Ba Temwe ba Yehowa abakwashaa bantu abapete masaku su?

Olo, misusa i bungi ba Temwe ba Yehowa abakwashaa bantu abapete masaku. Atutushaa bukwashi bulombane kwi bantu booso ba Temwe na bashii ba Temwe, muyiile mayi a mu Bible e mu Beena-Galate 6:10: “Tukitshineeyi bantu booso myanda ibuuwa, nkibinkibi bakwetu mu kukumiino.” Atwitatshishaa dingi bwa kwibapa bukwashi bwa ku mbidi na mu binangu bwabadi nabo lukalo mu yaaya nsaa.​—2 Beena-Kodinto 1:3, 4.

Byatwilumbuulaa

Kunyima kwa masaku, bakulu ba tukongye twa kyakya kipindji abende mu kutala bantu ba mu twatwa tukongye bwakuuka byabadi biro bya filiale bya ba Temwe ba Yehowa bya mu eumbo dyabo rapore ya bibabapete.

Su bukwashi abutungu kutuusha tukongye twi pepi ta twi na mushindo, Kasaka ka Bakunkushi-Bakulu ka ba Temwe ba Yehowa akalumbuula bya kulombasha lukalo lwabo. Uno ndjo mushindo ubadi beena Kidishitu ba kumpala abekwashena mu mafuku a nsala. (1 Beena-Kodinto 16:1-4) Biro bya filiale bya dyadya eumbo abisangula bantu balombeene kulumbuula na kuludika kwabila kwa bwabwa bukwashi. Ba Temwe ba mu angi maumbo abatushaa nsaa yabo na bintu byabo bwa kukwasha.​—Myeele 17:17.

Pabitale makuta

Umune wa ku mishindo yatufubaa na byabuntu byatutumaa ku biro bya filiale bya ba Temwe ba Yehowa nkukwasha bantu abapete masaku. (Bikitshiino 11:27-30; 2 Beena-Kodinto 8:13-15) Bu bi uno mudimo abeukitaa kwi bantu bashy’abatambula efuto, byabya bintu byatubungaa abikafikaa kwi baba be mu mpombo, kushii lukalo lwashi bebalondeshe. Atulamaa kalolo bintu byatutuusha.​—2 Beena-Kodinto 8:20.