Ma site a Internete a kuisamba na bantu bebungi e na bukitshishi bui bubi kui muan’obe su?​—Bible e kukuasha ba nambutuile naminyi?

“Lukalakashi lua mu binangu lui nalo ba nsongua, mmuanda autungu kupasukila na bukidi boso, na tui bamone’shi ma site a Internete a kuisamba na bantu bebungu nyi kintu kikata akifuisha luno lukalakashi.”​—Dr. Vivek Murthy, U.S. surgeon general, New York Times, 17/6/2024.

Ba nambutuile mbalombene kukaluila bana babo naminyi ku masaku aatukila ku ano ma site a Internete a kuisamba na bantu bebungi? Bible atuusha malango e buwa alombene kukuasha.

Ba nambutuile mbalombene kukita kinyi?

Talula ano mayi asatu a kulonda a mu Bible.

“Mudimukye eshinkâ kwibedi kwa kukita kintu.”​—Nkindi 14:15, EEM.

Bu biabidi’shi kufubisha ma site a Internete a kuisamba na bantu bebungi nkulombene kufuishila muan’obe masaku akata, tuepushanga mu kitungo kia kutadiila muan’obe bua’shi eafubishe. Kumpala kua kukumiina bua’shi muan’obe afubishe aa ma site a Internete a kuisamba na bantu bebungi, ikala mushinkamishe’shi mmulombene kunemeka nsaa itshibibue, e kupeta ba kuku be buwa na kupela kubandila bintu bi bubi.

• Bua kuka bibungi, badika ino miisambo “Mon enfant devrait-il utiliser les réseaux sociaux?” na “Protégez votre adolescent des dangers des réseaux sociaux.”

“Fubishayi nsaa y’enu kalolo.”​—Bena Efeso 5:16.

Su bokumiina bua’shi muan’obe afubishe ma site a Internete a kuisamba na bantu bebungi, muelele miiya pabitale biadia kuiafubisha, na omupatuluile bilombene kumukaluila yaya miiya. Ikala mupasukie nsaa y’omono bitunduilo abilesha’shi bikitshino bia muan’obe bibashintuluka, na bino mbilombne kukukuasha bua kumona’shi abitungu opeeleshe nsaa y’akisha ku ma site a Internete a kuisamba na bantu bebungi.

• Fubisha video a muntu asolo kuibaya amba’shi Dimukila ma site a Internet a kwisamba na bantu bebungi bua kukuasha muan’obe bua’shi amone’shi kuikala na nkatshinkatshi kui na muulo.

Longa bua kuka bibungi

Bible amba’shi tui mu “bipungo bibukopo.” (2 Timote 3:1-5) Anka, etupa’nyi malango ebuwa aetukuasha. Mu uno muisambo mui miisambo ikile pa 20 imeene mu Bible bua ba nambutuile na bana babo pabitale lukalakashi lua mu binangu bua ba nsongua.