Okwete kumona lukalo lwa kulambukisha bangi su?

1, 2. Bwakinyi abitungu tulambukishe bangi bwabadya kufuba midimo mu ndumbulwilo?

YESU baadi mutumikye ngofu bwa kulungula mukandu wibuwa wa Bufumu. Baadi mukishe dingi nsaa ibungi bwa kulambukisha balongi baaye. Bebalesheshe bya kulongyesha na bya kulama mwilo w’Efile Mukulu. Balongi baaye babalongyele byabadya kwikala bu balami ba mikooko abapasukila mikooko yaabo. (Mateo 10:5-7) Fidipe baadi mulungudi a mukandu wibuwa sha kishima, kadi baadi mulambukishe bana baaye bakashi bwa kukita uno mudimo. (Bikitshino 21:8, 9) N’atwe namu lelo uno, twi na lukalo lwa kulambukisha bangi. Bwakinyi?

² Mu tukongye tooso twi mu nsenga ishima, mwi bantu bapya bebungi bashabandile kutambula. Bano bantu bapya be na lukalo lwa kulambukishwa. Abitungu twibakwashe bwabadya kupusha bwakinyi kwikala abelongyela Bible abo banabeene kwi na muulo. Na dingi abitungu twibalambukishe byabadya kwikala abalongyesha na kulungula mukandu wibuwa kalolo. Bakwetu balume bapete lubatshisho mu mafuku ashaale be na lukalo lwa’shi bebalambukishe bwa’shi kunyima kwa mafuku bakafube bu bafubi ba midimo na bu bakulu. Abitungu’shi bantu booso be mu kakongye bekitshishe ngofu bwa kukwasha bantu bapya.​—Nkindji 4:2.

LONGYESHA BANTU BAPYA BYABADYA KWILONGYELA BIBLE

3, 4. (a) Mpoolo baadi muleeshe kwipusheena kwi pankatshi pa kwilongyela Bifundwe na mudimo wa bulungudi naminyi? (b) Kumpala kwa’shi tunyingishe bangi bwabadya kwikala abelongyela Bible, abitungu tukite kinyi?

³ Mufubi a Yehowa ooso e na lukalo lwa kwibadikila na kwilongyela Bible bwa kuuka kikyebe ky’eshimba dy’Efile Mukulu. Mpoolo mutumiibwa bapatulwile uno mwanda kwi bakwetu balume na bakashi ba mu Kolose nsaa ibambile’shi: “Tatutshibi kuteka pa mwanda wenu. Atutekye Efile Mukulu’shi nwikale bauule na kiukilo kya akikyebe eshimba dyaaye.” Bwakinyi bibaadi abitungu’shi bekale ababadika na kwilongyela Bifundwe? Mwanda kukita bino kubaadi kulombeene kwibapetesha binangu na kwibakwasha bwabadya kushinguula kipaso kibaabadi balombeene “kulonda nshalelo mulombeene Yehowa, na kukita kyooso kya kumusangasha.” Bibaadi bilombeene kwibakwasha dingi bwa “kupa bikuba mu myanda yooso ibuwa” ayibatekye Yehowa bwa’shi bakite, bikishekishe mu bulungudi bwa mukandu wibuwa. (Beena-Kolose 1:9, 10) Byabya nsaa yatulongo na muntu, abitungu tumukwashe bwadya kupusha’shi kwibadikila na kwilongyela Bible efuku dyooso akumukwasha bwadya kufubila Yehowa.

⁴ Ta twi balombeene kukwasha bantu batulongo nabo bwa kushinguula muulo wa kwilongyela Bible su atwe banabeene tatwilongyelaa Bible. Byabya, su twekala na kyubishi kya kubadika Bible nsaa yooso na kunangusheena ku myanda yatubadika, abiketukwasha mu muwa wetu na mu mudimo wa bulungudi. Bu kileshesho, nsaa yatudi mu bulungudi su muntu bayipusha lukonko lwibukopo, atukekala na ngobesha ya kufuba na Bible bwa kumwaluula. Sunga’shi nsaa yatubadika kipaso kibaadi Yesu, Mpoolo na bangi bantu babaadi banyingiile mu mudimo wa bulungudi, abitukankamika na kwitutakula bwa kuyididiila na kulungula mukandu wibuwa sunga twekala mu nshalelo ebukopo. Nsaa yatulungula bangi bantu myanda yatudi bapete mu kwilongyela kwetu na byayidi itukwashe, atwibakankamika bwabadya kwilongyela Bible ngofu bwa’shi n’abo namu bapete masanka e byabya.

5. Leesha mayele alombeene kukwasha muntu mupya bwadya kwikala na kyubishi kya kwilongyela Bible.

⁵ We kwiyipusha’shi: ‘Ne kulambukisha muntu andongaa naye Bible bwadya kwikala elongyela Bible efuku dyooso naminyi?’ Pangi we kumuleesha bya kwilumbuula mu mukanda wanukwete kulonga naye. We kumulungula bwadya kwikala abadika myanda i mu apandise a mukanda wa A nkinyi akilongyesha namu Bible? na kubadika maverse e mwanka. Kunyima, we kumuleesha byadya kwikala alumbuula bisangilo bwa’shi amone bya nkaluula. Mukankamikye bwadya kwikala abadika nimero ooso a Kitenta kya Mulami na a Réveillez-vous! Na dingi we kumuleesha byadya kukimba ngaluulo ku nkonko ya mu Bible, bu kileshesho ku bukwashi bwa Watchtower Library sunga Watchtower MIKANDA I MU INTERNET. Su batompo kufuba na ano mayele elekeene bwa kwilongyela, akasangala na kukumina kulonga ingi myanda.

6. (a) We kukwasha muntu olongaa naye bwadya kufula Bible naminyi? (b) Mulongi a Bible e kukumiina kukita kinyi su taadi na kifulo kya Bifundwe?

⁶ Nsaa yatulongo na muntu, atukumina aukye’shi Bible e kwanka bwa kumukwasha bwa kuuka Yehowa kalolo. Pamutwe pa kumutakula bwadya kwilongyela, twi kumuleesha byadya kusangeela kwilongyela. Su banyiisha kulonga myanda i mu Bible, akapusha nka bu mufundi a misambo bambile’shi: “Kwikala peepi [n’Efile Mukulu] nkukile buwa. Ne mufwamine koodi’be Nfumu Yehowa.” (Misambo 73:28, EEM) Kikudi kya Yehowa akikwashaa muntu ooso akyebe kwifubwila peepi naye.

LAMBUKISHA BALUNGUDI BAPYA BYA KUKITA BULUNGUDI NA BYA KULONGYESHA

7. Yesu balambukishe balungudi ba mukandu wibuwa naminyi? (Tala kifwatulo ki kumbangilo.)

⁷ Mushindo ubaadi Yesu alongyesha balongi baye wi kwitulongyesha myanda ibungi. Yesu baadi ende nabo nsaa ibaadi ende mu bulungudi, na babaadi abamulondesha nsaa ibaadi alongyesha bantu. Kunyima baadi mwibape mayi a kulonda pabitale kipaso kyabadi balombeene kulongyesha. (Mateo, shapitre 10)^[1] (Talqwa mayi e kunfudiilo.) Munda mwa mafuku apeela, Yesu balambukiishe batumiibwa baye bya kulongyesha bantu bya binyibinyi. (Mateo 11:1) Tubandeyi kutala myanda ibidi yatudi balombeene kulongyesha bantu bapya yabadya kukita nsaa yabadi mu bulungudi.

8, 9. (a) Yesu baadi esamba na bantu naminyi mu bulungudi? (b) Twi kukwasha balungudi bapya bwabadya kwambula mushindo ubaadi Yesu esamba na bantu naminyi?

⁸ Ikala otentekyesha na bantu. Yesu tabaadi esamba nka na kisaka kya bantu nya. Baadi esamba misango ibungi na bantu pa bupenka, na baadi ebaata bu bakuuku baye. Bu kileshesho, baadi mwisambe kalolo na mwana mukashi bafikile mu kutapa meema mu kitonko ki peepi na kibundji kya Sikare. (Yowano 4:5-30) Yesu besambile dingi na Mateo Levi, muudishi a bitadi, aye nkumwitanyina bwadya kwikala mulongi aaye. Mateo bakuminyine na kunyima bayitanyine Yesu na bangi balongi baaye kwaye ku nshibo bwabadya kudya kya kudya. Pabafikile kwanka, Yesu besambile na bantu bebungi.​—Mateo 9:9; Luka 5:27-39.

⁹ Yesu besambile dingi kalolo na Natanaele, sunga mbibaadi Natanaele mwakule myanda ibubi bwa bantu ba mu Nazarete. Pa mwanda wa’shi Yesu besambile naye na kalolo kooso, Natanaele baadi mushintuule mweneno aaye pabitele Yesu baadi a mu Nazarete. Natanaele bakuminyine mpa na kuuka ingi myanda pabitale Yesu. (Yowano 1:46-51) Kileshesho kya Yesu akitulongyesha’shi nsaa yatwisamba na bantu mu mushindo wibuwa na kalolo kooso, abakumiina kuteemesha myanda yatwibalungula.^[2] [Tala mayi e kunfudiilo.] Nsaa yatulambukisha bantu bapya byabadya kwisamba mu kino kipaso, abakekala na muloo wibungi wa kwenda mu bulungudi.

10-12. (a) Yesu baadi mutamishe lukalo lwa bantu mu bulungudi naminyi? (b) Twi kukwasha balungudi bapya bwabadya kulongamisha ndongyeesho a binyibinyi bya mu Bible naminyi?

¹⁰ Longyesha baaba abakumiina kuteemesha. Yesu baadi na myanda ibungi ya kukita. Kadi nsaa ibaadi bantu na lukalo lwa kumuteemesha, baadi akisha nsaa nabo na kwibalongyesha myanda ibungi. Bu kileshesho, dingi efuku kisaka kya bantu kibaadi kiimane ku kyese kya mwela bwa kuteemesha Yesu. Paapa Yesu batuukile mu bwato na Mpyeele aye nkwimana bwa kwibalongyesha. Kunyima kwa byabya, baadi na lukalo lwa kupa Mpyeele elango dikata. Yesu baadi mukite kilengyeleshi aye nkukwasha Mpyeele bwadya kukwata mishipa ibungi. Balungwile Mpyeele’shi: “Binobino mbantu bokakwata.” Mususa umune Mpyeele na baaba abaadi naaye “babaalwishe maato ku kyeese baleka byooso” abo nkulonda Yesu.​—Luka 5:1-11.

¹¹ Nikodeme namu baadi akumiina kulonga myanda ibungi kwi Yesu. Kadi bu bibaadi Nikodeme mwina Sanedrine, baadi na moo wa bilombeene kwakula bangi su abamumono kwete kwisamba na Yesu. Aye nkwenda bufuku kwi Yesu. Yesu tabaadi mumubingye nya, kadi bashalele naaye aye nkumupatulwila myanda ikata ya binyibinyi. (Yowano 3:1, 2) Efuku dyooso Yesu baadi akumiina kutumika na nsaa yaaye bwa kulongyesha bantu bya binyibinyi na kunyingisha lukumiino lwabo. Mu mushindo umune, atukumiina kwipaana mu kwalukiila bantu pa nsaa yabakumina, atukumiina kukisha nsaa nabo bwa kwibakwasha bwa’shi bapushe Bible.

¹² Nsaa yatudi mu bulungudi na bantu bapya, twi balombeene kwibalongyesha mushindo wa kwalukiila mu kutala muntu akumiina bwa kwisamba naaye dingi. Twi balombeene dingi kwata balungudi bapya bwa kwalukiila nabo mu kutala bantu na mu kulonga Bible na bantu. Patukitshi byabya, abalongo bya kulongyesha bangi na abamono miloo ayitukilaa mu ku kwasha baaba bantu bwabadya kulonga bya binyibinyi. Yaaya nsaa, bano bantu bapya abekala na muloo wa kwalukiila bantu na kulonga nabo Bible. Abalongo dingi byabadya kwikala na lwishinko kushii kuleka mudimo wa bulungudi su ta mbapete bantu ku mashibo.​—Beena Ngalatea 5:22; tala kashibo akamba’shi “Tabaadi mukookye nya.”

LAMBUKISHA BANTU BAPYA BYABADYA KUFUBILA BAKWABO

13, 14. (a) Opwandikisha naminyi pabitale bileshesho bya mu Bible bya bantu babaadi batuushe bintu byabo bwa kukwasha bakwabo? (b) Mmushindo kinyi wibuwa oodi mulombeene kulambukisha balungudi bapya na ba nsongwa bwabadya kwikala abakwasha bakwabo?

¹³ Yehowa akumina’shi bafubi baaye befuleene bu bana na bana na’shi bekale abekwasheena. (Badika Luka 22:24-27; 1 Mpyeele 1:22.) Bible aleesha’shi Yesu baadi mutuushe bintu byooso, mpa na muwa waye bwa kukwasha bangi. (Mateo 20:28) Dorkase “baakitanga myanda ibungi ibuuwa na kupesheena bya pa lusa.” (Bikitshino 9:36, 39) Madiya ‘bafubile mufubo ngofu’ bwa kukwasha bakwabo balume na bakashi ba mu Looma. (Beena-Looma 16:6) Mushindo kinyi watudya kukwasha balungudi bapya bwabadya kushinguula’shi bi na muulo kukitshina bakwabo balume na bakashi myanda ibuwa?

¹⁴ Twi balombeene kwibetanyina bwabadya kwitushindikila nsaa yatwende mu kutembela bantu banunu na bantu be na maladi. Nsaa ayende ba nambutwile mu kutala bano bantu, mbalombeene kwenda na bana baabo su kwi mushindo. Bakulu mbalombeene kwitanyina ba nsongwa sunga bantu bapya bwabadya kwenda nabo nsaa yabende mu kukwasha bantu banunu na byakudya sunga mu kwibalumbulwila mashibo aabo. Nsaa i ba nsongwa na bantu bapya abamono bakwetu balume na bakashi abakwasha bangi, abebambula. Bu kileshesho, nsaa ibaabadi abende mu bulungudi mu mbalo kampanda, ungi mukulu baadi na kyubishi kya nkatala bangi bakwetu be mu yaya mbalo bwa kuuka byabadi. Mukwetu nsongwalume baadi amushindikila balondele kileshesho kibuwa kya yawa mukulu na kwikala anangusheena bya kwikala akwasha bakwetu.​—Beena-Looma 12:10.

15. Bwakinyi bi na muulo bwa’shi bakulu bekale abataluula ngofu kwenda kwa kumpala kwa mu kikudi kwa bakwetu balume mu kakongye?

¹⁵ Yehowa mmupe bana balume bushito bwa kulongyesha Eyi dy’Efile Mukulu mu kakongye. Nyi bwakinyi bi na muulo bwa’shi bakwetu balume bebalambukishe byabadya kwikala abalongyesha kalolo nsaa yabakitshi miisambo. Su we mukulu mu kakongye, we kuteemesha mufubi a midimo nsaa yakitshi mwisambo na kumukwasha bwadya kulongamisha ndongyeesho aaye. (Neemiya 8:8)^[3]—Tala mayi e kunfudiilo.

16, 17. (a) Mpoolo baadi mukwashe Timote bwa kwenda kumpala naminyi? (b) Bakulu mbalombeene kulambukisha bafubi ba midimo byabadya kupasukila mikooko mu mafuku aafiki mu kakongye naminyi?

¹⁶ Kwi lukalo lukata lwa kulambukisha bakwetu balume bebungi bwabadya kwikala balami ba mikooko mu kakongye. Mpoolo baadi mulambukishe Timote na kumukankamika bwa’shi alambukishe bangi. Mpoolo bambile’shi: “Nyinga na buntu bwa kwi Kidishitu Yesu. Byabya byoodi mupushe kwandi ku meeso kwa tumonyi twibungi, ebilungule bantu [balume] ba kishima balombeene kwibilambukisha namu kwi bangi.” (2 Timote 2:1, 2) Timote balongyele myanda ibungi kwi Mpoolo, baadi mukulu na mutumiibwa, ibamukwashishe bwa kulongamisha mudimo waye wa bulungudi na bwa kukwasha bangi bantu mu kakongye.​—2 Timote 3:10-12.

¹⁷ Mpoolo baadi mukishe nsaa ibungi na Timote mwanda baadi akumiina kumulambukisha kalolo. (Bikitshino 16:1-5) Bakulu mu kakongye mbalombeene kwambula Mpoolo p’abo kwata bafubi ba midimo banyingye mu kikudi bwa kwenda nabo mu kutembela mikooko. Yaya nsaa, mufubi a midimo mulombeene kwambula bakulu kipaso kya kulongyesha bangi, bya kwikala na lwishinko na kifulo, na bya kukulupila mwi Yehowa nsaa yapasukila mikooko.​—1 Mpyeele 5:2.

KULAMBUKISHA BANGI KWI NA MUULO

18. Bwakinyi abitungu twate kulambukisha bangi mu mudimo wa Yehowa na muulo?

¹⁸ Mu ano mafuku a kunfudiilo, bantu bapya bebungi be na lukalo lwa kulambukishibwa bwabadya kulongamisha mayele aabo mu bulungudi. Nkwikale dingi lukalo lwa kulongyesha bakwetu balume bya kusemuna mashito a kakongye. Yehowa akumina’shi bafubi baaye booso bekale balambukishwe kalolo, na mmwitupe bushito bwa kukwasha bantu bapya. Ngi bwakinyi bi na muulo ukata bwatudya kukita mwetu mooso bwa kulambukisha bangi, nka bu bibakitshine Yesu na Mpoolo. Twi na lukalo lwa kulambukisha bantu bebungi mwanda kukii bibungi bya kukita mu mudimo wa bulungudi kumpala kwa’shi nfudiilo ifikye.

19. Bwakinyi we kushinkamisha’shi nsaa ywetatshisha bwa kulongyesha bangi mu mudimo wa Yehowa okapete bipeta bibuwa?

¹⁹ Kulambukisha bantu byapya akwata nsaa na bukome bwibungi. Kadi twi balombeene kushinkamisha’shi Yehowa na Yesu abetukwasha bwatudya kuuka bya kulambukisha bangi mu mushindo wibuwa. Atukekala na muloo wibungi patukamono bantu batudi balambukishe abafubu ngofu na kwipaana mu kakongye na mu mudimo wa bulungudi. (1 Timote 4:10) Na dingi, abitungu tutungunukye na kukita mwetu mooso bwa kwenda kumpala mu kikudi, kulongamisha ngikashi yetu ya bwina Kidishitu, na kunyiisha kwifubwila peepi na Yehowa.