Maako 11:24​—“Bintu bioso bianutekie, ikalayi na lukumiino’shi nubaapu kuibipeta”

“Nyi buakinyi nenulungula’shi, bintu bioso bianutekie, ikalayi na lukumiino’shi nubaapu kuibipeta, na anukebipete.”​—Maako 11:24, Traduction du monde nouveau.

“Ngi bwakinyi nenulungula’shi: Kintu kioso kianutekye mu luteko, nukumiine’shi, anwikitambula, na akikenukitshiinwa.”​—Maako 11:24, Kilombeno kipya 2014.

Akipatuula Maako 11:24

Mu ano mayi, Yesu alesha balongi baaye muulo wa kuikala na lukumiino mu bukome bua luteko. Ebashinkamiisha’shi Efile Mukulu apushaa nteko yaabo, na’shi eyaluulaa. Muntu ele nteko n’eshimba diaye dioso mu kuipushena na kikiebe ki’eshimba di’Efile Mukulu mmulombene kushinkamisha’shi ayikalombana kushi mpaka; bi nka bu’shi Efile Mukulu mmupue kualuula ku luteko luaye.

Yesu ashimika kasele pa muulo wa kuteka na lukumiino. Biabia, apatuula’shi yawa ele luteko t’abitungu’shi ekale na mpaka, kadi abitungu’shi akumiine’shi biakula abikalombana.” (Maako 11:23) Buakinyi abitungu kuteka na lukumiino? Muanda baaba be na mpaka ta mbalombene ‘kupeta kantu su nkamune kui Yehowa.”a​—Shake 1:5-8, NWT.

Muntu e na lukumiino elaa nteko nsaa yoso. (Luka 11:9, 10; Bena Loma 12:12) Mu uno mushindo, alesha’shi e na lukalo lukata lua kintu kiakuete kuteka na, mmushinkamishe’shi Efile Mukulu aluula ku nteko yaaye. Eyendo’shi, ashinkamisha’shi Efile Mukulu t’aluula ku nteko yaaye nka mu mushindo w’apuandikisha, sunga pa nsaa y’apuandikisha nya.​—Bena Efeso 3:20; Bena Ebelu 11:6.

Anka, mayi a Yesu taakiebe kulesha’shi boso abatekie mbalombene kukulupila kupeta ki’abatekie kui Efile Mukulu nya. Yesu pano baadi esamba na balongi baaye, bantu ba sha lukumiino babaadi abetatshisha bua kulanguila Yehowa mu mushindo aumusankisha. Bible amba’shi Efile Mukulu ateemeshaa nka penda nteko i mu kuipushena na kikiebe ki’eshimba diaye. (1 Yowano 5:14) T’ateemeshaa nteko ya bantu bash’abalondo miiya yaaye pa bukopo na abakitshi miluisho kushii kuilanga. (Yeeshaya 1:15; Mika 3:4; Yowano 9:31) Bua kulonga bibungi pabitale nteko y’abateemeshaa kui Efile Mukulu, tala uno video muipi.

Kiabakuila mu Maako 11:24

Mu mafu a ku nfudiilo kua mudimo waaye pano pa nsenga, Yesu baadi muisambe na balongi baaye pabitale muulo wa kuikala na lukumiino lui bukopo mui Efile Mukulu. Bua kutuusha dino elango kalolo, baadi mutuushe kileshesho. Pabaadi ende mu Yeelusalema, bamuene mutshi wa nfigiye ubaadi na masaki abaabanga kutuuka. Anka bu bibaadi wawa mushi ta ngupe bikuba, Yesu baadi muiwele mulua. (Maako 11:12-14) Bibaadi abimueka mutshi mu mushindo wa madimi, bibaadi abilesha muilo wa Isaleele a kala, ubaadi aumueka bu aulanguila Efile Mukulu, aku namu taubaadi na lukumiino. (Mateo 21:43) Kunyima kua mafuku apeela, mutshi wa nfigiye ubaadi uume, bibaadi abilesha kibadia kufikila muilo wa Isaleele ushi na lukumiino.​—Maako 11:19-21.

Anka, Yesu baadi mushinkamishe’shi balongi baaye abakapete lukumiino lulombene kuibakuasha bua kukambila nkalakashi na kukita bintu bia kukaanya. (Maako 11:22, 23) Malango abaadi Yesu mutuushe pabitale luteko abaadi afikie pa nsaa ilombane muanda lukumiino lua balongi baaye lubaadi peepi na kutompibua. Yesu baadi na kia kufua na abaadi na kia kufumankana na mushikua mu bulungudi buabo. (Luka 24:17-20; Bikitshino 5:17, 18, 40) Mpa na lelo, balongi ba Yesu be na kia kunyingiila mianda ibukopo pa kuikala na lukumiino mui Efile Mukulu na mu bukome bua luteko.​—Shake 2:26.

Tala uno video muipi bua kumona mu kikoso mianda i mu mukanda wa Maako.