tukiteyi muetu moso bua kuikala atutekie bua bangi.