Mukashi umune mwina Yunda apatuula bwakinyi baadi mutaluule lukumiino lwaye

Banda kwitulungula bibaadi nshalelo obe a kala.

Naadi mutandjikye mu 1979 mu Etats-Unis. Panaadi na bipwa bisatu, baledi baadi babaadi batshibe dibaka. Nyina’mi baadi munkushe muyile bipikwa bya beena Yunda na kuntuma mu yeshivas, tulasa twa beena Yunda. Panaadi na bipwa musambo, tubaadi bende mu kushaala mu Israel munda mwa kipwa kishima, na naadi nende mu kalasa na kutumika mu kisamba kya kibbutz. Akupu ami na nyina’mi tubaadi bende mu kushala mu Mexique.

Sunga byekala shi takubaadi kitumbwilo kya beena Yunda mbalo ibatudi, naadi mulame bipikwa byetu bya beena Yunda. Naadi natembesha bougies bwa Sabata, nabadika Torah, na kusambila ku bukwashi bwa mukanda wa nteko wabetanyina bu siddur. Ku kalasa, naadi nsaa ibungi nalungula beena kalasa na’mi shi kipwilo kyande nyi ky’eyendo. Kasha ntshinaadi mubande kubadika mukanda wabetanyina bu Kilombeeno Kipya, awisamba pabitale mudimo na malongyesha a Yesu Kidishitu. Nyi kwamba shi nyina’mi baadi mundimushe bwashi ntshiubadikanga, mwanda baadi atshinyi shi malongyesha ao ngalombeene kundwisha.

Bwakinyi boodi mwate kitshibilo kya kubadika Kilombeno Kipya?

Panalombeshe bipwa 17, nalukiile mu Etats-Unis bwa kupudisha kalasa kande. Kwakwa, ungi mwina’mi baadi eyamba shi mmwina Kidishitu bandungwile shi muwa wande tawikala ulombane su ntshi na Yesu.

Nalulwile shi: “Bantu bakumiine mwi Yesu mbashimine.”

Bayipwishe shi: “Kasha tobobadikile Kilombeno Kipya?”

Nalulwile shi: “Nya.”

Bambile shi “Byabya, tomono shi we mukutwe kuuka, wesambila kintu kyoshy’ouku?”

Mayi aaye abaadi ankume ngofu, mwanda namonaa shi kwisambila mwanda oshy’ouku nkukutwa binangu. Bibaabidi binkume, natwadile Bible aaye ku nshibo na kubanga kubadika Kilombeno Kipya.

Mushindo kinyi ubaadi ukukwashe myanda ibodi mubadikye?

Naadi mukanye, ami nkumona shi bantu babaadi bafunde Kilombeno Kipya babaadi bena Yunda. Na dingi, panaadi natungunuka na kubadika, naadi mumone shi Yesu baadi mwina Yunda sha kalolo, mwiyishe na baadi akumiina kukwasha bantu, kushi kwibamonela. Naadi mpa na mwende mu bibliotheque na kwiyapula mikanda ayisambila Yesu. Kadi, takwi su mmukanda umune ubaadi unkuminyishe shi baadi Mesiya nya. Ingi ibaadi mpa na ayamba shi nyi Efile Mukulu​—mweneno shi mulombane kwandji’mi. Na dingi, Yesu baadi ele nteko kwi nnanyi​—kwadi’ye nabeene? Kukasha byabya byooso, Yesu bafwile. Aku namu, Bible amba shi Efile Mukulu: “Obe twe kufwa.”a

Mushindo kinyi uboodi mupete ngaluulo ku ino nkonko?

Bya binyibinyi ta mbilombeene kwikutwena nya, na naadi na kitshibilo kya kupeta bya binyibinyi. Byabya naadi mwele nteko n’eshimba dimune kwi Efile Mukulu mpa na mpolo​—bwa musango wa kumpala kushi na mukanda waande wa siddur. Kapindji kapela kunyima kwami kwela luteko, abakokwele ku kiibi. Nyi ba Temwe babadi babaadi pa kiibi. Baabadi bampe umune wa ku mikanda yabalongaa nayo Bible. Uno mukanda, na miisambo ibatudi abesamba nan a ba Temwe, ibaadi inkuminyishe shi myanda yabalongyesha ngya binyibinyi na ayifiki mu Bible. Bu kileshesho, ba Temwe abakumiina mwi Yesu, kushi bu umune a mu Busatu bwiselele, kadi bu shi nyi “mMwan’Efile Mukulu”b na bu “nsulo [mbangilo] a kupanga kw’Efile Mukulu.”c

Mafuku apeela kunyima, nalukiile mu Mexique, kunaadi mutungunukye na kulonga matemuki atale Mesiya na ba Temwe. Na nakanya pabitale bungi bwa matemuki abaadi mwanka! Sunga mbyabya naadi nka mushale na ingi mpaka. Naadi neyipusha shi: ‘Nkapenda mwi Yesu bupenka bwaye nyi mukumbane ano matemuki?’ na dingi shi ‘Kadi su e bu penda munta asha pa mbalo ya muntu kampanda mu film?’

Kadi nkinyi kibaadi kikushintuule binangu?

Ba Temwe babaadi bandeshe matemuki ashi alombeene sunga nnaminyi kukumbana kwi muntu a madimi nya. Bu kileshesho, bipwa kukila 700 kumpala, mutemuki Mika bambile shi Mesiya akatandjika mu Beteleme, mu Yudeya.d Nnanyi mulombeene kusangula mbalo yaadi mulombeene kutandjika? Yeeshaya bafundjile shi Mesiya abakamwipa bu ntomboshi, kadi akyebe kushikibwa bu mpeta.e Ano ooso matemuki abaadi akumbane mwi Yesu.

Kishinkamiisho kikile bukata kibaadi kitale bankambwa ba Yesu. Bible bambile shi Mesiya ekala kekulu ka Nfumu Davide.f Bu byabidi shi beena Yunda kala abaadi abafundu mu mikanda milongo ya butandwa, su Yesu badya kwikala shi tabaadi kekulu ka mu kifuko kya Davide, beshikwanyi naaye babadya kwikala abamwele byanka pa na misase bwa kumulungula byanka! Kadi baadi na mushindo wa kwibikita, mwanda mulongo wa butandwa wa Yesu ubaadi w’eyendo. Mpa na bibumbu bya bantu bibadi abimwitanyina bu “Mwana a Davide.”g

Mu 70 B.B.​—bipwa 37 kunyima kwa Yesu kufwa​—basalayi ba beena Loma baadi balwishe babutule Yelusalema, na mikanda ayilesha milongo ya bifuko ibaadi ishimine sunga kushikibwa. Byabya, bwashi mulongo wa Mesiya uukibwa kalolo, baadi na kya kutandjika kumpala kwa kipwa kya 70 B.B.

Mushindo kinyi ubaadi kushinguula kwa bino kukukwashe?

Mu Miiya Ikituulwe 18:18, 19, abaadi batemukye shi Efile Mukulu akyebe kwibweshe mu Isaleele mutemuki umune e bu Moyise. Efile Mukulu bambile shi “su muntu tammutemeshe bishima byande, bino abikala mutemuki mwambe mwishina dyande, paapa ami nabeene naamwipusha kyaadi mukite nabyo.” Kulonga kwanda kwa Bible mushima na katshintshi kubaadi kunkuminyishe shi Yesu a mu Nasalete baadi uno mutemuki.