Yesu atuele mu Yelusaleme na ntumbo mmushale ku mpunda

Matemuki pabitale Mesiya aashinkamisha’shi Yesu badi Mesiya su?

Lualulo lua mu Bible

Olo. Pabaadi pa nsenga, Yesu baadi mulombashe matemuki ebungi pabitale “Mesiya Mfumu,” yawa ‘akapasha nsenga.’ (Ndanyele 9:25; 1 Yowano 4:14) Mpa na kunyima kua lufu luaye, Yesu baadi mutungunukie na kulombasha matemuki atale Mesiya.—Misambo 110:1; Bikitshino 2:34-36.

“Mesiya” apatuula kinyi?

Mu ki na Ebelu muaku Ma·shiʹach (Mesiya) na muaku wi mumune wa mu kina Greke Khri·stos (Kidishitu) yoso ayipatuula’shi “Muedibue muimu.” Biabia, “Yesu Kidishitu” apatuula “Yesu Muedibue muimu,” sunga “Yesu Mesiya.”

Mu Bible, abadi abele muntu muimu pa kumupongoola mwanka ku mutue nsaa yabadi bamusangule bua kukita mudimo kampanda wa pabuao wa bufumu. (Bena-Levi 8:12; 1 Samwele 16:13) Yesu abadi bamusangule kui Efile Mukulu buadia kuikala Mesiya—mbalo ya bufumu bukata. (Bikitshino 2:36) Anka, pamutue pa kuela Yesu muimu, Efile Mukulu bamuelele muimu na kikudi kiselele.—Mateo 3:16.

Bantu bebungi be kulombasha matemuki atale Mesiya su?

Nya. Anka abikalaa kitunduilo kia munue akilesha penda muntu umune, kulombana kua matemuki a mu Bible nkuimene penda pe muntu umune Mesiya sunga Kidishitu. Anka, Bible etudimusha’shi “Ba Meesiya ba-madimi na batemuki ba madimi abakatuuku, bakite bilengyeleshi na bipaso bilombeene kupambula sunga beenyi bsangulwe.”—Mateo 24:24.

Mesiya akamueka mu mafuku e kumpala su?

Nya. Bible badi mulee’shi Mesiya akekala muikulu a Mfumu Davide a mu Isaleele. (Misambo 89:3, 4) Anka mulongo wa ba nkambua ba bena Yunda kubanga kui Davide ngupue kushimina, pangi abadi bebabutule pabaadi bena Loma babutule Yelusalema mu kipua kia 70 bino bipungo bietu (B.B.)a Kubanga mu aa mafuku bibadi bukopo bua muntu kuitemuna’shi atukila mu kifuko kia Davide. Mu kuilekena na biabia, sunga mulongo wa ba nkambua ubadi kuanka mu mafuku a Yesu, sunga beshikuanyi naye tababadi abelesha mpaka’shi mmuikulu a Davide nya.—Mateo 22:41-46.

Mu Bible mui matemuki bungi kinyi pabitale Mesiya?

Ta mbibofule bua kushinkamisha bungi bua matemuki atale Mesiya nya. Kileshesho, mushindo wa kulesha bungi ngulombene kuilekena ngofu sunga mu mbalo yabalesha kalolo pabitale Mesiya. Mianda i mu Yeeshaya 53:2-7 ayilesha mianda i mu butemuki butale Mesiya. Bangi be kubadika ino mianda yoso bu butemuki bumune, bangi namu be kubadika muanda oso bupenka buao bu butemuki bui pa buabo.

Angi matemuki atale Mesiya abadi balombashe kui Yesu

Butemuki	Bui mu	Kulombana
Kekulu ka Abalahama	Kibangilo 22:17, 18	Mateo 1:1
Muana a Abalahama muana a Isake	Kibangilo 17:19	Mateo 1:2
Mutandikue mu kisamba kia Yunda	Kibangilo 49:10	Mateo 1:1, 3
Mu mulongo wa bufumu bua Mfumu Davide	Yeeshaya 9:7	Mateo 1:1
Abakamutanda kui mukashi kamame	Yeeshaya 7:14	Mateo 1:18, 22, 23
Akatandika mu Beteleme	Mika 5:2	Mateo 2:1, 5, 6
Abakamuitamina muishina dia bu Emanueleb	Yeeshaya 7:14	Mateo 1:21-23
Humble beginning	Yeeshaya 53:2	Luka 2:7
Muanda mukinga akayipayibua kunyima kua kutandikua	Yeelemiya 31:15	Mateo 2:16-18
Aketaminyibua ku Ejipitu	Osea 11:1	Mateo 2:13-15
Aketaminyibua bu muina Nazaretec	Yeeshaya 11:1	Mateo 2:23
Abamubadidiila kui mukiendi	Malaki 3:1	Mateo 11:7-10
Akedibua muimu bu Mesiya mu kipua kia 29 B.B.d	Ndanyele 9:25	Mateo 3:13-17
Abamukumina kui Efile Mukulu bu Muana Aaye	Misambo 2:7	Bikitshino 13:33, 34
E na kisumi bua nshibo y’Efile Mukulu	Misambo 69:9	Yowano 2:13-17
Mulungudi a mukandu wibuwa	Yeeshaya 61:1	Luka 4:16-21
Mudimo wa pa mbalo i bantu bebungi mu Ngadileya nyi etata dikata	Yeeshaya 9:1, 2	Mateo 4:13-16
Akitshi bilengieleshi bikata nka bu Moyise	Miiya Ikituulwe 18:15	Bikitshino 2:22
Bakuile binangu bi’Efile Mukulu, nka bu Moyise	Miiya Ikituulwe 18:18, 19	Yowano 12:49
Bapashile mikumbo ya bebungi	Yeeshaya 53:4	Mateo 8:16, 17
Ta mmukakie binangu bia bantu kuadi	Yeeshaya 42:2	Mateo 12:17, 19
Basambile basha makienga	Yeeshaya 42:3	Mateo 12:9-20; Maako 6:34
Baleshele kululama ku’Efile Mukulu	Yeeshaya 42:1, 4	Mateo 12:17-20
Muntu mukile buwa atushaa malango	Yeeshaya 9:6, 7	Yowano 6:68
Balunguile eshina dia Yehowa	Misambo 22:22	Yowano 17:6
Bakuile mu nkindi	Misambo 78:2	Mateo 13:34, 35
Mukunkushi	Ndanyele 9:25	Mateo 23:10
Bebungi ta mbamukumine	Yeeshaya 53:1	Yowano 12:37, 38
Ebue adikokolua	Yeeshaya 8:14, 15	Mateo 21:42-44
Bantu babadi bamupele	Misambo 118:22, 23	Bikitshino 4:10, 11
Babaadi bamushikue pa bisumanga	Misambo 69:4	Yowano 15:24, 25
Atuele mu Yeluesame na ntumbo mushaale pa mpunda	Sekadya 9:9	Mateo 21:4-9
Abamutumbishe kui bana	Misambo 8:2	Mateo 21:15, 16
Bafikile muishina dia Yehowa	Misambo 118:26	Yowano 12:12, 13
Abamutombokiela kui muntu adi mukulupile	Misambo 41:9	Yowano 13:18
Abamupaana ku nfuala 30 ya kiamoe	Sekadya 11:12, 13	Mateo 26:14-16; 27:3-10
Ba kuuku baye babamusukile	Sekadya 13:7	Mateo 26:31, 56
Tumonyi tua madimi atutemuka pa muanda waye	Misambo 35:11	Mateo 26:59-61
Mumiine kumpala kua abamufundu	Yeeshaya 53:7	Mateo 27:12-14
Abamuasa mata	Yeeshaya 50:6	Mateo 26:67; 27:27, 30
Abamukupila ku mutue	Mika 5:1	Maako 15:19
Abamukupila nfimbo	Yeeshaya 50:6	Yowano 19:1
Ta muikakene na babadi abamukupila	Yeeshaya 50:6	Yowano 18:22, 23
Bakata ba mbulamatadi abamudiila lukuku	Misambo 2:2	Luka 23:10-12
Abamukokola miololo mu masa na ku mikolo ku mutshi	Misambo 22:16	Mateo 27:35; Yowano 20:25
Bantu abata bubale (abasha) bua kuiabishena bilamba biaye	Misambo 22:18	Yowano 19:23, 24
Abamutshibila kimu pamune na bena miluisho	Yeeshaya 53:12	Mateo 27:38
Abamusumbushena, abamukaa	Misambo 22:7, 8	Mateo 27:39-43
Bakiengele bua basha miluisho	Yeeshaya 53:5, 6	1 Mpyeele 2:23-25
Bamuekiele bu abadi basumbushene kui Efile Mukulu	Misambo 22:1	Maako 15:34
Abamupeele nfinyo na bintu bisase buadya kutoma	Misambo 69:21	Mateo 27:34
E na nyota kumpala kua kufua	Misambo 22:15	Yowano 19:28, 29
Bapetele kikudi ki’Efile Mukulu	Misambo 31:5	Luka 23:46
Batushile muwa waye	Yeeshaya 53:12	Maako 15:37
Batushile nkuulo bua kukatusha muluisho	Yeeshaya 53:12	Mateo 20:28
Mifufua ta ngitshokolue	Misambo 34:20	Yowano 19:31-33, 36
Abamutubuile	Sekadya 12:10	Yowano 19:33-35, 37
Abamushiikile na ba mpeta	Yeeshaya 53:9	Mateo 27:57-60
Badi musangudibue	Misambo 16:10	Bikitshino 2:29-31
Nsesa abamupianyine	Misambo 109:8	Bikitshino 1:15-20
Bashalele ku mboko ibalume y’Efile Mukulu	Misambo 110:1	Bikitshino 2:34-36

a Mukanda wa Cyclopedia wa McClintock na Strong awamba’shi: “Takui bia kuelesa mpaka’shi mulongo wa bisamba bia bena Yunda ubaadi ushimine pa kabutu ka Yelusaleme kushi kumpala kua kumubutula.”

b Eshina Emanuele dia mu kina Ebelu adipatula’shi “Efile Mukulu enetu,” adilesha mudimo wa Yesu wa bu Mesiya. Kuikala kuaye kua pa nsenga na midimo yaye ibadi ileshe’shi Efile Mukulu e na balanguidi baye.—Luka 2:27-32; 7:12-16.

c Muakue “Nazarete” abimueneka’shi autukila ku kishima kia mu ki na Ebelu neʹtser, akipatuula “mutombo.”

d Bua kuuka ingi mianda pabitale kuilondena kua mianda ya mu Bible ayilesha kipua kia 29 B.B. bu kipua kia kufika kua Mesiya, tala muisambo awamba’shi “Mushindo wi butemuki bua Ndanele abulesha kufika kua Mesiya.”

e Buno butemuki bui mu mukanda wa Sekadya, kadi Mateo mufundi a Bible amba’shi “kibaadi kyambe Yeelemiya mutemuki.” (Mateo 27:9) Abimueneka’shi mukanda wa Yeelemiya abadi betule kumpala mu mulongo wa Bifundue biabetamina bu “batemuki.” (Luka 24:44) Mateo abimuenaka’shi badi mutemune “Yeelemiya” bua kuisambila yaaya mikanda yaoso mpana wa Sekadya.