Omono’shi we na lukalo lwa kwenda kumpala mu kikudi su?

1, 2. (a) Mayi e mu mukanda wa Yeeshaya 60:22 ngalombane mu ano mafuku a ku nfudiilo naminyi? (b) Ndukalo kinyi lwi mu kipindji kya ndumbulwilo a Yehowa ki pa nsenga binobino?

“Kisaka kipeela akiikala kya bantu kinunu, bee kuush’a booso abeekala kisamba kii na binunu bya bantu.” (Yeeshaya 60:22) Ano mayi akwete kulombana mu ano mafuku a ku nfudilo. Byabya, mu kipwa kya 2015, bafubi ba Yehowa 8220105 bekeele balungule mukandu wibuwa wa Bufumu mu nsenga ishima! Efile Mukulu bakwile bino pabitale kufiima kwa mwilo waye: “Ami Yehowa nakumbasha uno mwanda bukidi apakumbana nguba aawo.” Byabya kunyima kwa mafuku, booso bwetu atukekala na myanda ibungi ya kukita. Tukwete kukita mwetu mooso bwa kulongyesha na kulungula mukandu wibuwa kalolo kubanga binobino su? Bakwetu bebungi mbapwe kubanga kufuba bu ba mbala-mashinda ba kipindji na ba myeshi yooso. Bangi mbende mu kukwasha mu angi ma mbalo bwa kulungula mukandu wibuwa, na bangi namu bakwete kufuba ngofu mu mudimo wa kwibaka Mashibo a Bufumu.

² Ku kipwa kyooso, kukwete kutuuka tukongye tupya tufikye ku 2000. Tuno tukongye twi na lukalo lwa bakulu na bafubi ba midimo. Ku kipwa kyooso, bafubi ba midimo binunu na binunu be na lukalo lwa kufika bu bakulu na binunu bya bangi bakwetu balume bi na lukalo lwa kufika bu bafubi ba midimo. Abimweneka patooka’shi, kwi bibungi bya kukita “mu mufubo wa mwanana.” Ta nka penda bwa bakwetu balume nya, kadi na bwa bakwetu bakashi.​—1 Beena-Kodinda 15:58.

ABITUNGU KUKITA KINYI BWA KWENDA KUMPALA MU KIKUDI?

3, 4. Kwenda kumpala mu kikudi akupushisha kinyi?

³ Badika 1 Timote 3:1. Mpoolo mutumiibwa baadi mukaanyishe bakwetu balume babaadi “abakimbi kwikala” bakulu mu kakongye. Su muntu e na lukalo lwa kupeta kintu ki kula, abitungu’shi akite bukopo na koolola mboko bwa’shi ekipete. Binobino banda kunangusheena bilombeene kukita mukwetu mulume akimbi bya kulombasha myanda itekibwe bwa kwikala mufubi a midimo. Ashinguula’shi e na lukalo lwa kwikitshisha bwa kulumbuula ngikashi ya bwina Kidishitu. Kunyima, pakabanga kufuba bu mufubi a midimo, atungunuka na kwikitshisha ngofu bwa’shi alombashe myanda itekibwe bwa kufika mukulu.

⁴ Bangi bakwetu bakwete kushintuula nshalelo aabo bwabadya kukita bibungi mu mudimo wa Yehowa. Bu kileshesho, be kwata mudimo wa bu mbala-mashinda, kufuba ku Betele, sunga kukwasha ku mudimo wa lwibako lwa Mashibo a Bufumu. Tubandeyi kutala bilombeene kwitukwasha Bible bwa kutungunuka na kwenda kumpala.

NYIISHA KWENDA KUMPALA MU KIKUDI

5. Ba nsongwa be kufuba na bukome bwabo mu mudimo wa Bufumu naminyi?

⁵ Ba nsongwa mbalombeene kukita myanda ibungi mu mudimo wa Yehowa mwanda be na bukome bwibungi. (Badika Nkindji 20:29.) Bangi ba nsongwalume be ku ma Betele abafubaa ku byamo abitusha mikanda, kusemuna mikanda mpa na ma Bible. Ba nsongwalume na ba nsongwakashi bebungi bakwete kwibaka Mashibo a Bufumu sunga kwialumbuula. Bangi abetukilaa abo banabeene bwa kukwasha nsaa iyituuku masaku ebukopo. Na bamo ba nsongwa bapwe kwikala ba mbala-mashinda abalongo ingi ndimi sunga kwenda mu angi ma mbalo mu kulungula mukandu wibuwa.

6-8. (a) Ungi nsongwalume bashintulwile mweneno aaye bwa mudimo w’Efile Mukulu naminyi, na kipeta kinyi kyadi mupete? (b) Twi ‘kutompa Yehowa na kwimwena byadi buwa’ naminyi?

⁶ Twi bafule Yehowa na atukumina kumupa bintu byetu bya muulo. Sunga mbyabya, twi kupusha nka bu bibapushishe ungi mukwetu abetanyinaa bu Aaron. Baadi akyebe kufubila Efile Mukulu, anka tabaadi na muloo nya. Sunga bibaadi Aaron atwele mu bisangilo na kwenda mu bulungudi kubanga ku bukinga bwaye, bambile’shi: “Kutwela mu bisangilo na kwenda mu bulungudi kubaadi akunkookyesha.” Byabya, bakitshine kinyi?

⁷ Aaron baadi mukite bukopo bwaye booso bwa kwibadikila Bible efuku dyooso, kulumbuula, na kwaluula mu bisangilo. Babangile dingi kuteka misango ibungi kukila kumpala. Ino myanda ibamukwashishe bwa kwenda kumpala mu kikudi. Bafikile mu kuuka Yehowa kalolo na kunyiisha kumufula. Pa mwanda wa byabya, Aaron bapetele muloo. Baatshile mudimo wa bu mbala-mashinda, enda mu kukwasha pabatukile masaku ebukopo, akupu bayiile mu kulungula mukandu wibuwa mu dingi eumbo. Binobino taadi mukulu mu kakongye na kwete kufuba ku Betele. Lelo uno kwete kupusha naminyi bwa nshalelo aaye? Aaron amba’shi: “Ne ‘mutompe Yehowa namona byadi buwa.’ Ku bukwashi bwa myabi yaaye, napusha’shi ne mwipaane mwadi n’eshimba dimune na bino abintakula bwa kukita bibungi mu mudimo waye, na kumpetesha ingi myabi.”

⁸ Mufundi a Misambo bambile’shi: “Tompayi Yehowa nwimwene byadi buwa.” Bakwile dingi’shi: “Baba abakitshi byabya, tabakutwa kintu kyoso kyabadi nakyo lukalo.” (Badika Misambo 34:9-10, EEM.) Eyendo, nsaa yatupa Yehowa bintu byetu bya muulo, atwikala na muloo wa binyibinyi mwanda atuuku’shi atumusangasha. Na akalombasha mulayilo waye wa kwitupwila nkalo yeetu.

TOKOOKANGA

9, 10. Bwakinyi bibuwa kwikala na lwishinko?

⁹ Twi kwikala na lukalo lwa kukita bibungi mu mudimo wa Yehowa. Kadi twi kukita naminyi su tubakitshi mafuku ebungi na kukimba bya kupeta mashito mu kakongye sunga bwa kushintuula nshalelo eetu? Abitungu twikale na lwishinko. (Mika 7:7) Sunga Yehowa atadiila’shi tushale nka byabya, abitungu tushale baukye’shi aketukwasha. Twi balombeene kulonga myanda ibungi mu kileshesho kya Abrahame. Yehowa bamulayile’shi akapete mwana, byabya aye nkutengyela munda mwa bipwa bibungi kumpala kwa kutanda Isake. Kubanga kyakya kipungo, Abrahame baadi nka na lwishinko na ta mushimishe lukumino lwaye mwi Yehowa nya.​—Kibangilo 15:3, 4; 21:5; Beena-Ebelu 6:12-15.

¹⁰ Byabya, kwindila ta nkubofule nya. (Nkindji 13:12) Kadi su tubatungunuka na kunangusheena pa mwanda wetu na kumona bu’twe bashii bya kusangasha bantu, atukanyiisha kubofula. Pamutwe pa byabya, twi balombeene kufuba na ino nsaa bwa kulongamisha ngikashi yeetu bwatudya kumona bya kusemuna angi mashito mu kakongye.

11. Ngikashi kinyi ya mu kikudi yatudi balombeene kukimba, na bwakinyi i na muulo?

¹¹ Ikala na ngikashi ibuwa na kulumbuula myanda ayitungu. Su bwekala obadika Bible na kunangusheena ku myanda yobadika, okalongo bya kwikala na kinangu, bya kwikala onangusheena kalolo, na bya kwata bitshibilo bibuwa. Byabya, abitungu’shi bakwetu balume bekale na ino ngikashi na ngobesha bwabadya kusemuna mashito a mu kakongye. (Nkindji 1:1-4; Tite 1:7-9) Patwilongyela Bible, twi kuuka abipushaa Yehowa pabitale myanda kampanda. Kunyima, twikufubisha ino myanda ibatulongo efuku dyooso bwatudya kwata bitshibilo abisangasha Yehowa. Bu kileshesho, atukauku bya kukitshina bangi myanda, bya kufuba kalolo na makuta, na bya kusangula bipaso bya kukisha kapapi bibuwa na bya kufwala.

12. Beena kakongye be kuleesha’shi mbantu ba kukulupila naminyi?

¹² Fuba na katshintshi mudimo ooso wabadi bakupe. Pabaabadi abebakuula ntempelo kwi mwilo w’Efile Mukulu, Neemi ya baadi na lukalo lwa bantu balombeene kusemuna mashito elekeenelekeene. Basangwile bantu babaadi na nkumo ibuwa. Baadi auku’shi baaba bantu booso mbafule Efile Mukulu n’ashi mbalombeene kufuba ngofu mu mudimo ooso wabebapa. (Neemiya 7:2; 13:12, 13) Mu mushindo umune lelo uno, bantu booso be na lukumiino na abatumikaa ngofu abakekala na nkumo ibuwa na abakebapa mashito ebungi. (1 Beena-Kodinda 4:2) Byabya, sunga twekala balume sunga bakashi, twi balombeene kukita mudimo ooso wabetupa nka na katshintshi.​—Badika 1 Timote 5:25.

13. We kwambula kileshesho kya Yoosefe su bakukitshina myanda ibubi naminyi?

¹³ Kulupila mwi Yehowa. We kukita naminyi su bangi bantu babanga kukukitshina myanda ishii buwa? We kwibalungula byopusha. Kadi su okamba kukimba bya kwibingisha na kushimika kasele’shi obe ngi e na nsambu, we kunyiisha kulwisha myanda. Kileshesho kya Yoosefe nkilombeene nkukwasha ngofu. Bakwabo babamukitshinyine myanda ibubi. Bangi bantu nkumudimbiila abo nkumwela mu lukano bwa mwanda washii mukite. Kadi Yoosefe baadi nka mukulupile kwi Yehowa. Baadi anangusheena ku milayilo ya Yehowa, aye nkushaala na lulamato. (Misambo 105:19) Mu kyakya kipungo kibukopo, batamishe ngikashi ibuwa ibungi ibamukwashishe pabapetele mudimo wi na muulo kunyima kwa mafuku. (Kibangilo 41:37-44; 45:4-8) Su bantu bakukitshina myanda bibubi, teka Yehowa bwa’shi akupe binangu. Akukwashe bwa kwikala n’eshimba ditaale na kwibakitshina myanda na kalolo na kwibaluula bibuwa.​—Badika 1 Mpeele 5:10.

ENDA KUMPALA MU MUDIMO WA BULUNGUDI

14, 15. (a) Bwakinyi twi balombeene ‘kutaluula’ mushindo watulambukisha? (b) Twi kukita kinyi bwa kushintuula nshaleelo eetu? (Tala kifwatulo ki kumbangilo na kashibo akamba’shi: “Okumina kufuba na mayele elekeenelekeene su?”)

¹⁴ Mpoolo balungwile Timote bwa kutungunuka na kulongamisha mushindo waye wa kupatuula Bifundwe. Aye nkwamba’shi: “Etaluule obe nabeene na bulambukishi” boobe. (1 Timote 4:13, 16) Mafuku abaabadi bamulungule bino, Timote tabaadi mulungudi munda mwa bipwa bibungi. Bwakinyi bibaadi abitungu’shi anyiishe kulongamisha mayele aaye a kulungula? Timote baadi auku’shi nshalelo a bantu kwete kushintuluka. Baadi akumina’shi bantu bekale abamuteemesha, nyi bwakinyi baadi na kya kutungunuka na kulongamisha na kushintuula ndongyeesho aaye. Atwe namu lelo uno, bu byatukwete kulambukisha bantu, abitungu tumwambule.

¹⁵ Mu angi ma mbalo, nsaa yatulambukisha ku nshibo na nshibo, atusangana bantu bebungi ta be kwanka. Mu angi namu, bantu be ku mashibo aabo anka tatwi na mushindo wa kutwela mu mpango yaabo, pangi pa mwanda wa’shi tatwi balombeene kufika ku mashibo abadi bashale. Su bi byabya mu mbalo yanudi, twe mulombeene kutompa angi mayele bwa kupeta bantu su?

16. Bulungudi bwa mu ma mbalo e bantu bebungi abutushaa bipeta bibuwa naminyi?

¹⁶ Bakwetu balume na bakashi bebungi abakuminaa kukita bulungudi bwa mu ma mbalo e bantu bebungi. Bu kileshesho, abendaa mu ma mbalo aemenaa mashuwa a ndjandja, myootoka, mu bisalwe, na mu mambalo mwabalaminaa nyema bwa kulambukisha bantu. Temwe a Yehowa mulombeene kubanga mwisambo na muntu kukidila ku myanda yadi mupete mu jurnale mupya. Mulombeene kwisamba ka mwanda kebuwa katale yawa muntu sunga kumwipusha pabitale mudimo waye. Su bamono’shi yawa muntu akumina kwisamba naye, mulungudi a mukandu wibuwa mulombeene kutwesha mwanda wa mu Bible na kwipusha yawa muntu byanangusheena pabitale wawa mwanda. Kebungi, bantu abakuminaa kuuka myanda ya mu Bible.

17, 18. (a) We kukatusha moo wa bulungudi bwa mu ma mbalo e bantu bebungi naminyi? (b) Bwakinyi omono’shi binangu bya Daavide bya kutumbisha Yehowa mu bulungudi bibuwa?

¹⁷ Pangi okwete kupusha bukopo bwa kubanga mwisambo mu musese na muntu osh’ouku. Bino ngi bibaadi abipusha Eddie, ungi mbala-mashinda a mu New York City. Kadi bapetele kintu kibamukwashishe bwa kuleka kutshina. Akula’shi: “Kubanga mu lulangwilo lwetu lwa mu kifuko, mukashi’ande n’ami nabeene atukimbuulaa myanda bwa kumona bya kwaluula muntu akyebe kutshiba mwisambo na ngaluulo ilekeene ayituusha bantu.” Binobino Eddie kwete kutungunuka na bulungudi bwa mu ma mbalo e bantu bebungi.

¹⁸ Nsaa yatusangeela mudimo wetu wa bulungudi ngofu na kulongamisha mushindo wetu wa kwisamba na bantu, kwenda kwetu kwa kumpala mu kikudi akumweneka kwi bangi bantu. (Badika 1 Timote 4:15.) Na dingi twi kukwasha bangi bantu bwabadya kufika bafubi Yehowa. Daavide bambile’shi: “Naatumbula Yehowa ngub’oso, nkumo yaaye, taneyitshibi mukanwa. Neesadikila mwi Yehowa; beeyishe basangulukye pa kunteemesha.”​—Misambo 34:2, 3.

TUNGUNUKA NA KUTUMBISHA YEHOWA PA KWENDA KUMPALA MU KIKUDI

19. Mufubi a Yehowa e na lulamato e kumusangasha naminyi sunga ekala mu nshalelo ibukopo?

¹⁹ Daavide bambile dingi’shi: “Byooso byoodi mupangye abikusaamuna Yehowa, bakulamate abakutumbisha. Abapakalasha ntumbo ya Bufumu boobe, batentekyeshe kwilesha kwa bukome bwobe, basokwele bantu biileeshe bukome bwobe na bukata bwa ntumbo ya Bufumu bwobe.” (Misambo 145:10-12) Bantu booso bafule Yehowa na be na lulamato kwadi be na lukalo lwibukopo lwa kulungula bangi pa bimutale. Kadi we kukita naminyi su okutwa bukome bwa kukisha nsaa ibungi mu mudimo wa ku nshibo na nshibo bu byokuminaa pa mwanda wa maladi sunga bununu? Ikala nka otentekyesha’shi okwete kutumbisha Yehowa nsaa yooso yolungula bantu be mbwipi moobe pa bimutale, bu ba munganga. Su we mu lukano pa mwanda wa lukumiino loobe, we kwikala na mushindo wa kulungula bangi pabitale Yehowa, yaya nsaa osangasha eshimba dyaaye. (Nkindji 27:11) Ekala dingi na muloo wibungi su okwete kumufubila bupenka mu kifuko kyenu. (1 Mpyeele 3:1-4) Sunga wekala mu nshalelo ebukopo, we mulombeene kutumbisha Yehowa, kwifubwila peepi naye, na kwenda kumpala mu kikudi.

20, 21. Su okwete kukita midimo ibungi mu ndumbulwilo a Yehowa, we kwikala bu mwabi kwi bangi naminyi?

²⁰ Su nubatungunuka na kwifubwila peepi na Yehowa na kukita bukopo bwenu booso bwa kumufubila, akenwelela myabi. Pangi nsaa yoshintuula ingi myanda mu nshalelo oobe, okapete nsaa ibungi ya kukwasha bantu bwabadya kulonga bya kuuka milayilo ibuwa y’Efile Mukulu. Wekala na ngobesha ya kukwasha bakwenu ngofu. Na dingi banda kunangusheena kipaso kyabakakufulu kwi bakwetu nsaa yabamono’shi okwete kufuba ngofu mu kakongye!

²¹ Sunga twekala bapwe kufubila Yehowa munda mwa bipwa bi bungi bwi naminyi, booso bwetu twi balombeene kutungunuka na kwifubwila peepi naye na kwenda kumpala mu kikudi. Mu mwisambo aulondo, atukamono kipaso kyatudi balombeene kukwasha bangi bwabadya kwenda kumpala mu kikudi.