Efile Mukulu e na eshina su?

Lualuulo lua mu Bible

Bantu boso be na mashina. Efile Mukulu e kuikala n’eshina su? Kuikala n’eshina diabadia nkuitamina nyi nkintu ki na muulo pabitale bu kuuku bua bantu. Tabia kuikala nka biabia pabitale kudia bu kuuku n’Efile Mukulu su?

Mu Bible Efile Mukulu amba’shi: “Nami Yehowa. Dino nyi eshina diande.” (Yeshaya 42:8, NWT) Sunga biekala’shi e na miasu, bu “Sha bukome booso,” “Muanana Nfumu,” na “Mupangi,” apa balanguidi baye kinemo pa kuibateka bua’shi bamuitamine muishina diaye.—Kibangilo 17:1; Bikitshino 4:24; 1 Mpyeele 4:19.

Mu ma Bible ebungi, eshina di’Efile Mukulu di mu Efilu 6:3. Yawa verse amba’shi: “Nee mwileeshe kwi Abrahame, kwi Isaake naa kwi Yaakobo buu Efile Mukulu Sha bukome booso; anka mwishina dyande dya’shi nee Yehowa ntshi mwiukishe kwabadi.”

Yehowa nyi eshina di’Efile Mukulu mu Kisongie mbiabeditaminaa takudi bipua nkama. Sunga mbiabidi’shi basha binangu bebungi abakuminaa kuiditemuna bu “Yawe,” Yehowa nyi nfundilo a dino eshina aukibua ma mbalo akile bungi. Kipindi kia kumpala kia Bible abaadi bekifunde mu kina Ebelu kushi mu Kisongie, kina Ebelu abekibadikaa kukatukila ku mboko ibalume wende ku mboko ibakashi. Mu dino edimi, eshina di’Efile Mukulu mbedifunde mu maleta ashikale ananka, יהוה. Ano maleta ananka a mu kina Ebelu—mbealuule bu YHWH—abeetaminaa bu Tetragrame.