Maasha a Olympique e kubunga bantu booso mu buwumune biinyibiinyi su?​—Bible akula kinyi?

Mu kipungo kia maasha a Olympique mu kipua kia 2024, atupuandikisha’shi bantu peepi miliyare Itaano ababandila baaba bantu ba mu mawumbo 206, abaasha. Thomas Bach mukata a Comité international a maasha a olympique amba’shi: “Natue namu tui munkatshi mua bantu abakitshi mianda ikata ayibuungu bantu mu buwumune mu nsenga ishima mu butaale,” akumbasha’shi, “Tusangeeleyi ano maasha a Olympique na kinaangu kia butaale, bu mushindo umune awubungu bantu booso mu buwumune mu mianda ilekeenelekeene.”

Maasha a Olympique e kulombasha kano kepatshila su? Kui lukulupilo lua butale na buwumune bua biinyibiinyi su?

Abo ngi bekale nsulo ya butaale na buwumune su?

Maasha a Olympique a kino kipua ta ngekale nka penda bu kalashishi ka mbidi nya. Maasha aekalanga a ashimika kasele pa mianda ya mu nshalelo a bantu na ya politike bikuete kuabuula bantu. Mu ino mianda mui matalua a bantu, ntondo y’ekoba, kuiabulushena mu mianda ya bipuilo, na kukutua kuikala mu buwumune.

Mianda ikata bu ano maasha a Olympique aakuashaa bantu bua kukisha kapapi mu nsenga ishima. Na dingi ino mianda ayakuila nka penda bua kushintuula binangu na bikitshino bia kuiabuula, pa mutue pa kuakuila butaale abutuala ku buwumune bua losoo.

Bible baadi mupue kutemuka pabitale kino kinangu bi’akikutshishua kutuesha butaale na buwumune lelo uno. (2 Timote 3:1-5) Bua kuuka mianda i bungi pabitale matemuki a mu Bible, badika muisambo awamba’shi: “Bible baadi mutemukie mushindo awikala binangu na bikitshino bia bantu lelo uno su?”

Lukulupilo na butaale bua biinyibiinyi pa nsenga

Mu Bible mui butaale na buwumune bua biinyibiinyi bia kukulupila abikekala mu nsenga ishima. Alaa’shi bantu booso be pa nsenga abakekala mu buwumune na abakakunkushibua na mbulamatadi abetanyina bu: “Bufumu bu’Efile Mulu.”​—Luka 4:43; Mateo 6:10.

Yesu Nkidishitu Nfumu a buabua Bufumu, akafuisha butaale mu nsenga ishima. Bible amba’shi:

• “Mululame atangala, na ekale mu butaale bui bungi”​—Misambo 72:7.

• “Apaasha mulanda eele musaase kwadi, . . .Eebakalwila ku ntuditudi na ku kifita kya bantu.”​—Misambo 72:12, 14.

Biabia lelo uno, malongiesha a Yesu akuete kubunga midiyo ya bantu mu maumbo 239 mu nsenga ishima mu buwumune. Bu biatudi bena Nkidishitu, Tumonyi tua Yehowa mu nsenga ishima, ntulongie bia kuikala mu butaale. Bua kuuka mianda i bungi, badika muisambo wi mu jurnale a Kitenta kia Mulami wi na mutue wa muanda awamba’shi: “Tui balombene kukambila mushikua.”