Munanga wibukopo—Bible akula kinyi?

“Ma rapore a mu chine ngaleshe’shi kino kipua kuikele munanga ukile bukopo kukila bingi bioso.”—The Guardian, 7/9/22, 2022.
“Mu bipua bitano bikumpala, mu angi ma mbalo a mu Afrike amuikala munanga ukile bukopo.”—UN News, 26/8/2022.
“Kui masaku a’shi kia pankatshi kia Europe kikale mu munanga ukile bukopo, na pangi uno munanga tawekele bukopo bui bino takudi bipua 500.”—BBC News, 23/08/2022.

Baasha binangu bebungi abapuandikisha’shi uno munanga wi bino autungunuka mpa na kunyisha kuela bukopo. Kui lukulupilo bua nshalelo ebuwa mafuku e kumpala su? Bible akula kinyi?

Munanga na butemuki

Bible baadi mutemukie bua mafuku etu:

“Akukeekala . . . Mu ma mbalo ebungi bipupa bia nsala.”—Luka 21:11, Kilombeno kipya 2014.

Misusa ibungi munanga autueshaa nsala. Ino nsala, na dikienga na lufu luayifuisha, abilombasha butemuki bua mu Bible.—Kibafumbwilwe 6:6, 8.

Buakinyi munanga ukuete kunyisha kuela bukopo

Bible atuusha kabingilo kakata akalesha buakinyi munanga ukuete kunyisha kuela bukopo. Amba’shi:

“Muntu ta mfumu a eshinda dyalondo nya. Nyi mwina lwendo shii mulombeene kwenda kooso kwakyebe.”—Yeelemiya 10:23.

Bino abipatuula’shi bantu ta mbalombene koobesha “kukunkusha ntaba [yaabo],” nyi nkuamba’shi kuikunkusha. Bitshibilo biabo bibubi bikuete kufuisha munanga na kukama kua meema.

Bena sianse bebungi abakumiina’shi midimo ya bantu nyi ifuishe kibobo pa nsenga ishima, akifuisha dingi munanga mu nsenga ishima.
Bikitshino bia bantu basha luabi na bakuete kuela miiya kushi kunangushena ku bipeta bikumbene kutuuka mu mafuku e kumpala, akufuisha kusaasula kua mitamba, kuluisha kua lupapi, na kufubisha bibubi bintu bipangibue. Pa muanda wa biabia atushimisha nsulo ya mema ebuwa.

Anka, Bible atuusha lukulupilo.

Kui lukulupilo bua mafuku e kumpala su?

Bible mmulee’shi Efile Mukulu akapudisha dino dikienga dia mema di kuanka. Naminyi?

1. Efile Mukulu ‘akayipaa baaba abalwisha nsenga.” (Kibafumbwilwe 11:18) Akakatusha booso abafuisha dikienga dia mema—etombo, na baasha luabi bakuete kukita mianda ayiluisha mbalo yatudi bashaale.—2 Timote 3:1, 2.
2. “Nsenga ibaatatshile kaalo ayaluluka buu eshiba.” (Yeeshaya 35:1, 6, 7) Efile Mukulu akalumbuula bioso biabadi baluishe kui munanga na kualuula nsenga bu mpaladiiso e na mema ebuwa.
3. “Boofiki mu kutembela be pa nsenga, bwebatomesha meema; bwebafiimiisha bupeta.” (Misambo 65:9) Ku miabi y’Efile Mukulu, nsenga ayikala na bidibua bibuwa bibungi mpa na mema a kutoma ebuwa bua bantu boso.