MA VERSE A MU BIBLE ABADI BAPATUULE
Kibangilo 1:1—“Ku kibangilo, Efile Mukulu bapngile eyilu na nsenga”
“Ku mbangilo, Efile Mukulu baapangil’eyilu na nsenga.”—Kibangilo 1:1, Biible Bifundwe Biiselele.
“Ku kibangilo Efile Mukulu bapangile eyilu na nsenga.”—Kibangilo 1:1, Ebuku dy’Efile Mukulu.
Kipatulwilo kya Kibangilo 1:1
Uno verse a mbangilo a mu Bible akula myanda ibidi ya binyibinyi. Wa kumpala, “eyilu na nsenga,” sunga bintu abimweka mwiyilu na pa nsenga. Wa kabidi, babaadi bebipangye kwi Efile Mukulu.—Kibafumbwilwe 4:11.
Bible ta mutshibe bungi bwa mafuku abadi Efile Mukulu mupangye eyilu na nsenga nya, sunga kupatuula bibadi mwibipangye. Kadi apatuula’shi bapangile eyilu na nsenga kubukwashi bwa “makome aaye akata.”—Yeeshaya 40:26.
Mwaku “bapangile” wabadi baluule ku bukwashi bwa kishima kya mu kina Ebelu aulesha mudimo ubabaadi bakite kwi Efile Mukulu.a Mu Bible penda Yehowab Efile Mukulu nyi abadi betamine bu Mupangi.—Yeeshaya 42:5; 45:18.
Myanda yabadi besambile mu Kibangilo 1:1
Uno verse a mbangilo a mukanda wa Kibangilo akula myanda itale kupanga kwa bintu i mu shapitre 1 na 2 a mukanda wa Kibangilo. Kubanga ku Kibangilo 1:1 na ku 2:4, Bible akula mu kikoso myanda ibaabadi bakite kwi Efile Mukulu bwa kupanga nsenga na bintu bi na muwa panka, mpa na mulume na mukashi ba kumpala. Kunyima kwa kulesha ino myanda, Bible alesha kantu pa kantu myanda itale kupangibwa kwa mulume na mukashi.—Kibangilo 2:7-25.
Mukanda wa Kibangilo aulesha mudimo w’Efile Mukulu wa kupanga bintu bu kipungo kikile “mafuku” asamombo. Ano taabadi mafuku e na nsaa 24 nya, anka nyi mbipungo bi na bula bwabashi baleshe’shi bubadi naminyi. Byabya, mwaku “efuku” ngutale kipungo kya nsaa ikile 24. Bino mbebileshe mu Kibangilo 2:4, mwabadi batemune “efuku” mu mushindo umune na “nsaa” na kubunga mudimo oso w’Efile Mukulu wa kupanga bintu mu mafuku asamombo a kumpala na kwiekasha bu “efuku” dimune.
Mweneno e bubi pabitale Kibangilo 1:1
Mweneno ebubi: Efile Mukulu bapangile eyilu na nsenga munda mwa bipwa binunu bishaale.
Bya binyibinyi: Bible ta mutemune efuku dibabangile kupanga eyilu na nsenga nya. Mayi e mu Kibangilo 1:1 ta ngekutwene na abyamba bantu’shi eyilu na nsenga bi na bipwa midiyala nya.c
Mweneno ebubi: Mukanda wa Kibangilo 1:1 aulesha’shi Efile Mukulu e mu basatu mwanda mwaku wa “Efile Mukulu” wa mu kina Ebelu mbeufunde pano ku bungi.
Bya binyibinyi: Mwasu “Efile Mukulu” nyi mwaku ’Elo·himʹ wa mu kina Ebelu wabadi baluule wi ku bungi bwa kulesha bukata sunga buwa, ta mbungi bwa bantu nya. Mukanda wa New Catholic Encyclopedia aushinkamisha’shi mwaku’Elo·himʹ wi ku bungi mu Kibangilo 1:1 “awikala na kishima ki ku bupenka, bwa kulesha’shi kishima bu we akyakwila mfumu, wi ku bungi bwa kulesha bukata, anka ntabungi bwa bantu nya.”—Mukanda wa kabidi, Volime 6, esaki 272.
Badika Kibangilo shapitre 1 pamune na mayi e kushi kw’esaki abadi bapatuule na ingi mikanda ayakwila wanka.
a Pabitale uno mwaku, mu HCSB Bible a kulonga abamba’shi: “Mwaku wa mu kina Ebelu bara’, aupatuula ‘kupanga,’ kushi bu kintu kyabadya kukita kwi mwana a muntu. Byabya bara’ aupatuula mudimo wabadi bakumbene kukita penda kwi Efile Mukulu.”—Esaki 7.
b Yehowa nyi eshina dy’Efile Mukulu.—Misambo 83:18.
c Pabitale kipungo kyabadi baleshe mu myaku ya mu kina Ebelu yabadi baluule’shi “ku kibangilo,” mukanda wa The Expositor’s Bible Commentary awamba’shi: “Uno mwaku ta nguleshe bula sunga kipungo kampanda nya.”—Mukanda wabadi bakituule, Volime I, esaki 51.