Kipatuluilo kia Misambo 37:4​—“Kimba mulô ôbe mui MUANANA”

“Peta muloo ukata mui Yehowa, na aye akalombasha nkalo ya muishimba diobe.”​—Misambo 37:4, Ngaluluilo a nsenga ipia.

“Kimba mulô ôbe mui MUANANA, ê namu akakupa byabya byodi nabyo lukalo mwishimba dyobe.”—Misambo 37:4, Ebuku dy’Efile Mukulu.

Akipatuula Misambo 37:4

Mufundi a misambo anyingisha balanguidi b’Efile Mukulu buabadia kusankila kipuano kiabo kibuwa kiabadi nakio Naaye. Boso be mu kipuano ki bino na Yehowaa Efile Mukulu mbalombene kushinkamisha’shi, akalombasha nkalo yaabo i na muulo.

“Peta muloo ukata mui Yehowa.” Ano mayi mbalombene kuialuula dingi’shi: “peta muloo ukile bungi mui Yehowa,” “ikala na muloo mu kufubila MUANANA,” sunga’shi “peta muloo mu biabia biabadi bakulee kui MUANANA.” Mu ungi ngakuilo, abitungu “tupete muloo ukata” mu kulanguila Efile Mukulu a binyibinyi. (Misambo 37:4, mayi e kuushi ku’esaki) Buakinyi atuamba biabia?

Boso abalanguila Yehowa, abekalaa na mmueneno a mianda e mumune na aaye, bu biabadi bebileshe mu Bible. Ta mbemene penda pa kuuka Efile Mukulu nya, dingi be na binangu bia kumukookiela. P’abakitshi biabia, abalama kondo k’eshimba kebuwa na abekaluila ku nkalakashi ibungi mu nshalelo aabo. (Nkindji 3:5, 6) Bu kileshesho, nsaa y’abamono bantu baasha luabi sunga bakutue kululama abende kumpala nya, abo t’abaluishaa butaale bua mu mashimba aabo nya. (Misambo 37:1, 7-9) Bafubi b’Efile Mukulu be na muloo wa kuuka’shi kubashaala mafuku apeela bua’shi ayimikie kukutua kua kululama, na ape ba sha kululama buedi pa muanda wa muikelo wabo wibuwa. (Misambo 37:34) Na dingi penda kuuka kua’shi Nshabo e muiyilu mmuibakumiine akuibapa muloo ukata.​—Misambo 5:12; Nkindji 27:11.

“Akalombasha nkalo ya muishimba diobe.” Bino bishima mbalombene dingi kuibialuula’shi: “Akaluula ku nteko yobe” sunga’shi “akakupa kiakia kiodi nakio lukalo ngofu.” Eyendo’shi, Yehowa t’aketupa nka kioso ki’atumutekie nya. Anka abikalaa muledi oso ebuwa, Yehowa auku kiakia ki na muulo ukata kui bana Baaye. Na dingi, nteko yetu na nshalelo etu, abitungu ekale mu kuipushena na miiya yaaye na kikiebe ki’eshimba diaye. (Nkindji 28:9; Yakobo 4:3; 1 Yowano 5:14) Su bi biabia, tui balombene kuisamba na ‘Yawa apushaa nteko’ bashinkamishe’shi etuteemesha.​—Misambo 65:2; Mateo 21:22.

Kiabakuila mu Misambo 37:4

Musambo wa 37 abaadi beukite kui Nfumu Davide, nfumu a mu Isalele a kala. Bafundile uno musambo mu kuilondena kua maleta a mu alfabe.b

Davide abaadi bamukitshine mianda ibungi ya kukutua kululama. Nfumu Saule na bangi bantu abaadi abende na kumukimba buabadia kumuipaa. (2 Samwele 22:1) Anka, nsaa yoso Davide baadi nka mutuule lukulupilo luaye mui Efile Mukulu. Davide baadi auku’shi Yehowa akatekie bantu babi buabadia kuimuka kumpala kuaye. (Misambo 37:10, 11) Sunga bamueka bu bakuete kuenda kumpala bu “lubishi” bantu babi abakafudiila.​—Misambo 37:2, 20, 35, 36.

Musambo wa 37 aulesha abikekala nshalelo a bantu balamate ku miiya y’Efile Mukulu na akikafuila baaba bash’abeyikookiela. (Misambo 37:16, 17, 21, 22, 27, 28) Uno musambo awitukuasha buatudia kupeta binangu na kuikala bantu babadi bakumiine kui Efile Mukulu.

Tala uno video muipi bua kumona mu kikoso mianda i mu mukanda wa Misambo.