Ikala okumiina bwa’shi Yehowa ekale Mbuufi oobe

1. Bwakinyi Yehowa mmwikale Mbuufi mukata?

MU MWESHI wa 11/2010, bantu ba mu Chine babaadi baudishe kalondo k’ema mu Angleterre ku muulo wa midiyo 70 ya nfwalanga ya beena Amerique. Abikemesha bantu ngofu pa kumona’shi mbuufi mmulombeene kubumba ema kintu kya muulo upeela kadi ekutuusha kalondo kebuwa ke na muulo wibukopo. Yehowa Mbuufi eetu mmukile ba mbuufi booso ba pa nsenga. Bible akula’shi Yehowa babumbile muntu mupwidikye na “lufuufi lubadi mwate ku nsenga,” nkwamba’shi, baadi mumukite na ema. (Kibangilo 2:7) Uno muntu, Adame baadi “mwan’Efile Mukulu” na baadi mupangibwe na ngobesha ya kwambula ngikashi y’Efile Mukulu.​—Luka 3:38.

2, 3. Twi kwambula beena Isaleele babaadi belangye ku mashimba naminyi?

² Pabaadi Adame mutombokyele Mupangi aaye, tabaadi dingi bu mwan’Efile Mukulu nya. Anka bekulu ba Adame bebungi mbakumine bukunkushi bwa Yehowa. (Beena-Ebelu 12:1) Na kwiyisha kooso abakookyela Mupangi aabo, na abalesha’shi mbamukumine’shi ekale Nshaabo na Mbuufi aabo pamutwe pa kukumiina Satana. (Yowano 8:44) Lulamato lwabo kwi Efile Mukulu alwitutentekyesha ano mayi abakwile beena Isaleele belangye ku mashimba: “Yehowa, nnoobe Nshetu; atwe twi ema, obe ngi mwitubumbe, na booso bwetu twi mufubo wa ku maasa oobe.”​—Yeeshaya 64:7.

³ Balangwidi ba Yehowa ba binyibinyi lelo uno bakwete kwikitshisha bwabadya kwikala beyishe na abakookyela. Be na kineemo kya kwitanyina Yehowa bu Nshetu, na abakumina bwa’shi ekale Mbuufi aabo. Atwe namu atukumina kwikala bu ema dibofule dilombeene kubumbibwa n’Efile Mukulu bu kintu kya muulo ukata su? Atumonaa bakwetu bu kintu kikwete kubumbibwa n’ Efile Mukulu su? Bwa kwitukwasha bwa’shi twikale na mweneno ebuwa, atukamono abisangulaa Yehowa bantu bakyebe kubumba, bwakinyi ebabumbaa, na kipaso kyakwete kwibabumba.

YEHOWA ASANGULAA BABA BOOSO BAKYEBE KUBUMBA

4. Yehowa asangulaa bantu bwa kwibakaka kwadi naminyi? Tuusha kileshesho.

⁴ Yehowa tamonaa bantu mu kipaso kyatwibamonaa’twe nya. Anka, aye atalaa eshimba dya muntu ooso akwatudi kalolo. (Badika 1 Samwele 16:7b.) Yehowa baadi muleeshe bino nsaa ibaadi mutuule kakongye ka beena Kidishitu. Mmwikakile na kukakila Mwan’aye bantu bebungi na bangi ba munkatshi mwabo babaadi bu bantu bashii na muulo. (Yowano 6:44) Bu kileshesho, Mpoolo baadi mufadisee n’eshina dya bu Soolo, muntu e na “kasaabu ka biin’Efile byooso, mulwishi, na sha-kifita.” (1 Timote 1:13) Anka Yehowa pabaadi mutalule eshimba dya Soolo tabaadi mmumone bu ema dishii bya kubumba nya. (Nkindji 17:3) Anka, Yehowa bamwene’shi e bya kubumba Soolo bu “kyaamo kya mufubo” na kumwikasha bu mulungudi “kumpala kwa bisamba bya bashii-bakumiine, kwa banfumu na kwa beena-Isaleele.” (Bikitshino 9:15) Dingi’nyi Yehowa mmusangule bangi abakumina’shi ebabumbe bu “kintu . . . kya muulo ukata.” Munkatshi mwabo mwi babaadi bankodi’a malwa, bankitshishi ba bubi, na ba ngifi. (Beena-Looma 9:21; 1 Beena-Kodinda 6:9-11) Kunyima kwa’bo kulonga Bible, babaadi banyingishe lukumiino lwabo mwi Yehowa na kumutadiila bwa’shi ebabumbe.

5, 6. Lukulupilo lwetu mwi Yehowa bu Mbuufi eetu ndulombeene kulumbuula mweneno eetu naminyi kwi (a) bantu be mu teritware eetu? (b) bakwetu?

⁵ Twi bakulupile mwi Yehowa mwanda e na bukome bwa kusangula na kukaka bantu bebuwa kwadi. Ngi bwakinyi tatukumanga kutshibila bantu be mu teritware sunga mu kakongye keetu kiimu. Tubande kwata kileshesho kya bibakitshine ungi muntu abetanyinaa bu Michael nsaa ibafikile Batemwe ba Yehowa mu kumutembela. Akula’shi: “Naadi mutadiile kungi ami nkwilwankana nka bu pashii bantu. Naadi nebapangila bukalanga ngofu! Kunyima, nafumankeene na kifuko kinaadi nasankila pamwanda wa mwikeelo wabo wibuwa. Dingi efuku naadi mwinyongole ngofu p’ami kuuka’shi Mbatemwe ba Yehowa! Mwikeelo wabo ubaadi untakule bwa kutaluula mweneno ande. Nakaukile kunyima’shi binangu byande bibaadi bilwile pa mwanda wa kukutwa kwa kuuka ingi myanda, na bwa myanda ya mpwandikishi, na ya madimi.” Michael bakuminyine kulonga myanda ibungi aye nkukumiina kulonga Bible. Kunyima kwa mafuku baadi mutambule na nkubanga kufuba mudimo wa nsaa yooso.

⁶ Su twakumina’shi Yehowa etubumbe, mweneno eetu kwi bakwetu akashintuluka. Atukamono ooso a kwabadi bu kintu kyabakwete kubumba. Bino nyi abibamonaa Yehowa. Kwete kumona bi mu mashimba aabo na auku’shi kukutwa kwabo kwa kupwidika nkwa kapindji kapeela. Auku dingi kipaso kilombeene kufika muntu ooso a kwabadi. (Misambo 130:3) Twi balombeene kwambula Yehowa su twekala na mweneno ebuwa kwi bakwetu. Twi balombeene mpa na kutumika pamune na Mbuufi eetu bwa kukwasha bakwetu bakashi na balume bwa’shi bende kumpala. (1 Beena-Tesalonika 5:14, 15) Abitungu bakulu mu kakongye beekale kileshesho kibuwa mu uno mwanda.—Beena-Efeso 4:8, 11-13.

BWAKINYI YEHOWA ETUBUMBAA?

7. Bwakinyi okuminaa dinyooka dya Yehowa?

⁷ Bamo mbalombeene kwamba’shi: ‘Kubanga ku bukinga mpa na ku bukulu bwande ntshi mumone muulo wa dinyooka dibaadi dimpe baledi bande nya.’ Patukwete kwenda na kukula, twi bya kumona muulo wa dinyooka mwanda atumono’shi dinyooka mmushindo wa kwituleesha kifulo. (Badika Beena-Ebelu 12:5, 6, 11.) Yehowa mmwitufule mwanda twi bana baaye, nyi bwakinyi etunyokaa na lwishinko looso, sunga kwitubumba. Akumiina’shi twikale na binangu na muloo na tumufule bu Nshetu. (Nkindji 23:15) Takumiina’shi tukyengye, na takumiina’shi tufwe kushii kwilanga ku milwisho yetu nya.​—Beena-Efeso 2:2, 3.

8, 9. Lelo uno Yehowa kwete kwitulongyesha naminyi, na buno bulambukishi abukatungunuka mu mafuku aafiki naminyi?

⁸ Kumpala kwatudya kuuka Yehowa, tubaadi na ngikashi ibungi ibubi. Anka Yehowa mmwitubumbe na kwitukwasha bwa’shi tushintulukye, nyi bwakinyi, binobino twi na ngikashi ibuwa. (Yeeshaya 11:6-8; Beena-Kolose 3:9, 10) Twi mu mpaladiiso a mu kikudi. Bino abileesha bantu bebuwa betwifunyishe na nshaleelo ebuwa kwete kwitukitshina Yehowa lelo uno abimukwasha bwa kwitubumba. Patudi mwanka, atwipusha mu bulungantu na kwiyikeela sunga twekala munkatshi mwa bantu babi. Bantu bakule kushii’bo kwibaleesha kifulo kwi beena kifuko nabo, binobino bakwete kupusha bi kifulo kya binyibinyi kwi bakwabo mu mpaladiiso a mu kikudi. (Yowano 13:35) Na dingi mbetulongyeshe byatudya kuleesha kifulo kwi bangi bantu. Byabya mwanda wi na muulo nguno, twi bafikye mu kuuka Yehowa na binobino tukwete kupusha bi kifulo kyaaye kya bu Nshetu.​—Shake 4:8.

⁹ Mu ndumbulwilo mupya, atukapete myabi ibungi ayituukila ku uno mpaladiiso a mu kikudi. Atukekala dingi na muloo mu mpaladiiso amweneka na meeso mu bukunkushi bwa Bufumu bw’Efile Mukulu. Mu aa mafuku, Yehowa akatungunuka na kwitubumba na kwitulongyesha mu mushindo wa kukaanya. (Yeeshaya 11:9) Yehowa akalumbula dingi binangu na mbidi yeetu twikale bapwidikye. Bino abiketukwasha bwatudya kupusha na kukookyela miiya yaye kalolo. Byabya tuyididiileyi na kutadiila Yehowa bwa’shi etubumbe, na kumuleesha’shi atukumiina uno mushindo waye wa kwituleesha kifulo.​—Nkindji 3:11, 12.

YEHOWA ETUBUMBAA MUSHINDO KINYI?

10. Yesu balesheshe bi lwishinko na ngobesha ya Mbuufi mukata naminyi?

¹⁰ Nka bu mbuufi sha bukalamwino aukaa bi ema dyakwete kubumba, Mbuufi eetu mukata Yehowa, etuuku kalolo. Mwanda auku bi kubofula kwetu, myanda yatudi balobele, na myanda yatudi bapwe kulumbuula. Na dingi kwete kubumba muntu ooso a kwatudi muyiile ino myanda ibatuteemuna. (Badika Misambo 103:10-14.) Twi balombeene kuuka abitumonaa Yehowa pa’twe kutaluula bibaadi abikitshi Yesu pabaadi batumiibwa baaye abakitshi bilubilo. Ingi nsaa, batumiibwa babaadi abekakeena pa mwanda wa kuuka muntu mukata munkatshi mwabo. Su boodi panka, bodya kumona uno mwikeelo wa batumiibwa naminyi? Pangi bodya kwibamona’shi ta be bu ema dibofule nya. Anka, Yesu baadi auku’shi be bya kubumbiibwa su bateemesha elango dibaadi ebapa na lwishinko na kalolo kooso na kwambula kwiyisha kwaye. (Maako 9:33-37; 10:37, 41-45; Luka 22:24-27) Kunyima kwa lusangukilo lwa Yesu, batumiibwa baaye abaapetele kikudi ky’Efile Mukulu na tambatuule dingi binangu byaabo pa mwanda wa kuuka mukile bakwabo nya. Pamutwe pa byabya, babaadi bepaane ku mudimo ubebapeele Yesu.​—Bikitshino 5:42.

11. Daavide baadi muleeshe’shi nyi ema dibofule naminyi? Twi balombeene kumwambula naminyi?

¹¹ Lelo uno, Yehowa kwete kufuba na Bible, kikudi kiselele, na kakongye bwa kwitubumba. Bible mmulombeene kwitubumba naminyi? Nka paatumubadika, kunangusheena pa myanda yatubadika, na kuteka Yehowa bwa’shi etukwashe bwatudya kutumikila myanda yatudi balongye. Nfumu Daavide bafundile’shi: “Pandji mulâle, nakutentekyeshâ obe Yehowa, bufuku boso abunkîla na kukunangushêna.” (Misambo 63:7, EEM) Bafundile dingi’shi: “Natumbula Yehowa ampeeyaa binangu biibuuwa; sunga mbufuku, eshimba dyande adibadiila kundimusha.” (Misambo 16:7) Eyendo, Daavide baadi anangusheena pa elango dya Yehowa na kwiditadiila bwa’shi dibumbe eshimba na binangu byaaye, mpa na nsaa ibaadi amono’shi elango dibukopo. (2 Samwele 12:1-13) Daavide mmwitulekyele kileshesho kibuwa kya kwiyisha na kukookyela. Byabya eyipushe’shi: ‘Nsaa yambadika Bible, nanangushenaa pa myanda yambadika na kutadiila elango dy’Efile Mukulu bwa’shi dikume eshimba na binangu byande su? Ne mulombeene kutungunuka na kukita bino su?’​—Misambo 1:2, 3.

12, 13. Yehowa etubumbaa naminyi ku bukwashi bwa kikudi kiselele na kakongye ka beena Kidishitu?

¹² Kikudi kiselele ki kwitubumba mu mishindo ibungi. Kileshesho, nkilombeene kwitukwasha bwa kulonga bya kwambula bumuntu bwa Yesu, na kuleesha bipindji bilekeene bya kikuba kya kikudi mu nshalelo eetu. (Beena-Ngalatea 5:22, 23) Kimune kya ku bipindji bya kikuba kya kikudi nkifulo. Twi bafule Efile Mukulu na atukumiina kumukookyela na kubumbiibwa naaye mwanda atuuku’shi miiya yaaye i kwanka bwa buwa bwetu. Na dingi, kikudi kiselele ki kwitupa bukome bwa kupela kubumbiibwa na uno ndumbulwilo ebubi. (Beena-Efeso 2:2) Pabaadi Mpoolo mutumiibwa ki nsongwalume, baadi alondo kwitatula kwa bakata ba bipwilo bya beena Yuuda. Kadi kikudi kiselele kibaadi kimukwashe bwa kushintuluka. Kunyima bafundile’shi: “Nee mulombeene kukita byooso munda mwa Uno anyingisha.” (Beena-Fidipe 4:13) Abitungu n’atwe namu twikale atutekye kikudi kiselele, mwanda atuuku’shi Yehowa aaluulaa nteko yatukitshi n’eshimba dimune.​—Misambo 10:17.

¹³ Yehowa afubishaa dingi kakongye na bakulu bwa kubumba ooso a kwatudi. Bu kileshesho, su bakulu babamono’shi twi na kubofula kampanda, abakitaa bukopo bwa kwitukwasha. Kadi tabatuushaa malango a mu binangu byabo nya. (Beena-Ngalatea 6:1) Anka, abatekaa Yehowa na kwiyisha kooso bwa’shi ebape mpushisho ebuwa na binangu. Kunyima, abakimbuula myanda ku bukwashi bwa Bible na mikanda yeetu bwa’shi bapete myanda ilombeene kwitukwasha. Nsaa ayifiki bakulu koodi bwa nkupa elango, pangi pabitale nfwadilo oobe, tentekyesha’shi dyadya elango dyaabo nkileshesho kya kifulo ky’Efile Mukulu koodi. Su bwedifubila, wekala bu ema dibofule dilombeene kubumbiibwa na Yehowa, na okapete miloo ibungi.

14. Sunga ekala na matalwa a kubumba ema, Yehowa anemekaa bulungantu bwetu bwa kwisangwila naminyi?

¹⁴ Su tubashinguula mushindo awitubumbaa Yehowa, bino abiketukwasha bwa kwikala mu kipwano kibuwa na bakwetu. Na dingi, atukekala na binangu bibuwa mu teritware eetu, mpa na kwi bantu batulongo nabo Bible. Mu mafuku a kala, kumpala kwa kubumba ema, bibaadi abitungu’shi mbuufi edisuule bwa kukatusha mabwe na bingi bisooswa. Yehowa, mwikale Mbuufi mukata akwashaa bantu abakumiina kubumbibwa naye. Tebashintuula pa bukopo nya, kadi, ebaleesha miiya yaaye iselele bwa’shi abo banabeene baate kitshibilo kya kushintuluka.

15, 16. Balongi ba Bible abaleshaa’shi abakumiina Yehowa ebabumbe naminyi? Tuusha kileshesho.

¹⁵ Tubande kutala uno mwanda ubaadi ufikile Tessie, ungi mukwetu mukashi a mu Australie. Bibaadi bimubofwile bwa kulonga Bible. Anka, tabaadi ende kumpala ngofu nya, na tabaadi ende sunga mu bisangilo nya. Mukwetu mukashi baadi alongo naaye bakitshine luteko kwi Yehowa aye nkwata na kitshibilo kya kwimika kulonga naaye. Akupu kubakitshikile mwanda wa kukaanya. Nsaa ibaabadi abalongo, Tessie balungwile mukwetu baadi alongo naaye mwanda ubaadi aumukutshishwa kwenda kumpala. Bamulungwile’shi baadi apele kukita bu nsesa mwanda baadi aasha kalata ka makuta. Binobino baatshile kitshibilo kya kwimika aa maasha ebubi.

¹⁶ Kubanga nka papa, Tessie babangile kwenda mu bisangilo na kuleesha ngikashi ya bwina Kidishitu sunga bibaadi bangi baloole baaye abamutunyisha. Kunyima kwa mafuku Tessie batambwile, aye nkwata mudimo wa bu mbala-mashinda a myeshi yooso, aku namu baadi na bana bakinga. Uno mwanda auleesha’shi nsaa ayibanga kushintuluka balongi ba Bible bwa kusangasha Yehowa, aye namu efubwilaa peepi nabo na kwibabumba bu kintu kya muulo.

17. (a) Nkinyi akikusangasha bu bikale Yehowa Mbuufi oobe? (b) Nkonko kinyi yatukaluula mu mwisambo aulondo

¹⁷ Lelo uno, bangi ba mbuufi bakwete kubumba ema ku maasa na kutuusha bintu bibuwa bukile. Mu mushindo umune, Yehowa kwete kwitubumba na lwishinko looso ku bukwashi bwa malango aaye, na etubekyeela bwa kumona byatukitshi nsaa yatupete dyadya elango. (Badika Misambo 32:8.) Omono’shi Yehowa etatshishaa boobe su? Okwete kumona abikubumbu Yehowa kalolo su? Su bwaluula’shi oolo, eyikashi kinyi adikakukwasha bwa kushaala nka bu ema dibofule dilombeene kubumbiibwa na Yehowa? Ngikashi kinyi ayitungu’shi osuukye bwa’shi tofikanga bu ema dibukopo dyabashii balombeene kubumba? Na dingi, ba nambutwile mbalombeene kutumika na Yehowa bwa kubumba bana baabo naminyi? Mwisambo aulondo aukaluula ino nkonko.