Abitungu bipuilo bituelakane mu mianda ya politike su?

Pepi mu nsenga ishima bantu bebungi bakuete kuiamba bu abalondo Yesu Kidishitu, mbepaane ngofu mu mianda ya politike. Bu biabadi na lukalo lua kulesha bi nkumiino yaabo na muikelo wabo, bangi bakuete kukuatshishena bantu abakiebe’shi bebasangule mu mianda ya politike sunga kisaka kia mianda ya politike kia baaba be na mueneno e mumune na aabo. Bano abakiebe’shi bebasangule namu bakuete kufuba na mianda itale bipuilo bua kupeta bantu bebungi ba kuibasangula ku muasu kampanda kui bena kipuilo. Mu angi maumbo, bangi bakata ba bipuilo abakimbaa bua’shi bebasangule bua kupeta muasu mu politike. Ingi nsaa mpana kipuilo akileesha bu kia bena Kidishitu abekitulaa bu kipuilo kieumbo.

Opuandikisha naminyi? Mulongi a Yesu Kidishitu mmulombene kutuela mu politike su? Kileshesho kia Yesu nkilombene nkupa lualulo. Bambile’shi: “Nenupa kileshesho, bwa’shi, nka bu binanenukitshi ami, anwe namu nukite.” (Yowano 13:15, Kilombeno kipya) Yesu mmulekie kileshesho kinyi pabitale mianda ya politike?

Yesu baadi atuele mu mianda ya politike su?

Nya. Yesu tabaadi mutuelakane mu mianda ya politike ya mafuku aaye nya.

Yesu tabaadi mukimbe bufumu bua politike. Pabaadi Satana mumuleshe “mafumu ooso a pa nsenga,” mbulamatadi yooso ya bana ba bantu’shi mmulombeene kumupa yanka, bapelele. (Mateo 4:8-10)a Ungi musango, bantu abaadi bamone’shi Yesu e na ngikashi ya bu munkunshi ebuwa, abaadi batompe kumutakula buadia kutuela mu mianda ya politike. Bakitshine naminyi? Bible amba’shi: “Yesu pabawukile’shi abakyebe kufika mu kumwaata pa bukopo, bwa’shi bamutuule bu nfumu, baalukiile dimo pa mwengye, aye bupenka bwaye.” (Yowano 6:15, Kilombeno kipya) Yesu tabaadi mukumine bibaabadi abamba nya. Bapelele kutuelakana mu mianda ya politike.

Yesu tabaadi alamata ku lupese kampanda mu mianda ya politike nya. Bu kileshesho, mu mafuku aaye, bena Yunda abaadi abapusha bubi kufuta bitadi bibukopo bia mbulamatadi a bena Loma, muanda abaadi abamono’shi ta mbalombene kuibifuta. Nsaa ibaabadi bakimbe bia kutuesha Yesu mu wawa muanda, tabaadi mutuelakane mu kuikakena kua mianda ya politike pabitale biaki bitadi. Bebalunguile’shi: “Lambulayi bintu bia Kayisa kwi Kayisa na bintu bi’Efile Mukulu kwi Efile Mukulu.” (Mako 12:13-17, Kilombeno kipya) Bapelele kutuelakana mu mianda ya politike anka afuta bitadi bibaabadi abatekie kui bakata ba bena Loma abaadi abalesha mpala ya Kayisa. Mu yaaya nsaa imune balesheshe’shi kukookiela bakata ba mbulamatadi kui na mikalo, ta mbalombene kupa mbulamatadi kiakia akitungu kupa Efile Mukulu, nyi nkuamba’shi kumulamata na kumulanguila​—Mateo 4:10; 22:37, 38.

Yesu baadi akuatshishena na kulambukisha pabitale Bufumu bu’Efile Mukulu. (Luka 4:43) Tabaadi atuelakana mu mianda ya politike muanda baadi muukie’shi, Bufumu bu’Efile Mukulu nyi abukalombasha kikiebe ki’eshimba di’Efile Mukulu ta mbufumu bua bana ba bantu nya. (Mateo 6:10) Baadi auku’shi Bufumu bu’Efile Mukulu tabuikala ku bukunkushi bua bana ba bantu nya abukapiana bufumu bua bana ba bantu.​—Ndanyele 2:44.

Bena Kidishitu ba kumpala abaadi abatuelakana mu politike su?

Nya. Balongi ba Yesu abaadi abalondo eyi dia Yesu dia’shi ‘ta mba pa nsenga.’ (Yowano 15:19) Babaadi abalondo kileshesho kiaye na kupela kutuelakana mu mianda ya politike. (Yowano 17:16; 18:36) Pamutue pa kutuelakana mu mianda ya politike, abaadi abakitshi mudimo ubaabadi bebatumine eyi kui Yesu bua kukita​—kulungula na kulongiesha pabitale Bufumu bu’Efile Mukulu.​—Mateo 28:18-20; Bikitshino 10:42.

Bena Kidishitu ba mu siekele a kumpala, kia kumpala abaadi abakookiela Efile Mukulu, sunga mbiabia abaadi abanemeka bakata ba mbulamatadi. (Bikitshino 5:29; 1 Mpyeele 2:13, 17) Abaadi abakookiela miiya na kufuta bitadi. (Bena-Loma 13:1, 7) Sunga tababaadi abatuelakana mu mianda ya politike, kadi abaadi abakaluilua na miiya ya bakata ba mbulamatadi na bukuashi buabo.​—Bikitshino 25:10, 11; Bena-Fidipe 1:7.

Lelo uno bena Kidishitu tabatuekalanaa mu mianda ya politike

Bible alesha patooka’shi, biabikala Yesu sunga balongi baaye, tababaadi abatuelakana mu mianda ya politike nya. Mu nsenga ishima, ba Temue ba Yehowa, bu biabadi bena Kidishitu, tabatuelakanaa mu mianda ya politike nya. Anka bibaadi bena Kidishitu ba kumpala, abo namu bakuete kukita mudimo ubaadi Yesu mutume eyi’shi: balungule “mukandu wibuwa wa Bufumu.”​—Mateo 24:14.